|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Lyoonse mebo cikombelo cakali kundiyiisya kuti Banakristu baunka kujulu nobafwa akuti aabo batali Banakristu baunka ku mulilo uutamani. Ime ndakanyina kaambo kakukazya makani aaya kusikila cibalo cimwi cakazwa ku busena mbweekali kutobela mu milumbe ya muluwo nicaasika mu bbokesi mwetambwida magwalo. Ime ndalanzyalanzya biyo myeengwe mitaanzi yongaye. Munwe wangu wakalelema kudyomba aakumwaya mbuli mbuucita kanjaanji, kapati kujatikizya makani aa masendekezya. Ime ndakalaamvwide cimwi ciindi makani mbuli bwayaaya. Taakali kuguminizya ceeco caambwa mu Bbaibbele kujatikizya kupenzyegwa kutamani aboobo bakali kuyanda kusendekezya kuti kubaanga Yahuwah uleenkela casika ku kusubula cinyonyoono. Nokuba boobo, limwi bbala lyakali mulugwalo lwa muluwo lyakandijatila maanu lyakali lyakuti: “basikubambulula.” Bamwi basikubambulula tiibakali kusyoma ciyanza ca muzeezo wa kubaa buumi kalwiindide lufu, mbwaanga Ime ndakalaa bulemu kuli basikubambulula, aboobo munwe wangu tiiwakatyanka kumwaya lugwalo. Ime ndakabala kuya kumbele mu cibalo akumvwisya mizeezo yiindene yobile pele kayeendelana. Kutaanguna, tulafwa cakumaninina kusikila notuyoobuka kuzwa ku bafu. Cabili, mulilo uutamani tiikwakali kupegwa cisubulo kukabe kutamani. Ime ndakalaangulukide ku muzeezo mutaanzi pele kutali kuli wabili. Nokuba boobo, kufumbwa kwaambwa basikubambulula Ime eeco cilandikopa maanu.
Ndakali kweenkela aasyoonto neekatalika kuvwuntauzya ciiyo eeci. Cakali kumvwika kulubila kupa mubuzyo iijatikizya mbociyiisya cikombelo; masimpe cakali kumvwika buzangi kapati. Ndaibaluka umwi mwiyi uulaa mpuwo uuyiisya buleza waku Anglicani John Stott naakaambilizya munsaa kumamanino aabuumi bwakwe kuti tacisyomi kabili kuti kuli kupenzyegwa kuteeli. Eeci cakavwundumuna banjaanji mucikombelo aciindi eeco. Ime ndakabandika makani aaya amulongwaangu umwi mbucaayindila ciindi eeco. Toonse tobile twakanyandwa mwiyi uulelekedwe boobu mbwanga walilekelezya kuti acengwe naakamanizya mulimo weebeka boobu. inzya, swebo twakali kuti ndiswe tuzyi kabotu kwiinda nguwe antela mbutwakali kuliyeeyela oobo. Pele kasimpe nkakuti Ime nsyeninga langide makani aayo kweendelanya aa Bbaibbele alimwi ndakayeeme biyo muli zyakwaambilwa aa bakambausi.
Eelyo Ime neekali kubala mutwe wa ciiyo ooyu mu Bbaibbele, cakandisalaIila kuti tweelede kuzyokela ku bulongo bwaansi eelyo notufwa. Ooyu mulumbe uutonkomene mu Cizuminano Cakale, alimwi mizeezo yaci Hebulayo tiiyakali kuyeeyela cimbi kunze lya ceeco pe. Eeci cifwanikiso ca lufu cilazumanana mu Cizuminano Cipya. Lufu lulapandululwa ziindi zinjaanji kuti nkoona muli Kristu kusikila kuyoobuka kuzwa kulufu, eelyo basyomi nobayoopegwa mubili uutafwi, ooyo ngotutapedwe mububambe bwesu cino ciindi. Impuwo yaci Giliki yakazwidilila kulimbaika atala busanduluzi bwa buumi butamani akuyungizya mizeezo ya kupenzyegwa kutamani mu zibalo zisyoonto mu Cizuminano Cipya. Ime ndikanza kulomya kubambulula mizeezo eeyo imwi mu cibalo eeci.
Mutwe wa ciiyo wa cintu cicitika aciindi ca kufwa ncintu ceenzu mu cikombelo. Madilwe aabunganinwa atondezya cintu eeci kapati eelyo, mukusoleka kuumbulizya babunyina, bafundisi kanjaanji baamba kuti sikwaazwa eellyo “naazaya antela naazimina” waya “kubusena bwiinda kubota.” Nokuba kuti eeci inga capa kulimvwa kabotu munzila imwi, pele ooku nkusweeka nkaambo iBbaibbele kunyina pe mpolyaamba lufu munzila eeyi.
Cizuminano Cakale cilisalazyide kuti eelyo notufwa, tulazyokela ku bulongo bwaansi. (Matalikilo. 3:19). Tulamaninina kufwa. Kunyina ciinda waawo kuubauba kumvwa. Ibbala lyaci Hebulayo lya muzumi (napes) liiminina muntu uukkwene, kutali cintu cimwi cizandulwa aciindi ca kufwa. Nokuba boobo, nkaambo ka mpuwo ya Plato a basongo baci Giliki bamwi, twakayiisyigwa kuti miya tiikonzyi kufwa akuti munzila imwi inikuyaa kwiimpauka kusikila kukabe kutamani, kufumbwa naa nkuujulu naa nkuu mulilo.
Oolu lusyomo lutaluleme ndi bbiza lya Trojani eelyo lyakanjila mucikombelo akuleta Bunakristu kuti bweendelane a bupaizi bumbi boonse. Lwakazumanana kuzyala micelo iibolede kuzwa ciindi eeco. Kakwiina lusyomo lwakubeja oolu, Cikombelo ca Katolika nicataakonzya kusweesya makunga aa buleya munzila ya kukomba mituni kupailila Maliya, mipailo yaco ku basaante, kusubulwa mu lufu nanka ku mulilo. Abalo ba Musela Mupya banibataakonzya kucengelela bantu banjaanji mukubasyomya kuzyalululwa akujana “leza uutafwi mukati muli mbabo.” Bupaizi bwa Buddhizimu, bwaba Hindu, abwaba Mozilemu bulaa zisyomyo mbweenya buyo. Mbombubo ncobeni, ooku kubeja kutaminina kuti miya ilazumanana kupona lwasika lufu ngo moyo wa bupaizi buli boonse bwa lweeno. Mukubula coolwe, cikombelo ca Bunakristu cijatilide kutaminina nkweenya kuzyila kumusela wane kuzwa naakazyedwe mufutuli kuya kumbele nkaambo ka kusanganizya milazyo iitajanwi mu Bbaibbele akusinikizyigwa aa mfulumende. Eeci ciiyo ceelede kwaandaanya Bunakristu kuzwa kubupaizi bumwi, pele teesyi mbocibede oobo.
Lufu nga mamanino. Ikuti Yahuwah naatakabusya Yahushua kuzwa mu cuumbwe, walo naacilifwide kusikila sunu, kufwida lyo, kakwiina ciceede. Mbweenya biyo aswebo, eelyo notufwa, tulaleka kupona tatukonzyi kufwiinsya lufu munzila imwi kwiinda mukuya kujulu. Alikke Yahuwah nguukonzya kutujokolosya ku buumi. Aboobo kufumbwa biyo kufwa, swebo tuyeeme biyo kukubusyigwa kuzwa ku lufu. IBbaibbele lipandulula lufu kuti, “nkoona muli Kristu ” mu tumpango mbuli ka 1 Bakolinto 15:18: “Nkokuti aabo batakoona muli Kristu bakaloba.” Ncenciceeci ku Munakristu, koona ncocili cintu cakupanduluzya lufu nkaambo nokuba kuti ulifwide mubbala lili lyoonse ncolyaamba, swebo tulakonzya kukkazyika camba kuti tuyoojosyegwa ku buumi aciindi ca kubuka kuzwa ku lufu, mbweenya mbuli mbotuli masimpe kubuka kuzwa ku koona ŋonzi. Mabala akabelesyegwa kwaamba muzeezo ooyu nga “koona kwa lufu,” “koona mumuya,” naa “kutafwa kuyeeme kunzila imwi.” Mubulengwa Leza bwesu, tulafwa. Tufwa biyo nkaambo kakuti Yahuwah nguupa mubili uutafwi mukuyanda Kwakwe.
Muciindi ca Kubambulula lusyomo, banalumi mbuli ba Luther abamwi kutaanguna bakayeeme ku muzeezo wa koona kwa lufu. Nokuba boobo, Calvin wakayumya kukazya alimwi kunze lyaboobo walo wakali kuyiisya lusyomo lwa kuba muciimo cilaakatikati, ooyo muzeezo wakatalika kuzuminwa alimwi uciliko muzikombelo zya mazubaano. Ooyu muzeezo ngwakuti nokuba kuti mubili wafwa, muya uya kujulu kuutasamide mubili. Ooyu muzeezo uusendekezya kwaamba kuti muntu ulifwide kubulongo bwaansi pele ucipona kujulu. Tacimvwiki kubaa maanu nokuba asyoonto eeco pe, pele atulangelange tumpango twa Bbaibbele tubelesyegwa kukwabilila muzeezo ooyu.
Miya iili kunsaa cipaililo, mbuli mbwaakabona Johane mu Ciyubunuzyo 6:9, ilaambwa kanjaanji mukukwabilila ciimo cakuba akatikati, ooko nkusendekezya kuti kuli busena kujulu ooko miya yabantu nkwiiponena kacitaninga sika ciindi ca kubuka kuzwa ku lufu. Pele eeci ncifwanikiso biyo ca Yahuwah naakali kwaamba kuti Walo takabalubi aabo bakajayilwa zina Lyakwe, eeco kaceendelana acifwanikiso caambidwe mu Matalikilo 4:10, oomo bulowa bwa Abela “bulilila” kululamikilwa. Alimwi, mu BaHebulayo 12:24, bulowa bwa Yahushua “bukanana” cibotu kwiinda bulowa bwa Abela. Ncobeni, kunyina muzifwanikiso zyobile eezi bulowa bwakali kulilauka nokuba kukanana, aboobo eeci caambidwe mu Ciyubunuzyo, tatweelede kukosozya kuti eeyi “miya i yaambwa waawa pe. Mbwaanga, miya mbwiitakwe mubili niyataakonzya kulibonya kuli Johane.
Kuyungizya waawo mu Ciyubunuzyo 6:11, Johane wakaambilwa kuti eeyi miya (mumukonzya ooyu, bantu) beelede kuzumanana koona kaindi kasyoonto. Swebo tulizyi kuti kufwa kanjaanji kwaambwa kuti nkoona, aboobo Johane aawa waambilwa kuti aaba bakajayigwa bacinoofwide kwa ciindi cino, nokuba kuti makanze eeni ookwa Yahuwah nga kujokezyela baabo bakabajaya. Johane ubwene cifwanikiso cikonzyanya baabo bakajayigwa mu Ciyubunuzyo 20:4, pele aciindi eeci, eelyo cuulu ca myaka kaciyanda kutalika, Johane ubona miya (bantu) baba bazumi alimwi. Eeci ncintu cipati. Muya tuukonzyi kuba muzumi kuti kuupona kale.
Akamwi kampango kalaa mpuwo kabelesyegwa kuti mbumboni bwa ciimo caambwa mu 2 Bakolinto 5 cisyoonto 8 kalaambwa munzila yakupelengusya kuti “kuba anze lya mubili nkubaa Mwami,” pele ooku nkubala kutaluleme. Kunze lyaboobo, aaka kampango kaamba kuti Paulu “naakalombozya kuba anze lya mubili akubaa Mwami,” nkabela eeci cijuzya muzeezo wiimpene cinicini. Paulu ulombozya kuba anze lya mubili. Paulu ulalombozya akuti abe antoomwe a Mwami. Walo takaki kuti kuli ciindi cakufwa akati aawaawo. Bumboni busalala bwa mangwalo mbwakuti bafwide baloona alimwi kunyina ncobazyi kusikila bakabuke kuzwa ku lufu. Tumpango mbuli twa 1 Bakolinto 15:53 tupa bumboni bwa makani aaya. Swebo tubala kuti “ooyu mubili uubola, alimwi uufwa, weelede kusamikwa ciimo ca kutafwa,” akutwiibalusya kuti ndileelyo biyo notutambula mibili ya Moza notukona buumi akutafwa.
Mukampango aaka 2 Bakolinto 5, Paulu upandulula ziimo zyotatwe munzila ngubauba. Ciimo citaanzi nca civwuka caanyika (naa mubili waanyika), mbuli mucisyoonto 1. Iciimo cabili nca kusamununwa mubili (naa lufu), mbuli muzisyoonto 3 a 4a. Catatu nciimo cisamikidwe (naa ciimo ca kubuka kuzwa ku lufu), mbuli mu cisyoonto 4b. Paulu tasungilizyi kuti tuyootambula mubili wakujulu mpeenya biyo mbotwafwida pe. Mukwiimpanya, walo ugeme bube bwini bwa lufu, naa kusamununwa mubili, mbuli mukampango 4a kuti ncintu cimwi kunyina naba omwe ncayanda pele ncotutakonzyi kweeleba bunji bwesu. Kaambo keni kakwe nkakuti kwiinda mu kufwa munyika eeyi, walo uyoosamununwa (naa kunjila lufu) alimwi, aboobo, uyooba ntaamu yomwe kuswenena munsaa kubuka kuzwa ku lufu nkwaakasyomezya Yahuwah.
Tulizyi kuzwa mu Mukambausi 9:5,10 kuti bafwide kunyina ncobazyi. Aboobo, nokuba kuti tatulombozyi kufwa, cilatuumbulizya aasyoonto notuzyiba kuti kunyina ncotunoozyi kusikila ciindi ciboola notuyoolimvwa bulanga aciindi ca kubuka kuzwa ku lufu.
Lino atulange makanaa mubbi (na similandu) aciciingano muli Luuka 23:32-43 akweezyekanya ku milumbe iimwi. Mubbi ubuzya Yahushua kuti akamuyeeye eelyo aakuboola mu bulelo bwakwe. Kubala mbocilembedwe mbuli cilengwa caamba kuti Yahushua umusyomya kuti boonse bobile bayoonooli mu paladaisi mbweenya buzuba oobo.
Tweelede kutaanguna kwiima akulizeeza bweende a ciindi ca Bulelo bwa Yahushua. Yahushua taakateelede kuti paladaisi mbusena bwa bafwide pe pele kwaamba buyo kuti ninyika mpya, Bulelo bwakwe bwa kumbelaa mazuba, oobo buyoobambilwa anyika alimwi Yahushua kali Mwami. Mu milumbe yone, Yahushua waakambauka Bulelo bwa kumbelaa mazuba kabuli a Nyika. Walo wakazumanana kwaamba majwi aali mu Maako 1:15: “Bulelo bwa Yahuwah bwaswena; amweempwe akusyoma mu Mulumbe mubotu.” Mulumbe (makani mabotu) wa Yahushua ngwakuti Bulelo bupya bulazya. Mbube bulelo bupya tabuninga sika mazubaano, pele buyoosika bumwi buzuba. Cizuminano Cakale ciguminizya Bulelo bwa kumbelaa mazuba oobo atalaa nyika kuti mbusena oomo zintu zyoonse mozinooli zipya, mbuli bupanduludwe mumabbuku mbuli aaba Izaya, Ezekiya, Daniele, Intembauzyo, aamwi masena. Ciyubunuzyo 11:15 caamba leelyo bulelo oobo nobuyoopegwa kupa bulumbu ku Mwami Yahushua a basaante: “Bulelo bwa nyika bwaba Bulelo bwa Mwami wesu a Messiah Wakwe, alimwi uyoolela lyoonse alyoonse kukabe kutamani.” (Langa amuli Daniele. 7:27).
Muciindi cino, inyika icili mumaanza aa Saatani. Kaambo kapati aawa nkakuti Yahushua taakatambula Bulelo bwakwe bupya buzuba naakafwa. Kutaanguna, wakafwa cakumaninina kusikila naakabusyigwa ku buumi kakwiindide mazuba otatwe naakabuka kuzwa ku bafu. Cabili, lukono lwa Yahushua lwa Bulelo bwaanyika ncintu cicizya kumbelaa mazuba. Aboobo, bupanduluzi bwa kampango aaka tabumvwiki kubaa maanu. Yahushua wakalizyi kuti ucinooli muciimo ca lufu buzuba oobo, aboobo taakali kukonzya kusyomya mubbi kuti boonse bobile banooli mu paladaisi mbweenya buzuba oobo. Kuli cintu cisweekede aawa. Mulandu uli mukubikka kadosi aako katakaliko muci Giliki citaanzi. Aaka kampango inga kabwalwa bweelede kuti “Ime ndakwaambila ncobeni sunu [kaambyo kajisi mabala aakali kuvwuzya kubelesyegwa ciindi eeco] kuti, yebo tuyooba limwi andime mu paladaisi,” eeco, kumwi katuzyi kale mbotweelede kumaninina kufwa alimwi aciindi nobuyoosika Bulelo bwa Yahushua kumbelaa mazuba, kakwiina kudonaika oobo mbo bwiiminizi bwa kampango aaka kavwuzya kutamvwisyigwa ncokayiminina. Langa amu Milimo 20:26: “Ime ndakwaambila sunu...”
Matalikilo 5:24 inga asendekezya kuti Enoki wakatolwa kujulu kakwiina kufwa kakuli cilembedwe kuti, "Yahuwah wakamutola.”Aaka kampango aakale mu BaHebulayo 11:5, oomo mwaambwa Enoki kuti wakayimpulwa kutegwa atakanjili lufu. Cilakonzyeka kuti Enoch watolwa kubusena kulaale kutakwe ntenda, pele mulaka uubelesyedwe tuusalazyide kwaamba. Nokuba boobo, tulizyi kuti Enoki wakafwa lufu ndobafwa bantu nkaambo mu BaHebulayo 11:13 twiibalusyigwa kuti boonse bantu balembedwe, kusanganya a Enoki, “bakafwa mu lusyomo.” Enoki wakafwa mbuli bamwi boonse.
Banjaanji basyoma kuti Elija wakatolwa kujulu mu 2 Bami 2:11. Ibbala lyaci Hebulayo lya kujulu aawa ndyakuti (shamayim) lilakonzya kusandululwa akuti “mujulu,” akusendekezya kuti kunooli Elija wakatolwa biyo kubusena bumbi mujulu mbweenya mbuli Filipo mu Milimo 8:39. Kutobela kutolwa kwa Elija, Elisha waambila Mwami Jehoshaphati mu 2 Bami 3:13, aboobo tulizyi kuti Mwami Jehoshaphati wakali muzumi naakatoledwe mujulu Elija. Pele mu 2 Makani 21:12 kulembedwe kuti mwanaa Jehoshaphati musankwa Jehoramu wakatambula lugwalo kuzwa ku mushinshimi Elija. Eeco mbumboni bwakuti Elija wakazumanana kuba muzumi naakatoledwe mujulu. Walo taakatolwa kujulu mbuli mbokusyomwa kanjaanji. Eeci cilaambidwe amuli Johane 3:13: “Kunyina wakatanta kuya kujulu.”
Muŋanga waku Endulo
Kaano ka musondi waku Endulo muli 1 Samuele 28 kapandulula Saulu naakasola kubandika aabafwide kwiinda mumuntu uunjidwe (v. 7). Mbasyoonto Banakristu mazubaano basyoma kuti muntu uunjidwe inga wabaitila bafwide, aboobo tatweelede kukosozya kuti musondi wa Saulu wakali kukonzya kucita cintu ciinda waawo. Aawa cakacitika kwakali kulibonya ciseese cilipeekezya kuba muntu. Saulu wakakumbila daimona kwiinda mumuntu uunjidwe, ooyo walo wakazumina cintu eeci mukwaamba kuti wakabona muntu (muzimo) uulaa bulemu kazwa munyika mukampango 13. Bafwide balifwide alimwi kunyina nociceya ncobazyi. Saulu wakeenwa, mbweenya mbuli banjaanji mbobacicengwa abasondi sunu.
Muli Mateyo 17, tubala kusanduka kwa Yahushua, cilengaano ca Yahushua naakali muciimo cakubuka kuzwa kubafu, kalaa mubili wa muya akwaambaula aa Mozesi a Elija. Mucilengaano eeci (muci Giliki mbuli cisobano, Mateyo 17:9) ca ciindi ciboola kumbelaa mazuba nkaambo Yahushua taakatambula mubili wa muya kusikila naakabuka kuzwa ku bafu. Mozesi a Elija bacinoofwide kusikila bakatambule mibili yabo ya muya eelyo Yahushua aakuzyokela. Yahushua ngo mutaanzi kuzyalwa kuzwa kubafu (Bakolose 1:18). Kunyina wakabusyidwe kuzwa ku bafu akubaa buumi bwakutafwa kataninga busyigwa walo, alimwi kunyina uunabusyigwa kuzwa waawo. Makanze ookwa Yahuwah mucilengaano eeci akali aakukulwaizya akuyumyayumya Yahushua kwiinda mukuzwezya kukona nkwayoopegwa kumbelaa mazuba eelyo naakali kuyaa kuswena munsaa ciindi ca manyongwe mu mulimo wakwe anyika. Mozesi a Elija, bakali kwiiminina mulawo abashinshimi, bakapenzyegwa abalo zintu zimwi eezyo Yahushua awalo lwakwe nzyaakali munsaa kupenzyegwa. Yahushua wakaibalusyigwa zintu nzyaakabala kuguminizya banalumi bobile bazyandamene aaba mu Mangwalo. Kusandukila ku bulemu cakali cilengaano ca bulelo bwa Yahushua kumbelaa mazuba, cishinshimi ca ciimo Cakwe cisumpukide mbuli mbokusalazyidwe muli 2 Petulo 1:18- 19: “Twakamvwa ceeci kuzwa kujulu nitwakali aanguwe atalaa mulundu uusetekene. Nkabela tulijisi jwi lya cishinshimi liinda kulemenena.”
Cizuminano Cakale cilaa zibeela-beela zinjaanji zyaamba bafwide kuti bazyokela ku bulongo bwaanyika lwasika lufu. Mu 1 Bami 2:10, tubala kuti Davida wakaunka kuya koona abamawisi. Intembauzyo 13:3 yaamba kuti nkoona ŋonzi zya lufu, alimwi Joobo 14:12 waamba kuti muntu uufwide tabuki kuzwa kukoona kwa lufu kusikila ciindi nayoobuka kuzwa kubafu. Kuli tumpango tunjaanji mbuli bwa tooto. Muzeezo wakuya kujulu aciindi ca kufwa wakali weenzu kapati ku BaHebulayo, balo bakali kusyoma ncobeni kuti bakatozyede kukuzyokela mu bulongo bwaanyika mbweenya Yahuwah mbwaakaamba mu Matalikilo 3:19. Muli Daniele 12:2, tubala kuti bumwi buzuba bafwide bayoobuka kuzwa kubafu kuya ku buumi butamani: “Bunji bwa baabo boona mubulongo bwaansi bayoobuka, aaba ku buumi butamani, pele bamwi ku kusampaulwa akusesemya mane do kukabe kutamani.”
Ooyu mutwe wa makani wa bafwide aabo boona kusikila bakabuke. kuzwa ku bafu ulazumanana mu Cizuminano Cipya coonse eelyo notubala mu tumpango mbuli bwa 1 Batesalonika 4:16: “Nkaambo Mwami lwakwe uyooseluka kuzwa kujulu ajwi akoompolola kupati, ajwi lya Silutwe wa bangele, a mweembo wa Yahuwah; mpoonya aabo bafwide muli Kristu bayootaanguna kubuka.” Alimwi mu Ciyubunuzyo 20:4: “Ime ndakabona miya yabaabo [aabo bantu] bakakosolwa mitwe akaambo ka bumboni bwa Yahushua alimwi nkaambo ka jwi lya Yahuwah, abaabo batakakomba munyama nokuba cibumbwa cakwe, alimwi batakatambula caando cakwe ankumo zyabo nokuba mujanza lyabo; mpoonya bakabukila ku buumi akutalika kulela aa Kristu kwa cuulu ca myaka.”
Kweelede kuti bafwide bafwide ncobeni, antela tabafwide bwinibwini. Tabakonzyi kufwa kumwi kabacili bazumi kujulu. Masimpe ngakuti cilisalazyidwe akululamikwa ikuti twayaamuka ziyanza zya bantu akuzumizya Mangwalo kuti akanane lwawo eeni. Yahuwah uyanda ndiswe kuti tuzyibe cicitika eelyo notufwa. Taceelede kuvwuukilwa maseseke aamasendekezya Kulangila bwesu bulikke buli mu kubuka kuzwa ku bafu, ooko kuyoocitika eelyo Yahushua aakuzyokela. Kutamauka kuti munzila imwi tucili bazumi kujulu kakutaninga sika kubuka kuzwa ku bafu nkusebaanya biyo cintu cipati ncokwiiminina kubuka kuzwa kubafu mbuli bulangizi bwesu bupati bulikke. Ikuti twafwa aciindi ca kufwa, nkokuti kubuka kuzwa ku bafu mbobulangizi bwesu bulikke, eeco ncecipandulula kupiluluka kwaambilizyigwa akulangila cintu eeci mu Cizuminano Cipya coonse. Naba Yahushua, akuli nguwe kwakanyina nzila iikosozya kuya ku buumi mpeenya aawo mbwaakafwida pe. Bulikke bulangizi Yahushuaj bwa kubaa buumi kalwiindide lufu bwakali mu kubuka kuzwa ku bafu, mbocibede oobo akuli ndiswe.
Eeci ncibalo citali ca-WLC cakalembwa aaba Nigel Page-Jones, England.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC