|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
No. 1. Lwiiyo lwa Mazina lwakati.
Mazina aawulikwa zintu mabala aabelesyegwa mucibaka ca mazina aagaminina bantu nokuba zintu akulesya kwiinduluka kwaamba bbala ndeenya nokuba jwi. Izina ligamide muntu ndibbala liitwa mucibaka ca zina nokuba mutwe wa cuuno ca muntu ooyo, lijatikizya zyoonse eelyo zina nokuba mutwe wa cuuno ncuuguminizya kuti lyabelesyegwa ndilyo mubusena mbweenya.
Ngooyu mukonzyanyo: Abulahamu wakali mwaalumi mubotu, walo wakali mulongwe ookwa Yahuwah, alimwi Yahuwah wakali kumuyanda walo akubamba cizuminano anguwe. Mu kaambo aaka, ibbala lyakuti walo lilibelesyedwe ciindi comwe alimwi lyakuti anguwe lilibelesyedwe mucibaka ca zina lini lya Abulahamu. Aawa ncoliiminina bbala inga ceelana munzila iitobela: Abulahamu wakali mwaalumi mubotu, Abulahamu wakali mulongwe ookwa Yahuwah, alimwi Yahuwah wakali kumuyanda Abulahamu akubamba cizuminano a Abulahamu. Ibbala lyakuti Walo alyakuti anguwe, aboobo, aaya mabala aabelesyegwa mucibaka ca zina lya muntu. Ibbala lyakuti muntu lilabelesyegwa kufumbwa ku muntu uukkwene maanu — kuli Yahuwah, kuli Messiah, kufumbwa mungele, nokuba mwaalumi, kufumbwa naa nkwacili mumubili naa taciko mumubili.
No. 2. Lwiiyo lwa Mazina Mpolubelesyedwe.
Ono aaya makani aayinda atwaabelesye mu lusyomo lwa Baleza botatwe mukupandulula bumboni bwa Messiah mbwayeeme kuli Yahuwah. Cilizyibidwe kapati kuti aabo basyoma muli Baleza botatwe bakasala muzeezo ooyu wakuti Messiah ngu Yahuwah alimwi muntu omwe. Aawa kuli mizeezo yobile yaandeene iijatikizya mubili omwe, eeyo yeelede kuswaangana akulangwa kuti muntu omwe, Yahushua Messiah. Kuswaangana kuli boobu Ime nsyekwe kukaka nokuba kubandika. Ime taakwe ncezyi kumakani aayo. Pele kuzumina kuti muzeezo ooyo uliluleme, cilisalazyidwe kuti ooyu mwaalumi tali Leza mubuntu bwanyama pe. Buleza bweelede kuba muzintu zyoonse amuli zyoonse, mbuli mbokweelede, mubweende bwa mulimo, amu bulemu bwa Messiah. Mumakani aaya, mbuli bwaambwa kale atalaawa, zimwi zintu inga zyalomya ncobeni kujanwa mucibeela camuntu omwe biyo, pele teesyi cinga caambwa akugumikizya muntu uumbi kutali yooyo. Pele eelyo Messiah nokuba muntu umwi naamba kuti, Ime ndakonzya, naa kuti Ime nsyekonzyi kucita ceeci nokuba ceciya, ibbala lyakuti Ime lyaambilizya nguzu zyoonse zya muntu ooyo. Boonse balazumina kuti inga tiiceelela kuti mebo ndilyaambe kuti, “Ime nsyekonzyi kuyeeya,” kumwi nkelangila kulyaangununa kuzwa kububeji kuti naa bandibuzya mubuzyo mpoonya nkeingula kuti Ime ndali kulyaamba biyo mubili wangu naa kanweenwe kangu. Aboobo mukubula coolwe ooyu ngo mulaka uuli boobu uubelesyegwa mukupandulula mulaka ookwa Messiah. Walo wakati, “Ime kunyina ncenga ndacita ndemwini lwangu; Taata uuli muli ndime, nguucita milimo.” “Taata wangu mupati kwiinda ndime.” Eelyo mulaka wamusyobo ooyu nuukulwaizyigwa kuti mbo bumboni bwakuti Messiah taakayeeme kuli Yahuwah, aabo basyoma muli Baleza botatwe nobasoleka kwaamba boobu, mutwaambo ootu, “Messiah wakali kwaamba biyo ciimo cabuntu bwakwe. Mbuli mbwaakali muntu, kuli nkwaakali kuyaamina, pele kali mbuli Leza kunyina ngwaakali kuliyaamika.”
Lino akuyeeyelwe kuti, mukusunkwa kwa Messiah kunembo lya Basilutwe na buJuuda, wakabuzyigwa mulimo wakwe akaambo kakulyaamba kuti wakali kuyaamina kuli Yahuwah; atwaambe kuti wakapandulula amutwe wa Baleza botatwe, kaamba kuti, “Ime ndakaambide biyo ciimo ca buntu bwangu aciindi ciya; pele ndime Yahuwah, ndileelene a Taata. Pe ma, Ndime Leza wa Abulahamu, ooyo wakali kukombwa aabamauso, alimwi ooyo ngomupeda bumboni kuti ngomukomba” Hena aabo bakali kumubeteka nibataamujanina mulandu uulema kwiinda yooyo wakuti wakali kulikankaizya kuba Mwanaa Yahuwah? Hena tiibakali kunga bamwaambila kuti “Mulaka ngookatobela mukukambaukila bantu tiiwakali kuteelekeka alimwi wakali wabumpelenge, naa kuti eeci ncowaamba lino cilinyongene ncobeni. Kutaminina, mbuli mboocita, kuti kunyina lwako omwini webo nconga wacita akugozya kwaambilizya kuti totaminini kulanganyigwa aanga nduwe Yahuwah. Mbubuti lino mbonga walangilwa kusyomwa mukwaamba kuti nduwe Leza weelene aa Taata? Kunze lyaboobo, kusikila ciindi cino, nguni wakamvwide kuti kuli Wisi wa Leza wa Abulahamu?”
Pele kunyina pe basinkondonyina nibaatamikizya “Kamboni wamasimpe alimwi Uusyomeka” cintu cikasyidwe mbuli ceeci. Kunyina pe, mbwensyoma Ime, nokuba aciindi cilibuti, Messiah taakwe pe, Ime mbwesyoma, taakwe Messiah naakakazya bumboni bwakwe kujatikizya mbwaakali kuyaamina kuli Yahuwah, nokuba kusendekezya kuli baapositolo bakwe kuti wakali Leza a muntu mumubili wabuntu omwe; akuti walo munzila iili yoonse wakali kuyaamina muli Yahuwah. Alimwi taakwe pe nokulangika kuti baapositolo bakwe bakamuteelela kuti kunyina ngwaakali kuliyaamika nanka kuti wakali kuliponenena lwakwe mwini.
No. 3. Kubambilila kwa Johane mukulesya Kutamvwisyisya.
Johane wakali sikwiiya ooyo Yahushua ngwaakali kuyandisya, Mulembi wamamanino wakalemba makani aakwe, alimwi walo nguwakalemba mibandi oomo Messiah mwagaminide kusinizya kuti uyeeme muli Yahuwah, mu mulimo wakwe, mubusongo amunguzu, amuli zyoonse nzyaakacita akwaamba. Mumikonzyanyo minjaanji, Johane waakakatila kapati kubambilila kuti mazwi aa Messiah amvwisyigwe akulesya kutateelwa ncaayiminina munzila iiluleme. Walo taakapandulula biyo mazina ongaye azyuuno zya milimo, mbuli lya Cephas, Thomas, Siloam, Rabbi, alya Messiah, pele wakaambilizya ancolyaamba zina lya Messiah ziindi zinjaanji, aboobo naatakamvwisyigwa aabaabo bakali kumuswiilila ba musela wakwe.
Mu caandaano cabili, twaambwiila kuti bamaJuuda bakati kuli Yahushua: “Ncitondezyo nzi ncotupa nocita zintu eezi?” Kumubuzyo ooyu, Yahushua wakaingula kuti, “Amumwaye tempele nkabela mumazuba otatwe, Ime ndiyooliyakulula.” Kwiinda mukwiingula kwabo, bamaJuuda bakalitondezya kuti tiibakamvwisyisya ncaakali kwaamba kumakani aa tempele. Yahushua taakalimvwa kuti abalulamike mukulubila kwabo mpeenya aawo pe. Pele kutegwa bamwi babala batasweeki muli ncaakali kwaamba Messiah, Johane upandulula kuti: “Pele Yahushua wakali kwaamba tempele lya mubili wakwe” (vs. 18-21).
Mu caandaano 6:64, Yahushua wakaambila mbungano yakali kuswiilizya kuti, “Pele nkobali bamwi akati kenu batasyomi.” Johane upandulula kuti, “Nkaambo Yahushua wakalizyi kuzwa kumatalikilo aabo batakali kusyoma, abaabo bakali kuyoomwaaba.”
Johane 7:38, 39: Yahushua wakati, “Ooyo uusyoma muli ndime, mbuli bwaamba mangwalo, kuzwa mwida lyakwe kuyookunka milonga ya meenda aabuumi.” Mumulaka wamikonzyanyo ooyu, Johane ulati, “Pele eeci wakacaamba kujatikizya muuya ooyo basyoma muli nguwe ngobayootambula; nkaambo Muya Uusalala tiiwakaninga pegwa [nkokuti, tiiwaapegwa Messiah kataninga busyigwa kubafu], nkaambo Yahushua taakaninga pegwa bulemu.”
Johane 11:11, 12, 13: Yahushua wakati kuli basikwiiya bakwe, “Mulongweesu Lazalosi uloona, nkabela ndaunka Ime nkamusisimune kuzwa mukoona kwakwe.” Mpoonya basikwiiya bakwe bakati, “Mwami, ikuti kali uloona, ulaba kabotu.” Johane ulapandulula kuti, “Yahushua wakali kwaamba lufu lwakwe, pele balo bakali kuyeeyela kuti waamba kulyookezya mu koona.”
Johane 12:32: Yahushua wakati, “Alimwi kuti Ime ndayimpulwa kuzwa anyika, ndiyookungilila bantu boonse kuli ndime.” Johane alimwi ulapandulula kuti, “Eeci wakacaamba, kwaamba musyobo wa lufu ndwaakali kuyoofwa.”
Johane 13:10, 11: Naakali kusanzya matende aabasikwiiya bakwe, Yahushua wakati, “Mwasalala, pele kutali ndinywe nyoonse.” Kaambo keni nkaakapeda majwi aaya kalipedwe muli Johane: “Nkaambo wakalimuzyi ooyo wakali kuyoo mwaaba; aboobo wakati, mulasalala pele kutali ndinywe nyoonse.”
Johane 21:18: Yahushua wakati kuli Petulo, “Ncobeni, ncobeni ndikwaambila masimpe yebo, eelyo nookacili mukubusi wakali kulisamika akweendeenda kufumbwa nkoyanda; pele waakucembaala, yebo unootambika maanza aako mpoonya umwi uuno kusamika, akukutola ooko nkotayandi kuunka.” Aawa Johane uyungizya kuti, “Eeci wakacaamba kujatikizya lufu oolo ndwaakali kuyoofwa akupa bulemu kuli Yahuwah.”
Mucaandaano camamanino, Johane waamba kuti “Petulo, naakamubona, wakati kuli Yahushua, ‘Ino ooyu mwaalumi uyoocita nzi?’ Yahushua wakati kuli nguwe, ‘Antela Ime nkeyanda kuti kacilindila kusikila ndikaboole, hena aayo makani aako na?’” Lino kaswaanganyide mubuzyo abwiinguzi, Johane ulapandulula akululamika kulubila kwaacitika kuti: “Mpoonya kwakamvwugwa maŋunuŋunu akataa babunyina abacizyi kuti ooyo sikwiiya takoyoofwa. Pele Yahushua taakamwaambila kuti, Walo takafwi, pele kuti ikuti Ime nkeyanda kuti walo alindile kusikila ndikaboole, cilaa mulimo nzi kuli nduwe eeco?”
Lino akulangisyigwe ziindi zinjaanji Messiah naakagaminide kuyaamina kuli Yahuwah naa kukaka kuyaamina ku muntu — saa mbubuti Johane mbwaakazyi kuti mulaka uuli boobu ukulwaizya kusyoma kuti Messiah tayaamini kuli Yahuwah? Inga twabuzya akuti, nkaambo nzi Johane ncaatakapa bupanduluzi mbuli mumakani aabamwi, akwaamba kuti, “Eezi zintu Messiah wakazyaamba kujatikizya ciwa cabuntu bwakwe, kutali nguwe kali mu ciimo cabu Leza?” Masimpe kuti Johane naakalizyi nokuba kusyoma kuti Messiah wakali muntu watakayeeme kuli umwi, pele wakalizyi akuti bupanduluzi oobu bulaa cikkelo kapati kwiinda cili coonse cijanwa mu Mulumbe wakwe mubotu. Kuti naakali muntu uusyoma muli Baleza botatwe, mbuli baabo bamazubaano, walo naatakalipenzya kupa mulwi wa bumboni busandulula Messiah nkwayaamima kakwiina kuvwelanya makani aakuubula mulumbe. Ikuti Johane naakali kulanganya Messiah aanga ngu Yahuwah, mbuti mbucakali kunga cabula bulemu kupandulula ncaakaamba Messiah naakati Lazalosi uloona nokuba naakaamba kudilimuna tempele akuliyakulula mumazuba otatwe, eeco kweezyekanya amwaanda wa tumpango oomo mwaakali kulyaamba kuyaamina kumuntu umwi, akuti zyoonse nzyaakabulide wakali kuzitambula kuzwa kuli Taata!
Tacili mumoyo wangu kubuzyilila bululeme nokuba kuba masimpe kwa balongwe bangu basyoma muli Baleza botatwe. Nokuba boobo, ndicisungilizyigwa kuyeeyela kuti naa tabakubwene busanduluzi bwabo bwa majwi aa Mwami wesu kuti bumubikka ambaakani yakubaanga ulaa ciyanza cakubelesya mulaka wakupelengusya walucengo, mbuli yooyo uunga wasofwaazya ciimo ca muntu uumbi. Kuti naakali muntu uulyeendelela, nsyezyi mebo mulaka ngwaakali kunga wabelesya kuunina akubaa lucengo muzintu zinjaanji eezyo Johane nzyaakalemba kuti zyakaambwa aanguwe. Pele ooyu mulaka tiiwakasandululwa aanguwe lwakwe mwini, nokuba aa sikwiiya wakwe munkutwe kubambilila. Kutali lwakwe nokuba aa Johane mbocaambidwe, kwaamba kooko nkwaakali kuyaamina, taakamupandulula cakumaninizya buntu bwakwe mbuli Mozesi mbwaakali kunga wacita kubelesya mulaka ngweenya uukonzyanya. Hena tiili nzila yaandeene yakupa bulemu kuli Messiah, kumwaamba kuti kunyina ngwaakayeeme kali muciimo cabu Leza mpoonya akumugwisya ciimo cakwe ca kuyandisya kasimpe? Pele eeci ncecilibonya kacicitwa aabasikwiiya bakwe basyoma muli Baleza botatwe. Pele muntu uuli woonse uusyoma Baleza botatwe kuti walibuzya naa inga taaba muntenda kuzumanana kubelesya mulaka wabucenjezu uuli boobu, kakwiina busanduluzi, eelyo mizeezo yakwe niitamikizya Yahushua ooyo watakamvwugwa kaamba cisofweede mumulomo wakwe? Pe ma nditaambi muntu mubotu naa inga taakankama kuyoowa muzeezo wakutobela ciyanza cili boobu?
No. 4. Busanduluzi bwa bakomba Baleza botatwe tabweendelani a manjezyeezya aabo.
Lino andibweze ntaamu kuya kumbele. Ikuti Yahushua Messiah naakali Leza uutayaamini ku muntu, nkokuti majwi aakwe aakuti uyeeme muli Taata taakali kukonzya kululama, munzila imwi eeyo njobasumpauzya aabo Bakomba Baleza botatwe. Kutegwa manjezyeezya aabo atabi aakuti ciwa cakwe cabuntu cakali kamantene a Taata, pele muntu wabili, wakali kulyeendelezya lwakwe kali mbuli Taata. Lino, nguni uutakonzyi kubona kuti kulyeendelezya kotayaamini kumuntu kuti cisinkila kulyeendelezya omwini? Ikuti Messiah naakali jisi kale zyoonse, mbubuti ciwa cakwe cabuntu mbucakali kunga cayanda kugwasyigwa aamuntunyina? Pele Messiah wakaamba biyo kuti uyeeme kuli Taata. Walo taakaamba kuti, “Ciimo cangu cabuntu kunyina ncocinga cacita lwaco cilikke, pele Ime eeli mbuli Leza ndendime neebeleka.” Pele kalyaamba lwakwe kuti walo muntu luzutu omwe, ngu Messiah, Mwanaa Yahuwah, walo wakati, “Muli lwangu ndemwini, Ime kunyina ncendinga ndacita lwangu.” “Majwi ngekanana kuli ndinywe, Ime nsyaambi muli lwangu ndemwini: Pele ngu Taata uukkalila muli ndime, Walo nguucita milimo.” “Ikuti inywe kamundiyanda nimwali kusekelela nkaambo ndaamba kuti Ime ndiya kuli Taata wangu, nkaambo Taata mupati kwiinda Ndime.” “Ime kunyina ncenga ndacita muli lwangu ndemwini, pele Taata wangu mbwaakandiyiisya, Ime mbwekanana zintu eezi.”
Hena aaya majwi aakwaamba boobu alaa mulimo ikuti Messiah naakali mbuli Taata, kajisi zyoonse alimwi katayaamini kumuntu? Ikuti nicakali cintu cipati kuli Messiah kucenjezya basikwiiya bakwe kuti batamulendekezyi buleza, Ime nsyezyi amulaka ngwaakali kunga wabelesya kabotu kucita boobu. Ikuti naakaamba kuti, “Ime nsyeli Leza, pele ndi Mwanaakwe uuyeeme kuli nguwe alimwi ndiimvwi mucibaka ca Yahuwah,” muzeezo wa Bakomba Baleza botatwe niwakaamba akuti “wakali kulyaamba biyo ciwa cakwe cabuntu.”
Awumwi mubuzyo ulamvwika. Ikuti Messiah naakali Leza uuliponena muciimo cabuntu, nciindi nzi naa makanze aali buti ncaakali kunga waamba kuti ciimo cakwe cabuntu ciyeeme kumuntunyina uumbi? Hena busongo bwakwe buteeli anguzu ziinda zyoonse tiizyakali kumupa nzyabulide anzyayanda muciimo cakwe cabuntu na? Kunze lyaboobo, ninzi caali kunga camupa kulyaamba mbwayeeme kuli umwi muciimo cakwe cabuntu kakuli wakalizyi kuti eeco caambilizya ciimo cakwe cabuntu coonse? Mubuzyo wakuti naa wakali kuyaamina kumuntunyina naa wakalijisi kale zyoonse kakwiina kuyaamina kumuntunyina, ooyo wakali mubuzyo mupati kapati. Mbwaabede makani oobo akataa balongwenyina ba zikombelo zyoonse mazubaano. Tiicakali kunga calangwa aa Messiah abaapositolo bakwe munzila iimbi. Aboobo, ino kuti, eeci ciiyo cilemu boobu alimwi cikondelezya kumukowa wabantu, hena naakacita cilengwa cakwaambaula mulaka uukonzya kusandululwa munzila zyaandeene, zya kupelengusya boobu, zibambilidwe kuunina bayiide abatakubwene, hena inga twakakkazyika moyo muli nzyaakaamba amuziiyo zimwi na? Ikuti naakainduluka kwaamba kuti “Ime kunyina ncenga ndacita muli lwangu ndemwini,” kakuli mubwini, walo wakali kukonzya kucita zyoonse lwakwe mwini, mbumboni nzi mbotujisi bwakuti muli zyoonse nzyaakaamba kwakali masendekezya aasisidwe, eeco ciimpene kulaale ancaayiminina cini majwi ngaakaamba? Acimwi ciinda kulema, mumeso aangu, ciinda atalaa buleza bwa Messiah cijatikizya mubuzyo uuliko cino ciindi — nkokuti, lubomba lwakwe, bululami bwakwe, kuloma moyo kwakwe, akuba wamasimpe mbuli Mwiyi wakatumwa kuzwa kuli Yahuwah.
No. 5. Tumpango tobile tulangwa aawa.
Mumubandi waamoyo akataa Messiah abaapositolo bakwe kaindi kasyoonto munsaa kukankaminwa kwakwe, walo wakati kuli mbabo, “Taata mwini ulamuyanda nkaambo inywe mwandiyanda akusyoma kuti Ime ndakazyila kuli Yahuwah.” Mu mupailo wakwe wakatobela mpeenya aawo, naakacili kwaamba makanaa baapositolo, Messiah wakati kuli Taata, “Lino bazyiba kuti zintu zyoonse nzyookandipa Webo nzyizyako; nkaambo Ime ndabapa majwi aayo Webo ngookapa ndime, alimwi bakaatambula, akuzyiba masimpe kuti Ime ndakazyila kuli Ndiwe, alimwi bakasyoma kuti Webo ndiwe wakandituma.”
Ootu tumpango tuyandika kubikkilwa maanu ku Banakristu. Kuzyiba ncobeni kuti Messiah “ wakazyila kuli Yahuwah” a “kusyoma kuti Yahuwah nguwakamutuma” ceelede kuba caandeene kuzwa kukuzyiba kuti Messiah wakali Leza, weelene a Taata, ciliimpene kulaale kuzwa kukusyoma kuti walo taakali kuyaamina kumuntunyina. Eeci ceelede kuzuminwa abaabo Bakomba Baleza botatwe, nkaambo batamikizya lusyomo lwa baabo basyoma Leza omwe kuti ndwabuzangi naa talululeme. Nokuba boobo, basyoma ncobeni kuti Messiah “wakaboola kuzyila kuli Yahuwah” alimwi wakatumwa aa Yahuwah. Pele Ime ndiyeeya kuti ceelede kuzuminwa kuti Messiah, mu mupailo wakwe, wakazumizya lusyomo lwa baapositolo bakwe naakaamba kuti, “Aabo bandisyoma kuti Webo ndiwe wakandituma Ime” — alimwi eeco kakwiina kusendekezya nokuba aasyonto kuti bakali kusyoma, naa kuli nibaali kunga basyoma, kuti walo wakali Leza uupona.
Ime ndayungizya mukampango kaambidwe kale atalaawa, Messiah wakasinizya kubasyomezya luyando oolo Yahuwah ndwajisi kuli mbabo akugaminina kubaambila ncobakali bayandwa boobo kuli Yahuwah. Walo taakaamba kuti, “Taata ulamuyanda nkaambo inywe mwakasyoma kuti Ime ndime Leza weelene anguwe,” — Pele aaya ngamajwi aakwe kuti: “Taata ulamuyanda, nkaambo inywe mwandiyanda, akusyoma kuti Ime ndakazyila kuli Yahuwah.” Katumanide kuteelela bunjaanji bwa kutamikizya kuyoosya ooko akutaalukila kuli boonse basyoma kuti Messiah taakali Yahuwah, pele wakali Mwanaakwe muyandwa ooyo “wakaboola kuzyila kuli Yahuwah,” mbuli mbwaakatumwa mulimo akuboola kuzwa kuli Taata; nguni waali kunga weezyeezya kuti kampango kali boobu mbuli mbokabede kunembo lyesu inga kajanwa mu Bbaibbele? Ikuti Messiah taakalubizya mukwaamba Yahuwah mbwazumina luyando lwa baapositolo, kulalibonya ncobeni kwiimpana mizeezo akulimvwa kwa mumoyo akataa Yahuwah abunjaanji bwa Bakomba Baleza. Oolo ndusyomo ndwazumina Yahuwah alimwi Mwanaakwe wakatamikizyigwa abaabo bakali kulangika aanga bali masimpe mukusyoma mbobalanganya Messiah.
Tacikwe mulimo aawa kwaamba kuti, “cakali ciimo biyo cabuntu eeco baapositolo ncibaasyoma kuti ‘cakazyila kuli Yahuwah.’” Luyando lwabo kuli Messiah, akusyoma kuti walo wakazyila kuli Yahuwah, aawo nembaakani biyo mpobaimina kuti: “Taata Lwakwe ulamuyanda inywe.” Kunze lyaboobo, kusyoma kuti Messiah “wakaboola kuzyila kuli Yahuwah” ncecibeela cilikke ca lusyomo caambidwe mukampango. Kufumbwa naa ndusyomo lwakuti Messiah tayaamini kuli Leza luli lubide naa luliluleme, eeco tiicakali cakusyoma mukusyoma kwabo ooko kwakapa kuti baapositolo bayandwe aa Taata.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
Eeci cibalo citali ca-WLC cakalembwa aaba Noah Worcester, D.D., 1827.