|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Ime ndiyanda kukananina baabo bateelela Mulumbe wa Bulelo bwa Yahuwah mbuli mbuulembedwe cabululeme mu Bbaibbele. Mutwe wamakani mu Cizuminano Cakale a Cipya mubufwaafwi ngwakuti: ooyo Muntu uuli luzutu alikke, Yahuwah, nkokuti Taata, uyoobambulula nyika, aawo bantu bayootambula Bulelo oobu mpobayookkala maumi ngibakeelede kupona. Oobo Bulelo buyoobambululwa kumamanino aamusela uuno, a Yahushua waku Nazaleta, Mwanaa Yahuwah kwiinda mukumitwa/ kuzyalwa a muya uusalala (Luuka 1:35), alimwi aboobo ngo Messiah muntu susu wakashinshimwa ooyo lino uupedwe bulemu kujanza lyalulyo lya Yahuwah (Intembauzyo 110:1; 1 Timoteo 2:5).
Bulelo bwa Yahuwah buyoosimpwa anyika kumamanino aamusela uuno a Yahushua waku Nazaleta Mwanaa Yahuwah ooyo wakamitwa camaleele a Muya uusalala (Luuka 1:35), mbube aboobo ngonguwe Messiah muntu wakashinshimwa lino uupedwe bulemu kujanza lyalulyo lya Yahuwah (Intembauzyo 110:1; 1 Timoteo 2:5).
|
Eelyo aakuzyokela, walo uuyoosimpa Bulelo oobo bunoolaa munzi mupati wa Jelusalema alimwi uyoolela kwamyaka iili cuulu abasaante kusikila boonse bakasangane bulelo bwakwe bwa luyando. Aciindi eeco uyoosiila zyoonse mumaanza aa Wisi ooyo wakamupa nguzu zyakubeleka makanze aaya, mpoonya majulu mapya anyika mpya iyoobambwa. (1 Bakolinto 15:28).
Aboobo alimwi, cili kuli ndinywe nomuteelela mbuubede Mulumbe wa Bulelo Ime ngweyanda kumukananina buno buzuba. Ime ndiyanda kusalazyila limwi makani aayo bantu banjaanji, kapati Banakristu muzikombelo zya tunsiyansiya ncobatazumini lwiiyo lwamu Bbaibbele lwakuti ooyo Messiah wakashinshimwa muntu susu, ngu Yahushua, kunze lyaboobo bayiisya ciimpene cakuti ngu “Leza”-muntu akataa Baleza botatwe wakali kupona kataninga zyalwa. Ime ndiyanda kuti umvwisyisye ciiyo cakuti Yahuwah muntu omwe luzutu, ngu Taata, eeco ncibeela cipati mu Mulumbe wa Bulelo. Kutali biyo kuti lusyomo lwa Baleza botatwe lupilinganya makanze aa Bbaibbele aa mulumbe wa Bulelo bwa Yahuwah, pele lulasungilizya akuti Yahushua tali muntu wancobeni mbuli ndiswe.
Masimpe ncobeni kuti kuli bantu basyoonto buyo anyika bamutambula Yahushua kuti muntu susu ncobeni uuzwide buntu mububambe amuciimo cakwe. Cikombelo ca Cizuminano Cipya cakalizyi mbuli mbotuzyi aswebo, kuti mukati kamyaka 100 kuzwa mazuba ngaakali kupona anyika, busongo bwaci Giliki amanjezyeezya aabantu akatalika kupindulula lwiiyo lwa leza Omwe wamu Bbaibbele akucinca Yahushua kuti abe “Leza-muntu.” Nkaambo nzi ncicaacitikila boobu? Ime nsyaambi kuti naa mbuti caacitika mumusela eeyo. Aayo makani akalembwa kale kabotu-kabotu. Ime ncendaamba ncakuti, ino ncintu nzi cinicini, caaleta muyanda wa kuzangila moza akuyaamuka kuzwa ku kasimpe? Cintu cikondelezya ncakuti, bwiinguzi bujanwa kumatalikilo aamusela wabantu uuno niwakaanzwa akutalika.
Akali aciindi eeco lweeno ndwaakatalisya Saatani, sinkondonyina wa Yahuwah abaabo babambidwe mucinkonzya Cakwe. Oolu lweeno lwakali sisidwe kuzwa akataa banalumi abamakaintu kuzwa kumatalikilo aabuponi bwabo anyika, nokuba boobo lipa musemo aawo kufumbwa lusumpuko lujanwa ansaano mpulwaayakilwa. Oolu lweeno lwakatalisya muzeezo wakudonaika mufutuli muntuma mbuli ndiswe. Aboobo Ime ndiyeeya kuti lino nceciindi cakubbunwida limwi ooku kuuninwa akutondezya bwinibwini mbobwiipene kukazya mulumbe wa Bulelo woonse mbuuzulwa mbuwakayubununwa kuli ndiswe a Yahuwah kwiinda mu bashinshimi, Yahushua, a baapositolo.
Inyika tiikonzyi kulekela muzeezo walusyomo lwakuti Yahushua ngu Messiah muntu susu, ooyo wakazyila muli banyina, mbuli Bbaibbele mboliyiisya. Eeco ncintu cilwana aa musemo wini uugwasyilizya bweende bwazintu zitudyakaizya anyika mumusela uuno.
|
Mubufwaafwi, musemo walweeno lwanyika iino ngwakuti: kuba muntu susu tacili cibotu bwinibwini. Muntu tajisi cintu cimweelezya kuti abe mwana mulombe nokuba musimbi ookwa Yahuwah. Ime ndayinduluka ndati: Saatani wakacenga bantu bakkala anyikeeyi kuti kuba muntu tacili cintu cibotu bwinibwini. Oolu lweeno luyakilidwe atalaa cibumbwa ncotwiitakuti ndusumpuko kuzwa kumatalikilo aamusela wabantu woonse. Inyika tiikonzyi kulekela muzeezo walusyomo lwaambilizya kuti Yahushua ngu Messiah muntu susu, wakazyila muli banyina, mbweenya Bbaibbele mboliyiisya. Aaya masimpe alwana muzeezo wini uugwasyilizya bweende bwazintu zyaanyika mumusela uuno. Kunyina busena bwa Messiah muntu nkaambo eeco inga catupa kuti swebo tulilange bubotu bwa buntu bwesu, alimwi eeco ncecintu camacaalizyo Saatani ncatayandi kuti swebo tubone. Walo ngu sinkondonyina wa Yahuwah abaabo babambidwe mucinkonzya Cakwe Yahuwah, aboobo kufumbwa ncatandila kucita ceelede kunyonyweeda limwi mukowa wabantu akusampaula Yahuwah akataa baabo bali mu moza. Bweende bwazintu zyaanyika bwini buyeeme mukusendekezya kuti bantu tabali babotu bwinibwini eeco nceenya ncecibikka kumbele misyobo yabupaizi bwakudyaaminizya bantu mumusinze kuti bataibaluki ncibaalengelwa alimwi ambobakonzya kuba bantu babekema kubaa bulemu aabo bayookona mulengalenga akubeteka muzintu zya muuya abangele. Kutegwa bulikwabilile antoomwe a Saatani “Leza wamusela uuno” (2 Bakolinto 4:4), eeyi nyika yeelede kukaka nokuba kuuntuluzyila limwi Yahushua, nokuba kumubamba kuti ngu Leza-Muntu uupona kutamani pele wakalaa “ciimo cabuntu,” Pele taakali muntu susu, 100%muntu mbuli ndiswe. Kuzumina masimpe aali mu Bbaibbele aambilizya Yahushua mbwabede bwini inga eeco caambilizya mamanino akudilimwida limwi lusumpuko loonse ndotuzyibide ansaano. Naba Saatani nokuba nguzu zya mfulumende inga tiizyaliyandila kuzumizya cintu eeco kuti cicitike. Inga kwaba kulijaya. Aboobo kweena kwakuti bantu tabajisi cibotu alimwi tabazukide bwinibwini, kucizumanana kusikila Yahushua akazyokele abulemu boonse Yahuwah mbwaakamupa kuti a bambe musela mupya anyika aawo bantu mpobapedwa mpindu abulemu oobo Yahuwah mbwabapa.
Aboobo, atujokelele kumatalikilo kubucedo bwa musela wabantu tubone zyoonse eezyi mbuzyaapungwa kutalikwa. Atujokelele kumatalikilo kumuunda wa Edeni ooko kwaacitika cilembedwe muzyaandaano zitaanzi zya bbuku lya Matalikilo. Ime ndagumaguma biyo zipatipati aasyoonto nkaambo ndiyeeya kuti boonse balikazyi kale kaano.
Mukampango kacaalizya mu caandaano 1 tulajana kuti Yahuwah wakamanizya kulenga Adamu a Eva mpoonya wakabaamba kuti, antoomwe azilengwe zyoonse zimwi, “ncibotu kapati.” Kweendelanya bwaamba Yahuwah, aaba bantu bobile bakalengwa bupya bakali babotu bwinibwini alimwi bakali kweelela kukona Bulelo Walo mbwaakababambide nkaambo wakabapa nyika yoonse kakkedwe camba kuti biiyendelezye. Alimwi awalo Adamu a Eva tiibakalaa penzi lyakubula maanu aabupati akuba bakubusi bataninga kula, nkaambo mukampango 2:25 kulembedwe kuti, “boonse bobile bakalaa mantaanda pele tiibakafwide bweemya.” Tiibakalondokede mbuli Wisi, pele eelyo tiilyakali penzi kuli mbabo. Nanka kuli Wisi tiilyakali penzi. Bana Bakwe bakacili bakubusi bataninga kula, aboobo bakacili kuyaa kukomena kuti babe mbuli Wisi, pele tiibakali kulangilwa kubaa maanu aabupati aakulyeendelezya. Kunyina muntu mubotu mbwaazyalilwa alimwi uutakwe ciindi cakuti ayiye kwaandaanya cibotu kuzwa ku cibi, pele Yahuwah alikke, mbuli mbwaakaamba Yahushua muli Luuka 18:19.
Aciindi aawa, mubusena buumwine kulibotela akulikwaya tulajana mu Muunda wa Edeni zintu zyoonse ziyanda kupinduka. Yahuwah wakaambila bana Bakwe kuti inga balya kufumbwa cizyalwa kumicelo ya mumuunda pele buyo mucelo wamusamu waluzyibo lwa cibotu acibi. Ngooyu wanjila siluuni, Saatani. Mukampango 3:4-5 wakapelengusya kusungilizya Eva kuti kunyansya tacili cintu cinga cakusolweda ku lufu. Ikuti alye musamu wakuzyiba cibotu acibi, inga kayooba mbuli Yahuwah ooyo uukkwene luzyibo lwa cibotu acibi, alimwi inga wazyiba bwakweeleba lufu kwiinda mu luzyibo oolo. Inga walo wainda kubota kwiinda muntu, alimwi waakakatila ncobeni kuyandisya kuba boobo. Mulumbe uuli kunsaa makani aawa ngwakuti Yahuwah ulatambula, ulacibikkila mpindu, alimwi ucikuyanda nokuba kuti waba cintu ciimpene aceeco ncookalengwa, waba dekeleke lya muntu. Lino, cili masimpe kuti Adamu a Eva tiibakali bantu bapwekepweke, pele tacili masimpe kuti kwakali cilubide muli ceeci pe. Bana boonse beelede kukomena, alimwi beelede kucita boobo munzila iipa buumi bubotu ikuti cilongwe akati kabo a Wisi kaceendela mukusyomana akuti kabayandwa mumeso aakwe. Ku mwana uuli woonse, muzeezo wa wisi abanyina ali nguwe nguulaa mulimo mupati alimwi nguulandabika musemo wakuti ooyo mwana akabe muntu uubujula nokuba cifuswa makowa. Alimwi aawa ngooyu Saatani kasendekezya kuti Wisi wabo takkomene nkaambo kabo mbuli mbwanga wabakkomanina ikuti nibabambidwe mucintu ciimpene kutali bantu.
Aboobo ninzi caatobela ali zyoonse eezyi? Mbweenya mbotulangila: “Meso aabo boonse bobile akavwumbuka mpoonya bakazyiba kuti lino bakalaa mantaanda” (3:7). Eeci caambilizya kuti lino bakalisenda nkaambo ka mbubakalengedwe, bakabaa bweemya nkaambo ka mantaanda aabo, bakabaa nsoni nkaambo ka kutakkwaninina bwini, bakabaa bweemya nkaambo kakuba muntu wakali kukonzya kubelesya aasyoonto oolo luzyibo ndwaakajana lwa cibotu acibi. Coonse ncibakali kukonzya kubona lino, eelyo nibakali kukwakwalisya kulipasununa micito yabo kweendelanya aa mulawo, bakalibona mbubataakkwene akwaalilwa kupona mumilazyo yokwa Yahuwah. Tiibakali kulangilwa kuti mpeenya aawo balondoke kuba mbuli Yahuwah, pele umwi wakabaambila kuti beelede kukomena akuba boobo. Nkabela nibakazumina kulweeno oolo, mpeenya aawo bakawida muciyanza ca kulitunusya. Aa ino Yahuwah wakaamba kuti nzi kujatikizya ceeci? “Nguni wakamwaambila kuti mulaa mantaanda?” Mumajwi amwi ooku nkwaamba kuti, nguni waakakwaambila kuti kubaa mantaanda ncintu cuusisya nsoni?
Aboobo nkaambo ka bweemya bwabo, bakayuba bamwi akuyuba Yahuwah (3:7-8). Alimwi ono kuzwa ciindi eeco toonse tucibalika kuyoolisisa. Bantu banjaanji balaa bweemya nkaambo ka mbobalengedwe kuti mbaani. Bamazyali balalibilika, nkaambo ka ziyanza zyabantu zisampuzya, abupaizi businganya bantu eezi zyoonse zyakacita mulimo wazyo azyalo, kukasya bantu kuti bayibaluke ceeco, Yahuwah ncaakabalengela kupona.
Pele aalumbwe Yahuwah, tanaleka Walo pe kuzumanana kwaambilizya masimpe Aakwe, aakuti muntu ncecintu ciinda kulibotela Walo ncaakabamba mumulimo wakulenga. Walo ukulwaizya ndiswe kuti tusike ambaakani yabuntu aawo mpotweelede kweendelana aa ciiyo cipati mu Bbaibbele, nkokuti, makani mabotu aa Bulelo buciboola bwa Yahuwah. Mbuli cibeela ca mulumbe ooyo, Walo utaanguna kutwaambila ciindi aciindi kuti kuli biyo Leza omwe, nkokuti Walo Lwakwe kumugama, kutali ndiswe. Ooyo tuuli mukuli wesu kulikulika swebo pe. Cili kabotu kuli Nguwe kuti katuli bantu susu biyo — kuli Nguwe taakwe cisyoonto nanka ciinda waawo cimwi ncalangila kuli ndiswe. Cabili, Walo wakakanza kulenga Adamu wabili ooyo uunooli muntu susu uukkwene mbweenya mbuli Adamu wakutaanguna, pele aciindi eeco ooyo takacegwi mukooze ka sinkondonyina alimwi uyoozwidilila kuba mutaanzi, uubekema bulemu, muntu uutafwi. Ooyu Messiah uyooba mutaanzi kuzyalwa aakataa babunyina banji alimwi uyoojuzya musela mupya wa kuponya balwazi aluumuno kubantu boonse. Kumamanino bantu bayoopona buumi mbubakeelede kupona, alimwi bayooba bantu mbubaabambwa kuba. Buntu bukkwene buyoozuzikwa atalaa nyika eeyi Yahuwah njaakalenga kuti ibasunke akubapa ziindi zibotu zyakuti eeco cicitike.
Eelyo notuteelezya mulumbe wa Bulelo woonse kuzwa mu Cizuminano Cakale a Cipya, tulamvwa kakuli mulumbe uuli mukataa mulumbe. Iswe, tobana ba Taata Yahuwah, tatuli kalungu kaamoyo Wakwe nkaambo kakuti tulateelela mulawo ngwaakatupa Mozesi pe. Bululami tabubooleli mu milimo ya mulawo. Tatujani mpindu yabuntu bwesu nokuba kuyandigwa munzila eeyi pe. Pele, tulalulamikwa kwiinda mukusyoma zisyomyo ziboolela mu Mulumbe mubotu ngwaakakambauka Yahushua mutumwa waandeene wa Taata, ooyo ngo mulumbe wesu waluyando. Ooyu Mulumbe wa Bulelo ngo mulumbe Abulahamu ngwaakasyoma, mbuli bwaamba Bbaibbele, akuti ooko kusyoma kwakwe kwakamupa kwaambwa bululami. Mbululami bwa kusyoma mulumbe wabulelo bwa Yahuwah bukkomanisya Yahuwah, akubamba nzila yakuyeeya mizeezo iiluleme akupona kabotu kuli ndiswe tobantu. Tulayandigwa akutambulika kuli Yahuwah mbweenya mbotuli bantu kale, kutali nkaambo kacintu cili coonse ncotunga twacita nokuba kuzyiba, Pele nkaambo Walo mbwatwaambila kuti mbotubede oobo. Tede kayi nokuba boobo Walo ngo Taata wesu. Mukujokezya, iswe tulabomba a “kuteelela kwa lusyomo” eelyo notwiiya kuzwa kuli Yahushua Mwanaa Yahuwah.
Mulumbe mubotu mbuulembedwe cabululeme mu Bbaibbele ulikke nguupa nzila yakuleka mizeezo akupona kutaluleme. Tweelede kucita kufumbwa ncotukonzya kuti tutole mulumbe ooyu munyika yoonse. Bantu bayoomvwa lufutuko luponya nduuleta cino ciindi. Kasimpe ka Yahuwah takeelede nokuceya kwaambwa kuti takajisi bakamboni mumusela uuno. Mulumbe wabulelo kusanganya acibeela ciyandika kapati ngwakuti Yahuwah Muntu omwe luzutu akuti Yahushua ngu Messiah muntu mbuli ndiswe, aayo nga makani toonse ngotweelede kuteelela kutegwa tuye kumbele kusumpula buntu bwesu. Kakwiina mulumbe ooyu, zintu ziteendelani akataa bululami bwa kubaa lusyomo a milimo yabululami inga tiizyateelelwa munzila iiluleme, aboobo inga twacaala katucedwe muzinyonyoono zyesu, “amumisyobo-misyobo” ya bupaizi.
Bupaizi bwaanyika boonse mubunji bwabo tabukonzyi kutambula Messiah muntuma mbuli ndiswe nkaambo uuno musela waanyika woonse uyakidwe atalaa kweenwa kuti kuba muntu tacili cibotu bwinibwini mumeso aa Yahuwah. Aboobo ncenciceeci Bunakristu bwa tunsiyansiya ncobweelede kuyiisya kusyoma muli Baleza botatwe. Kuti nicatali boobo inga caambilizya kuzimaanyila limwi bweende bwazintu zyaanyika busofweede, alimwi ndayoowa kuti bwalo inga tiibwazumizya cintu cakulijazya cili boobo kuti cicitike pe. Lusyomo lumwi mbuli lwakuti muzimo wamuntu tuufwi alwalo luyumbyayumbya kumbele lweeno lwakuti kuba muntu muli lwaco tacili cibotu bweelede kumaninina. Kunzaa lusyomo lwakuti muzimo wamuntu tuufwi, kuli muzeezo wakuti akataa malengelo ookwa Yahuwah, mubili wamuntu, amuya wabuumi ngwayoya ooyo wakazyila kuli Yahuwah, muli lwawo ulisofweede alimwi aboobo ncoweelede kusoogwa aciindi cakufwa.
Atuzumanane kubeleka mulimo wa Yahuwah, kwaambilizya mulumbe mubotu ooyu kunyika yoonse kusikila kumamanino (Mateyo 24:14). Mulumbe uujanika mukati ka mulumbe, muubauba kuteelela pele ulaa cikkelo: kuba muntu wancobeni ncibotu bwinibwini kuli Yahuwah. Muntu susu ulipedwe kale buumi bwakutafwa oobo buyooba bwesu aswebo eelyo twaakukona Bulelo bwa Yahuwah oobo mbwaakabambila ndiswe.
Eeci cibalo citali ca-WLC cakalembwa aaba Robin Todd.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina as Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
