|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Mu lwiiyo “lwakucincanya baleza,” oolo luyambukide muzikolo, akataa mikowa yabantu, acalo cisi ca Isilayeli tacicilanganyi kuti kuli bantu bacizuminano ca Yahuwah, pele Cikombelo cakaatwida limwi cisi ca Isilayeli. Zisyomyo zya Cizuminano Cakale zya kuyakulula Isilayeli “zyakapindululwa” mu lwiiyo oolu cakuti Cikombelo cakaba ncecitambula zileleko zyoonse, kakuli bantu banyenzi mucisi ca Isilayeli bakalekelwa biyo kusinganyigwa aa Yahuwah. Mubweende bwa misela, acalo Cikombelo ca Katolika cakatobela lwiiyo oolu akupa kuti lubaa mpuwo mubuleya. Mu Protestanti John Calvin wakalusungilizya akataa batobeli bakwe, aboobo lucitambwidwe ambuli sunu akataa ba “evangeli” banjaanji alimwi (cilanyandya kapati) kuti abalo Bakamboni ba Jehovah balisangene (akwiimpanina lyo kuzwa kumizeezo yayooyo wakatalisya nkamu yabo, C.T. Russell).
Oolu lusyomo lwakucincanya baleza lwakakazyigwa mu BaLoma 11 (amubunjaanji bwa Cizuminano Cakale), oomo bbala lyakuti “Isilayeli” moliiminina Isilayeli wancobeni alimwi oomo Paulu mwatwaambila kuti Yahuwah ucilaa makanze kuli mbabo mbuli cisi (mucisyoonto 22-32) nkaambo bakaba “bayandwa akaambo ka bamawisi” (mucisyoonto 28). Cikombelo camisela yaakatikati acalo cakatobela nzila ya “kusandulula” zishinshimi zya Bbaibbele kubelesya “mikonzyanyo.” Ooku kukonzyanisya zishinshimi kucizumanana mubunji bwa zikombelo ziluulwa mazubaano. Kukonzyanisya caamba “kwaamba cintu cimbi.” Ooyo musamu uujaya moza, nkaambo wuubyawubya cilembedwe mukampango ka Mangwalo akulipeekezya “kusandulula.” “Kukonzyanisya” munzila ya lweeno ninzila yakumpelenga kusisa kasimpe aako umwi nkatakombeleli kusyoma!
Kaindi loko, bantu ba lusyomo luna Abulahamu bakaibaluka kuti eeyi nzila tiiyakaluzi ku Mangwalo alimwi yakalaa bujayi mu kusyoma Mulumbe mubotu wa Bulelo. Mulumbe mubotu wa Bulelo usanganya makani aayandika aa Isilayeli ooyo lino muyumu moyo, akubaya (kutali Cikombelo) nkaambo aabo balo lino mbaba ngo “sinkondonyina ba Mulumbe mubotu” (BaLoma 11:28). Pele boonse antoomwe, ciindi ciboola, bayoocengulukila kuli Messiah. Muciindi cino umwi awumwi akataa bamaJuuda ulakonzya kusangana basikwiiya ba Yahushua Messiah akuba sicikombelo wa “kupalulwa” mu moza (BaFilipo 3:3; BaGalatiya 6:16, Isilayeli wamu moza, kutali “Isilayeli wa buntu,” 1 Bakolinto 10:18).
Kukakanyana kwaamba kuti cisi ca Isilayeli ciciboola kumbelaa mazuba tacaambilizyi kuti swebo mbotuli Banakristu tutalike kulinjizya mu mapolitikisi kuti tupelengusye zintu kuti cicitike kufumbwa ncolyaamba Bbaibbele. Swebo tusyoma kuti Cikombelo tiicakayitilwa milimo iili boobo pele kulyaandaanya kuzwa ku mfulumende zya musela uuno.
Bamwi bakanana “Leza wa bamaJuuda aleza waba Mozilemu” munzila iisendekezya kuti ngu Leza ngweenya omwe. Swebo tulakaka kwiimina munzila yakuganta boobo. Leza wa bamaJuuda, Yahuwah, ngo Leza wamasimpe mumulengalenga woonse. Walo ngo Leza a Taata wa Simalelo Yahushua. Walo teesyi Allah pe, “Leza” wa Izilamu. Ibbuku lya Koran a Bbaibbele malembe aayimpene kulaale cinicini. Yahuwah wamu Bbaibbele ulyaamba kuti Lwakwe ngu Leza wa Isilayeli. Busanduluzi bwa Bbaibbele bwakubeja abwalo bulakonzya kusweesya bantu mukubasolweda kuzwa kuli Yahuwah ooyo wakayoyela moza mu Bbuku liyandisi eeli.
Nokuba kuti tusyoma mukujokolosya cisi ca Isilayeil, eeci tacaambilizyi kuti iswe katulanganya mfulumende iilela cino ciindi mucisi ca Isilayeil kuti mbo Bulelo bwa Yahuwah pe. Swebo tatusyomi kuti lusyomo lwa Zionizimu nkokuzuzika cifwanikiso camu Bbaibbele ca Isilayeli uuyobolodwe mulusyomo lwa masimpe. Swebo tatusyomi kuti bantu baku Isilayeli tabaciti milandu iiyoosya, mbuli ndiswe toonse. Isilayeli taninga sandulwa kuzya ku Mulumbe mubotu wa Bunakristu wa lufutuko, nokuba ku milazyo ya Cizuminano Cipya. Paulu ubaamba kuti “mbaasinkondonyina ba Mulumbe mubotu” (BaLoma 11:28). Balo mba mfulumende yaanyika mbweenya mbuli mfulumende zimbi zya mazubaano. Balo bakabweedezyegwa kunyika yakwabo kabatasyomede, mbweenya mbuli bamatata ba lusyomo luna Abulahamu mbubaali kulombozya mulusyomo lwabo.
“Ime ndiyoomuyobolola masimpe nyoonse nywebo, bana ba Jakobe; Ime ndiyoobabunganya basyaalizi ba Isilayeli” (Mika 2:12)
|
Pele bakeelede kujanika munyika, kabatasyomede kutegwa Yahuwah akonzye kubalumbula munyika eeyo, mbweenya mbuli bashinshimi Bakwe mbubakaambilizya. Zishinshimi zinji ziguminizya zintu ziciyoocitika mucisi ca Isilayeli. Mumazuba aazya kumbele eelyo aakwiinda Mapenzi Mapati aatanabwenwe, kulangilwa kuti kuyooba kweempwa mucisi coonse akucengulukila kuli Messiah. “Aboobo bana Isilayeli boonse bayoovwunwa” (BaLoma 11:26). Majwi ookwa Mika aleelela ncobeni aawa: “Ime ndiyoomuyobolola masimpe inywe nyoonse, nobana Jakobe; Ime ndiyoobabunganya basyaalizi ba Isilayeli” (Mika 2:12). Isilayeli woonse mbwazulwa uyoosandulwa kumamanino. Eeci tacaambilizyi kufumbwa muJuuda, nkaambo biyo kakuti muJuuda. Muntu woonse weelede kweempwa akutambula Yahushua a Mulumbe wamasimpe wa Bulelo (Milimo 8:12).
IBbaibbele talijisi lusyomo lwa lufutuko lutakakwi nokuba lutakonzyi kweelebwa, nokuba masena obile aakusalilwa kwakugama. Muntu woonse uleelede kusala, alimwi Yahuwah ulikkomene kuyandisya kuvwuna bantu boonse (1 Timoteo 2:4-5). Kasimpe kakuti tabali boonse bayoofutulwa mbobumboni bwini bwakuti tucilaa ciindi cakulisalila, nkokwaamba kuti, tucibelesya “lwaanguluko lwakusala” kusyoma akuteelela kasimpe ka Mulumbe mubotu, kutegwa tukafutulwe (BaHebulayo 5:9; Johane 3:36; 12:44-50).
Eeci cibalo citali ca WLC cakalembwa aaba Bill Wachtel.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina as Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
