|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Mu Matalikilo 14:18 tulabuzyigwa ku makani Huaa Mupaizi Mupati. Twiiya kuti Melechizedeki uukopa mizeezo ngu Leza Singuzuzyoonse. Walo nguuleleka Abulamu alimwi ngu Leza Mupati Atalaa boonse. Mulimo wakwe uumugaminina tuuzyibidwe, pele nceeci ncotuzyi: Walo wakali mwami waku Salemu alimwi wakali mulanda wa Yahuwah anyika mumazubaayo mataanzi aamukowa wabantu. Eeci cakali ciindi cilamfu kakutaninga ba cisi ca Isilayeli abupaizi bwaba Levi.
Ceelede kusalazyilwa limwi kuzwa mukaambo aaka kalembedwe kuti “wakaleleka Leza Mupati Atalaa Boonse” kuti ooyo Melechizedeki taakali nguwe Yahuwah. Pele biyo antela kuti tweezyeezya kuti Yahuwah Lwakwe Mwini nguwaalipa cileleko, inga twateelelesya kuti ooyo Mupaizi muntu uumbi kutali Yahuwah! Ime ndaamba cintu eeci nkaambo kuli bantu bamwi basyoma kuti Melechizedeki wakali Messiah, alimwi kuti kali Messiah wabupaizi bwa tunsiyansiya, nkokuti Mwanaa Leza.
Mubwini Melechizedeki wakali “mbuli Mwanaa Yahuwah” (BaHebulayo 7:3), mbube eeci caambilizya kuti taakali kukonzya kuti wakali Mwanaa Yahuwah. Melechizedeki tajisi mukowa uulembedwe (“taakajisi wisi abanyina,” BaHebulayo 7:3, mbweenya mbuli bamaJuuda mbubakali kwaamba Sarah ooyo watakazyibidwe luzubo nkwaakazyila). Bazyali Bakwe, tulizyi, kuti tiibakali kuzyila mumulongo waba Levi (v. 6).
Saa Melechizedeki wakali mupaizi biyo naa tulakonzya kuvwuntauzya kuti wakali Silutwe Mupaizi? Kampango kaamba kuti wakali mupaizi wa Sijulu Mupati Yahuwah. Hena kwakali abamwi bapaizi bakasangene mulimo naa wakali biyo Melechizedeki alikke aciindi eeco, aboobo kumubamba kuti abe Silutwe Mupaizi luzutu na? Aawa kutondezyedwe kuti Melechizedeki wakalaalikke, kabeleka mucibaka ca Yahuwah ku mwaalumi (Abulamu) ooyo wakali kuzyootambula “cizuminano” caandene kapati.
Ncintu cikopa maanu kuti Melechizedeki taakalibonya, mu Bbaibbele, kusikila nibaaswaangana a Abulamu. Inga tweezyeezya kuti wakali kupona alimwi akubeleka mulimo kacitaninga citika cintu eeco, pele tatuzyi cini ncaakali kucita. Kunyina citondezya kuti Abulamu wakagambwa kubona Melechizedeki naakalibonya, aciindi buyo naakeelede kutambula kwakkumi kuzwa muli zyakasaalwa kunkondo. Kulangikaanga cakali ncintu caazyibidwe kucitwa, kakwiina kubuzyilila mibuzyo; mbube Abulamu wakapa kwakkumi muli nzyaakasaala. Nkaambo muntu uukkwene maanu taakali kunga wapa zintu zyakwe kumuntu mweenzu ngwatazyi, saa inga tiiceelela kutobela kuti Abulamu bakalizyibene nanka kubaa cilongwe a Melechizedeki?
Eeci cilakondelezya kuti Melechizedeki ulaambwa ziindi zyotatwe mu Bbaibbele — comwe mu Matalikilo kabalaa Abulamu (kujatikizya cizuminano cimwi), alimwi kabalaa Davida mu Intembauzyo 110 (Davida wakatambula cizuminano ca bwami, cakasolweda Messiah) alimwi camamanino mu BaHebulayo 6 a 7 (Cizuminano Cipya). Mubwini, boonse bweende bwa cizuminano bulaantoomwe kwiinda muli Melechizedeki kusikila kuli Abulamu, kuli David akuli Yahushua Messiah. Aboobo zisyomyo zya Yahuwah zyakubikka Yahushua kuti abe mwami a simalelo ziliswaangene antoomwe cakutazandulika acisyomyo ca Yahushua kuti abe mupaizi (Silutwe Mupaizi) kukabe kutamani keendelana amundando wa Melechizedeki. Oobu mbupaizi buteeli, mbuli bwami bwa Messiah atalaa masi woonse.
Mukwiimpanya ku bupaizi oobu, bupaizi bwa Aloni abalunyungu lwakwe bwakali kuzyoosimpa. Mupaizi Mupati mubupaizi bwa Aloni aba Levi wakali kubelekela Yahuwah akukutaukila bantu mbuli mulanda wa Yahuwah mumakani aa milimo yabupaizi. Ooyu nguwakali mulimo amakanze aa bupaizi bwamu Bbaibbele kuzwa ciindi ca Melechizedeki. Nkaambo nzi? Nkaambo mbombuboobu Yahuwah mbwaakabamba kuti Walo unooswaangana a muntu busyu abusyu.
Yahuwah tayimi akataa Nguwe Lwakwe a muntu pe. Walo usala bantu nokuba bangele kucita mulimo ooyo, alimwi kweendelanya aa Bunakristu, ooyo muntu, uubeleka bulemu bwakujulu, uutafwi, Yahushua Messiah.
|
1 Timoteo 2:5 ulaamba cakusalazya akugaminina kuti lino kuli buyo “Leza omwe mwiiminizi omwe akataa Yahuwah a bantu, ooyo mwaalumi Messiah Yahushua.” Mulimo wa Yahushua wa kwiiminina akati ulamanizyigwa kwiinda mumulimo wa Mupaizi Mupati uuli mumulongo wa Melechizedeki. Yahuwah tayimi akataa Nguwe Lwakwe a muntu pe. Walo usala bantu nokuba bangele kucita mulimo ooyo, alimwi kweendelanya aa Bunakristu, ooyo muntu, uubeleka bulemu bwakujulu, uutafwi, Yahushua Messiah. (Yahushua naakali anyika wakali mbuli mupaizi mupati, BaHebulayo 9:11.) Kufumbwa kusungilizya kuti Yahushua ngu Yahuwah alimwi ngu Silutwe Mupaizi ncintu citakwe maanu nokuba buti, nkaambo kuti kali Yahuwah wakabaanga ngo “wiinda akati,” nkokuti saa mumuzeezo ngweenya ooyo, hena kufumbwa muntu inga wataminina kuti ooyo wiimvwi akati ngu Yahuwah? Ikuti Yahuwah kali nguuyiminina akati, ino kwiiminina akati ncocitali kwaamba biyo kuti, “Ime ndiyooba mwiiminizi akataa ndime a muntu”?
Kuli twaambo tunjaanji twakusunkya tunsiyansiya tujatikizya buleza mbwaambwa Yahushua Messiah. Yahuwah takonzyi kufwa, Yahuwah takonzyi kusunkwa, Yahuwah takonzyi kusofwaala, Yahuwah nkwali kuli koonse, alimwi lino twabona ciimo acimwi: Yahuwah takonzyi kuba Silutwe Mupaizi. Yahushua Mupaizi Mupati alimwi aboobo takonzyi kuba Yahuwah. Ooku nkokukosozya makani kuzwa mutwaambo tobile.
Kuli zinjaanji zinga zyaambwa kuguminizya ciiyo ca bupaizi mu BaHebulayo zyaandaano 6-9. Ndafwiinsya kubunganya twaambo tulibonya kapati. Bupaizi bwaba Levi bwakali bupaizi bwaciindi cisyoonto bwakasalidwe kwiiminina akataa Yahuwah a Isilayeli. Ooyu mulimo wakazuzikwa naakasika Yahushua mumusela wabantu kali Mupaizi Mupati wabantu bamisela yoonse. Lino ulikkazyikidwe kujulu kujanza lyalulyo lya Yahuwah alimwi unookkede mbweenya oobo kusikila kuciindi ca kuzyokolola Bulelo anyika eelyo Yahushua aakuboola.
Malembe aali mubbuku Torah lyabupaizi akacincwa, Mupaizi Mupati awalo wakacincwa mubbuku Torah eelyo lyakali kubelesyegwa mubupaizi alyalo lyakacincwa (BaHebulayo 7:11-12). Kwakaambilizyigwa kuti Yahushua wakakomezyegwa kuzwa mulunyungu lwa Judah, ooyo mukowa watakaambidwe nociba comwe ciguminizya bupaizi. Pele Yahushua wakaba Mupaizi Mupati nokuba kuti kwakali zintu zyakali kuyandika eezyo zyakabandaukidwe mubbuku lya Torah. Buti kayi? Kwiinda mukuyanda kwa Yahuwah, alimwi kwiinda mumulimo wa Messiah amu caabilo citeeli ncaakatuuzya acipaililo mubusena Bwiinda Kusetekena, wakaba mupaizi kukabe kutamani mumundando wa Melechizedeki.
Koyeeya alimwi ciindi cibotu eelyo Yahuwah Taata naakasalazya akululamika cilongwe akataa Nguwe a Mwanaakwe, Silutwe Mupaizi uumaninide. Mangwalo aamba kuti, “Cilisalazyidwe kuti Simalelo wesu wakakomezyegwa kuzwa mulunyungu lwa Judah” — kutali kuzyila kujulu, kutali kuzwa kutamani kusyule lya ciindi! Alimwi, BaHebulayo 7:15 baamba kuti “Eno cilainda kumvwika kuti, muciimo mbuli ca Melechizedeki [muntu susu, v. 4], kwalibonya mupaizi uumbi.”
Mucisyoonto 24 Yahushua utambula bupaizi butacincululwi. Nkaambo nzi? Kuleka kuti ngu Yahuwah akuti lyoonse bwakali bupaizi bwakwe pe, pele nkaambo naakabusyigwa ku lufu, wakazumanana mulimo ooyo kukabe kutamani. Walo wakatambula cuuno eeci kwiinda mukulyaaba.
Mu BaHebulayo 8 tubala kuti Yahushua wakeelede kulyaaba lwakwe kutegwa anjile mu Busena Bwiinda Kusetekena, mbuli bwaali kucita Mupaizi Mupati wa baLevi mu Cizuminano Cakale mubuzuba bwa Lumvwano. Mu BaHebulayo 8:3 tubona kuti “ooyu [Yahushua] wakalaa cituuzyo cakupa” alimwi, mbombubo, eeco cipo bwakali buumi bwakwe, bulowa bwakwe mwini acipaililo. Aboobo nkaambo kacituuzyo eeci “walo wakatambula mulimo wiinda kubota, mbweenya mbwali mwiiminizi wa cizuminano cibotu kwiinda cakainda kale.”
Yahushua takonzyi kuba Yahuwah a Mupaizi Mupati aciindi comwe nceenya, alimwi nkaambo cilisalazyidwe kuti walo ngo Mupaizi Mupati, aboobo takonzyi kuba Yahuwah. Bapaizi bakali kusalwa kuzyila akataa bantu (BaHebulayo 5:1) |
Bupaizi bwaba Levi bwakali bwa ciindi cisyoonto alimwi bwakeelede kwaatulwa akubikka nzila mpya. Eeyi yakayeeme mukumvwisisya kutamani ciimo camuntu mbocibede kuba ancokuyandika Mupaizi Mupati mupya uutonkomene, uulondokede alimwi waluzyalo. Aaya ngaakali makanze ookwa Yahuwah kuli Messiah. Ikuti nicakali mumuzeezo ookwa Yahuwah kuti Messiah “wakatuuzyigwa kuzwa kumalengelo aanyika” (Ciyubunuzyo 13:8), nkokuti nkwaamba kuti Yahuwah wakalizyi kuzwa kumataliklo kuti Melechizedeki wakali mukonzyanyo wa bupaizi buteeli alimwi aboobo bupaizi bwaba Levi bwakali bwa ciindi cakapimidwe.
Zyaandaano zya BaHebulayo 6-9 tazyeelede kusinikizya kweezyeka lusyomo lwa tunsiyansiya lwakaboola aakale twa Buleza bwa Messiah. Kunyina citondezya aawa kuti kuli muntu umwi kunze lya mwaalumi Messiah Yahushua uuzuzika mulimo mupati kwiinda yoonse wa mupaizi amwiiminizi, pele biyo mubweende bwa Cizuminano Cipya. Eelyo notulekela Mangwalo kuti kaakunka kuzwa ku BaHebulayo nkwaakazyila, inga twanywa ncobeni meenda aalweela aapa buumi.
Yahushua takonzyi kuba Yahuwah a Mupaizi Silutwe aciindi nceenya comwe pe, alimwi nkaambo cilisalazyidwe kuti walo ngo Mupaizi Silutwe Mupati, aboobo nkokuti walo takonzyi kuba Yahuwah. Bapaizi bakali kuswalwa kuzwa akataa bantu (BaHebulayo 5:1).
Eeci cibalo citali ca-WLC cakalembwa aaba Terry Anderson.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina as Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
