|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
“Kayi zyoonse zinyama nzyaakalenga Yahuwah nzibotu, alimwi tazyeelede kulesyegwa naa zyatambulwa amoyo uulumba: Nkaambo zilasalala kwiinda mu Majwi aa Yahuwah akukomba cakulumba” (1 Timoti 4:4, 5)
Inga catubeda kabotu kumvwisyisya bwinibwini ciiminina mizeezo eeyi. Mu kampango 3, Paulu waamba kuti kuyooba bantu akati kabo bayoolailila "kulilesya zyakulya eezyo Yahuwah nzyaakalengela kutambulwa amoyo uulumba kuli baabo basyoma akuzyiba masimpe."
Zilikke zinyama eezyo Yahuwah nzyaakalailila bantu kuti balye zyakali kusalala (langa Ba Levi 11; Ciibalusyo 14).
|
Aawa majwi aalaa kaambo ngakuti “Yahuwah ncaakalenga kuti citambulwe amoyo uulumba.” Zilikke zinyama eezyo Yahuwah nzyaakalailila bantu kuti balye zyakali kusalala (langa Ba Levi 11; Ciibalusyo 14). Aboobo, eezyo zinyama aaba bamayi babeji nzyobalesya kulya nzinyama zisalala! Pele ino nkaambo nzi kulesyegwa kulya nyama zisalala? Paulu taakali kwaamba buyo baabo balya zisyu-mani luzutu pele bamayi babeji aabo batamanina kuti nyama zisalala zyakaba zitasalali mumulawo nkaambo zyakaulwa kuli baabo bakomba mituni aabo batuuzya zinyama eezyo ku mituni yabo. Paulu wakaswaanganya twaambo ootu aku Bakolinto basyoma:
“Lino kwaamba makani aakulya zilyo zipaizyigwa ku mizimo, swebo tulizyi kuti mizimo taakwe, akuti taakwe Yahuwah kunze lya omwe buyo. Nikuba kuti nkobali aabo bategwa baleza mujulu naa ansi (iiyi mbanji-banji bategwa mbaaleza, abalo bategwa bami mbanji-banji) pele kuli ndiswe kuli buyo Yahuwah omwe, Taata, wakalenga zyoonse alimwi uuli ngotuponena, andiswe tuponena Mwami Yahushua Messiah, ooyo kwiinda muli nguwe motuponena. Nokuba boobo, tabali boonse balaa luzyibo oolu pe. Pele bamwi bakazibila kukomba mizimo kuzwa leelyo kusikila sun; balya zilyo zipaizigwa ku mizimo kayeeya kuti cilyo eeco capaizigwa. Lino nkaambo kakudonaika myoyo yabo ilabisyigwa acilyo eeco. Masimpe ngakuti kulya takutusisyi kuli Yahuwah pe. Kuti naa tatulyi, tatusweekelwi cintu, alimwi kuti twalya tatujani cintu." (1 Bakolinto 8:4-8)
Katuya kumbele, twasika aawo aali ncayanda kubandika Paulu. Walo takazyi kuti zinyama zitasalali lino zileelela kuligwa, nokuba boobo ulabandika “makani aajatikizya zyakulya zituulwa ku mituni.” Mumubandi ooyu, Paulu waamba kuti cili kabotu kuli nduwe kulya zyakulya zyakali kutuuzyigwa ku mituni kaindi nkaambo “kuli ndiswe, kuli buyo Yahuwah omwe, Taata, ooyo iwakalenga zintu zyoonse.” Alimwi, eezi nzinyama zisalala nzyotubandika aawa. Kunyina mweelwe wa kupaizya uunga wasofwaazya ceeco Yahuwah omwe wakasimpe ncaakaamba kuti cilasalala
Kuleka buyo kuti tiicakali kusyomwa kuti zinyama zisalala zyakasofwaazyigwa nkaambo kakupaizyigwa ku mutuni nokuba kuguma cinyama citasalali, pele bakalilubide kusyoma kuti muJuuda ulasofwaala eelyo nagumana a muntu wa masi! Yahuwah wakalulamika kuteelela kwa Petulo mu Milimo caandaano 10 eelyo Walo naakapa Petulo cilengaano ca zinyama zisalala azitasalali kazili antoomwe akuselusyilwa mumulembo.
Paulu uya kumbele kuti tabali boonse balaa luzyibo oolu lwa Leza omwe wamasimpe a Mwanaakwe, aboobo eelyo nobalya nyama eeyi, balo balalubizya kusyoma kuti balasofwaazyigwa nkaambo myoyo yabo tiikwe nguzu akaambo kakusyoma kuti eelyo nobalya cintu eeco, balo “balya cintu capaizigwa ku mutuni.”
Mpoonya Paulu ulailila ndiswe kuti tucenjele eelyo notulya nyama notuli akati kabo:
“Amucenjele kuti lwaanguluko ndomujisi citabi cilebyo kuli baabo batasamide mulusyomo. Nkaambo kuti naa umwi wakubona, yebo oolaa luzibo kolya mukaanda ka mizimo, sena eeci tacikwe kumusungula kuti awalo alye zilyo zipaizigwa ku mizimo na?” (1 Bakolinto 8:9, 10)
Paulu aawa waamba kuti aabo balaa mizeezo iitakwe nguzu kuti bakubona kolya cakulya capaizigwa ku mutuni, mizeezo yabo inga yaanka kwaanguluka kuti cili kabotu kulya cilyo eeco cipaizyigwa ku mituni amuzeezo uulubide. Balo inga kabayooyeeyela kuti cili kabotu kuli nduwe kulya zyakukombya mizimo.” Paulu ulazumanana kuti:
“Aboobo nkaambo ka luzyibo lwenu, ooyo uutasiminide ulasweeka akaambo kanduwe oolaa luzyibo? Wacitya boobo kumukwesu ooyo Messiah ngwaakafwida? Lino ciindi ncomubisizya boobo basyomi akulubizyila badonaika mwabisizya Messiah. Aboobo kuti naa cilyo calebya mukwesu, nsikooyoolya limbi nyama kuti intakalebyi mukwesu pe.” (1 Bakolinto 8:11-13)
Paulu ulailila ndiswe kuti tutanoolidi waawo mpobabede nkaambo ka mizeezo yabo yuubukide akubula nguzu. Ncencicceci Paulu ncaamba kuti, “Masimpe ngakuti kulya takutusisyi kuli Yahuwah pe. Kuti naa tatulyi tatusweekelwi cintu, alimwi kuti twalya tatujani cintu” mu kampango 8. Aboobo, nokuba kuti cili kabotu kulya cakulya eeco utalyi koli akati kabo, nkaambo inga walengelezya kuti basweeke. Paulu ulazumanana makani aaya mu caandaano 10:
“Kamulya kufumbwa ncobauzya mucisambalilo ca nyama kakutakwe akubuzya-buzya (naa capaizyigwa ku mituni naa pe) mukuti moyo ulamukatazya nkaambo kulilembedwe kuti “Nyika njiya Mwami azyoonse zili muli njiyo”. Kuti naa umwi wabatasyomi wamutamba kukulya, mwamana mwainka anguwe, amulye kufumbwa eeco ncimwasombwa kakutakwe akubuzya-buzya mukuti moyo ulamukatazya. Pele kuti naa umwi wamwaambila kuti “Eeci cilyo ncicipaizyo ca mizimo” mutalyi nkaambo kayooyo wamwaambila , kuyoowa kupenga mumoyo. Ngamba moyo wakwe, kutaamba moyo wanu. Ambweni inga wati, “ Nkaambo nzi ncetinsiye lwaanguluko lwangu nkaambo kakuti umwi ulapenga mumoyo?…” (1Bakolinto 10:25-29)
Aboobo, nkaambo ka mizeezo yabantu batasyomi, mutanoolyi cakulya cituuzyilwa ku mituni ikuti balo bamwaambila kuti capaizigwa ku mituni nokuba kuti kamuzyi kuti cili biyo kabotu kucita boobu. Eelyo Paulu naamba kuti, “kamulya kufumbwa ncimwasombwa,” walo taambi nyama zitasalali, pele nyama zyakaabilwa mituni nkaambo “kuli ndiswe kuli biyo Yahuwah omwe, Taata, kwiinda muli Nguwe zintu zyoonse muzyaabeda, alimwi swebo tuli Bakwe, a Mwami omwe Yahushua Messiah, ooyo kwiinda muli nguwe zintu zyoonse muzyakalengelwa, alimwi kwiinda muli nguwe swebo tulapona.”
Lino katwaambide boobu, atujokelele kuli 1 Timoteo:
“Kayi zyoonse Yahuwah nzyaakalenga nzibotu tazyeelede kulesyegwa naa zyatambulwa amoyo wakulumba: Nkaambo zilasalazyigwa a majwi ookwa Yahuwah alimwi akukomba cakulumba zilasalala.” (1 Timoteo 4:4, 5)
Alimwi, Paulu taambi “kufumbwa cinyama” kusanganya aa ngulube, zyuuka zya mumeenda zilaa cikaye, zyuuka zya mumeenda zilaa njili, azimwi zinjaanji. Walo waamba cinyama cisalala nkaambo “cakasalazyigwa mu jwi.” Eezyo nzizyeezyo zijanwa mu BaLevi 11 amu Ciibalusyo 14.
Zilikke zyakulya nzizyeezyo zyeendelana a Mulawo ookwa Yahuwah waku malengelo...
|
Pele hena Paulu taambi kuti zilakonzya “kusalazyigwa a mupailo na”? Peepe, Paulu taambi kuti kupailila nyama iitasalali inga yasalazyigwa pe. Kupailila kaseseko naa kaampaafwa, mitendu ya ngulube, nyama ya ngulube, zyuuka zya mumeenda zilaa cikwa, nyimbaansalama, zyuuka zilaa njili, nokuba nyama ya mubwa kuti inga tiicapa kuti eezyo zyeelele kuba cakulya; mbweenya buyo akupailila musanga wa tombwe mbokutakonzyi kupa kuti upe buumi bubotu ku mubili. Hena yebo uyeeya kuti kupailila nkomeki ya mungwimba wa kweenzya mootokala inga mpoonya aawo capa kuti ube kabotu kuti yebo unywe na? Zilikke zyakulya nzizyeezyo zyeendelana a Mulawo ookwa Yahuwah waku malengelo, taakwe makani naa mupailo wako ulisinizyide naa mulamfu buti:
“Kuti naa muntu taswiilili zyaamba mulawo, nikuba kukomba kwakwe kulasesemya.” (Tusimpi 28:9)
Mubwinibwini bwa ciyootola busena kumamanino aaciindi, Izaya upa kucenjezya kwakuti:
“‘Aabo [balipenzya] kulisalazya akulibambilila kuya kumyuunda [kuyoopa zituuzyo ku mituni], batobela umwi uuli akati kabaabo balya nyama ya ngulube abasikoswe azintu zimwi zisesemya, boonse bayoolobela antoomwe Mbwaamba Mwami Yahuwah (Izaya 66:17, Amplified Bible, majwi aali mutokobelezyo akazyila mumalembe mataanzi)
Eeci ncibalo citali ca-WLC cakalembwa aaba Kevin J. Mullins.
Twakagwisya mucibalo citaanzi mazina aamituni woonse ngobaulikide taata a Mwana, akubikka mucibaka cangawo mazina mataanzi ngubaapedwe. Kuyungizya waawo, twakojokolosya mu Mangwalo mazina aa Taata a Mwana, mbuli mbwaakalembedwe kutaanguna a balembi ba Bbaibbele bakayoyelwa moza. Nkamu ya-WLC
