|
“Amubacenjelele bashinshimi babeji, aabo baboola kuli ndinywe kabasamide zikutu zya boya bwa mbelele ani mukati mbaa wumpe.” Mateyo 7:15 ESV |
Taata Yahuwah wakabaletela mumuni wa bubambe bwa nyika bafundisi ba Seventh-Day Adventist Church (SDA) kumamanino aamusela wa kkumi afuka. Ooyu mumuni wakakkomaninwa akutambulwa abasicikomblelo bangaye buyo, aabo bakali kulangila kuti Ellen White alakwe ulawutambula, nkabela akujulila mbungano kuti izumizye masimpe aayo ku cikombelo. Bakanyandwa, Ellen White wakabafubaazya mu kukakatila kwabo akwaambilizya twaambo tugambya anselelo aawa. Walo wakaimina ambaakani yakuti Cikombelo ca SDA tiicakazumizya masimpe aakuti nyika ilipapalele. Tabakonzyi kuzumizya ceeco Ellen White ncaakakaka. Atulangalange ncaakali kwaamba:
Mukubwekaangala 15, 1887, ku Basel, Switzerland, wakalembela:
Ooywandwa Mukwabo Brown,
Ime ndakamvwa mumagwalo aazwa ku New York kuti mukwabo Brown wakatambula alimwi ecino ciindi ukambauka muzeezo wa nyika iipapalele. Cilakonzyeka kuti ooyu muzeezo wakatalisyigwa aa Mukwabo Wilcox waku England, ono nywebo mwakuutambila akutalika kuyiisya na? Mukwabo, mulimo wesu ngwa kuyiisya mulumbe wa mungele watatu. Siminina ku mulumbe ooyo. Nkubula nguzu kwa Mufundisi Wilcox kuti atalike zyakusobana akulamatila zintu zimwi nzyayelede kuleka biyo.
Kufumbwa musyobo wa muzeezo nokuba cintu cakusobanya eeco Saatani canga wabelesya kujata maanu aabantu, walo ubakwelela maanu kuli ncico, kutegwa baleke kwaambilizya mulumbe wakusinizya wa cecino ciindi. Mukwabo, utacegwi mumizeezo iitajatikizyi mulimo wa ciindi cino. Cilainda kubota kuyiisya kasimpe mbuli mbokabede muli Jeesu. Cilainda kubota kuyandaula bubotu bwa Leza, kusetekana mu moyo, kwaanguluka kuzwa ku buunyu boonse, kwaanguluka ku kunyonokela akufwida munyono.
Cilainda kubota kupaila akulibatamika muya kunembo lya Leza, akulekela nyika, naa ibumbidwe mbuli mbumbulu nokuba kupapalala, kaiba biyo mbweenya oobo Leza mbwaakiilenga. Kosoleka kusinizya akusyomeka kuzumanana kucita zibotu akulangila zina litakwe kampenda mu kukona nyika iilenguludwe bupya. Cilabota kuti yebo wasolweda nkamu ya Leza kuyoonywa ku tusensa twa kujulu; cilabota kuti kwiinda mu malembe amikonzyanyo webo wayandaula Leza eelyo Walo nacikonzya kujanwa. Komwiita Walo nacili aafwaafwi. Kuli kubukuluka kweelede kuba mu cikombelo. Eelyo bafundisi nobanywa bupya kuzwa mu mugonti waku Betelehema, ndendilyo nobakonzya kusolweda bantu ku meenda aabuumi. Muya wangu walemenwa amukuli wa zintu zicitika ku New York. Mwami aayimikizye bagwasyi, banalumi aabo Walo mbakonzya kuyiisya, banalumi Walo mbakonzya kusolweda kuti bape bumboni busalala, butonkomene mu lusyomo. Leza akugwasye yebo kulangaula busyu Bwakwe, akweenda kabotu-kabotu, akugwisya kuliyanda kuzwa antangalala, akusumpula Jeesu.
Ime ndasyoma Mukwabo Wilcox uyooba mwaalumi uusandukide ncobeni. Eeci ncecintu cipati ncabulide cino ciindi. Walo uyandika kuteteeta moyo, uyandika kubomba, uyanda kulyaaba cinicini, alimwi kuti kakwiina eeco uli mbuli mulangu uulila nokuba cikwankwani cikonkonwa. Muya wakwe amuya wako uyandika Jeesu uukkalila mukati ka moyo. Kaciba biyo naa nyika ili mbuli mbumbulu naa ilipapalele tacikonzyi kuvwuna muntu, pele kuti bantu basyoma akuteelela eeco kaceendelana caambilizya zintu zyoonse. 1
“Ziiyo Zitayandiki Zyeelede Kweelebwa,”
Ivwivwi 12, 1904. Cakalembwa aaba Ellen G. White ku Omaha, Nebraska
Kuleelede kweeleba mazwanga. Swebo tweelede kukanana kasimpe mu luyando. Lusyomo lwakubeja lwa musyobo uuli woonse luyooletwa kuti lukwelelezye mizeezo kuzwa kuli “Nceeci ncaamba Mwami.” Kufumbwa nkotwagama, swebo tuyoojana bantu kabalibambide atwaambo kumbali. Eelyo Ime neekali ku Melrose, umwi mwanalumi wakaboola amulumbe wakuti nyika ilipapalele. Ime ndakalaililwa kuti ndipe mulumbe waciindi cino ooyo Kristu ngwaakapa basikwiiya bakwe kaindi kasyoonto kataninga tanta kuya kujulu, mbuli bulembedwe muli Mateyo 28:16-20.
Swebo tatweelede kuzumizya mizeezo yesu kunjilwa ziiyo mbuli bwa ceeco ncaakaleta muntu ooyu. Kweendelanya aziiyo zili boobu, Leza waambila muntu woonse kuti, “Cilaa mulimo nzi kuli nduwe eeco? Webo kotobela Ndime. Ime ndakutuma kale mulimo wako. Kokkalilila mu tusimpe tupati tusunka twa ciindi cino, kuleka kuya mu twaambo tutakwe ncotwiiminina mu mulimo wesu.”
Ciindi a ciindi alimwi eezi ziiyo zitakwe mulimo zyakavwundaulwa, pele mibandi yazyo tiiyakoolola cintu cibotu nociceya. Swebo tatweelede kuzumizya maanu eesu kuti akwelelezyegwe kuzwa kukwaambilizya mulumbe ngotupedwe. Kwamyaka minji Ime ndakalaililwa kuti tatweelede kubikkila maanu ku mibuzyo iitakwe mulimo. Kuli mibuzyo iilaa cikkelo kapati yeelede kubikkilwa maanu. “Ncinzi Ime ncenga ndacita kuti ndibaa buumi butamani?” similawo mbwaakabuzya Kristu. Mufutuli wakamwiingula kuti, “Ninzi cilembedwe mu mulawo? Ubala kuti nzi webo?” “Webo weelede kuyanda Mwami Leza wako amoyo wako woonse, amuya wako woonse, anguzu zyako zyoonse, amuzeezo wako woonse; alimwi a simukobonyoko mbuli mboliyanda lwako.
Eeyo mibuzyo Messiah njalanganya kuti njiilaa mulimo njenjiyo njotweelede kukulwaizya sunu. Swebo tatukulwaizyidwe kunjila misalo iijatikizya ziiyo zitakwe mulimo. Mulimo wesu ngwa kusolweda mizeezo ku milazyo mipati ya mulawo wa Leza.2
“Aabo baleta mizeezo yakuti naa nyika ili mbuli mbumbulu naa ilipapalele, baleke mubuzyo ooyu, nkaambo Leza taabapa kuti bawiingule, alimwi balibuzye cakusinizya kuti, “Ncinzi Ime ncetiicite kutegwa ndibaa buumi butamani?” Abateelele kwiingula kwakuti, “Webo weelede kuyanda Mwami Leza wako amoyo wako woonse, amuya wako woonse, anguzu zyako zyoonse, amuzeezo wako woonse: alimwi a simukobonyoko mbuli mboliyanda lwako.”3
“Mibuzyo iitakwe mulimo iyooletwa abaabo batasalazyi miya yabo kwiinda mukuteelela kasimpe. Bayoolezya kusika aciga cakuyanda Leza cakumaninina a simukobonyina mbuli lwabo beni. Ime ndakatumwa kwaamba kuti mpasulula balozi ziyooletwa kuti zitole busena bwa Mulumbe uusalala wa Jeesu Kristu. Imulumbe ulipedwe kuti, “Bamwi bayooyaamika kuzwa ku lusyomo, akumvwidilila miya iiboongelezya, a ziiyo zya badyabooli.” Eeli jwi lyali kuyaa kuzuzikwa akataa bantu besu.4
“Melrose, Mass., mu Nsondo, Itwi 28, 1904—Ime ndikanana ku bantu aabo bayoobungana ku civwuka ca miswaangano ku Melrose. Muzeezo wangu uli gwitide kapati aano mafumofumo. Ime ndakaletelwa twaambo kuli ndime twakupa bantu besu. Kumwi kukumbila kwakujata maanka kwakandisikila kuzwa kumwaalumi ooyo wakali kuyanda kuti abandike aandime kujatikizya nyika iili muciimo ca mbumbulu—kuli nguwe aaka kaambo nkalemu kapati. Bwiinguzi bwangu mbwakuti, “Ime ndaa mulumbe wakwaaba uujatikizya buumi mbobeelede kupona munyika eeyi kuti balibambile ku buumi buciboola oobo bweelene a buumi bwa Leza. Tatujisi cakucita ku mubuzyo wakuti naa nyika ili mbuli mbumbulu naa ilipapalele. [Cintu cipati] nkunyonena Leza amakanze aamoyo uulenguludwe bupya, uusalazyidwe alimwi akusetekanyigwa kwiinda mu bulowa bwa Jeesu Kristu.”
Hena ncintu cikonzyeka kweezyeezya kuti Yahuwah uyokwiita mushinshimi/mutumwa wa mamanino aaciindi ooyo uutabikkili cikkelo nociba buti ku zilengwa leza zya Yahuwah, alimwi eelyo naletelwa masimpe aazintu eezyo, ubwentela baabo balemedwe mukuli wa kwaabanya kasimpe ka malengelo Aakwe? Batobeli ba Ellen White beelede kutontomana kulizeeza mibuzyo eeyi.
|
“Kufumbwa kaambo kayooletwa mumasena aayindene abantu bamwi batabelesyegwi aa Muya wa Leza. Ijilo masiku Mwami wakandipa mwajwi aakukanana ku bantu. Saatani ulijisi mbwelekete mibuzyo yakuleta kwiinzya mumizeezo amubumpelenge kubee ilaa mulimo. Amubweze Jwi, lyalo lilaamba munzila iisalala kasimpe ka mu 1904; alimwi imutumwa ngwaakatuma Leza wakalaa mulumbe uukonzyene mbuli yooyo ngobayanda bantu cino ciindi. Ooyo wakali Johane Mubbizyi.5
“Ime umwi wakandiboolela kayanda kuti ndimupe makani aa nyika ili mbuli mbumbulu nokuba iipapalele. Ime ndakati, Ime nsyekwe mukuli uuli boobu ku moyo wangu nuuceya pe. Ime kunyina ncejisi cakukwaambila nokuba kuli umwi ca nyika ili mbuli mbumbulu naa ilipapalele. Icintu ncotuyanda nciimo cibulungene. Tujisi kale ciimo canyika iipapalele, alimwi ncotuyanda lino nkuyaka ciimo mbuli ca mbumbulu kulondoka, mbuli Taata wesu uuli kujulu mbwa londokede, alimwi tuyanda kuti kufumbwa cipego ncopedwe kuli Leza cibe ncoyelede kubelesya. Kukomena mu luzyalo amuluzyibo lwa kasimpe, kutegwa yebo ukonzye kuya kumbele, alimwi—Kristu waamba kuti nzi? Amubayiisye zintu zyoonse zijatikizya nyika ili mbuli mbumbulu na? Peepe. Eezyo Ime nzyeekamulailila inywe. Eezyo nzyenyintu nzyotweelede kuyiisya. Amubayiisye ziiyo eeyo Kristu nzyaakapa mumulimo wa buumi bwakwe.6
Lino mbokuli makumi aatumpango twa Bbaibbele ooto tugwasyilila ciiyo cakuti nyika ili akataa mulengalenga wa malengelo woonse, kwiimpanya ku muzeezo wakuti nyika izinguluka zuba, hena cilakonzyeka kweezyeezya kwakanzumina komwe kuti Taata Yahuwah uyootumina mushinshimi wa mamanino aaciindi ooyo uyoonyansya caali kukaka tumpango twa Bbaibbele ooto tuyubununa malengelo Aakwe mbwaabambidwe bulengwe bwini na?
Mbubuti mushinshimi/mutumwa ookwa Taata Yahuwah mbwanga wauntuluzyila Mulumbe wa Mungele Mutaanzi wamu Ciyubunuzyo 14, ooyo uulailila bantu kuti bakombe Yahuwah Mulengi wa julu anyika? Hena cileelela kuti Taata Yahuwah uyootambula kukomba Nguwe kwesu kuti ngo Mulengi eelyo nozaanyana kuzumizya muzeezo wiimpene wa malengelo kuleka boobo mbwaakalenga Walo na? Hena cilakonzyeka kweezyeezya kuti Yahuwah uyokwiita mushinshimi/mutumwa wa mamanino aaciindi ooyo uutabikkili cikkelo ku bubambe bwa malengelo ookwa Yahuwah, alimwi eelyo naletelwa masimpe aamalengelo aayo, walo waanka kubwentela baabo balemedwe mukuli wa kwaabanya kasimpe ka bubambe bwa malengelo Aakwe na? Batobeli ba Ellen White beelede kutontomana kulizeeza mibuzyo eeyi.
1 Lugwalo 43, 1887. 21MR 412.6-413.3
2 17MR 303.3-304.3
3 21MR 419.6
421MR 420.1
5 21MR 421.3-421.5
6 Ms155-1904.79
