Print

Wazimina Mumubili Pele Balaantoomwe A Mwami

Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa.

wazimina mumubili pele balaantoomwe a mwami

“Tulaacamba, Ime mbweng'mba, alimwi tulayandisya kupola mumubili, akuyooba antoomwe a Mwami” (2 Bakolinto. 5:8, KJV). Aaka kaambo kavwuzya kubelesyegwa mukuyiisya kuti lwasika lufu, Munakristu ulayimpuka atalaa anyika eeyi kuti akaakukkale aa Yahushua katakwe mubili. Pele kubula mubili tacili ncaakali kulombozya Paulu. Kunze lyaboobo, Paulu utondeka ku mubili mupya, mubili uutafwi, mubili uuyoya ooyo “uyoosukama akusanikwa bukkalo bwesu buli kujulu” (v. 2).

Muuya uutakwe mubili naa muzimo uuzumanana kupona, akubeleka aanga muntu, eeci cikonzyene aampuwo iikopa yabu Giliki yakanjila cikombelo mumisela yansiku alimwi yakalaa mpuwo iinyonyoona mulumbe mubotu.

Paulu ubelesya kaambo nkeenya ka “kusamikwa” mu 1 Bakolinto 15:54 (NIV) alimwi upandulula bweende bwazintu ziyootola busena kumbelaa mazuba aa banakristu. Banakristu bayootambula mubili uuyoya mupya uutafwi kutali aciindi nobafwa, pele baakubuka kuzwa kubafu eelyo Yahushua aakuzyokela. Makani eeni aali mukampango kadumide aaka (2 Bakolinto. 5:1-9) amu 1 Bakolinto 15 antoomwe atumpango tunjaanji mu Bbaibbele, apa ndiswe “kaano koonse mbokabede.” Mbuli mbobaamba, kampango katakwe kaambo nkakucengeezya biyo. Bulumbu bwesu (2 Timoteo. 4:8; Ciyubunuzyo. 22:12) nkubusyigwa kuzwa kubafu akuzyokela kwa Messiah (1 Bakolinto. 15:23). Kunjila mu Bulelo buteeli bwa Yahuwah a Messiah (2 Timoteo. 4:1; 2 Petulo. 1:11) akwalo kweelede kulindila kuboola kwakwe.

Nokuba boobo aaka kaambo kalikke mu 2 Bakolinto 5:8 nkakavwuzya kwiinduluka kwaambilizyigwa aciindi nobafwa Banakristu ategwa mpoonya aawo mbubafwida biyo baya kukutambula bulumbu bwabo kujulu kabatakwe mibili akubikka kumbali kuboola kwa Yahushua nokuba kubuka kuzwa kubafu. Paulu utalisya kupandulula mbwayandisya kuzwa mumubili ngwajisi cino ciindi, uutakwe nguzu, uufwa, mubili uuli munzila kufwa “notutongela” (v. 4). (“Maawe! Ndemuntu uusampukide ncobeni Ime! Nguni uutaandivwune kuzwa kumubili walufu ooyu?” BaLoma.7:24). Paulu ulangila “kuyoosamikwa cikkalilo cesu cakujulu...nkaambo swebo tatulombozyi kusamununwa [kugwisyigwa] pele kusamikwa mubili uubusyidwe kuzwa kubafu (v. 2-4; 1 Bakolinto. 15:21-23).

Mukwaambilizya mubili wesu waanyika, walo ubelesya mikonzyanyo mbuli yakuti “civwuka caanyika” akuti “civwuka.” Mukwaamba mubili wesu uutafwi uubusyidwe kuzwa kubafu, walo ubelesya mikonzyanyo mbuli yakuti “uuyakidwe,” “Ĺ‹anda iiteeli iili kujulu” akuti “cikkalilo cakujulu” (ziindi zyobile). Inzya ncobeni, eelyo notufwa, ooyu mubili waanyika (uufwa) ula “nyonyoonwa” (v. 1). Eeco muli lwaco tacili cintu cini ncalombozya Paulu. Eeco nciimo cabuntu ceelekwa mubili “uusamunudwe” uulaa “mantanda” (uutasamide cintu). Mukwiimpanya, Paulu ulombozya ciimpene aceeco “cisamunudwe” acilaa “mantanda” (cifwide, mubwini). Walo uyandisya “kusamikwa,” “kuccaula,” atwaambe boobo, mu “cikkalilo ca kujulu.” “Kwaino tulatongooka, katulangila kusamikwa cikkalilo cesu cakujulu, nkaambo twaakusamikwa, tatukajanwi katulaa mantaanda” (v. 2-3).

Caandaano cipati cakubuka kuzwa kubafu (1 Bakolinto. 15) ciyungizya kupandulula makani aaya. “ Nkaambo eeci ciboleka ceelede kusamikwa citaboli, alimwi acalo cifwika ceelede kusamikwa citafwiki. Eelyo ciboleka caakusamikwa citaboleki, acifwika caakusamikwa citafwiki, ndendilyo eelyo kaambyo kalembedwe nokayooba masimpe: ‘Lufu lwalobelela mukuzunda’” (1 Bakolinto. 15:53-54).

Atweezyeke eeci ku kampango kesu kakuti: “eeco cikonzya kufwa cilamenwa a buumi” (2 Bakolinto. 5:4). Bulangizi bwesu takuli kuba muzimo wiingaila uutakwe mubili. Bulangizi bwesu mbwakubaa mubili mupya, mubili uuzyandamene, “mubili uubekema.”

Akaambo kaako tweelede kulindizya Yahushua akaboole kuzwa kujulu: “Pele iswe tuzulilwa mumunzi uuli kujulu. Alimwi nkukonya nkotulangila Mufutuli, Mwami Yahushua Messiah, ooyo, kwiinda munguzu zimupa kuti ayendelezye zintu zyoonse, uyoosandula mibili yesu iisampukide, akwiisandula kuti ibe mbuli mubili wakwe wabulemu” (BaFilipo 3:20-21).

Ono atulange cifwanikiso coonse mbocibede, ncintu camaanu kukosozya makani kuti Paulu wakali kubandika kuyandisya kwakwe kuti aciindi aawo azwe “mumubili uufwa.” Walo wakali kulangila ciindi ciciboola kumbelaa mazubaano eelyo walo nanooli aa Mwami akubuka kuzwa kubafu (kutali musyule kacitaninga sika ciindi eeco), nkaambo kubaantoomwe a Mwami, nkubaa mubili mbuli ngwajisi cino ciindi. “Tulizyi kuti’ eelyo aakulibonya, tuyooba mbuli nguwe, nkaambo tuyoomubona mbwabede bwini” (l Johane 3:2). “Amulange maanza aangu, amatende aangu, ndime ndemwini ncobeni: amundijate mubone; nkaambo musangu tajisi nyama amafuwa mbuli mbwelaa nzizyo” (Luuka 24:39).

Ikuti katuyanda buyo kuba muciimo citajisi mubili kutegwa tukakkale antoomwe a Yahushua, nkokuti kubuka kuzwa kubafu kwa mubili uufwa ncitu citujokolosya musyule kwiinda kaindi alimwi cityompokezya. Pe ma, eeco ciimo ncotuyandisya kuyoobusyigwa aancico nca kuzwa kubafu eelyo Mwami aakuzyokela. Nkabela cuumbwe ceelede kubulula mubili ngucaajatide. “Mutagambwi amakani aaya, nkaambo ciyoosika ciindi boonse bali muzyuumbwe nobayoomvwa jwi lyakwe akuvwukkuka” (Johane 5:28-29).


Eeci cibalo citali ca-WLC cakalembwa aaba David Burge.

Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina as Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC