Print

Inzila Yaandaana

Ncintu cakali ceenzu. Lubulo lwa golide lwakabbukizyigwa kumbo lya Masi Aasweene (US), mumazuba masyoono bantu bakabweza musinzo kuzwa kujwe kabatantide mabbiza, akuccililwa mumyezi iitobela ankalaki zijisi mikwasyi; boonse kabatandila kujana buvwubi. Bantu banji bakauzya zintu zyabo zyoonse akubweza musinzo kuya munyika yataana kkedwe kumbo. Zyuulu zyabantu zyakasweekelwa lubono, amaumi aabo. Ntenda zyamusinzo ooyo, malwazi, abasinkondo zyakacesya nkamu zyankalaki kusikila bace buyo bakacaala mbibakasika nkobaali kuya. Pele, mbasyoonto akati kabaabo bakajana nokaba kasyoonto kabwe kagolide akubaa buvwubi mbobakaabila zintu zyoonse kuti babujane.

 Zimwi nkalaki zyakapa mulimo kubasololi kuti babasolwede nzila. Bamwi bakasala muntu akati kabo kuti abaamulimo wabusololi. Ooyo mulimo waali mulemu kapati. Buumi bwaali kukonzya kusweeka kuti kwasalwa nzila iitaluleme. Buyumuyumu bwaali kwiindila kuti kwayindwa ambali lya cikala cameenda nokuba kuyaka civwuka mucibaka citali kabotu. Kulwanwa basinkondo kwaali kukonzya kujaya bantu bataazyi bwakulikwabilila. Bukwabilizi bwa nkamu bwakakkede makkuko aamusololi.

Kuti musololi wankalaki naakainda nzila iitaluleme, akusala nzila mbyaabi, wakali mulimo wakwe kwaambila bantu kuti bazyokoloke, akupiluka, kuti bakabweze nzila iiluleme. Eeci caali kukonzya kuyungizya musinzo, kusowaila ciindi akutongooka kunjaanji. Muziindi zimwi, nkalaki zimwi zyakaya kumbele munzila iitaluleme kwiinda kuti zipiluke musyule muzyakazyila. Kuti musololi naakazumina kuti walubila caali cintu cimupa kutasyomeka mubusololi bwakwe. Waali kukonzya kuzwisyigwa mubusololi. Musololi uulaa busongo wakeelede kuvwuntauzya twaambo tunji tujatikizya musinzo ooyo, aluzyibo lwakubelesya mumizeezo yakusolweda nkamu.

Ba World's Last Chance mbasololi munzila yakumwaya mulumbe wabupaizi muluwo. Mbuli mbobali kumbele kuyiisya kukomba muNsabata yabuzuba bwa ciloba, balaa mulimo wakuyiisya kasimpe alimwi kasimpe kalikke. Nkaambo kakuti kasimpe kaciyaa kwiindila kuvwunguluka akulibonya, akwalo kuvwuntauzya kweelede kuya kumbele kutegwa kuzyibwe cisyomwa celeede kuyiigwa aceeco ceelede kulubwa. Yahuwah wakasyomezya musololi kuli baabo bayandaula kasimpe koonse cakutontomana. Musela wamamanino walo uuya kwiinda muciindi camapenzi ngoweelede kubaa kasimpe kalikke koonse, kakwiina cilubide muli nzyobasyoma. Beelede kusimpa lusyomo lwabo mukasimpe aako kutegwa batakazungaani akulwanaa bantu nokuba kweenwa amadaimona.

Ba World's Last Chance lyoonse balomya kusyoma kuti bantu boonse balaa mulimo ku Mulengi wabo wakukomba Nguwe mubuzuba bwa ciloba, mbwaakabikka kuti nje Nsabata kutobezya bwaamba mulawo wane. Pele ino mbubuti eeyo Nsabata mboinga yajanwa? Hena cilakonzyeka kululama kujana buzuba pele kobelesya kkalenda litaluleme kuganta buzuba oobo? Mumyezi yainda, kuvwuntauzya cakutontomana kwaacitwa abasi Nsabata banjaanji, kuti bazyibe naa kkalenda lina Gregory libelesyegwa kanji mazubaano, kuti ndikkalenda lyakasimpe lya Bbaibbele. Ino nkukuli kujanwa miyanda ya kkalenda lina Juliyasi/Gregory? Ndilili kkalenda ndibaali kubelesya bama Juuda muciindi ca Yahushua, Kristu?

Kusanyangula mibuzyo eeyi cakuvwuntaulisya kwaatozya basikuvwuntala kumuzeezo wakuti myeelwe yakasimpe kageme buzuba bweelede kukombwa kayiisyigwa kale. Buzuba bwaciloba nje Nsabata. Nokubaboobo, kkalenda litaanzi lya Bbaibbele litobezya mwezi azuba ndelyeelede kubelesyegwa kujana buzuba bwa Yahuwah bwamasimpe. Mubweende bwa ciindi kwakali ma Kkalenda manjaanji, anzila zinji zyakupima ciindi mukujana mazuba aakukomba. Ibbaibbele lyeelede kuba musololi wesu; mangwalo ayelede kutondezya nokweelede kukombwa akkalenda lyeelede kubelesyegwa. Twaambo tunji twamisela inga twabelesyegwa antoomwe aBbaibbele kulomya kujana kasimpe, pele Bbaibbele lyeelede kuba ndelipa nguzu atalaa zyoonse.

Ba World's Last Chance bakatumina muluwo zilembedwe, makkoosi, azipekupeku oomo mobaabanya makani aakajanwa abasikuvwuntauzya. Ncintu cinyandya caajanwa knuti muzeezo wa “mvwiki zitaleki kuzingulukana kuzwa kumalengelo” waali muzeezo uutaluleme. Ikkalenda lina Gregory naa lyabu poopo ndyabukombi bwazilengwa leza alimwi ncipimyo citaluleme kujanya buzuba bwa ciloba bwini nokukombwa. Ncintu ceenzu kumizeezo kusoleka kuzyibila nzila imbi yakupima ciindi. Pele, kasimpe kalayandika kapati, nkukondwa kupati kuzyiba kuti Nsabata iiluleme ilakonzya kujanwa kwiinda mukubelesya kkalenda litobezya mwezi azuba. Twakomba amusanyangule kuti muteelele kaambo aaka kalo kacinca-buumi nobeni lwenu. Twakomba kuti mweezyekanye aMangwalo atwaambo twamisela kutegwa mubone Saatani mbwaakacita ncobeni mukusoleka “kucinca ziindi amilawo”. Twakomba amuupe ciindi Moza wa Yahuwah kuti uyumye mizeezo yenu mukutobela Nguwe naa kuti Wamuyubunwida kuti nkakasimpe aaka.

Amusangane abasyomeka kuzinguluka nyika mbuli mbotuyaa kujokela mumukondo wesu, luzyibo lwanzila yansiku lwabambululwa alimwi mizeezo iilangika aanga mipya kuli ndiswe yateelelwa. Mipailo yakukwabililwa mumoza wenu ilaimpuka lyoonse kuzwa kubabelesi abasikusanyangula baku World's Last Chance. Yahushua Kristu ulazya linolino. Atuswaangane mumyoyo amujwi, mumoza amukasimpe kujatikizya buzuba bwa ciloba bwamasimpe butobezya mwezi azuba kuti tukombe Mulengi wesu.