|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
[Lugwalo luzyila ku Mwami Yahushua: Lwaambilizya Yahuwah a Ndime]1
Ooyandwa omunakristu,
Ndalikuyanda kuti ndikwaambile makani aa Yahuwah andime.
Ime ndizyi kuti kumoyo uyanda cintu cibotu; ulasoleka kundivwuna bulemu kubantu banditamikizya kuti ndili biyo mbuli “bamayi bapaizi balupatipati” banjaanji. Masimpe kuti, Ime nsyeyandi kubungikwa antoomwe abantu bali mbuli Muhammad, Buddha, nokuba Gandhi. (Ndinyina makani naa bandeezyekanya aa Mozesi, nokuba kuti mulimo wangu wakali mupati kulaale kwiinda wakwe.2) Nokuba boobo, Ime ncelombozya ncakuti, yebo lwako ubikkile maanu kuziiyo zyangu, nzyeekali kuyiisya mumulimo wangu nkecili anyika anzyeekayiisya neekabuka kuzwa kubafu kwiinda mu baapositolo mbeekasala.
Ime njanda kuti webo uleke kulibuzya ncondilanganya aanga ndime Yahuwah, Taata wesu wa kujulu. Yebo upailila kuli Yahuwah mpoonya umwiita kuti ngu “Yahushua,” kakubee eelyo ndezina lyakwe. Sa awalo ulaazina lyakwe limugeme, pele eeli lyakuti “Yahushua” talili ndilyo pe!3 Mpoonya yebo upaila Taata akumulumba kuti wakafwida nduwe aciciingano. Kunyina pe nicaacitika eeco! Kamuteelela, bana bangu.
Ime ndi Mwanaa Yahuwah, nsyeli ndime nguwe pe!4 Ime ndi mwaalumi, alimwi kakwiina akwaamba zinjaanji Singuzuzyoonse tali muntu pe.5 Walo, Taata wangu, alikke ngo Leza ncobeni.6 Ime ndime Messiah wakwe,7 uunanikidwe wakwe, uuzilidwe wakwe, kutali uunanika pe. Ndime ndakafwa, alimwi nkulumba Yahuwah, wakandibusya Ime akundibambulula kuti nsyetacinoofwi.8 Pele walo lyoonse tafwi, aboobo kwiina uukonzya kumujaya.9 Amucilangisye eeco nobaapositolo bangu, alimwi kunyina pe neekamwaambide kuti Ime ndime Yahuwah uunga waba “Mwanaa mbelele ookwa Yahuwah uugwisya zinyonyoono zyanyika.”10 Ooyo uutafwi takonzyi kufwa lufu noluba buti kusanganya antoomwe alufu lwa kujayigwa cituuzyo! Kunyina pe nitwakamwaambila kuti alikke muntu waciimo cabulemu nguukonzya kunununa bantu kuzibi zyabo. Masimpe, Yahuwah ngu Taata wangu, wakandikkomanina,11 akundilanganya kuti ndili cituuzyo ceelela, inzya, Ime ndemuntu wa nyama abulowa mbuli ndinywe.12 Walo wakamutondezya mbwamuyanda nywebo kwiinda mukutuma ndime kuzyootuuzya buumi bwangu nkeli muntu mucibaka cenu,13 eeco walo ncaatakali kukonzya kucita lwakwe, nkaambo tafwi. Mbantu buyo bazwide manjezyeezya akati kenu, kutali baapositolo bangu nokuba ndime, bakamuyunga kuti mulumbe mubotu ngwakuti Yahuwah wakaboola akufwida ndinywe. Nokuba kuswiilila basimulumanya tuuka basumpya makani aalweeno kuti Ime ndakafwa “nkecili muntu” pele ndakacili kulanga nkeli muciimo “cabulemu,” kubee ndakali fwide mubili alimwi nkatafwide ncobeni, alimwi nkecipona akutapona aaciindi comwe! Nokuba kwiimba nkomundiimba mulwiimbo lwa muntu wakali kuzaya alwakuti “Muntu wabulemu” uutafwi. Ndakafwa ncobeni kufwida nduwe aciciingano. Ime ndime ndakaliko masimpe aalya, alimwi inga ndakusyomya yebo kuti obuya buzuba butaambiki kunyina naba muntu omwe wakali kuyeeyela kuti Yahuwah nguwaakankaminwa ampanda.14
Ndakafwa ncobeni kufwida nduwe aciciingano ciya. Ndakaliko masimpe aalya, alimwi inga ndakusyomya yebo kuti obuya buzuba butaambiki kunyina pe muntu wakali kuyeeyela kuti ngu Yahuwah waakankaminwa aciciingano.14
|
Yahuwah ngonguwe ngweekali kupaila mumbewu, nkelangila kuti andilemunune mukuli wapenzi kwakaindi kasyoonto buyo. Pele zyoonse zitaambiki zyaacitika buzuba buya, zyakacitikila mukuyanda kwakwe, Ime ndakalyaaba buyo kukuyanda kwakwe.15 Mbuli mwaapositolo Paulu mbwaakapandulula, ncenciceeci Yahuwah ncaakandibusyila kuzwa kubafu akundisumpula.16 Lino ndalela, mukwaamba boobo, kujanza lyalulyo lya Yahuwah.17Yebo inga waamba kuti Ime anguwe tulalinzyaana cuuno cakwe cabulemu,18 inzya, pele eeco, tacaambilizyi kuti ndime nguwe pe! Alimwi, mbuli bwakaamba Paulu abalembi bamwi bataanzi mbobasalazya kupandulula, nokuba muciimo cangu cisumpukide, mbuli mbokulangilwa kuti ndakapegwa nguzu zyabweendelezi, bulemu, abuleli atalaa masi woonse aanyika,19 Ime ndicili kunsaa Yahuwah. Toonse tucili kunsi lyakwe!
Leza wamasimpe takwe leza atala lyakwe pe; kunyina uunga walipa kuba leza wakwe. Walo alikke nguuli boobo. Toonse tobamwi tuli buyo kunsi lyakwe. Leza wangu ngweenya ngo Leza wenu. Yahuwah ngu Taata wangu andinywe nyoonse. Ime ndakamusalazyila kale aaya makani mbweekabukila buyo kuzwa kubafu.20
Ime ndakacita cintu cimwi a Yahuwah lwakwe ncaatakali kukonzya kucita: Ime ndakapona buumi bwakuti bube mukonzyanyo kuli ndinywe buumi bwa muntu mbwayelede kupona cakusyomeka kalyaabide kuli Yahuwah, kayendela mumilawo mipati kwiinda yoonse “kuyanda Mwami Leza wako amoyo wako woonse, muya wako woonse, amuzeezo wako woonse,” alimwi awa “kuyanda simukobonyoko mbuli mboliyanda lwako.”21 Yebo tokonzyi kumusunka Yahuwah Singuzyoonse;22 pele Ime ndakasunkwa, alimwi ndakazwidilila mumasunko woonse.23 Ime ndakali kupaila kuli Yahuwah nkeli mukaziziizi alimwi nkeli akataa makunga aabantu,24 Ime ndakamukomba mutempele, alimwi kuzwa kubwana bwangu Ime ndakabala majwi aakwe aayubunudwe.25 Ime ndakamwiisya nywebo mbomweelede kupaila kuli nguwe akumutondezya mbomweelede kumulanganya.26 Mbuli mbweekapandulula kale, ngu Yahuwah wakandituma,27Yahuwah nguwaandipa nguzu Ime,28 Yahuwah nguwaandigwasyilila kucita maleele aanyandya woonse ngaakacita kwiinda muli ndime,29 alimwi aakale amubatumwa bakwe.30
Hena ndakalibikka Ime lwangu kuba Yahuwah na? Peepe, mbuli mbweepandulula kale, ooko kwakali kunditamikizya cakundibejekezya kwini. Coonse nceekataminina ncakuti ndili Mwanaa Yahuwah, Messiah wakwe.31Amulangisye kuti bantu baatumwa ambeyo kunyina pe nitwakamwaambide noliba lyomwe kuti Ime ndime “Leza Mwana.” Ime ndakaamba kuti Taata andime “tuli bomwe,”32 inzya, mbweenya mbuli muntu uusyanga ayooyo uutilila meenda mbobali “bomwe.” Ooku nkokwaamba kuti, tubelekela makanze eesu antoomwe.33 Alimwi kunyina pe baapositolo bangu nibakamwaambide kuti Taata andime tuli Leza omwe pe; pe ma, walo ngu Leza wangu.34 Ime ndime mwami wenu, pele kutali Leza wenu pe; Yahuwah ngumwi.35 Basikwiiya bangu bakali kuyanda kumubona Taata,36mpoonya Ime ndakabaambila kuti bandicenke Ime kutegwa babone mbwabede Taata — kuleka kuti ndime taata, pele nkaambo kakuti ndilakonzyanya anguwe. Ime ndicikombole cakwe,37 alimwi walo wakali kubeleka alimwi ucibeleka kwiinda muli ndime.38 Mukuya kwaciindi awalo Thomasi wakavwumbuka meso kuti amubone Taata wakali kubelekela muli ndime, kamvwanya nyika kuli nguwe mwini.39
Eezyo nguzu zisandula buumi bwa muntu, zyizwa kuli ndiswe. Alimwi kufumbwa uunditobela tukkala limwi anguwe, antoomwe a Leza wakasimpe andime, nde Mwanaakwe waandeene, ndemwami wenu wabuntu. Yahuwah andime, katwaandeene, walo ngu Leza omwe alimwi ime ndime simalelo wenu omwe.40 Amutobele ndime, alimwi ncobeni, iswe tunookkala antoonwe andinywe.41Pele mutanookopwi kutweelanya, alimwi mucileke ciyanza camasendekezya aakuti tuli “Bantu” bobile mumutwe wa Baleza “botatwe” bakweezyeezya. Ime nsyeekamwiisya cintu eeco pe, nokuba batumwa bangu. Taata ngo Leza, ngu Leza luzutu uuliko alikke; walo tali umwi akataa “Bantu” botatwe baitwa kuti Leza pe, kufumbwa ncocaamba naa caamba nzi eeco!
Hena ndalyaamba kuti “Ime”? Inzya! “Ime Ndendime Yooyo.” Naa inga mwandaamba kuti “Ime ndime nguwe.” Alimwi ambeyo ndali kwaamba yooyo uuli Ndime: Messiah. Ime ndakamusalazyila makani aaya awumwi mukaintu waku Samaliya.42 Mwanditeelela na? Hena ono nkaambo kakuti mweelede kundikomba Ime, hena ndamubeda Yahuwah lwakwe na? Nee peepe! Ime ndeelede kukombwa nkaambo kakuti Yahuwah wakandisumpula kujanza lyalulyo lyakwe.43 Ndakalumbulwa munzila eeyi nkaambo kamulimo ngweekamucitila, kumulwisyila makamu aabantu bamasi woonse.44 Hena ono muyanda kulikumbatizya kumasendekezya aamushinshimi mubeji aa “kulikankaizya” Yahuwah wa musyobo uumbi?45 Yahuwah atazumizyi oobo pe! Amumuteelele Yahuwah akundipa bulemu Ime; ooko nkokumupa bulemu awalo. “Nguni uukonzya kulekelela zinyonyoono, tee pele buyo Yahuwah alikke?” Mboobu bwiinguzi: nkwali awumwi Yahuwah ngwaakapa nguzu zyakulekelela zinyonyoono mucibaka cakwe, mbweenya mbuli ndime,46 abasikwiiya bangu.47
Kunyina pe muntu uukonzya kumujaya Yahuwah! Walo nguuyendelezya zintu zyoonse kutali kutobelezya musyule pe; kunyina mupati kwiinda ali Nguwe 51. Nokuba kuti ulizyi kale zyoonse, Ime ndakwaambila kuti ambeyo kuli cintu ncetazyi 52. Ikuti kamwaamba kuti ndizyi zyoonse nkeli “muciwa cabulemu” cangu nokuba “mumuzeezo wabulemu” nkokuti mundaamba kuti ndimubeji. Mutanoociti boobo!
|
Ncinzi acimwi ncenga ndamwaambila masimpe kuti nsyeli ndime Yahuwah, pele ndili Mwanaakwe waandeene waciimo cabuntu, kayi ndamwaambila kale cakusalazyila limwi kuti walo ulizyi zinji kwiinda ndime,48akuti walo mupati kwiinda ndime,49 alimwi akuti Ime ndicita buyo ncayanda alimwi nditobela buyo nkwanditola,50 alimwi boonse balizyi kuti Ime ndakajaigwa? Pele kunyina muntu uukonzya kujaya Yahuwah! Walo nguusolweda boonse kutali kutobela mbabo musyule pe; kunyina pe mupati kwiinda ali nguwe.51 Walo ulizyi kale zyoonse, pele Ime ndakamwaambila kuti ambeyo kuli cintu cimwi ncetazyi.52 Aboobo ikuti mwandaamba kuti Ime ndakalizyi kale zintu zyoonse kwiinda mu “ciimo cabulemu” nokuba mu “muzeezo wabulemu” wangu, nkokuti mundaamba kuti ndimubeji. Mutanoociti cintu eeco!
Amulangisye kuti neekali kutundululwa akusunkwa basinkondoma, tiibakanditamikizya kwiindilizya kuti nditaminina kuba Messiah ookwa Yahuwah, Mwami wa Isilayeli uusyomezyedwe.53 Ime ndimwaambila masimpe: kunyina pe Ime neekaambide nociba cintu comwe cisampauzya kwaamba muntu, kufumbwa naa ooyo muntu kali Messiah ngwaakasala ncobeni Yahuwah. Aboobo ooyo ngo ndime.
Amunditeelele, nkabela ndamugwasya kubona kuti Mwami Yahuwah a Simalelo Yahushua Messiah tabali “Mwami” omwe. Nokuba kuti Ime ndi mwami waandeene, Taata wangu ngo Leza wangu mbweenya mbuli ndinywe. Mutazingwi mizeezo kuyeeya kasimpe kakuti lino ambeyo ndiitwa mazina amwi aamilimo yakwe. Walo muluzyalo lwakwe wakayoyela moza balanda bakwe kuti bandiite mazina manjaanji ngayitwa kuti: “Mwami,”54 “Leza,”55 “Mufutuli,”56 “Simalelo,”57 “Mutaanzi a Wamamanino,”58 “Alpha a Omega,”59 alimwi akuti “Simalelo wa basimalelo a Mwami wa bami.”60 Amwiibaluke kuti aabo bantu beni banduulika mazina aaya mbeenya mbabayiisya akuti Yahuwah ngu Leza wangu, ngu Leza atalaa ndime, ngu Leza ngwekotamina ambeyo.61 Aboobo taceelede kumugambya kuti, mbuli mbwekonzyana kale anguwe, ndili cikombole cakwe, nkako ndeelede kujata bubi milimo yakwe, aboobo walo ubona kuti ncibotu kuti ambeyo nkebelesya mazina aamilimo yakwe mayandisi. Ime ndamulumbaizya nkaambo kaceeci!62
Inzya, Ime ndizyi kuti kuli bantu bamwi bapilingene akati kenu, nobabona mpotwiindene Yahuwah andime, nkako baleenkela kundaamba kuti Ndime Yahuwah lwakwe. mucibaka caboobo basumpauzya makani aa “buleza bwa Kristu,” akuzuunyana kuti Ime ndilaa “ciimo cabulemu.” Masimpe kuti, aabo bantu bakondoola meenda akubelesya tulawolawo twabo twakusungilizya bantu kuti bandaambe kuti “ndilikkwene bulemu alimwi ndikkwene amubuntu, nkeli Leza wancobeni alimwi nkeli muntu wanyama...Kristu omwe, Mwana, Mwami, simuzyalwaalikke, uulibonya muziimo zyobile.”63 Kunyina Ime nobaba baapositolo bangu nitwakamuzyiisya zintu eezi. Ikuti “ciimo cabuntu” kacili nceca mwaalumi, nkokuti Ime ndilaa ciimo cabuntu. Ikuti “ciimo cabulemu” kacili nceca Yahuwah, inywe mweelede kwiibaluka kuti kuli buyo Leza omwe, alimwi ooyo ngo Taata wesu.64 Ikuti “ciimo cabuntu” kaceelede kuzublula zyoonse mbwayelede kuba kufumbwa muntu, nkokuti mbweenya mbuli muntu, ambeyo ndaaciimo cabuntu. Pele kuti “ciimo cabulemu” kacizubulula mbwayelede kuba kufumbwa Leza uuli woonse, nkokuti Ime nsyejisi ciimo cabulemu, mbuli mbweepandulula kale.
Mutanoocesyi muzeezo wenu ngomumuyeeyela Yahuwah kuti abaanga muntu kutegwa buyo muyumbyeyumbye mizeezo yenu yakuti walo abe ndime [Yahushua]!
|
Kakwiiindide myaanda myaanda yamyaka yakwaambila bantu kuti Ime nsyeekali kulicengeezya kwaalilwa kucita zintu mbuli bantu banyama, eeco cakali kunoonga caambilizya kuti Ime ndakali kweena baabo bakali mumbali lyangu, pele mazubaaya aayinda bamwi benu, mukuyandisya kucita kufumbwa cintu kuti muvwuninine twaano twenu twabaleza, mwakacinca lwiiyo lwa leza mubupaizi bwenu, akutalika kwaamba kuti Yahuwah ulakonzya kwakaindi kasyoonto buyo kulekezya luzyibo lwakwe lukkwene, kucingililwa masunko lwakwe, anguzu zyakwe ziteeli. Akaandaawuke uulaa muzeezo uuli boobu! Mwami Yahuwah Singuzyoonse takonzyi kujayigwa, takonzyi kutempaulwa, alimwi kwiina cintu ncatazyi. Inzya, walo ulakonzya kulibonya muciimo cabuntu, nokuba kutingaana aamuntu,65 kuswaya muntu akukkomanina kubambililwa,66 nokuba kubonwa mbuli mbwaakamubona Mozesi abalupatipati ba Isilayeli67 — kunyina pe ciyumu kuli nguwe. Pele kulibonyaanga muntu tacili cintu comwe akuba muntu wanyama, tee mbombubo?68
Mutacesyi muzeezo wenu ngomumuyeeyela Yahuwah kuti abaanga muntu kutegwa buyo muyumbyeyumbye mizeezo yenu yakuti walo abe ndime! Cilainda kubota kuti mulilangelange nzyomuyiisya kujatikizya ndime anzibakaamba baapositolo bangu, kutaguminizya abashinshimi bakapona kunembo lyangu. boonse bakali kuzuminana kuti Ime ndi muntu, walunyungu lwa Davida,69 alimwi kwiina nobakasendekezya kuti “ndimuntu” uutali “muntu ncobeni” nokuba kuti Ime “ndimuntu” pele kutali “muntu susu.”70
Aaya masendekezya aakuti kufumbwa “MWAMI” naa “Leza” wakabonedwe muziindi zyansiku kuti wakali ndime,71 Ime nsyeekamwaambila makani aayo pe, nobaba baapositolo bangu. Kamutuswiilila swebo! Muumazuba aano aamamaninino Yahuwah nakanana kwiinda muli ndime.72 Aboobo andisalazye kaambo aaka kakuti ndime ndakalenga mulengalenga. Ime kunyina pe neekataminide cintu eeci pe. Ime ndakaambilizya buyo nceekayiisyigwa abamukowa wa buJuuda, kuti wakali Leza omwe wakalenga.73 Mulengalenga mulimo wamaanza ookwa Taata uuli kujulu. Peepe, taakwe neekamugwasya. Walo taakabulide wakumugwasya.74 Walo wakoonda mulimo woonse kubelesya buyo jwi lyakwe lilaa nguzu.75 Taakabulide muntu wakwiiminina akati kuti amukwabilile kuzwa kuzintu nzyaakalenga. Nokuba kuti naakali kuyanda kucita boobo, Ime nsyeekaliko aciindi eeco kuti ndimugwasye. Kayi nsyeekaninga mitwa!76 Inzya, mbuli mweenzuma Johane mbwaakalemba, kwakali cintu cimwi kumatalikilo eeco cakali antoomwe a Yahuwah alimwi tiikacili Yahuwah eeco, alimwi nkwiinda muli ceeco Yahuwah mbwaakabamba zintu zyoonse.77 Ndaamba jwi lya Yahuwah we, naa mumajwi amwi, busongo bwakwe.78 Bwakali busongo oobo aakale bwakaboola anyika akuzyoomvwika muli nzyeekali kuyiisya amumicito yangu.79 Inzya we, munzila imwi ndimusyobo wa mulengi ambeyo, pele mulimo wamaanza aangu ngwa malengelo mapya, mulazyo wazintu mupya, amisela mipya.80
Kukososzya kaambo, Ime ndi Mwanaa Yahuwah waandeene, alimwi Ime ndakabusyilwa kuba mugwasyi kujanza lyaluylo lyakwe, mbuli Josefa mbwaakabede kuli Pharaoh.81 Bumwi buzuba njooba mubetesi wenu; Yahuwah nguwaandisala kubeleka mulimo ooyo.82 Ime njoolela mubusena bwini bwakwe Yahuwah oobo Ime mbweekapegwa kuzwa kuli Leza wamasimpe omwe.83 Ime ndicili muntu, nokuba boobo Yahuwah wakandibusya kuti ndibe “moza uupa buumi” uula mubili wabuntu uutafwi.84
Ime ndi Mwanaa Yahuwah waandeene, alimwi ndakakomezyelwa kuti ndibe mugwasyi wakwe, ndibe Josefa kuli Pharaoh wakwe.81 Bumwi buzuba ndiyooba mubetesi wenu; Yahuwah wakandisala kuti ndikabeleke mulimo ooyo.82 Ime njoolela akweendelezya acuuno ca Yahuwah eeco nceekapegwa a Leza wakasimpe Omwe.83 Ime ndicili munutu, nokuba kuti Yahuwah wakandikomezya kuba “muya-uupa buuumi” nkelaa mubili uutafwi.84
|
Ikuti kamuyeeyela kuti cililubide kukomba nokuba kupaila ku “muntu uutabujuli,” inywe mweelede kukankama kamwiibaluka zintu nzimwandaamba. Hena mulakonzya kwiimikila kunembo lya umwi akataa bami baanyika nokuba baleli, kamutondaika nguwe amunwe akumoompolweda cakusabila kuti “yebo uli muntu buyo”? Eelyo mwaakwiimikila kunembo lyangu nkenooli mubetesi wenu, muyoolibonena mbweli muntu “wabuyo”! Inywe muyoondifugamina amagondo eenu Ime, “akube bulemu kuli Taata Yahuwah.”85 Nokuba kuti nsyeli Leza wenu, Ime ndili simalelo wenu, alimwi inywe mweelede kundiyanda akundiyoowa 'me.86
Ikuti kamuyeeyela kuti Yahuwah inga walekela muntu susu kuti akkale mucibaka ncekkede cino ciindi — pe ma, ooko nkuyeeyela kubulide lusyomo. Ime ndakamwaambila kuti ndime “muntu wakamwaambila masimpe ngeekamvwa kuli Yahuwah.”87 Ndakapegwa nguzu kuli Yahuwah, inzya muntu wanyama ncobeni ulabakonzya boonse ba Messiah bokwa Yahuwah ncobeelede kucita. Ooyu muntu unooli mupaizi wenu lyoonse kukabe kutamani kayimina akati kenu a Yahuwah.88 Ooyu muntu ngo mwiiminini alikke akataa Yahuwah anobanabokwesu basazima abacizyi.89 Ooyu muntu ngo “mutaanzi amucaalizi, alimwi muzumi. Ime ndakalifwide, alimwi amulange lino, Ime ndapona lyoonse alyoonse; alimwi Ime ndijisi zijuzyo zya Lufu a Mulilo.”90 Kamuswiililisya lino: Ime nsyeli Yahuwah mutaanzi nokuba wamacaalizyo — oobo busena bulijisi kale uulaabo! Ime ndime simalelo wabuntu wakasumpulwa mutaanzi alimwi wamacaalizyo, wakabusyigwa kuzwa kulufu, akusumpulwa kusikila zyoonse zyaba kunsi lyangu, mbweenya ambeyo mbweli kunsaa Yahuwah.91
Ime aciindi cimwi ndakabazinga mizeezo beenima neekababuzya kuti mbubuti mucishinshimi ca Intembauzyo Davida mbwaakali kunga waita Messiah, walunyungu lwakwe kuti, “mwami.”92 Tiibakazyi pe, pele muntu uubala Cizuminano Cipya weelede kuteelela kuti Yahuwah wakandisumpula 'me, nkakaambo keni nkeekabazubulwida balo.93 Ime nsyeli Mwami Yahuwah Singuzuzyoonse pe, Ime ndili mwanaa Maliya mutaanzi ooyo Yahuwah “ngwaakabamba kuti abe Messiah a Mwami.”94 Mutanooswaanganyi antoomwe Mwami Yahuwah a simalelo Yahushua, Messiah wakwe.95
Eelyo nobala makani aabuuumi bwangu, inga walibonena kuti ime ndimuntu alimwi akuti Yahuwah uli nsini, ngu Leza wamasimpe, Leza wa Isilayeli ooyo ngwekomba Ime akunyonena. Pele alimwi, mumalembe amwi bantu balaa mpuwo kapati bazuunyene kuti mulumbe wangu woonse tuukwe mulimo pele buyo kuti “buleza bwa Kristu” kabuli cibeela ca mulumbe ooyo. Teelela kabotukabotu, mwanaangu: weelede kuyandisya ndime kutali bantu bali boobo pe, mbweenya mbuli basikwiiya bangu bataanzi bamwi mbubaacenguluka kuleka kutobela nobaba basicikolo abalembi baluulwa busongo kutegwa banditobele me mbuli mwiyi wabo. Koboola buyo kuno kuli ndime, wiiye kuli ndime, ndikulaye akukuzubulwida mpozambaidwe. Basikwiiya bangu bataanzi bakalemba cakusyomeka ooto tusimpe ntwaakandipa Yahuwah, atusimpe tunjaanji, ooto Moza wa Yahuwah ntwaakabayiisya. “Masimpe ncobeni, Ime ndamwaambila kuti, kufumbwa uutambula yooyo ngwentuma utambula ndime; alimwi kufumbwa uutambula ndime utambula yooyo wakandituma.”96 Hena muyeeyela ncobeni kuti ziiyo zyangu ziyandika kugwasyililwa, kubambululwa na? Nkaambo nzi ncomundiitila kuti “Mwami, Mwami” kakuli mudyakaizya nzyeyiisya zijatikizya Yahuwah kubee mulumbe uuyandika kuyungizyilwa, kubelesya mabala ngeetakali kubelesya Ime, akusungilizya basikwiiya bangu kuti babelesye mabala aayo? Mutatoobaminyi mikuli yatunsiyansiya basikwiiya bangu ooto ntubatakamuyiisya kuti njemilazyo ya cizuminano cipya!97
Kamuswiilila kuli ndime, mutasinki matwi eenu eelyo bantu nobamoongelezya cintu ncobayeeyela kuti ncesendekezya. Mutanikoongoongwi aamaseseke aangu aamanjezyeezya aakuti “ndisangene aciimo cabulemu,” aayo aakonzya kumvwisyigwa buyo abantu bayiide nokuba balaa “moza.” “Ime ndakaambaula caantangalala kunyika yoonse;” ncobeni, “Ime kunyina nceekaamba munzila ya kusisikizya.”98 Inzya, kwakaindi kasyoonto buyo Ime ndakalilesya kulitondezya kuti ndime Messiah kutegwa eeco citanyonganyi mbomunditeelela, nanka kulwanwa aalumamba lwa bamwi. Pele Ime ndakabaambila batumwa bangu masimpe aangu woonse amulimo ngweekatuminwa; “Ime ndakamuzyibya kufumbwa nceekamvwa kuzwa kuli Taata wangu”;99 Kunyina pe nceekamusisa.
Aboobo, inywe mweelede kubamvwida kabotukabotu ncibaalemba batumwa bangu ancibaataalemba. Bakazubulula buumi bwangu mbubwakazuzika zishinshimi zya Messiah, azishinshimi zyaambilizya Yahuwah. Pele kwaamba zyeezi zicaalizya, tiibakasendekezya kuti ndime Yahuwah lwakwe. Pele, muli zimwi, Yahuwah wakazuzika zishinshimi kwiinda muli ndime,100 alimwi muli zimwi zinjaaji, Leza wangu wakabayubunwida ncokayiminina kamwi kampango kansiku, aako kakazuzikwa linolino.101 Ikuti inywe kamuyeeyela kampango kakazyila kubatumwa bangu kuti kabembeleka mumbalaa masimpe amwi, mapati loko aataninga yubululwa aajatikizya ndime, amulangaule naa ooyo mulembi nanka yooyo muntu waambwa mumalembe aabo naa muntu uubujula akuzuzika makani aayo. Ikuti pe, nkokuti ndinywe mwiide kwiingaila kuligantila mpaakosweda makani aayo. Balembi bamakani aabuumi bwamulimo wangu munyika bakalemba cakusalazya; tiibakalemba zizuminano zyabweelenzi eezyo zikonzya buyo kuteelelwa abacenjezu. Amumvwe cini ncobaamba. Aaya ngamamanino aakuleka zyakusobana “kuvwuntauzya” zintu nzyobatamauka mumalembe aabo mbuli zyakuti Ime ndili Yahuwah nokuba kuti ndi “Yahuwah muntu.” Peepe, kwaamba kuti Ime ndakeenda atalaa meenda takuli kweezyeezya pe.102 Alimwi taali majwi aangu kuti Ime njoozyokela nkeli atalaa makumbi.103 Nokuba nzyeekaamba kuti “Ime ndili muzintu ziindene.104 Ime ndakamwaambila cakusalazya kuti ndime ni.105Ime ndi mwiyi, kutali muntu uuŋuŋuna zyakwaambilila, alimwi basicikolo bangu balanditeelela 'me. Pele ino nywebo? Ikuti naa kamuyeeyela kuti aaya malembe aasalazya kuti Ime ndime Messiah wa Yahuwah alamucima, inywe tamuninga kwaamvwisyisya pe. Amupaile kuti Taata uuli kujulu ajule meso eenu mulibonene. Ambeyo njoomupailila, kuti ndikabone naa mwalibatamika kuyandisya kutambula “majwi aabuumi butamani”106 aayo ngeekamweetela kuzwa kuli Taata.107
Mukukosozya makani, amulange malembe aabuzuba bupati loko bwa musela mupya uuno. Mulanda wangu Luuka wakamukosweeda cakusyomeka mulumbe mutaanzi wa musela mupya uuno. Mumulumbe ooyo, mulongwaangu alimwi mutumwa wangu Petulo takambauki kuti Ime ndime Yahuwah uuli muciimo cabuntu pe. Walo taambi kuti Ime ndime Yahuwah lwakwe nokuba kundiita kuti ndime “leza muntu.” Walo tasungilizyi kuti Ime ndaaciimo ca bulemu. Walo tandaambi kuti ndime ndakalenga nyika pe. Walo taambi kuti ndime ndakoonda milimo yokwa Yahuwah muziindi zyaba Abulahamu a Mozesi pe. Pele, ululamika kundipandulula kuti ndi “mwaalumi ngwaakamusyomezya Yahuwah amaleele aanguzu, maleele azitondezyo eezyo nzyaakacita Yahuwah kwiinda muli nguwe akati kenu.”108 Hena eeco tacili cibotu kapati kuli ndinywe na? Aaya, nobeenzuma, ngamakani mabotu aamusela mupya uuno. Kunyina Yahuwah uumbi uuyandika, Leza wabili, nanka “leza wakasimpe” wakuyungizya atalaa nguwe, ooyo uunooli muntu nsini kutali yooyo ngwemwaambila kuti alikke ngo Leza wakasimpe.109 Petulo taakaalilwa kukambauka mulumbe mubotu. Pele, wakakambauka mulumbe ooyo kuutavweledwe manjeezyeezya aabuntu. Lino kamuya kumasi woonse muzina lyangu mukacite mbweenya oobo.
Ndasinizya, ndime
Yahushua
(cakalembwa aaba Dr. Dale Tuggy, Tennessee)
|
Kutegwa mujane makani manji aaciiyo cipati eeci, mukaswaye kubusena bwa WLC Content Directory: The Trinity (doctrinal error) |
Eeci cibalo tacili cina WLC. Eelyo notubelesya milumbe iizwa kubalembi balaanze lya mbungano, imbunga izuminizya buyo zintu eezyo nzyotumvwa aanga zileendelana acilembedwe mu Bbaibbele. Kanjaanji, balembi ba milumbe eeyi tabalyatani a mbungano ya WLC muzintu zilaa bulemu (mbuli Nsabata ya buzuba bwa ciloba amutwe wa Buleza). Nokuba boobo, eeci taceelede kutulesya kutambula zileleko kwiinda muli nzibaalemba, eezyo zyeendelana a Mangwalo. Aboobo kuzumina cibeela ca milumbe yabo takuli kuzuminizya azintu zimwi zyoonse nzyobatongomene kusyoma.
1 https://trinities.org/blog/letter Cakazumizyigwa mumulawo wa Creative Commons License: https://creativecommons.org/licenses/by-nc-nd/4.0/
2 Milimo 3:22, 7:37; Ciibalusyo. 8:15; Johane 1:17–18.
3 Kulonga. 3:15.
4 Johane 10:33–36.
5 Johane 8:40; Myeelwe. 23:19.
6 Johane 17:1–3; 1 Bakolinto. 8:6; BaEfeso. 4:6; 1 Timoteo. 2:5; 1 Batesalonika. 1:9–10; 1 Johane 5:20.
7 Johane 4:25–26.
8 1 Bakolinto. 15:3–4, 42–56.
9 1 Timoteo. 1:17, 6:16; 2 Timoteo. 1:10; Baloma. 1:23.
10 Johane 1:29.
11 Mateyo. 3:17, 17:5.
12 BaHebulayo. 2:14–18, 1 Timoteo. 2:5–6.
13 Baloma. 5:8.
14 Maako 15:32, 39.
15 Maako 14:36.
16 Bafilipo. 2:8–9.
17 Maako 14:62; BaEfeso. 1:20-21.
18 Ciyubunuzyo. 7:17.
19 Daniyele. 7:14.
20 Johane 20:17.
21 Mateyo. 22:37, 39.
22 Jemusi1:13.
23 Luuka 4:1–13; BaHebulayo. 4:15.
24 Luuka 5:16, 22:41.
25 Luuka 2:41–42, 47.
26 Mateyo. 6:5–13.
27 Maako 9:37; Johane 13:20.
28 Luuka 4:18; Milimo 10:38.
29 Johane 5:36, 14:10–11; Milimo 2:22.
30 Milimo 2:43, 4:30, 5:12, 6:8.
31 Johane 10:22–39.
32 Johane 10:30.
33 1 Bakolinto. 3:8.
34 Ciyubunuzyo. 3:12.
35 1 Bakolinto. 8:4–6; Maako 12:29; BaGalatiya. 3:20.
36 Johane 14:8–11.
37 Bakolose. 1:15.
38 Johane 14:10; BaHebulayo. 8:1.
39 Johane 20:28; 2 Bakolinto. 5:19.
40 1 Bakolinto. 8:6; BaEfeso. 4:4–6.
41 1 Johane 1:3.
42 Johane 4:25–26. Kweezyeka a: Johane 14:24–25.
43 Bafilipo. 2:6–11.
44 Ciyubunuzyo. 5:9–10.
45 https://www.thoughtco.com/shirk-2004293
46 Mateyo. 9:2–8.
47 Johane 20:23.
48 Maako 13:32.
49 Johane 14:28.
50 Johane 5:19–20.
51 Intembauzyo. 89:6, Izaya. 40:18; Ciibalusyo. 10:17.
52 Baloma. 11:33–35.
53 Mateyo. 26:59–66, 27:17,22, 29, 37, 42–44; Maako 14:55– 65, 15:2–5, 12, 18, 26, 32; Luuka 22:66–71, 23:1–5; Johane 18:33–38. Bamwi babala basungilizya kuti Yahushua wakali kutaminina kubaa “bulemu” nkaambo muli Mateyo amuli Maako utamikizyigwa mulandu wakulyaamba buleza. Pele muntu uubala kabotukabotu inga wabona kuti Yahushua utaminina buyo kuti walo unookkede kujanza lyaluyo lyokwa Yahuwah, eeco ncecisalazya kuti Yahushua tali Yahuwah lwakwe, pele muntu nsini.
54 BaLoma. 1:4.
55 BaHebulayo. 1:8.
56 Luuka 2:11.
57 Juda 1:4.
58 Ciyubunuzyo. 2:8.
59 Ciyubunuzyo. 22:13.
60 Ciyubunuzyo. 17:14.
61 Johane 20:17; Baloma. 15:6; 2 Bakolinto. 1:3; BaEfeso. 1:3, 17; 1 Petulo. 1:3; Ciyubunuzyo. 1:6, 3:2, 12.
62 Ciyubunuzyo. 15:3–4.
63 https://www.theopedia.com/chalcedonian-creed
64 Johane 17:1–3; 1 Johane 5:19–20.
65 Matalikilo. 32:22–32. Nokuba kuti eezi zintu zyakacitigwa kwiinda mumilimo yamungele, nokuba boobo ngu Yahuwah (weendelezya) zintu eezyo.
66 Matalikilo. 18:1–22.
67 Kulonga. 24:9–11.
68 Balembi ba Cizuminano Cipya, balazumina kuti Yahushua wakali muntu susu ncobeni, kumwaamba munzila ngubaauba kuti wakali “mucinkonzya ca muntu wacibi” (Baloma. 8:3), “wakayubununwa mumubili wabuntu” (1 Timoteo. 3:16), “wakaboola muciwa cabuntu” (1 Johane 4:2) alimwi “wakazyalwa mucinkonzya cabuntu” (Bafilipo. 2:7). Pele tiibakali kusendekezya kuti Yahushua wakali kulangika buyo mbuli kuti muntu, nanka kuti Yahushua wakasanduka kuzwa mukuba moza uutakwe mubili akunjila mumubili wamuntu (naa cinkonzya cabuntu). Nkaambo kuli mbabo, walo wakamitwa mumaleele pele kali mwana musankwa ookwa Maliya (Luuka 1:35; Mateyo. 1:18), walunyungu lwa Davida (Baloma. 1:3), “mwaalumi” (Milimo 2:22; Johane 8:40) nokuba kuti “wakazyila kujulu,” ooko takuli kwaamba kuti, wakatumwa kuli Yahuwah (1 Bakolinto. 15:47; Johane 3:13).
69 Luuka 1:32; Baloma. 1:3; 2 Timoteo. 2:8; Ciyubunuzyo. 22:16.
70 http://www.ncregister.com/blog/steven-greydanus/is- Yahushua-muntu-susu
71 Justin Martyr, Mumubandi a Trypho.
72 BaHebulayo. 1:1–2; Bakolose. 1:13–20; 2 Bakolinto. 5:17–18.
73 Maako 10:6, 13:19. kweezyekanya ku: Baloma. 1:20; Milimo 4:24,
14:15, 17:24–31; BaHebulayo. 11:3; BaEfeso. 3:9; 1 Timoteo. 4:3–4; Ciyubunuzyo. 4:11, 10:6, 14:7.
74 Izaya. 44:24b.
75 Matalikilo. 1:3, 6, 9, 11, 14, 20, 24, 26; Intembauzyo. 33:6; Johane 1:1–3.
76 Luuka 1:31.
77 Johane 1:1–3.
78 Intembauzyo. 33:6; Tusimpi. 8:22–31.
79 Mateyo. 11:19, 13:53; 1 Bakolinto. 1:24; Col. 2:2–3.
80 BaHebulayo. 1:2.
81 Matalikilo. 41:37–45.
82 Milimo 17:31.
83 1 Bakolinto. 15:27.
84 1 Bakolinto. 15:42–46.
85 Bafilipo. 2:11.
86 Ciyubunuzyo. 6:16, 17:14.
87 Johane 8:40.
88 BaHebulayo. 2:17, 3:1, 4:14–15, 6:20, 8:1, 9:11.
89 1 Timoteo. 2:5.
90 Ciyubunuzyo. 1:17–18.
91 1 Bakolinto. 15:20–28, 11:3.
92 Maako 12:35–37.
93 Maako 12:36; Intembauzyo 110:1.
94 Milimo 2:36.
95 Luuka 1:32; Milimo 1:21; Baloma. 1:7.
96 Johane 13:20.
97 1 Johane 4:15.
98 Johane 18:20.
99 Johane 15:15.
100 Maako 1:3.
101 Mateyo. 1:23; BaHebulayo. 1:10–12.
102 Mateyo. 14:33; Maako 6:45–52; Johane 6:16–21.
103 Mateyo. 26:64; Maako 14:62.
104 Johane 6:35, 8:12, 10:7, 10:11, 11:25, 14:6, 15:1.
105 Mateyo. 16:15–17; Maako 8:29; Luuka 9:20; Johane 20:31.
106 Johane 6:68.
107 Johane 8:28, 12:49, 14:10.
108 Milimo 2:22.
109 Mulazyo waku Nicene kuzwa mumwaka wa 325 waambilizya “Leza wamasimpe” omwe (Mwana) ooyo uuliponena kutali nkaambo ka “Leza wakasimpe” uumbi (Taata). Ooku kwakali kwiinduluka cakaambidwe mulusyomo lwa Origen kuti Yahuwah “wakalenga kuteeli” i Logos naa Jwi llyakwe.
Eeci cibalo citali ca-WLC cakalembwa aaba Dr. Dale Tuggy.
