Print

Luyando Lutamani|Cibeela 3: Kwiingula kwa Muntu

Yahuwah ngo luyando. Eelyo nkondo akataa bululami acibi yaakusika kumamanino, Yahuwah unoozundide kale nkaambo Luyando ncecintu ciinda kubaa nguzu mumulengalenga woonse. “Meenda manji taakonzyi kumwaya akuzimaanya luyando lwini, nokuba zambangulwe lya meenda aakupaika, talikonzyi kunyikizya luyando: kuti muntu waaba zintu zyoonse zili muĊ‹anda yakwe kuti abaa luyando, eeco inga camusampauzya ncobeni. (Lwiimbo lwa Solomoni 8:6, 7, KJV).”

Inkondo iitola ciindi cilamfu loko akataa Bulelo bwa Luyando a bulelo bwa cinyonyoono, yakayubununa zibeela zyobile zyamilazyo. Yahuwah wakalwisya makanze Aakwe kuti alwanine miya yabantu kwiinda mumilawo ya luyando, kwiinda mu kuloma, mu kulekelela abululami. Saatani wakabelesya milazyo yakwe yakusinikizya, kucita lunya akucengelela kutegwa asolwede makamu aabantu kuyoonyonyoonwa. Ziindi zimwi, kwakali kulibonya aanga eeyi nkondo tiiyelene kumabazu obile aayo nkaambo Yahuwah ukonzya buyo kubelesya zintu eezyo zyeendelana a Luyando Lwakwe.

Kumamanino, nokuba boobo, Yahuwah nguuzunda nkaambo LUYANDO ncecintu ciinda kubaa nguzu atalaa zyoonse. Luyando lusinsimuna luyandonyina. Muntu umwi ulatalika kubaa luyando nkaambo ulayandwa alakwe. Ngaaya maseseke aanguzu ziteeli zya Luyando. Mwaalumi ulanga kulaaleLuyando lulakonzya kusandula muntu – kusinikizya takukonzyi kusandula muntu pe. Nokuba moyo muyumu nta mbuli bbwe ulakonzya kubomba kuluzyalo lwaluyando, kakuli kusinikizya kwiindilizya buyo kuyumya moyo.

Kusinikizya kukonzya buyo kusinikizya mubili wamuntu, pele takukonzyi kusandula mizeezo yakwe. “Muntu uutobela cintu katayandide lwakwe, ucili muntu uucilaa mizeezo yakwe.”1 Lulikke Luyando ndolulaa nguzu zyakusandula lusyomo ambwalimvwide muntu, akusandula basinkondonyina kuti babe balongwenyina.

Bupati bwa luyando lwamuntu bulipanduludwe mu Mangwalo kuti: “Kunyina luyando lwiinda kukomena ndwajisi muntu mbuli loolu, kuti muntu alazyikile balongwenyina buumi bwakwe ansi.” (Johane 15:13, KJV)

Kutondezya Luyando lwa bulemu bwakujulu, eelyo Yahuwah naakasungula Mwanaakwe, kwakayubununa Luyando lwiinda atalaa luyando loonse: Yahuwah wakasungula buumi bwa Mwanaakwe alikke kutegwa avwune buumi bwa basinkondonyina!

“Obuya Yahuwah mbwaakiiyandisya nyika cakuti Walo wakiipa” . . .zyoonse kufumbwa ncaakajisi. Yahuwah wakayubununa bulamfu bwa luyando butanabwenwe. Walo wakayubununa luyando lukonzya kulekelela cibi akuvwuna babisyi. Walo wakiiyandisya nyika cakuti “ wakiipa Mwanaakwe simuzyalwaalikke kutegwa kufumbwa uusyoma muli Nguwe atakafwidilili pele akabaa buumi butamani. (Johane 3:16)

Mangwalo apa kaambo keni Yahuwah ncaakali kuyandisya kusungula Mwanaakwe: “Yahuwah taakatumizya Mwanaakwe munyika kuti azyoosinganye nyika pe, pele kutegwa kwiinda muli Nguwe nyika ikonzye kuvwunwa!” (Johane 3:17)

Eelyo aaka kasimpe nokatontomana kuzeezwa, ndendilyo ooyu musyobo wa Luyando nuutalika kunjila mumizeezo yamuntu akumvwisyigwa, akusandula muntu ooyo. Tacikonzyi kwaalilwa kucitika eeco. Bulumbu bulasinsimuka mumoyo wamuntu eelyo muntu naibaluka kuti Yahuwah wakatumina Mwanaakwe kuzyoovwuna muntu ooyo, kutali kumusinganya!

Kulumba ncibeela cakulimvwa kuyandwa. Zipego zipati zilakonzya kupegwa, pele kuti tiizyabikkilwa maanu akulanganya mbozyibede bwini ncobeni, akutondezya luyando, kunyina pe kulumba kunga kwasinsimunwa nokuba kujosya luyando kunga kwacitika.

Bana balayandisya kwaabila bamwi zintu zyabo. Toyo twabo tusyoonto tulalangila nzila zyakutondezya luyando, nanka mukupa cifwanikiso, nokuba kupa kakata kamaluba.

kasimbi kasyoonto kajisi malubaMuzyukulu wangu musyoonto ali boonse ulayandisya kundipa maluba Ime. Taakwe makani naa aayo maluba aamungunga waji nokuba aasubila pyu. Walo nabona luba, ulayanda kulitema akulipa muntu umwi ngwayandisya. Kuli nguwe, insoke teesyi cintu cikola pe, nokuba ceeco caatula zyoonse zili kumbele lyayo mbuli mbotulanganya nsoke swebo tobapati. Kunze lyaboobo, walo ubona buyo kuti maluba aacisombo aalisanseene alimwi uyanda kutema maluba aayo akupa muntu umwi ngwayanda kutondezya luyando lwakwe.

Ziindi zinjaanji Ime ndavwiila nakonkomona kumulyango, kuti ndibone busyu bwakwe nkwamwetamweta kasiside maanza aakwe kusyule lyakwe. Walo ulasekaseka kasangalede akwaamba kuti, “Ime ndijisi cintu cakukunyandya!” Mpoonya nkuyubununa cipego ciyandisi ca luyando lwakwe.

Aciindi cimwi, Ime ndakamutoleezya neekaunka kumusika. Naakabona maluba mapati aalaa misyobo yiindene, wakacengulukila kuli ndime kazwide kulombelela mumeso aakwe: “Ndakomba, amundipe mali? Ime ndibulide mali! Ndakomba?”

Nkezyi cintu cini eeco cakamupa kuti azuumuke kuyanda mali, Ime ndakayeeya zintu zimwi zyoonse nzyeekali kuyanda kuyobozyela mali. Nokuba boobo, meso aakwe akazwide kulitolaansi akukombelela, kaatondezya kuyandisya ncobeni, eeco cakanduumuzya akucengulula mizeezo yangu kuti ndileke zintu nzyeekali kuyanda akupengela mumoyo.

Ndakamupa mali amwi, kumwi walo kandilaila kuti, “ Ono jala meso, utalangi! Njanda kukunyandisya!”

Mukaindi kasyoonto buyo tutende twakwe twakali kumwantauka akuzyaninina twakandizyibya kuti wapiluka.

“Nkooko! Aaya ngaako! Hena taali mabotu na?”

Ime nsyekalubi luyando lwakali kulibonya mubusyu bwakwe kumwi jwi lyakwe nilyakali kundaambila luyando lwakwe kuli ndime. Ime nsyeekabulide maluba pe, pele walo wakali kuyanda ciindi cakuti anditondezye luyando lwakwe kwiinda mukundipa maluba aayo.

Taata Yahuwah wakujulu wabusongo, wakalizyi zipego zyaluyando zyoonse mumulengalenga kuti inga tiizyanyonena myoyo yabana Bakwe kuli Nguwe, kuti tiibazyibona zipego Zyakwe akulumba nobatambula zipego eezyo. Walo tabulide kumvwa nkotulumba muluyando lwesu pe – pele Walo ulizyi kuti swebo tweelede kutondezya kulumba aluyando.

Saatani wakatamikizyide Yahuwah kuti wakalenga buyo zilengwa leza zyakwe kutegwa kazilumbaizya buyo Nguwe akumubelekela milimo yakumutembaulwa. Cintu cuusisya ncakuti, bantu banjaanji basyoma ncobeni kubeja kuli boobu. Eeci ncintu ciimpya kasimpe ncobeni. Kufumbwa buyo luyando noluzyibwa amuntu, ooko kulumba nkwalimvwa kupa kuti ajokezye luyando.

Muzyali ulaa busongo, ulayanda kuti bana bakwe kabaamba kuti, “Ndalumba.” Kufumbwa coonse ncaapegwa mwana, weelede kuzyiba akutondezya kulumba kwakwe mujwi lyakwe. Meenda aakunywa azipego zipombaidwe kabotu-kabotu zyoonse zyilayandika kwaambwa kuti “Ndalumba.” Eeci ciyanza cakutondezya kulumba ciyaka luyando akulumba mumizeezo yamwana.

Kuzwa akuzyalwa, mpoonyaawo muzyali ulatalika kuyanda mwanaakwe, pele mwana kunyina nalimvwa kuti uyanda muzyali wakwe. Kanjaanji mumilumbe kuli makani aabana batukila akutundulula bazyali babo bacembeede. Nokuba kuti kuli twaambo tunjaanji twakaletelezya makani aali boobo, ncintu comwe buyo cipa kuti bana batalike kunyansya bazyali babo. Kulumba takukonzyi kuyiisyigwa mwana musyoonto kwiinda mumukonzyanyo. Kweelede kuyandika kuba ciyanza muciimo ca mwana ooyo.

Nkakakali kaambo aako Yahuwah ncaakali kuyandila ziindi zibotu zyakuti bantu Bakwe bazyibe akulitondezya kulumba kuli Nguwe nkaambo kazileleko eezyo nzyaakabacitila. Taata ulizyi kale eeco cili mumoyo amumizeezo yamuntu uuli woonse. Walo ulimuzyi muntu omwe omwe cigaminina mbuli kuti kunyina muntu uumbi uuli munyika kunze lyayooyo. Walo ulizyi mizeezo yesu ambotulimvwa. Walo tayandi kuti swebo katupailila buyo nkaambo Kakwe. Mupailo nceciindi cesu cakuti twaanguluke kusumpula mizeezo yesu kuti katuyeeya mbuli Nguwe, akunjila mumizeezo Yakwe.

Mupailo utupa ciindi cakuleka kubinda kujata maanka abuzuba, kuti tutontomane kuyeeya zipego nzitwaatambula, kulilekelela nzitwaalubizya, akulimvwa kulekelelwa. Kulumba ooko nkotumvwa eelyo notulumba zileleko, kuletelezya luyando akusyoma mumoyo wamuntu – alimwi eeci nceciyandika.

Mbweenya buyo, “Nsabata yakabambilwa muntu, alimwi kutali muntu kubambilwa Nsabata.” (Maako 2:27) Yahuwah wakalizyi kuti, ikuti kakwiina buzuba bomwe bwakulyookezya akukomba, muntu mulyato, syaacivwulemwangu inga kanoobeleka lyoonse kuyandisya buyo mpindu akusweekelwa buumi buteeli. Kulailila kuti kujika kucitwe mubuzuba bwakulibambila, cakaangulula bamakaintu kuti baleke kupika mililo aanga mbazike bajikila mikwasyi yabo pobwe. Kulailila kuti kubule mulimo uucitwa, cakapa kuti mukwasyi woonse, antoomwe abatumwa abanyama kuti babaa ciindi cakulyookezya akukatulukwa.

Ciibalusyo ca mucado naa buzuba bwa lukwato inga caba ciindi cakwiibaluka ciindi eeco cibotu ciyandwa akulisungwida mazuba aacizya kumbele. Nsabata nziibalusyo zya Malengelo aanyika. Kulekezya milimo akulyookezya mu Nsabata nciibalusyo cazisyomyo zya Mulengi nzyaakabamba kumatalikilo kwini – kuleleka ndiswe akutubamba, akutwaabila zyoonse nzyotuyanda kuti tupone akukkomana.

Mazuba mataanzi aa Myezi Mipya, aalo nziindi zyakusekelela. Zileleko eezyo zyakatambulwa mumwezi wakainda zilaibalukwa akulumbwa, eeco ncecikulwaizya kuzumanana kulyaaba alimwi mumwezi uutobela. Mapobwe aaciindi comwe amwaka aalo akali kuyandika, akali ziindi zyakwiinduluka kulyaaba akubambululwa, alimwi kapati, kupa kulumba.

Akataa mapobwe aaciindi comwe amwaka, Pobwe lya Mavwuka lyakabambilwa kupa kulumba. Lyakali mvwiki yoonse yakulumbaizya akusekelela pobwe! Butebuzi bwamwaka ooyo bwakali tebudwe kale akubikkwa mumatala alimwi cakali ciindi cakutontomana kuyeeya zipego zinjaanji eezyo cikata ca masaansa mumuunda wamasaansaTaata muciindi cakainda nzyaakapede bantu bakwe. Izuba libala, imvwula iikomezya zisyango; kukwabililwa kuzwa kuzyilijazyo abasinkondonyina babuumi bubotu kumikwasyi yabo – zyoonse zyakasinsimuna moyo uuzwide kulumba zileleko zizwa Kujulu.

Eelyo bana ba Isilayeli nobakakoma munzi wa Canaani, bakakoma nyika yakakkedwe kale bantu bamwi. Basinkondonyina bakabingwa kumbele lyabo, mpoonya bakalijanina maanda aazwide kale zintu zyeebeka, myuunda ambewu zilaa masaansa, myuunda iizwide micelo, meenda aakunka acintu cibotu cili coonse ciyandika mubuumi bwakukkala kabotu. Yahuwah wakalizyi, nokuba boobo, kuti moyo wamuntu uuwide mucibi, ulafwamba kuluba zileleko zipati akutalika kuzyuubausya.

Walo wakali kuyanda kuti ayibalusye mizeezo yabo lyoonse kutegwa kabamusyoma kuti ucinoobabambilila. Walo wakalailila kuti bana ba Isilayeli beelede kubungana antoomwe akwaanzika mavwuka aabambidwe amitabi amasanzu aamasamu. Bakeelede kucita eeco amwaka muciindi ca Powe lya Mavwuka akusekelela buvwubi abwaabi bwa Kujulu. Bakeelede kwiibaluka lyoonse kuti Taata wakujulu nguwaabavwuna mbuli cisi comwe kuzwa mubuzike ku Ijipita.

Kulumbila lwaanguluko lwa cisi azileleko zyaabuzuba, eeco inga cazumanana kupa kuti luyando akusyoma kakucili mumyoyo yabo. Eeci inga caba cikwabilizyo kumasunko aa Saatani kuti waboongelezya kunjila mumituni. Saatani wakalizyi kuti, ikuti wazyola bana ba Isilayeli kuleka kutobela Yahuwah akukomba baleza bamituni, nkabela julu tiilyakacili kukonzya kubakwabilila kuti batazundwi abasinkondonyina bakali mumbali lyabo.

Cintu cikondelezya ncakuti eelyo pobwe litaanzi bana ba Isilayeli ndibakaleka kusekelela lyakali lya kupa kulumba mu Pobwe lya Mavwuka. Kukomba kwamasimpe kwakaide kuba kupaila kwabuyo. Kwakaba bupaizi bwa zilengwa zyabantu alufutuko lwamilimo yamaanza aabantu. Mpoonya kukomba mituni kwakafwamba kutobela kuzwa waawo. Ooku kusofwaala mumoza kweelede kutondezya ncokuyandikila kubamba mapobwe woonse ookwa Yahuwah amoyo uusyomeka akulumba.

Yahuwah taakabulide kulumbaizyigwa abana ba Isilayeli mbweenya mbwatabulide kulumbaizya kwako. Nokuba boobo, Walo ulizyi kuti, mbweenya mbuli bana ba Isilayeli, yebo uyandika kubaa ciindi cakwiibaluka zileleko Walo nzyaakakupa, akutondezya kulumba kuzipego Zyakwe akulekela moyo wako kuti utikaike luyando kwiingula Nguwe.

tusimbi tobile tumwetamweta Eelyo muntu umwi nayandwa akutambulwa aluyando lutakwe magolelo, luyando lutafwi, kufumbwa cintu akataa zyeezyo zimusinkila zyoonse zyiladilimuka. Moyo tuukonzyi kulilesya kwiingula Luyando lusinsimuna luyandonyina!

Bwiinguzi bwa moyo uulimvwa kuyandwa, nkutondezya luyando kwiinda mumicito. Ooyo muntu wakamvwa Luyando lwabulemu bwakujulu aciindi cimwi, ulangila kutondezya luyando oolo alakwe. Citalika kuba cintu cili muciimo cakwe munyika yoonse kuteelela Taata. Moyo ooyo wakazangide aciindi cimwi, lino ulabombekwa aluyando, akujana kukkomana mukubamba mulawo wabulemu wa Luyando.

Yahushua wakabikka musunko wakutondezya kuti naa muntu ulamuyanda ncobeni Walo: “Kuti yebo kondiyanda Ime, yebo weelede kubamba milawo Yangu.”2 Kuteelela milawo yoonse yokwa Yahuwah ncecintu cicitika kumoyo wamuntu ooyo uuzwide luyando lwa Uupa mulawo.

Ooku takuli kuyandisya tulawolawo pe. Saatani ulafwamba kucinca tulawolawo lyoonse kufumbwa muntu natalika kutobela mulawo wabulemu bwakujulu. Cintu cuusisya ncakuti, bantu banjaanji batalika kutobela mubukandu kabayoowede cintu cinga catobela waawo – nokuba kusyoma kuti balakonzya “kulijanina nzila yakuya kujulu lwabo beni” kwiinda mumilimo yamaanza aabo akuleka kuteelela. Tacili cintu cikonzyeka lyoonse kufwamba kwaandaanya akataa muntu uuteelela nokuba yooyo “uulilangawida nzila yakuya kujulu” amuntu uuteelela nkaambo ulaa luyando. Kuteelela kulakonzya kulangika munzila iikonzyene mbweenya nokuba kuti kuzyila mumakanze aayimpene.

Nokuba boobo, Yahuwah ulizyi kale zyoonse. “Nkaambo Yahuwah ulabona kwiinda mbuli muntu mbwabona; nkaambo muntu ulanga ciwa caatala, pele Yahuwah ulanga mumoyo wamuntu.”3 Kuti kuteelela kwa muntu kakucitilwa buyo kutegwa muntu “akanjile” kujulu, ooyo muntu uyoosweeka.

Yahushua wakapandulula kuti:

Tabali boonse bandiita kuti 'Yahushua , Yahushua' bayoonjila mubwami bwakujulu pe, ccita buyo ooyo uucita nzyayanda Taata uuli kujulu.

Mubuzuba oobo banji-banji bayoondaambila kuti 'Yahushua, O Mwami wangu Yahushua, sena tiitwaakakambauka muzina lyako, kugwisya myuuya mibi, akucita milimo yanguzu minji?' Lino ndiyoobaambila kuti, 'Nsimwizi pe! Amuzwe nywebo nobasizibi. (Bala Mateyo 7:21-23.)

Ncintu cikonzyeka kwiinda mukulimvwa kuli buti koonse, akubamba milawo yoonse pele kuyoosweeka kumamanino. Cintu ciimpene ncintu ciletelezya micito ya muntu. Hena milawo Yakwe ilabambwa nkaambo kaluyando? Naa abambilwa kuyandisya “kunjila” kujulu?

Yahushua waamba kuti aabo bakacita “milimo mibotu yoonse eeyi” tabali baabo balangilwa kuyoonjila kujulu nkaambo kakaambo komwe buyo: Walo tabazyi. Ijwi lyakuti “kuzyiba” mu mangwalo lyaambilizya cintu cilemu kwiinda mbolyaamba mu Cikuwa camazubaano . “Adamu wakamuzyiba Eva mukaintu wakwe; mpoonya wakamita, akuzyala Kkaini . . .” (Matalikilo 4:1, KJV) Oolu nduzyibo lwiinda kuzyiba mumutwe buyo. Ooku nkuzyiba kumaninide ncobeni, mbuli muntu mbwazyibene amuyandwa wakwe.

Nkaambo kuzyiba Yahuwah nkuyanda Nguwe, kuteelela nkwiingula kwamoyo ooyo ulaa luyando. Aboobo, ulikke mulimo wakuteelela muluyando nguutambulika.

Cimwi cintu cigambya ncakuti, eelyo luyando noluletelezya kuteelela, ayalo “milimo yamulawo tiilanganyigwi kuti milimo yakubeleka pe. Luyando talubikkilili, nokuba kulangila cintu cimwi cakuvwola nkaambo kamulimo wakacitwa. Yahushua wakatondezya ciiyo eeci eelyo Walo naakapa ciiyo camamanino aanyika:

Eelyo Mwanaa Muntu nayooboola mubulemu Bwakwe, alimwi bangele Bakwe kabalaa Nguwe, mpoonya uyookkala acuuno cabulemu Bwakwe. Masi woonse ayoobungana munsi Lyakwe, alimwi Walo uyookwaandaanya bamwi kuzwa kuli bamwi, mbweenya mbuli mweembezi mbwazandula mbelele kuzwa kumpongo. Alimwi Walo uyoobikka mbelele kujanza Lyakwe lyalulyo, pele uyoobikka mpongo kulumwesyi.

Mpoonya Mwami uyooti kuli baabo bali kujanza Lyakwe lyalulyo, ‘ Kamuboola nywebo nomulelekedwe a Taata Wangu, mukone bulelo oobo mbumwaabambilwa kuzwa kumalengelo aanyika: nkaambo Ime ndakalaa nzala mpoonya nywebo mwakandipa cakulya Mebo; Ime ndakalaa nyota mpoonya inywe mwakandipa cakunywa; Ime ndakali mweenzu alimwi inywe mwakanditambula; Ime ndakalaa mantanda alimwi inywe mwakandisamika; Ime ndakalicisidwe mpoonya inywe mwakandiswaya; Ime ndakali muntolongo mpoonya inywe mwakaboola kuli Ndime.’

Mpoonya baluleme bayoomwiingula Walo kabaamba kuti, ‘ . . . [Yahushua], ndilili swebo nitwaakubona Yebo kofwide nzala akukusanina, naa kofwide nyota akukupa cakunywa Yebo? Ndilili swebo nitwaakubona koli mweenzu akukutambula, nokuba koli aamantanda akukusamika Yebo? Naa ndilili swebo nitwaakubona Yebo kociswa nokuba koli muntolongo, akuboola kuzyooswaya Nduwe?’

Mpoonya Mwami uyoobavwiila akubaambila kuti, ‘Ncobeni, Ime ndimwaambila masimpe, kufumbwa eelyo nimwakali kucitila baaba akataa basazima, inywe mwakali kucitila Ndime.’ (Mateyo 25:31-40, NKJV)

Kuzyiba Taata a Mwana cakumaninina, akuzyibwa aambabo, ncintu ciyandika kubaa ciindi cakukkala ansi ambabo. Kuti webo kotakwe cilongwe abaabo mboyandana limwi, kobikka ambali ciindi cakubambilila cilongwe eeco, mbweenya mbuli cilongwe cili coonse. Kobala jwi Lyabo; kosoma nzila nzyobakutondezya luyando muzilengwa leza.

Kuti kolimvwide kuba kulaale mumoyo wako akuti ulimvwide aanga tomuyandi Taata Amwana amoyo wako woonse, eeci cilakonzya kucincigwa. Koibaluka zileleko zinjaanji eezyo zili mubuumi bwako, mukaintu uusakene mizeezoanzila zinjaanji zimwi nzyobakutondezya luyando lwabo. Hena kuli ziindi mubuumi bwako yebo nookakwabilidwe ncobeni? Hena ulaibaluka ziindi zimwi nookatambwide bulumbu mbootakali kulangila? Kotontomana kuyeeya zintu eezi akuzyibikka mumizeezo yako.

Kolangisya tuntu tusyoonto tunjaanji ooto tukuboolela munzila yako abuzuba. Kolekela moyo wako kuti ulungumane ku Mulengi wako mumipailo yako. Eelyo notaluuka ntaamu kuzwa amunzi wako, kolumba Nguwe nkaambo kakusangalala anze . . . nokuba kumulumbila ciyusilo eeco cikukwabilila niiwa mvwula. Eelyo nopetaika milwi ya zikobela zyako, komulumba Walo nkaambo yebo ulakonzya kusamika mukwasyi wako. Eelyo nojisi bubi mumilimo yako abuzuba, komulumba Walo nkaambo kanguzu nzyakupede kuti ucite ceelede kucitwa.

Komulumba Singuzu Uupa-zipego nkaambo kabuumi bwako, buumi bubotu, kasimpe, luyando, balongwenyoko, kufumbwa cikweetela kukkomana, kukkuta akubaa luumuno. Eezyo nzyezintu zilondo zikonzya kukuponya kulendelelwa kwako akubaa buumba akwalo.

Lukondo ndoyoojana kujulu luleelene kweezyekanya a luyando alusyomo ndopa kuli Taata Yahuwah yebo nocili munyika eeyi. Mumisela minjaanji iisikila kuteeli, banunudwe bayoojana kukondwa kapati mukuyanda akuyandwa aa Mulengi wabo. “Bayandwa bokwa . . . [Yahuwah] bayookkala kabatakwe ntenda munsi Lyakwe: alimwi . . . [Yahuwah] uyoobavwumbilila buzuba boonse.” (Ciibalusyo 33:12)

Okuya kujulu, mizeezo yabantu batakonzyi kufwa iyookweebela zintu zikondelezya zyakalengwa, maseseke aaluyando lunununa. Kunyina pe muntu ulaalunya, naba sinkondonyina uukakatila kusunka mbabo kuti balube . . . [Yahuwah]. Cibeela cili coonse camizeezo yabo, ciyoosima akukomena, zyoonse zili mubongo ziyoobeleka mbozyeelede kubeleka kabotu. Kuzyiba zintu zinjaanji tacikabi cintu cibatolwaazya mizeezo yabo nokuba kubakatazya. Kuyooba milimo yeebeka iyoocitwa, zintu zinjaanji ziyookonzya kucitigwa, amizeezo minjaanji iyoomaninina kulibonya; alimwi kucinooli kulaale kuzulila bulemu, kucinooli zinjaanji zitaliboteli zyakweebela, tusimpe tunjaanji twakumvwisisya, zintu zinjaanji zikulwaizya nguzu mumizeezo, mumuya amubili.

. . . Alimwi mumyaka yoonse iiteeli, mbuli myaka mbwiiyaa kwiinda, iyooleta ziyubunuzyo zizwide bubotu abulemu bwa . . . [Taata a Mwana]. Mbuli luzyibo mboluyungizya kuya kumbele lyoonse, mbweenya aluyando, kulemekezya, akukkomana akwalo kuyookwiindila kuyungizya.4

Myaka iteeli yakukkomana iiyungizya kuya kumbele, kukkuta mumoyo, milimo iikondelezya aluyando luteeli, zyoonse eezyo zilindila nduwe nkaambo Yahuwah ngo luyando.

"Koswiilila Jwi lya Muyandwa Wangu”

Koswiilila jwi lya muyandwa wangu
Kaliita kumamanino aabuzuba.
“Koboola, omooye wangu! Koboola kaka undicingauzye Ime,
Kobuka, Kobuka kaka, kozya tweende.

Musinze wamupeyo ulaafwi kuumbuluka
Alimwi mvwula ilaafwi kwaamuka.
Maluba adukuzya amasamu asyuuka matu.
Ciindi cakwiimba casika.

Ime ndalikulindila muzimvwule
Kulindila Simalelo wangu kuti andiite
Lino bucedo bwasika kukabe kutamani.
Mumumuni Wakwe, Busyu Bwakwe ndabubona Ime.
 

Eelyo nobona mukuyu wasyuuka matu
Yebo inga wazyiba kuti mainza asika.
Eelyo yebo nomvwa majwi ngekwaambila
Yebo ulazyiba kuti kuboola Kwangu kwaswena aafwi.

Kozumanana kuswiilila omooye wangu,
Nkaambo kuboola Kwangu kulaafwi kusika.



1 Samuel Butler (1612-1680), Hudibras., Cibeela iii. Canto iii., Mweengwe 547.

2 Langa Johane 14:15, Nestle-Aland Greek New Testament, busimbo bwane.

3 Langa 1 Samuele 16:7.

4 E. G. White, Great Controversy, p. 677.