Mumazubaano aakujala mumusela wanyika, muulo wakujana buumi butamani uyaa kulibonya caantangalala. Mufutuli Lwakwe wakayubununa muulo ooyo Walo naakati:
“Alimwi bwami bwakujulu buli mbuli musambazi uuyandaula ngale zibotu. Naakajana mbotu kwiinda wakainka waakuuzya zyoonse eezyo nzyaakajisi akwiiwula.” (Mateyo 13:45-46, NKJV)
Kuyoonjila Julu, kuyandika kusiila limwi zyoonse zyanyika. Yebo toyelede buyo kuti naa uliyandide kusiya zyoonse – yebo weelede kusiya ncobeni kufumbwa cintu ncoyandisya kutegwa ukatambule Bulelo bwa Kujulu.
Boonse batambula Nsabata bayokwiitwa kuzyoolitukka mukuli, eeco nce ciciingano cakuteelela mulawo. Eeci nciciingano ciminya ncobeni nkaambo cinoojatikizya zibeela zya buumi bwako zyoonse.
Kutambula Nsabata kuyookuletela masunko manjaanji mapya. Zintu zinji zipya ziyookuboolela eezyo zyeelede kubambululwa kubelesya busongo bupati kwiinda maanu aamuntu. Muciindi eeco, mbweenya mbuli muziindi zimwi, Yahuwah wakapa kale nzila yakweendela akubambulula penzi lili lyoonse.
“Yahuwah amubede aaluse akumupa luumuno lunji kwiindila mukumuzibisisya walo a Yahushua Mufutuli wesu. Messiah munguzu zyabuleza bwakwe wakatupa zyoonse zitugwasya kuba aabuumi abukombi bwini-bwini. Wakacita oobo kwiindila muluzyibo lwa Yahuwah wakatwiita akaambo kabulemu abubotu bwakwe. Mulinzizyo wakatupa zisyomezyo ziyandika zipati kapati kuti mukatambule buumi bwabuleza mwamana kufutulwa kukunyonyooka kwaansi aano nkaambo kazisusi.” (2 Petulo 1:2-4)
Ijwi lyokwa Yahuwah lilaa nguzu zyakucita ncolyaambilizya cini. Aboobo, yebo weelede kulisakatizya muzisyomyo Zyakwe zipati zilibotela nzyaakasyomya! Eezyo zisyomyo nzyezipego Zyakwe kuli nduwe. Yebo inga wakkazyika ncobeni camba cako muzisyomyo zyoonse nkaambo eelyo Jwi lyokwa Yahuwah lyakaambilizya zisyomyo eezyo, lilaa nguzu ncobeni zyakuzuzika cintu ncolyaamba.
Zyoonse zisyomyo zili mu Mangwalo nzyabaabo balemekezya Mulengi wabo kwiinda mukubamba buzuba Bwakwe busetekene bwa Nsabata. Kuti yebo mukubamba malailile Aakwe, wanjomba mumapenzi amasunko, kotaminina buyo cisyomyo Cakwe!
“Mwami Yahuwah ulabavwuna balulami nobamulilila kuti abagwasye, kuzwa mumapenzi aabo oonse ulabavwuna. Mwami Yahuwah ulaafwiifwi abaabo bawizukide, aabo bazingidwe mumyoyo ulabafutula. Mululami mapenzi manji naamusikila buti, Mwami Yahuwah ulamuvwuna kuzwa kuli ngawo.” (Kolanga mu Intembauzyo 34: 17 & 19.)
Kulayandika kubaa camba kutegwa utobele kasimpe kakwaandaanya kuzwa kubantu bamwi. Bantu batayandi kasimpe balacimwa akutalika kukonga baabo baimvwi nji mukutabilila kasimpe.
“Aabo bandikazya O Mwami Leza, ubakazye ayebo, aabo bandilwana ubalwane. Bweza ntobo azyakulwanya zimwi, nyamuka uzoondigwasye. Belesya sumo amuumba, kuli baabo banditandaanya, ndipa camba cakuti, “Ndilakufutula.” Bagunwe, bause nsoni aabo bayanda kundijaya, bapiluke kabatyompedwe aabo bayanda kundinyonyoona.” (Intembauzyo 35:1, 4)
Kulemekezya Mwami Yahuwah kwiinda mukukomba mubuzuba Busetekene bwa Nsabata inga cakupa kuti usweekelwe mulimo. Yahuwah ulizyi kale makani aayo azintu zyoonse nzyoyanda. Kunyina muntu uusyoma muli Nguwe uunga waingaila akufwa nzala pe.
“Ntaamu zya muntu uululeme zilizumizyidwe a Mwami Yahuwah, alimwi Walo ulikkomene mubweende bwakwe. Nikuba kuti muntu uululeme alebwe inga tawi pe, nkaambo janza lya Mwami Yahuwah mwini ndelimujatilide. Ndakali mwana mpaawa sunu ndacembaala, pele nsina bona balulami mbaakalekelezya Yahuwah nikuba kubona bana babo kabalombelela cakulya.” (Langa Intembauzyo 37:24, 25.)
Ijwi lyokwa Yahuwah lilaa Nguzu zyakuzuzika ncolyaamba cini. Aboobo kolikankaizya muzisyomyo Zyakwe zipati ziyandika! Eezyo zisyomyo nzipego Zyakwe kuli nduwe. Yebo inga wakkazyika camba akuliiba koyaamide muzisyomyo Zyakwe nkaambo eezyo zyisyomyo ndi Jwi lya Yahuwah alimwi zijisi nguzu zyakuzuzika ncozyaambilizya.
|
Yahuwah ulizyi kale mbozyikweendela zintu mubuumi bwako.
“Meso ookwa Yahuwah alngide ku baluleme, matwi Akwe aswiilizya kulilauka kwabo.” (Kolanga Intembauzyo 34:15.)
Aabo batayandi kasimpe inga batalika ncobeni kukutundulula akukuyoosya; intenda njoswaanganya nintenda ncobeni. Pele Mwami Yahuwah wakakusyomezya kale bukwabilizi Bwakwe.
“Utalipenzyi akaambo kabantu bacita zisofweede, bacita zibi utababedi aabbivwe. Balafwambaana kupusama mbuli bwizu, balanyana-nyana mbuli mweemvwe. Kosyoma mu Mwami Yahuwah noticite zibotu, notikonzye kukkala munyika cakuliiba. Mu Mwami Yahuwah kobotelwa, ziyanda moyo wako uyookupa. Ku Mwami Yahuwah ulipe, uyookucitila zibotu osyoma muli nguwe. Uyoomwesya bululami bwako, mbubumweka mumuni wakubucedo, mbuli sikati mbobuyoobala bululami bwako. Konga kolibatamika kumbele lya Mwami Yahuwah, utapengi bantu bazwidilila munzila zyabo bamanizya kucita milimo mibi. Lijate, leka bukali, utanyemi, utalikatazyi nkaambo inga cakuletela bubi. Bayoonyonyoonwa babi, bayookona nyika aabo balindila Mwami Yahuwah. Kwainda kaindi kaniini buyo, babi tabacinooliwo, tabakajaniki nikuba kuti ukabalangaule. Babombede myoyo bayookona nyika, bayookkala muluumuno akukupuka. Babi bakanza baluleme, cabukali babalumina ntwino. Ulabaseka babi Mwami Yahuwah. Nkaambo ulizi kuti, bulasika buzuba mbobayoosubulwa. Basizibi basomona mapanga akukwela buta, kuyanda kuyasa bacete bapengede, aabo beenda munzila ziluzi babajaye. Mapanga aabo ayoobbwabula myoyo yabo beni, mata aabo ayootyoka. Cita cintu cibotu ciluleme nociceya, kwiinda kucita bubi bwabasizibi banji. Nobaba aanguzu buti basizibi bayoonyonyoonwa, Mwami Yahuwah ukwabilila baabo baluleme.” (Langa Intembauzyo 37:1-17.)
Kunooli ziindi zimwi notazyi nconga wacita. Utayoowi! Kolisakatizya mu cisyomyo Cakwe!
“Kuti kakuli umwi akati uutakwe busongo, aakumbile kuli [Yahuwah], uupa cabwaabi kakwiina kusinsa kubantu boonse; mpoonya uyoopegwa.” (Jemusi 1:5, KJV).
“Nguyooyo uukakatila kusikila kumamanino uyoofutulwa.” (Mateyo 24:13, NKJV)
Inkondo akataa kasimpe abusofwaazi, bululami abuzangi, iyoopapa akulutila mbuli mbotuyaa kuswena munsaa Kuboola Kwabili.
“Boonse bayandisya kupona buumi bwabo kabeendelana a . . . [Yahushua] bayoopenzyegwa.” (2 Timoteo 3:12, KJV)
Bweende akataa zilongwe mumukwasyi abwalo tabukamwiindi kumbali muntu uusyomeka akumusyaanikizya kuti atobele zintu. Bazyali bacembeede bayoosiigwa kumbali; bana bayootandwa. Zikwati zyakaciliko ziyoonyonyooka eelyo umwi wa banabukwetene nayoosala kasimpe kakuli umwi uyoosulaika kasimpe. Caakucitika eeco, Yahuwah nguyooba banyoko, abauso amukaako:
“Nikuba kuti Taata a Baama bandisowa, Yahuwah uyoondibambilila akundisunga.”(Langa Intembauzyo 27:10.)
“Utayoowi pe, tokooyoousigwa bweeme, utayoowi zyakuusigwa nsoni, tokooyoobombezegwa pe. Uyooluba buusu bwakubukubusi bwako, tociyooyeeyi limbi masampu aabukamufu. Nkaambo Sikabumba wako ngo mwaalumi wako . . . [Yahuwah] wamakamu nde zina Lyakwe: Alimwi Munununi wako ngu Uusetekene wa Isilayeli: Walo wiitwa kuti [Elohimu] wa nyika yoonse.” (Izaya 54:4, 5, NKJV)
Mufutuli wakalizyi kale kuti basikwiiya Bakwe bayookwiindila kutundululwa mukuya kumamanino aaciindi. Kamwi kaambo nkaakaamba mangolezya kataninga kankaminwa, katondezya cisyomyo caluyando kubantu boonse bapona mazubaano:
“Munyika iino muyooswaanganya mapenzi; pele amukkomane, Ime ndiikoma kale nyika yoonse.” (Johane 16:33, NKJV)
Kutabikkila maanu kuzintu ziyoocitika eelyo yebo waakusala kutobela kasimpe, Yahuwah wakakonkezya kweendela antoomwe anduwe kufumbwa ntaamu njotaaluka mumusinzo, akuyookwiinzya kakwiina kunjila ntenda mumusunko uuli woonse.
“Ime njookupa malailile akukuyiisya nzila nyoyelede kweenda; Ime njookusolweda ameso Aangu.” (Intembauzyo 32:8, NKJV)
Cintu citakwe ntenda nkusyoma muli Yahuwah.
“Syoma Mwami Yahuwah amoyo wako woonse utaccilili maanu aako omwini, koyeeya Mwami Yahuwah mumilimo yako yoonse eelyo uyookululamikila nzila zyako.” (Langa Tusimpi 3:5, 6.)
Kwiina makani naa ncintu nzi cikuboolela kumbelaa mazuba, yebo ulitantamukide kale ntenda zyoonse kuti koli mumaanza aa Mufutuli. Eelyo nobweza ntaamu mulusyomo, kokanzide ncobeni kutobela Nguwe, Yahuwah uyookujulila nzila iitakwe ntenda yakweendela.
Kosyoma muli Yahuwah mwanookwesu. Kolazyika kufumbwa mukuli wako ali Nguwe. Kunyina musunko mulemu Walo ngwatakonzyi kukulemununa; kunyina penzi likopa kapati Walo ndyatakonzyi kubambulula; kunyina kulendelelwa kutaambiki ooko Walo nkwatakonzyi kuumbulizya.
Buno buzuba Mwami Yahuwah waambila nduwe musa kuti:
“Ndakusiila luumuno Lwangu yebo; kuleka mbuli luumuno lwaanyika mbwekupa. Utakatazyigwi mumoyo wako, alimwi utalibiliki nokuba kuyoowa.” (Johane 14:27, NKJV)
