|
Kwainda myaka 2000 kuzwa bantu nibaasyomezyegwa kuti Mufutuli ulaafwi kuzyokela. Aabo batasyomi bafubaazya cishinshimi citanazuzikwa eeci kuti nkakaambo keni ncobatasyomi. Koyungizya kubala wiiye mbokonzya kupandulula.
|
Bantu batasyomi balikkomene nobafubaazya lusyomo lwabantu basyoma. Cimwi ncobayandisya kufubaazya nkasimpe kali mu Mangwalo kayiisya kuti Mufutuli “ulaafwi” kuboola, pele kusikila sunu kwainda myaka 2000 tanajokela. Eeci tacili cintu cakulilesyela kusyoma. Mubwini, ooku kufubaazya boobu, kwakashinshimwa kunoocitika!
Petulo wakacenjezya kuti: “Kuyoosika basikasaaza mumazuba aamamanino, kabeendeenda mu zisusi zyanyama yabo kumwi kabati, ‘Cili kuli cisyomyo ca kuboola kwakwe? Kuzwa bamatata nibakoona mubulongo bwaansaano, zintu zyoonse zicicitika mbweenya buyo mbuli kumatalikilo aa Malengelo.’” (2 Petulo 3:3-4, NKJV)
Zimwi ziindi ibbala lyakuti “afwaafwi” mu Mangwalo, lyaambilizya zintu zinoocitka kuya munsaa kuboola kwa Yahushua, kutali kwaamba kuboola Kwakwe kwini. Messiah lwakwe, naakapa cishinshimi cisanganya kudilimuna munzi wa Jelusalema antoomwe amamanino aanyika, wakati: “Aboobo anywebo, mwaakubona zintu zyoonse eezi nkozicitika, mukazyibe kuti casika ciindi — casika amulyango! Ncobeni ndimwaambila masimpe kuti ooyu musela tuukayindi zyoonse eezi zintu kazitaninga citika pe.” (Mateyo 24:33-34, NKJV)
Eelyo Cizuminano Cipya nocipandulula kuboola kwa Yahushua kuti “kwaswena afwaafwi,” nanka kuti “kwasika,” nokuba kuti “ulaa mulyango,” tacaambilizyi mulongo wini waciindi kuyoosikila mpayelede kuboola. Pele, caambilizya kuti Messiah wasika. Buumi mbwaakapona butakwe cinyonyoono alufu lwakwe lwakacikoma kale cibi, mpoonya mulimo wakubunganya boonse batambula mulumbe mubotu wakatalika aawo.
Kuti mwana waambilwa kuti ndakupa cilweela “inoyino,”, mumizeezo yakwe inga wabaa muzeezo wakuti eelyo bbala lyaambilizya: mumazuba aacizya kumbele; cilaafwi kucitika eeco. Nokuba boobo, ibbala lisanduludwe kuti “linolino” mu Cikuwa, lizyila kubbala lyaci Giliki lyakuti tachu eelyo liguminizya zinjaanji zitajanwi mumabala eesu aambilizya kuti “linolino.”
Tachu ndibbala likonzya akwaambilizya kuti, mukulaba kwaliso, kucitika munzila iigambya, nokuba muciindi citalangilwi. Eeli ndebbala libelesyedwe mumajwi aamamanino ookwa Messiah naakati: “Amulange, Ime ndafwambaana kuboola [tachu] alimwi bulumbu bwangu bulaa ndime, bwakupa muntu omwe-omwe kweendelanya amilimo njaakacita mbwiinoobede.” (Ciyubunuzyo 22:12, KJV) Mumajwi amwi ooku nkokwaamba kuti, kuboola kwa Yahushua kuyoocitika mbuli nkondo yakavwumbu, kakwiina kulangilwa.
Balembi ba mulumbe mubou bakayiisya kuti awalo Yahushua taakazyi pe ciindi naakeelede kuboola. Mateyo 24:36 waamba kuti: “Pele oobo buzuba nokuba woola eelyo, kunyina muntu uubuzyi pe, nobaba bangele bakujulu pe, pele Taata wangu alikke.” Ikuti awalo Mufutuli taakazyi ciindi ncayelede kuboola, nkokuti taakali kukonzya kweezyeezya ciindi eeco nayoozyokela!
Akamwi kaambo katamvwisyidwe kabotu kajatikizya kuboola kwa Yahushua, nkaambo nkaakaamba Lwakwe Messiah naakati: “Ncobeni, ndimwaambila masimpe kuti, nkobali bamwi bayimvwi aano batakanjili mulufu kusikila bakamubone Mwanaa Muntu kaboola mubulelo Bwakwe.” (Mateyo 16:28, NKJV) Tee kayi boonse bakamumvwa kaamba majwi aayo bakafwa kale, pele aaka kaambo kacili masimpe ncobeni.
Yahushua wakaamba makani aayo kataninga sanduka atalaa mulundu akulibonya mubulemu bakwe. Eelyo Yahushua naakasanduka akulibonya mubulemu bwakujulu, aabo bakamubona bakali ba Petulo, Jemusi, a Johane; eeco ciindi cakali mukonzyanyo wa kuboola kwakwe kwakacili kumbelaa mazuba. Petulo wakafwamba kuyungizya atalaa makani aayo kuti:
Nkaambo nitwakamuzibya makani anguzu zya Messiah Yahushua azyakuboola kwakwe, tiitwakali kutobela zyaano zyakapangwa abucenjezu bwabantu pe. Pele twakalibonena ameso eesu bupati bwakwe.
Yahushua naakatambula bulemu akulemekwa kuzwa kuli Wisi Yahuwah, wakasikilwa jwi lizwa akataa bulemu akumweka ooko liti, “Ooyu ngomwanaangu uuyandwa uundikondelezya lyoonse.” (2 Petulo 1:16-17, KJV)
Akamwi kampango kazingide mizeezo yabantu, nkaambo Paulu nkaakataminina kuti walo ucinoopona Yahushua aakuzyokela: “Lino ndimwaambile majwi aa Mwami mwini. Swebo notusyeede notuyoojanika tuli baumi Mwami aakuboola, takuli kuti tuyoobasaangunina aabo bakafwa pe.” (1 Batesalonika 4:15, NKJV)
Paulu taakali kwaamba kuti ucinoopona aciindi Yahushua nayoopiluka. Pele, aaka nkaambo kasanganya bantu banjaanji. Paulu taakazyi pe kuti naa ucinoopona kusikila ciindi Messiah aakupiluka, naa unoofwide kale. Kwiina ncaakali kukombelela cinga caakumucitikila.
Ndalindila amoyo woonse kuti nsikooyoofwa nsoni pe. Pele njandisisya kapati kuti lyoonse ndibe aacamba akulemeka Messiah amubili wangu, nikuba kubuumi nikuba kulufu. Ino buumi ninzi kulindime? Nkaambo Messiah ulaandime, eelyo kufwa nimpindu mpati. Kuti naa kupona kucindipa ciindi cakubeleka milimo iitondezya micelo, nsizi ncenga ndasala. Ndajata maanka-maanka. Kuyandisya kwangu nkwakuunka kuli Messiah, kayi ncibotu kwiinda! Pele nkaambo kandinywe cileelede kuti nkecipona.” (Bafilipo 1:20-24, NKJV)
Cizuminano Cipya cilaa zishinshimi zikondelezya mbozipandulula milimo yokwa Messiah. Milimo yokwa Yahushua yakazuzika milimo amaleele aakashinshimwa kuti ngayoocita Messiah. Kuboola Kwakwe akwalo wakali mukonzyanyo. Munzila imwi, kwakazuzika zishinshimi eezyo ziyoozuzikwa mubukkwene aciindi ca kuboola kwakwe, eelyo bulelo bwa Yahuwah bwaakuletwa anyika.
Mubulelo bwa Yahuwah kulayandika mwami muntu wanyama ncobeni kuti akakkale acuuno cabuleli cokwa Davida. “Alimwi uyooba mwami waŋanda ya Jakobo mane kukabe kutamani. Bwami bwakwe tabukamani pe.” (Luuka 1:33, KJV) Eeci cakazuzikwa mumaleele ngaakazyalwa Mufutuli. Aboobo cisyomyo cabulelo bwa Yahuwah cakasimpya kusinizya mpeenya aawo. Nkako Mateyo ncalembede kuti: “Kuzwa aciindi eeco Yahushua wakatalika kukambauka, akwaambilizya kuti, Amweempwe: nkaambo bulelo bwa kujulu bwasika.” Walo nguwakeelede kukkala cuuno camwami cokwa Davida!
Bulelo Bwakwe, aciindi eeco, bwakacili bulelo bwa moza, pele ooyo mukonzyanyo uyoozuzikwa mubukkwene aciindi cakuboola kwakwe eelyo nyika mpya a Jelusalema Mupya waakuseluka kuzya anyika, kuti ukabe munzi wabantu bakanununwa aa Mufutuli..
Muntu lyoonse weelede kwiibaluka kuti kuboola kwa Yahushua kulaafwaafwi mbuli ciindi cakufwa cakwe. Buzuba abuzuba, zyuulu atalaa zyuulu zyabantu bayilingana kutiyaanina milimo yabo, kabatakubwene kuti, kuti moyo wabbubba mucamba kusikila wazima, nokuba kuti mootokala wabbewuka akunjila muntenda, nokuba bakabwalala babbida muntu mpoonya bamujaya, eezyo inga zyakosola buumi mpeenya aawo. Aboobo webo omuntu, kotambula mulumbe mubotu akuzumina lufutuko buno buzuba nocilaa ciindi.
Kuli omwe-omwe akati kesu, kuboola kwa Mufutuli kulaafwi kapati mbweenya mbuli kuti waleka kuyoya. Ambweni ciindi ciboola noyoolimvwa bulanga akubbatula meso, uyoolijana uzwa mucuumbwe kobuka kuzwa kulufu nayoozyokela Mufutuli. Aboobo kotambula lufutuko buno buzuba. Mpoonya, nokuba kuti twafwa limwi toonse, nokuba kuti katucipona kusikila tukamubone kaboola Yahushua, tunookkede katulaa luumuno muli Yahuwah.
