|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Ino ciyanza ca kupana zipego zya valentine cakatalikila kuli? Mbubuti Banakristu mbubaakona ciyanza ca BaLoma bansiku eeci? Nkaambo nzi ncokwiina nokuceya mu Bbaibbele aalailidwe kusekelela ciyanza cili boobu?
Casika ciindi cakuti tubuzye kaambo keni bazyali ncobakulwaizya bana babo kusekelela Buzuba bwa Valentine Musaante – kakuli kunyina pe anocaambidwe mu Bbaibbele.
Hena ulizyi kuti misela minjaanji kataninga zyalwa Messiah, BaLoma bakomba mituni bakali kupana zintu zya Valentine aciindi ca mwaka nceenya eeci? Mubuzuba bwa Mulumi 14, bakali kusekelela pobwe lya mituni kulemekezya “valentine” Lupercus, ooyo wakali “muwezi wa bawumpe”? BaLoma bakali kwiita pobwe lya BaLoma kuti ndipobwe lya “Lupercalia.”
Zisobano zya Lupercalia zyakali kucitilwa mumasena masyoonto buyo: Mumpangala ya Lupercal, atalaa Mulundu wa Palatine alimwi antangalala akataa BaLoma, amumuswaangano waantangalala wiitwa kuti Comitium. Pobwe lyakali kutalikila ku mpangala ya Lupercal ooko nkubakali kutuuzya mujembwe omwe nanka banjaanji—eeco cakali kwiiminina cisaaza—alimwi a mubwa.
Eezi zituuzyo zyakali kucitwa aaba Luperci, kabunga ka bapaizi baLoma. Kumanizya waawo, ankumo zyaba Luperci bobile kabalaa mantaanda bakali kuzilwazilwa bulowa bwa zinyama, kubelesya mupeni wa kujazya zinyama. Mpoonya oobo bulowa bwakali kusansamunwa aa boya bwa mbelele bunyikidwe mu mukupa kumwi ba Luperci kabasekelela.
Mumunzi wa Loma wansiku, kupobola kw/akali kutalika biyo mbubamanizya kujaya munyama. Eelyo pobwe lya Lupercal nilyakamana, ba Luperci bakali kutendulula mitendu, yiitwa kuti milaapi nokuba februa, ya cikutu ca bajembwe bazwaa kujayigwa.
Mpoonya bakali kubalika kabalaa mantaanda—nokuba kabalaa mutundulu asyoonto—kabayaa kuzinguluka Mulundu wa Palantine, kabakwibbaula kufumbwa mukaintu wakali munsimunsi a milaapi eeyo.1
Iciyanza cakupana zipego zya valentine azimwi zilengwa zya kupa bulemu kuli Lupercus—ooyo sikuweza-mukomi waku Loma “cakalekelwa kuzwa ku pobwe lya BaLoma lya Lupercalia, ilyakali mumwezi wa Mulumi eelyo mazina aa bamakaintu bakubusi naakali kunjizyigwa mu kabbokesi mpoonya banalumi bakali kuzubulula mazina aayo kufumbwa nkucagama cisolo,” mbolyaamba bbuku lya Encyclopedia Americana, art. “St. Valentine’s Day.”
Eelyo Constantine naakabamba kuti Bunakristu bube bupaizi bwa Bulelo bwa Loma, kwakali maŋunuŋunu mucikombelo aakusowa ciyanza eeci cakunga kufumbwa uuyanda mituni nkutobela, pele bantu banyenzi baku Loma tiibakali kwaayanda ampaayinda makanaayo! Aboobo bakazuminana kuti eeli pobwe lizumanane mbweenya mbulyakabede kaindi.
Pele ino mbubuti eeli pobwe lya mituni mbulyaapegwa zina lyakuti “Buzuba bwa Valentine Musaante?” Alimwi nkaambo nzi cifwanikiso ca Cupid uulaa mantaanda ca BaLoma mazubaano ncocijatikizya buzuba bwa Mulumi 14th? Alimwi nkaambo nzi bana baniini abakubusi ncobatendulula zifwanikiso zya moyo akutuminana mu buzuba bwa kulemekezya Lupercus sikuweza bawumpe? Nkaambo nzi ncotuyeeyela ziyanza eezi zya bakomba mituni zipa bulemu Leza wakubeja kuti nzya Bunakristu?
Valentine lyakali zina lyaazibidwe akataa BaLoma. Kanjaanji bazyali bakali kupa bana babo zina eeli mukulemekezya mwaalumi uulaa mpuwo ooyo wakataanguna kwiitwa kuti Valentine mumazuba aa sinku lini. Ooyo mulombwana wakali Lupercus, muwezi. Pele ino nguni Lupercus? Nkaambo nzi ncaakapedwe zina lyakuti Valentine akataa BaLoma bakomba zibumbwa?
Nkaambo nzi Nimrod ncaakapegwa zina lyakuti “Valentine” ku BaLoma?
Valentine ndibbala lizwa kubbala lyaci Latini lya Valentinus, izina likkwene lyakabambwa kuzwa kubbala lyakuti Valens, eelyo liiminina “kubaa nguzu,” mbuli bupanduludwe mu Webster’s unabridged dictionary. Liiminina “kuyuma, kubaa nguzu, kukoma.”
Mu Bbaibbele tubala kuti Nimrod wakali ”muwezi SINGUZU” (Matalikilo.10:9). Aaka kakali kaambyo kakazyibidwe mazubaa ciindi ca nsiku kuti Nimrod wakali muwezi wa Nguzu kunembo lya Mwami.” Nimrod wakali mukomi wabo – mwaalumi uulaa nguzu – VALENTINE wabo! BaLoma bakali kunga baamba kuti, - Valentinus, Valentine - kwaamba mulombwana mukomi!
Valentine mutaanzi wakali Nimrod, sikuweza bawumpe uulaa nguzu. Alimwi zina lya Nimrod lyakali lyakuti “Santa,” mukwaamba “Musaante.” Nkako pobwe lya Lupercalia lya BaLoma ncilyaakali kwiitilwa kuti “Buzuba bwa Valentine Musaante”! Pele ino nkaambo nzi eeco ncocijatikizya zifwanikiso zya MYOYO mubuzuba bwakupa bulemu kuli Nimrod - Bbaali waba Phoenicia aba Semaiti?
Bbaali – leza zuba
Bwiinguzi bunyandya mbwakuti BaLoma bakomba zibumbwa bakalijanina citondezyo cizwa ku bana Bbabbuloni. Mumulaka muna Bbabbuloni, ibbala liiminina moyo lyakali lyakuti “Bbaali.” (langa muli Young’s nokuba muli Strong’s concordance)
Umwi inga wabuzya kuti, ino cifwanikiso ca moyo cakazyila kuli–eeco ncotuvwuzya kubona mazubaano? Ku Egipita, “ooyu leza mwana muvwanda kanjaanji wakali kutondezyegwa muciimo ca moyo, nokuba muciimo ca mucelo uukonzyana a moyo Kkotapela [Avocado; Persea gratissima] (Makkotapela), mujanza lyakwe limwi” (The two Babylons, Alexander Hislop, p. 189). Hislop uya kumbele kuti: “mbombubo leza-mulombe mbwaakatalika kulanganyigwa aanga ngu leza wa moyo, mumajwi amwi, mbuli cupid, eelyo ndi zina lya Nimrod liiminina “kuyandisya” (Encyclopedia Britannica,” cibeela ca “Cupid”). Lino Nimrod naakakomena, wakaba mwana mukomi wa bamakaintu banji aabo bakali kumuyandisya. Wakali Cupid kuli mbabo! Walo wakacokacoka bamakaintu banji kuti babaa munyono nkaambo cibumbwa cakwe cakali kuvwuzya kwiitwa kuti “ncinkonzya ca munyono” (Ezekiya. 8:5). Nimrod, sikuweza, ngweenya ngowakali Valentine wabo – mukomi wabo muyumu uulaa nguzu!
Aakale, mumazuba aa Constantine, bupaizi bwa Bbabbuloni Simaseseke, kabulipeekezya kuba Cikombelo ca Kristu, bwakabamba Nimrod – Valentine Musaante wa bakomba mituni – kuti abe Musaante! Pele ino nkaambo nzi BaLoma ncibakasalila buzuba bwa Mulumi 15th amangolezya aa Mulumi 14th kuti balemekezye Lupercus - Nimrod? (Amwiibaluke kuti mazuba aansiku akali kutalikila kumabbililo aa buzuba kumwi mangolezya kaasolwede.)
Nimrod – Bbaali naa leza-zuba wa basimituni bansiku – wakali kwaambwa kuti wakazyalwa aciindi naayelene mazuba amasiku akataa mupeyo. Muciindi ca nsiku, eeco ciindi ceelene mazuba amasiku cakali kucitika mubuzuba bwa Mukazi Maziba 6. Aakale nicakacinca ciindi eeco, cakali kusekelelwa mu Nalupale 25 muli bwa Kkilisimasi.
Cakali ciyanza cansiku kuti banyina mwana mulombe balyeeta kuzyoo salazyigwa mubuzuba bwa makumi one kuzwa nibaatumbuka. Buzuba bwa makumi one kuzwa mubuzuba bwa Mukazi Maziba 6 – mbuzuba bwini mbwaakazyalwa Nimrod – busikila mubuzuba bwa Mulumi 15th, kusekelela kwakali kutalikila mangolezya muli bwa Mulumi 14th, Buzuba bwa Lupercalia naa Valentine Musaante! Mubuzuba oobu mu mwezi wa Mulumi, Semiramis [uuli kulumwesyi mu cifwanikiso], banyina Nimrod, wakali kwaambwa kuti wakasalazyigwa akulibonya ciindi cakutaanguna akataa buleya kajisi mwanaakwe mulombe ngo mukonzyanyo mutaanzi wa “banyina a mwana.”
Mwezi wa BaLoma wa Mulumi, mubwini, izina lyawo lizyila kubbala lya februa eelyo bapaizi baku Loma ndibakali kubelesya mumilimo ya kusekelela Buzuba bwa Valentine Musaante.
Eelyo Nimrod naakakula, wakaba mukomi wa bamakaintu banji aabo bakali kumuyandisya. Walo wakaba Cupid wabo! Nciceeco basimituni ncibaali kusekelela muwezi-mukomi Nimrod, naa Bbaali wabo, kwiinda mukutuminana tupego tubambidwe kukonzyana moyo kumangolezya aabuzuba bwa Mulumi 14th kuti ncecinkonzya cakwe.
Alexander Hislop ulaamba mubbuku lyakwe kuti "Ba Bbabbuloni Bobile": "Lino, ooyu Ninus, nanka "Mwana mulombe," ooyo wakali mumaanza aa Madonna waku Bbabbuloni, ulipanduludwe munzila iisalala kutondezya kuti ngu Nimrod. "Ninus, mwami waba Assyria, ... kutaanguna ali zyoonse wakacinca bweende bwa kulilemeka kwa nsiku, akukkomanina cintu cipya, wakayanda cintu ca kuzundana. Walo wakali mutaanzi kulwana nkondo basimukobonyina, alimwi wakazunda masi woonse kuzwa ku Assyria kusikila ku Lybia, mbwaanga tiibakaninga zyibila misyobo ya kulwana nkondo." Aaya makani atondeka cigaminina kuli Nimrod alimwi taakonzyi kwaamba uumbi pe.
"Ninus, wa nsiku kapati kwiinda bami bana Assyria baambidwe mu makanaa misela, wakacita zintu zipati kapati. Lino kali muntu wa ciimo ca bulwani alimwi kayandisya bulemu bwa kuzunda bamwi, wakababbalaika zilwano bakubusi balombe aabo bakalaa nguzu akugwitingana mbuli nguwe, wakabayiisya kwa ciindi cikubwene zintu ziminya akupenzya, nkabela kwiinda munzila eeyo wakabazyibizya kuliyumyayumya zintu ziminya mu nkondo, akuti kabalanganya ntenda kakwiina kubaa bukandu."
Eelyo Diodorus naakabamba Ninus kuba "mwami waba Assyria wansiku loko", wakamuleta akati kabo mbuli uutalisya nkondo eezyo zyakamupa kuti asumpulwe nguzu, wakakwelanya antoomwe bantu baku Bbabbulonia kweendelezyegwa a nguzu zyakwe; pele munzi wa Bbabbuloni tiiwakaciliko pe, eeci citondezya kuti wakalaa cibeela cigaminide Nimrod mwini, ooyo mumalembe aa mangwalo, wakali mutaanzi " kutalika kuba mukomi atalaa nyika," alimwi akuti "matalikilo aa Bulelo bwakwe akali mu Bbabbuloni."
Eelyo bazyali ba ngazi ya Bbabbeli, mulaka wabo niwaapyopyongana, bakamwayikizyanya atalaa nyika ooku akooku alimwi aboobo bakasiya munzi a ngazi njibaali kuyaka. Bbabbuloni mbuli munzi tiiwakacili kunga waambwa kuti uciliko kusikila Nimrod, kwiinda mukusimpa nguzu zyakwe omuya, wakuubamba kuba musemo a matalikilo aa bupati bwakwe. Mumakani aaya, kaano ka Ninus a Nimrod kaleendelana. Ayalo nzila, eeyo Ninus njaakajana nguzu ili mbweenya mbuli Nimrod mbwaakabamba nguzu zyakwe. Takukonzyi kuba kudonaika kuti wakali kusinikizya batobeli bakwe ku kupenzyegwa akunjila ntenda zya makanze aakwe kuti walo mukuya kwa ciindi wakabamba kuti batalike kubelesya zilwanyo alimwi aboobo kubabambila kuti bakamugwasyilizye kubamba malelo aakwe; mbweenya awalo Ninus, kwiinda mukuyiisya balongwenyina kwa ciindi cilamfu loko "zintu ziminya akubapenzya," wakababamba kuti bakamugwasyilizye kuba mwami mutaanzi akataa bantu baku Assyria."
Mpoonya mukaintu wakasamide zikobela zya cisombo azisubila pyu, wakalisakatide golide amabwe mayandisi amabwe aangale, kalaa nkomeki ya golide mujanza lyakwe lizwide zisesemyo azisusi zya bwaamu bwakwe:
Atalaa nkumo yakwe kwakalembedwe1 zina kuti, MASESEKE, BBABBULONI MUPATI, UUZYALA BAMAMBI A ZISESEMYO ZYA NYIKA.
Ciyubunuzyo 17:4-5
Ciyanda kusika lino ciindi cakuti tusanyangule ziyanza zya bakomba mituni eezi– lino aabo baitwa munzila yakubeja kuti Mbanakristu. Casika ciindi cakuti tusiye cilengwa eeci ca BaLoma abaku Bbabbuloni – ooku nkukomba mituni- atuzyokele ku lusyomo oolo Kristu ndwaakatupede ciindi comwe kwa lyoonse. Atuleke kuyiisya bana besu ziyanza zya kukomba mituni eezi mukwiibaluka Bbaali, Leza zuba – Valentine wakutaanguna – mpoonya mucibaka ca ceeco atubayiisye ncolyaamba cini Bbaibbele!
Eeci tacili cibalo ca WLC.
Nkucaajanwa: http://www.cognm.org/cognm/Publications/St.%20Valentines%20Day%20-%20Where%20Did%20It%20Come%20From.htm
1https://www.history.com/topics/ancient-rome/lupercalia
Eeci cibalo citali ca-WLC cakalembwa aaba Dina Lesperance.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC