Bana Kristu banji kuzwa kubwana bwabo bayiisyigwa kuti kuuma njuka ncibi. Bazyali abafundisi ba Nsondo bayiisya kuti Ijulu lyakatupa mukowa wabantu zileleko ziyandisi kapati, alimwi mulimo wabulemu kuba bankutwe mukubambilila zipego eezyo. Aboobo, kubbeja akuuma njuka nokuba kuuma nsolo kobelesya akusowaila zipego eezyi ncinyonyoono. Pele nokuba boobo, zyuulunzuma zya Banakristu balasyoma akuyiisya kuti lufutuko lwini alwalo munzila imwi nkuuma njuka.
Lusyomo lwakuti twakasalilwa kale kwakugama, lwakataanguna kujuzyigwa akumvwugwa kuli umwi Sikutongooka John Calvin mumusela wa 16th, oolo lusyomo lucesya mulumbe mubotu wa lufutuko kuti ubaanga kunyina acimbi pele ninzila imwi yabulemu yakusalauzya kweenda nsolo, kuuma njuka yabulemu. Kweendelanya amuzeezo ooyo, ikuti naa Leza wakakusala kale kuti ube umwi akataa basale, ulaa coolwe musa! Pele kuti kakutali boobo; cabija, wabula coolwe. Yebo lisweekede. Kunyina nconga wacita munguzu zyako ciyoopindula nkoti kagame mubuumi bwako.
Nokuba kuti aabo basyoma kuti bakasalilwa kale kwakugama balisinizyide mukusyoma kwabo, oolu lusyomo lulaa ntenda nkaambo lupilinganya ciimo ca Yahuwah ca luyando. Mucibalo eeci tulabandauka zibeela ziindene zya lusyomo lwa kusalilwa kwa kugama akupandulula eezyo zibeela mbozikazyanya a jwi lya moza wa Yahuwah liyubunudwe, ambozinyonganya ciimo cabulemu cokwa Yahuwah mbociyubunudwe mu Mangwalo.
Lusyomo lwa kusalilwa kwakugama lusimpidwe atalaa misemo yosanwe. Njeeyi misemo yalusyomo oolu:
Kulangila atala, bunji bwa Banakristu inga bazuminizya twaambo tulaa tala aawa. Nokuba boobo, kuti ootu twaambo tweezyekwa ku Mangwalo, tujanwa kuti ntwaambo tukazyanya a Bbaibbele. Atulange twaambo tosanwe ootu alimwi, akweezyeka kaambo komwe-komwe ku Jwi lisalazyidwe lyokwa Yahuwah.
Masimpe kuti bantu boonse bazyalwa bakakona ciimo ca Adamu naakawa mucibi. “Kunyina naba omwe uululeme, nee, naba omwe pe . . . nkaambo boonse bakabisya akulezya kusika abulemu bwa Yahuwah.” (BaLoma 3:10 a 23.) Kutegwa kutabi muntu uudonaika cinyonyoono mbucaapoizya mukowa wabantu, Izaya waamba kuti: “Toonse tuli mbuli cintu citasalali, alimwi bululami bwesu buli mbuli magamba aanunka nsu.” (Izaya 64:6)
Nokuba boobo, ooyu muzeezo wa kusalilwa kwakugama muzeezo wiintide Ikuti muntu naali sofweede citaambiki cakuti tacikonzyi kuteelela lwiito lwa kweempwa akuleka cinyonyoono, kampango katobela nikataalembwa:
“ Baambile kuti, 'Mbubonya mbuli mbwendi muumi, mbwaamba Mwami Yahuwah, nsibotelwi mulufu lwabasizibi, pele ndiyanda kuti basiye nzila zyabo bapone. Amupiluke, amupiluke musiye nzila zyanu zibi! Nkaambo nzi ncomuyandila kufwa nomusyobo wa Isilayeli?” (Ezekiya 33:11)
Kuyungizya waawo, kuti muntu naatali kukonzya kucita nociba cibotu, natali kweelede kupegwa mulandu nkaambo zibi zyakwe. Ooko inga kwaba kubaa lunya akubula bulemu.
Nokuba kuti eeci cimvwikaanga cizwa mu Bbaibbele nkaambo kakwiina kudonaika, bantu bakakona ciimo cilaa cibi, pele ooyu muzeezo tuululeme. Kuyaamika lufutuko lwako aciga cakuti Yahuwah wakasala kale mbayanda kuyoofutula, eeco cilesya lwaanguluko lwa kulisalila kuti ubaa lufutuko. Lusyomo lwa kusalilwa kwa kugama luyiisya kuti Yahuwah nguusala bantu bayoofutulwa. Aabo batobela mizeezo yokwa Calvini bayiisya “kusalilwa kwakugama mubuumi ” munzila zyobile; imwi njakuti Yahuwah nguusala abaabo bayoonyonyoonwa.
Kuli twaambo tobile tuboola mukuzeeza kuli boobu:
Kutaanguna, oolu lusyomo luzimaanya muntu uucita cibi kuti takwe mulandu. Kaini naakajaya Abela naatakapegwa mulandu kumwi kataminina kuti Caini “wakali singanyidwe kale ” kuyoo, aboobo “wakali salidwe kale” kuti nguuti kajaye munyina. Ooyu muzeezo usungilizya kuti muntu takwe mulandu nokuba kuti wasotoka mulawo mumicito yakwe. Usendekezya kuti kunyina makani cicitika kuli bamwi nkaambo kamulandu wamuntu ngwaacita umwi. Mubwini, eeco ncencico ncobeni Kaini ncaakasola kucita.
Mangwalo alembedwe musalo akataa Yahuwah a Kaini naakamanizya kujaya mwanookwabo:
Lino Kaini wakaambila musyoonto wakwe Abela kuti, “Atukeendeende.” Nibakaakusika musokwe, Kaini wakabukila musyoonto wakwe wamujaya.
Lino Mwami Yahuwah wakabuzya Kaini kuti, “Uli kuli musyoonto wako, Abela?” Kaini naakaingula wakati, “Nsizi nkwabede. Sena ndime ndeembela musyoonto wangu?” (Matalikilo 4:8-9)
Kulubila kuli mulusyomo oolu kulalibonya kufwambaana eelyo Yahuwah nakaka kwiingula kwa Caini akumwaambila kuti:
Ninzi ncoocita webo? Ijwi lya bulowa bwa mwanookwenu liloongolola kuli ndimwe kuzwa mubulongo.
Nkaako yebo wasinganyizigwa, alimwi ulatandwa kuzwa mucisi eeci, nkaambo canywa bulowa bwamusyoonto wako mbootila. Waakulima zisyango, bulongo tabukakupi pe.
Uyooba simutuntuli buyo munyika, tokooyookkalilila abusena bomwe. (Matalikilo 4:10-12)
Ipenzi lyabili mumuzeezo wa Kusalilwa Kwakugama Noyanda Notayandi ndyakuti, ooyu muzeezo usendekezya kuti Yahuwah nguusala cibi. Tabali boonse batobela Calvini baimvwi ambaakani eeyi, pele bamwi balaindilizya awaawo, ndepenzi lini eelyo. Ikuti Yahuwah naakasala kale zyoonse nkozyeelede kugama, nkokuti Walo nguwaasala kuti cinyonyoono citalike eelyo naakasala kutibamwi beelede kufwa. Eeci ncintu cikazyanya a Mangwalo aasalazyide kwaamba kuti: “Kutabi muntu uunga naanjila musunko, walilauka kuti Yahuwah wandisunka: nkaambo Yahuwah takonzyi kusunkwa acibi pe, alimwi tasunki muntu naba omwe pe.” (James 1:13)
Kunununa kwalusalauzya kuli boobu, nokuba kuti kuleendelana amuzeezo wakusalilwa kwakugama, pele takweendelani a Mangwalo pe, alo aayinduluka kwaamba kuti Yahushua wkafwida bantu boonse. Mucishinshimi ca Izaya ca mulimo wa Messiah, walo wakalemba kuti:
Swebo toonse twakali sweekede mbuli mbelele. Twakali kutobela umwi aumwi nzila yakwe mwini. Nkaako Mwami Yahuwah wakalemezya nguwe zibi zyesu toonse.”
Amana kupenga, uyoobona bubotu bwawo, uyoolamwa azeezyo nzyaakapengela. Kwiindila muluzibo lwakwe mubelesi wangu uululeme uyoolulamika banji. uyootola zibi zyabo.
Nkaako njoomupa caabilo antoomwe abapati, uyooabanya zisaalo antoomwe abasintanze. Nkaambo wakatuula buumi bwakwe. Wakabalilizigwa abasizibi. Wakatola zinyonyoono zyabantu banji. Wakakombela babisyi.” (Izaya 53:6, 11-12)
Kamwi kampango kabotu kainduluka ciindi aciindi mu Mangwalo kayungizya masimpe aakuti Yahushua wakafwida nyika yoonse, kutali basale bongaye buyo pe.
“Obuya Yahuwah smbwaakiyandisya nyika, cakuti wakiipa Mwanaakwe Simuzyalwaalikke, kutegwa kufumbwa uusyoma muli Nguwe atakafwidilili pele akabaa buumi butamabi.
Nkaambo Yahuwah taakatuma Mwanaakwe munyika kuzyoosinganya nyika pe; pele kutegwa nyika kwiinda muli Nguwe ikakonzye kuvwunwa.” (Johane 3:16-17)
Lweengelelo Kutakonzyi KukakwaOolu lusyomo lukaka musemo wini aayimvwi nzila ya lufutuko! Mumajwi amwi ooku kusyoma boobu kuyiisya kuti kunyina uulaa lwaanguluko lwa kulisalila. Mwanaa Adamu musankwa amusimbi uuli woonse wakakona ciimo cilaa cibi. Yahuwah, “mbwaatakali kuyanda kuti a naba omwe, pele boonse beelede kweempwa” (2 Petulo 3:9) wakaaba Mwanaakwe kutegwa azumizye bantu boonse ciindi cabili cakulisalila. Kuti oolu lwaanguluko lwakusala lwalesyegwa mpoonya bamwi basalwa munzila ya bulemu kuti bakafutulwe, bamwi bakafwe, ooku nkubikka kumbali mulimo wini wa lufu lwa Yahushua.
Oolu lusyomo lwaamba kuti. Kunyina naba omwe, nokuba kuti muntu uuzangide buti, nokuba kuti ugagambide buti mu cinyonyoonyo ncayandisya uunga wa kuti Yahuwah wasala kuti ooyo muntu atafwi. Mukwiimpanya, kunyina naba omwe nokuba kuti uyandisya kuba mbuli Yahuwah kwaciindi cilamfu buti, uuyoofutulwa kuti kali wakasalwa kale kuti aka. Oolu ndusyomo lulaa ntenda kapati lutakobeledwe akampango nokaba komwe mu Mangwalo aayo aamba kuti kusala nkwa muntu mwini kumugaminina. “Makunga, makunga aabantu baimvwi akataa nzila zyobile akwaalilwa kusala: nkaambo buzuba bwa Yahuwah bulaafwi “Zyuulu zyuulu zyabantu zyili mukkuti lyakubetekwa. Nkaambo buzuba bwalubeta lwa Mwami Yahuwah buli aafwiifwi.” (Joweli 3:14)
Mbweenya mbuli muzeezo wa “lweengelelo lutakonzyi kukakwa,” alwalo lusyomo lwakuti kufumbwa buyo kuti muntu wakafulwa aciindi cimwi, kunyina ooyo muntu ncanga wacita cinga camupa kuti aka alimwi, tee ooko inga kwaba kunjizya mubuzike lwaanguluko lwa muntu. Kunyina muntu “uucita kufumbwa ncayanda katapegwi mulandu.” Lwaanguluko lwa kusala lwa muntu talulesyegwi mpeenya buyo muntu mbwaatambwida cipego ca lufutuko. 
Mwaapositolo Paulu lwakwe wakaambilizya kuti muntu ulalangilwa kusweekela limwi – nokuba kuti wacita zyoonse munguzu zyakwe kuti alete lufutuko kuli bamwi!
“Ime ndalijata mubili wangu, akulyeendelezya: nkaambo inga muciindi cimwi, ndamanizya kukambaukila bamwi, Ime lwangu ndaba ndime eesinganyigwa (1 Bakolinto 9:27)
Lusyomo lwa kusalilwa kwakugama buumi lukazya milazyo iijanwa mu Mangwalo. Akataa majwi aaacaalizya aayo ngaakaamba Mufutuli aalembedwe mu Mangwalo, kuli malailile aakuti, “Kamuya; munyika mukayiisye masi woonse, mukababbapatizye . . . . Mukabayiisye kubamba zintu zyoonse, kufumbwa ncindakamulailila: alimwi , Amulange, Ime ndinoolandinywe kusikila kumamanino aanyika.” (Mateyo 28:19-20) Ikuti Yahuwah naakasalide kale muntu uuyoofutulwa, kukambauka milumbe inga kwaba kusowa ciindi nkaambo bantu inga kabafutukide kale.
Kuyungizya waawo, kuti Yahuwah naakasalide kale bamwi kuti bakafutulwe, tacikwe mulimo kupailila mukwasyi abalongwenyoko nkaambo balisalidwe kale kuyoo nokuba kuyoofutulwa kweendelanya ambwaakasala Yahuwah alimwi kunyina naba muntu omwe ncakonzya kucita kuti acince mizeezo Yakwe. Kusyoma kuli boobu nkukaka milazyo ya Bbaibbele yakupailila bamwi mbuli mbwaakazubulula mushinshimi Samuele. Eelyo ba Isilayeli nobakazumanana kuti babaa mwami uubalela, mubwini baakaka bweendelezi bwa Yahuwah kuti ngo simalelo wabo. Aciindi eeco Samuele kalaa moyo uuzwide buusu, wakaamba majwi aaciinduluka kumvwika mazubaano:
Nkabela citacitiki kuti mebo mbisizye Mwami Yahuwah mukutamukombela. Alimwi ndinoomwiisya makani aanzila mbotu iiluzi.
Amulemeke Mwami Yahuwah akumumanina milimo cakusyomeka amyoyo yanu yoonse. Amuyeeye zintu zipati eezyo nzyaakamucitila.
Pele kuti naa muzumanane kucita zibi, ncobeni lwanu antoomwe amwami wanu muyoonyonyoonwa (1 Samuele 12:23-25)
Kunyina cintu cakasalidwe kale aawa pe. Samuele ubabikkila zintu antangalala ziyootobela kuti bazumanana kuzangila Mulengi wabo. Kaindi kasyoonto munsaa lufu lwa Mozesi, wakabapa lwiito ba Isilayeli kuti babelesye lwaanguluko lwa kusala ndwaakabapa Yahuwah akusala kucita bululami.
“Sunu ndaita julu anyika kuti zibe bakamboni bangu. Ndamupa ciindi kuti musale akati kabuumi alufu, zileleko alusinganyo. Lino amusale buumi kutegwa nywebo abalunyungu lwanu mupone.
Amuyande Mwami Yahuwah wanu, amumuswiilile kamusyomeka kulinguwe lyoonse. Ndendilyo Mwami Yahuwah nayoomupa myaka minji munyika eeyo njaakakonkezya kuli basikale banu ba Abulahamu, Izaka a Jakobo.” (Ciibalusyo 30:19-20)
Mozesi, mulongwe wa Singuzuzyoonse, mutwanga uulaa moyo mubombe ooyo Yahuwah ngwaakali kubandika limwi “busyu abusyu, mbuli muntu nabandika amulongwenyina,” (Kulonga 33:11) waakaka muzeezo wakusalilwa kwakugama buumi, kagaminina kwaamba kuti ooko kusala kwakali mumaanza aamuntu lwakwe mwini.
Kwiindilizya waawo, kucili caambwa mu lusyomo lwa kusalilwa kwakugama buumi cijatikizya ciimo cokwa Yahuwah. Oolu lusyomo taluleme nkaambo aabo batasalidwe kufutulwa inga baaku kakwiina mulandu ngubaacita cakuliyandila! Cili masimpe ncobeni kuti moyo wa muntu uusofweede, ulasofwaazyigwa acinyonyoono. “Moyo wamuntu ulacenga kwiinda zintu zyoonse, mubi kapati, ino nguni uukonzya kuumvwisya.” (Jelemiya 17:9) Cili masimpe akuti lufutuko ncipego cakupegwa buyo kuzwa kuli Yahuwah: “Nkaambo kwiinda muluzyalo mwakafutulwa kwiinda mukusyoma alimwi kutali lwenu nobeni pele nkaambo eeco ncipego ca Yahuwah.” (BaEfeso 2:8) Kulubila kulanjila mumoyo wamuntu kuti lwaanguluko lwakusala lwa muntu ooyo lwalesyegwa.
Mangwalo aambilizya kuti “Yahuwah nduyando.” (1 Johane 4:8) Eloah uulaa luyando inga taanyanga bana Bakwe mbayandisya lwaanguluko lwa kusala, kasobana nsolo munzila yabulemu imwi, kasala bamwi kuti bakafutulwe, pele bunji bwabo kuti baka.
Ooyo tuuli mucito wabulemu. IBbaibbele luyubununa ciimo ca Mulengi kuti:
Mboobu mbwaamba Mwami Yahuwah ulati, “Muntu musongo atabi nalikankaizya abusongo bwakwe, naa muntu sintanze kuba nalikankaizya akaambo kanguzu zyakwe, naba muvwubi kuba nalikankaizya akaambo kabuvwubi bwakwe.
Pele ooyo uulikankaizya alikankaizizye ceeci, cakuti ulamvwa alimwi ulindizi kuti mebo ndime Mwami Yahuwah ooyo uufwida luzyalo, uuluzi, uululeme aano anyika, nkaambo zintu eezi ndazikkomanina, mbwaamba Mwami Yahuwah. (Jelemiya 9:23-24)
Lusyomo lwakusalilwa kwakugamika buumi ndusyomo lwa bujayi. Lutondezya Mulengi wesu waluyando kuti ulaa lunya, ulaa moyo muyumu uupindauka. Eeci ncintu cikazyanya a Mangwalo, alo aatondezya Nguwe kuti ngu Taata waluyando uutayandide kuti naba omwe kuti akalobe. Cintu citobela ncakuti myoyo yabantu ilanetauka kuyoowa bululami bwamusyobo ooyo. Balasuuluka kabatamvwisyide kuti naa eeco nceciimo cini cokwa Yahuwah, pele eeco ciimo cakasendekezyegwa aa sinkondonyina wa Yahuwah a muntu, Saatani.
Lusyomo lwakusizya ciimo ca Munununi lulasinkila akataa muya wamuntu a Mulengi wakwe. Yahuwah wiita bantu boonse kuti balazyike ansi kufumbwa lusyomo lutajanwi mu Mangwalo. Kotambula luyando ndwajisi kuli nduwe. Yebo uyoobona bulamfu abubotu bwa ciimo cabulemu mbocikukwelela kuli Nguwe, antambo zyaluyando luteeli. Walo takkede kulaale a zilengwe Zyakwe pe, kaide kusalauzya kuti bamwi bakafutulwe mpoonya boonse batasalidwe bakasoogwe. Kunze lyaboobo, Walo uluukwete kukwelakwela boonse kuzya kuli Nguwe nkaambo ulangila kuti boonse bakafutulwe.
“Yahuwah Mwami wakalibonya kulimbabo, kubantu bakwe wakati, 'Ndakamuyanda akutamani, asunu ndicimuyandisisya.” (Jelemiya 31:3)