Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Hena Yahushua abaapositolo bakatwaambila masimpe mbwaabede makani woonse na?
Nkaambo nzi ncicaatola kwiinda amyaka 300 kuti Cikombelo cibbukizye nzila ya Lufutuko?
Ikuti tusyome, mbuli milazyo ya Cikombelo mboyaamba, kuti muntu umwi weelede kusyoma muli Baleza botatwe kutegwa afutulwe, ino oolu lusyomo lwiimvwi atalaa nguzu zizwa kuli? Aciindi cimwi, batasyomi bakali kuumpwa bulanga acisamu. Nkulumba biyo kuti eeci tacizuminiki mazubaano, pele aabo babuzyilila mibuzyo balayoosyegwa kubelesya majwi aa basicikolo baluulwa mpuwo. Ngooyu mukonzyanyo, Millard J. Erickson waamba Baleza botatwe kuti: “Ikuti wasozya kubapandulula inga waziluka maanu; pele kuti wasola kukazya inga bwakweelela nuuba muzimo wako.”1 Mbo, kuyoosya cintu eeco!
Eeci ncintu cilemu kapati alimwi Ime ndilimvwide kuti nca masimpe, ambweni Yahushua a baapositolo bakalaa kantya ncobeni ncibataatusalazyila masimpe aaya. Aabo balikumbatizya ku kusyoma Baleza botatwe bataminina tumpango tongaye, bamwi baladonaika nuuba mukondo ooko kwaazyila lusyomo oolo ndobatakonzyi akupandulula. Langa kuli 1 Johane 5:7-8 mu KJV mpoonya kweezyekanya a busanduluzi bwa mazubaano ulajana kampango 7 kakapindulwa nokuba kusiilwa limwi anze. Mabala aalembedwe mu KJV azyibidwe kuti taakalembwa aa Johane Pele akalembwa aa mulembi uusyoma Baleza botatwe ooyo wakaboola aakale kumbelaa ciindi. Aayo makani aakuunina aasumpauzya Baleza botatwe. Azimwi zisanganyidwe nokuba zisanduludwe munzila yakuliiba a “kupunga”, zilalibonya muma Bbaibbele manjaanji kuti lyoonse zitabilila kusyoma muli Baleza botatwe. Hena tacimvwiki bumpelenge eeco na?
Yahushua wakati, “Oobu mbo buumi butamani kuti bazyibe Ndiwe, O Yahuwah wamasimpe olikke, a Yahushua Messiah, ooyo Webo ngookatuma" (Johane 17:3). Johane wakati, “Kufumbwa uusyoma muli nguwe [Yahushua] takanyonyooki, Pele uyoobaa buumi butamani” (Johane 3:16). Paulu wakatondeka nzila ya Lufutuko iili mu BaLoma 10:9: “Ikuti webo walilekelela amulomo wako kuti Mwami ngu Yahushua, a kusyoma mumoyo wako kuti Yahuwah wakamubusya kuzwa ku bafu, yebo uyoofutulwa” — atumwi twaambo tukonzyana tunji. Nziindi zyongaye kabapa lwiito ba evangeli kubelesya Mangwalo mbuli bwayaaya, pele kakwiina noliba lyomwe kusendekezya kuti Yahushua ngu Yahuwah? Pele, aciindi nosangana Cikombelo, cimwi cintu ncosungilizyigwa nkuti uzumine kuti naa ulasyoma muli Baleza botatwe. Oolu ndusyomo lwakalwaninwa akwaambilizyigwa abaabo bakazunda mu miswaangano ya cikombelo, kwa ciindi cilamfu loko kubelesya nguzu zyakulipangila. Yahushua ulayungizya kutusalazyila kuti Leza wesu ngo Leza wakwe. Walo wakati kuli Maliya naakabuka kuzwa kubafu, “Ime ndaunka kuli Taata a Taata wenu; akuli Leza wangu a Leza wenu” (Johane 20:17). Paulu, kaamba mamanino aamulimo wa lumvwano mu 1 Bakolinto 15:28, wakati: “Eelyo zintu zyoonse zyaakubatama kuli nguwe, mpoonya awalo Mwana uyoobatama lwakwe kuli Nguwe ooyo wakabikka zintu zyoonse kunsi lyakwe, kutegwa Yahuwah akamaninine kuba muli zyoonse.”
Lino, Yahushua wakaambilizya akuti wakacilaa zintu zyakuyiisya Cikombelo muli Johane 16:12-13: “Ime ndicilaa zintu zinjaanji zyakumwaambila inywe, pele tamukonzyi kuzimvwisya cino ciindi pe. Nokuba boobo, Muuya wa kasimpe, aakuboola, uyoomusolweda mu kasimpe koonse...alimwi walo uyoomutondezya zintu ziciboola.” Alimwi ciyubunuzyo ciyungizyidwe eeci cakapegwa kakwiindide lya ciindi ca Pentecosti aawo mpotubala mubbuku lya Milimo kuti Milimo 1:2: “Kusikila buzuba oobo Yahushua naakatolwa, naakamanizya kupa malailile kwiinda mu muya Uusalala kuli Baapositolo aabo mbaakasala.” Kunyina akataa malembe aa baapositolo mpokwaambwa Baleza botatwe pe. Hena tusyome kuti kwakainda myaka 300, kusikila leelyo muswaangano niwakakkalwa kanjaanji abafundisi baci Giliki, akweendelezyegwa aa muleli uulimba mituni uupaila zuba, kuti ndileelyo Yahuwah naakasala kuyubununa “bbwe lya musemo wa lusyomo lwa Bunakristu” mbuli mbotwaambilwa mu lusyomo lwa Baleza botatwe mazubaano na? Nkabela, nokuba aakale, Mulazyo waku Athanasia awalo wakati: “Aboobo ooyo uuyanda kufutulwa weelede kuyeeyela Baleza botatwe. Kuyungizya waawo, ncintu ciyandika ku lufutuko luteeli kuti ooyo muntu asyome bululeme mu Kuzyalululwa kwa Mwami wesu Yahushua Kristu [nkokuti Kuzyalululwa kwa Muntu wabili mutwe wa Baleza botatwe, Mwanaa Leza uuteeli, ooyo watakajisi matalikilo aakwe mu ciindi].”
Mwiyi mupati Loofs waku Germany, sicikolo wa Harnack, umwi akataa “bana babami” mumusela wa cikombelo, wakayiisya mu 1922 ku Cikolo ca Oberlin College ku Ohio akwaamba kuti kunyina akataa babelesinyina mu Germany bakali kusyoma kuti Lwiiyo lwa Bunakristu lwaku Nicea (325) alwaku Chalcedon (451) lwakalaa mulimo. Ngonguwe ngweenya ooyu Loofs wakali kwaambilizya kuti lusyomo lwa baleza banji lwakanjila mu Cikombelo, kaluvwumbidwe ciwa, mumusela wabili. Inzya, lusyomo lwa baleza banji lusofwaazya lwakasobelela kunjila my Cikombelo kaluvwumbidwe mbuli cinyawu. Ooko kuyandisya kubikka “Leza” wabili muciimo ca “mulongo waciindi milamfu loko” wamaseseke, kwanyonganya kusyoma muli leza omwe wamu ooyo ngwaakali kuyiisya lwakwe mwini Yahushua. Muciwa cakupeekezya kusumpauzya Yahushua, eeyo milazyo yakadyakaizya buntu bwakwe alimwi aciindi mpeenya akunyonganya ciimo cili nsini ca Leza Omwe, Taata wakwe. Mucibaka ca Yahushua, Simuzyalwaalikke ookwa Maliya (Mateyo 1:20), kwakabikkwa mweenzu uuzwa kulaale kunyika iimbi.
Munakristu uuzuunyene masimpe woonse uleelede kuyandaula bwiinguzi ku mibuzyo iibuzyigwa mu cibalo eeci — kuli bamwi taakwe maseseke mu ciimo ca Mufutuli wesu, “imwaalumi Yahushua Messiah.” Ncintu cikkazyika moyo kucengulukila ku Mangwalo maubauba kuteelela kutegwa wiiye kuti nguni Mwanaa Yahuwah mbobeendelana a Wisi. Bala amuli Luuka 1:26-35.
1 “Ibuti ...[Yahuwah] Mbwabede,” p. 342. Millard J. Erickson (b. 1932) mwiyi wabuleza munakristu, duundumuntule mu lwiiyo lwa buleza, alimwi mulembi. Walo wakalemba ciluulwa mpuwo camutwe wakuti Christian Theology amabbuku aayinda 20 aambi.
2 BaLoma 16:25-26: “Lino kuli yooyo uulaa nguzu zya kumubamba kweendelanya a mulumbe wangu, akukambauka kwa Yahushua Messiah, kweendelanya a ciyubunuzyo ca maseseke, eeco cakayobwedwe kuzwa nyika niyaatalika, pele lino catondezyegwa, alimwi kwiinda mu mangwalo aa bashinshimi, kweendelanya a mulawo ookwa Yahuwah uuteeli, bakamuzyibya ku masi woonse aamutobela kwiinda mu kusyoma.”
Eeci cibalo citali ca-WLC cakalembwa aaba Keith Relf.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC