Itwaambo Tukazya Bbaibbele twa Ellen White twa Kulya Nyama
“Amubacenjelele bashinshimi babeji, aabo baboola kuli ndinywe kabasamide boya bwa mbelele anukuti mukati mbaa wumpe bakwamauna.” Mateyo 7:15 ESV |
Ellen White ukasya cakulya eeco Taata Yahuwah ncaakasalila bantu Bakwe kuti balye ciguminizya kulya nyama. Eelyo notubala ncaakalemba cijatikizya kulya nyama akweelanya twaambo twakwe kuli twa Taata Yahuwah ntwaakayubununa muli zyakulya zya bantu Bakwe, inga catalika kusalalila kumuntu uubala navwuntauzya kuti twaambo twakwe ooto tujatikizya kulya nyama ntwa kusampauzya cigaminina. Kwiindilizya waawo, walo upa masendekezya aakuti twaambo twakwe ooto tukasya kulya nyama kuti malailile aagaminina kuzwa kuli Taata Yahuwah kuli baabo balibambila kusandulwa kuya ‘Kujulu’.' Mukwaamba zintu zili boobu, walo ulizuunyene kusampaula eelyo natalika kudyakaizya ciimo cokwa Taata Yahuwah eeco citacinci, eelyo nasendekezya kuti eezyo zintu nzyaamba zyakapegwa Ellen White kuzyila kuli Taata.
Zyakulya Taata Yahuwah Nzyakulwaizya
Aboobo, katutaninga vwuntauzya twaambo tumwi ntwaakaamba ooto tujatikizya makanaa kulya nyama, atutaangune kulanga zyakulya Taata Yahuwah nzyakulwaizya ku bantu Bakwe basale, bana Isilayeli. Tulajana eezyo zyakulya Taata Yahuwah nzyakulwaizya kazyaambidwe mu Lwiimbo lwa Mozesi mu Ciibalusyo 32:
9 Yahuwah wakasala bantu Bakwe kuti babe bakwe mwini.
Ibantu ba Jakobe bakali kuzulilwa kuli nguwe.
10 Yahuwah wakabajana kabali munkanda mutakwe cintu, munyika iibbubbula muwo.
Walo wakabacingilila akubeembela
Walo wakabakwabilila balo mbuli mboni ya liso lyakwe,
11 mbuli sikwaze natalisya bana bakwe kuuluka kuzwa aciteente.
ulakkala munsimunsi lyabo akubalangilizya, kalibambide kubagwasya.
Walo ulakwakwamuna mababa aakwe kuti abakwabule eelyo nobayaa kuwa akubabweza kubatola kubusena butakwe ntenda .
12 Yahuwah alike wakasolweda bantu bakwe.
Tiibakajisi lugwasyo kuzwa kuli leza uuzwa kule pe.
13 Yahuwah wakabagwasyilila kuti batalike kweendelezya nyika ya malundu.
Bakayobolola butebuzi kuzwa mu myuunda.
Walo wakabapa buci kuzwa mu njeleela zya malundu
a mungwimba wa maolifa kuzwa munyika ya cikweembala.
14 Walo wakapa bantu bakwe mafuta kuzwa mu lutanga a mukupa kuzwa mu tanga.
Walo wakabapa ibana bana ba mbelele a mpongo.
Balo bakalijanina bagutu bainda kubota kuzwa kuli Basyani a maila aayinda kubota.
Balo bakalya akunywa waini wiinda kubota uubambwa kuzwa ku musinza wa masaansa aasubila.
Izyakula eezyo Taata Yahuwah nzyaakasalila bantu Bakwe basale zyakali kusanganya bana ba mbelele aba mpongo, bagutu bainda kubota, mafuta a mukupa.
Ellen White Mbwakaka Zyakulya Nzyakulwaizya Taata Yahuwah
Hena Taata Yahuwah wakacinca mizeezo Yakwe kakwiindide zyuulu zya myaka, akulailila Ellen White kuti alembe twaambo tutobela ootu tujaikizya kulya nyama na?
Kucenjezya: Cili kuli yooyo uubala kuti acenjele. Tumwi twaambo tulanyemya cinicini, tulagambya, alimwi akusampauzya.
Busofwaazi bwa kulya nyama tabusiidwe kunze lya malwazi aamubili. Icakulya cilaa nyama cilaa ntenda ku buumi bubotu, alimwi kufumbwa citoneka mubili cilaa ntenda iikonzyene ku mizeezo a muuya. CCH 230.8
Kuyandika kuzyokoloka kulibonya kapati akataa bantu aabo bataminina kuti balangila kulibonya kwa Messiah ooko kulaafwi kucitika. Kuzyokoloka mu bukkale akataa bantu besu nkucita mulimo akataa bantu besu ooyo uuciyandika kucitwa. Nkobali aabo beelede kusinsimunwa ku ntenda ya kulya nyama, aabo bacilya buzani bwa banyama, aabo bacibikka mubili, mizeezo abuumi bwa muuya mu ntenda. Mbanji lino basandukide kwa cisela cisyoonto biyo mukuleka kulya nyama, aabo bayooyaamuka kuzwa kataa bantu basale bokwa Leza, akuleka kweenda akati kabo. CCH 230.7
Cakasalazyigwa cinicini kutondezyegwa kuli ndime kuti bantu ba Leza beelede kwiimikila nji kukazya kulya nyama. Hena Leza kwa myaka iili makumi otatwe wakapa bantu Bakwe mulumbe wakuti, ikuti kabayanda kubaa bulowa busalazyidwe amizeezo iiluleme, beelede kulekela lyo kubelesya nyama, ikuti Walo naatakali kuyanda kuti bateelele mulumbe ooyu? Kwiinda mukubelesya nyama, ciimo ca munyama cilakulwaizyigwa kuzyamya mpoonya ciimo ca muuya cilaubuka akubula nguzu. CCH 230.8
Ikuti nokwali ciindi izyakulya nozyeelede kubazitakwe cisanganyidwe, nceecino ciindi. Inyama tiiyelede kubikwa kumbelaa bana besu. Icokokacoka busa mu mubili akukutula mulilo wa nguzu muzisusi zya nayama, alimwi ilaa ciyanza ca kupa cinywe ku mizeezo ya kulijata. Maila amicelo iibambilidwe kakwiina mafuta malemu, alimwi eezyo kazili muciimo mbuli mbozilengedwe mbuli mbocikonzyeka, zyeelede kuba cakulya ca baabo bataminina kulibambila kuyoosandulwa akunjila kujulu. Testimonies, Vol. 2, p. 352.
Aabo bakatambula malailile aajatikizya busofwaazi bwa kubelesya zyakulya zilaa nyama...tabakazumanani kulikwaya kulya zyakulya eezyo nzyobazyi kuti tazipi buumi bubotu. Leza ukulwaizya kuti tusalazyigwe mu kulya, akuliimya kujatikizya zintu eezyo zitali zibotu. Ooyu mulimo weelede kucitwa eelyo bantu Bakwe kabataninga kwiimikila kunembo Lyakwe kabali bantu balondodwe. Testimonies, Vol. 9, p. 153.
Izyakulya zisanganya nyama zikulwaizya kulyeendelezya mbuli banyama ... akupa kuti mizeezo yaalilwe kuteelela kasimpe. CH, p. 576
Kulya nyama kunyonyoona mubili, kuvwuukizya maanu akuzibinganya kulijata mu zisusi. Testimonies Vol 2, p. 63-64
Swebo inga twabandauka tumpango tunjaanji twa Cizuminano Cipya oomo mokukulwaizyigwa kulya nyama. Pele eeci tacikwe mulimo alimwi inga tiicayandika kuti twaamba kale zyakulya Taata Yahuwah nzyakulwaizya mbuli bulembedwe mu Ciibalusyo 32. Izyakulya nzyalombozya Walo zijatikizya majwi aakwe aakulya nyama alimwi eeci ncecigaminide kukazya twaambo twa masampu tokwa Ellen White atala aawa.
Pele kuli baabo balombozya kampango kambi kuti kape bumboni, Ime ndainduluka kampango katobela:
Eelyo Yahuwah Leza wako naakakomezya cooko ca nyika yenu mbuli mbwaakasyomezya ndinywe, mpoonya inywe mwayanda nyama akwaamba kuti ‘ ime njanda kulya nyama,” mbube nywebo mulizumizyidwe kulya nyama mbuli mbomuyanda, (Ciibalusyo 12:20)
Hena Taata Yahuwah uutacinci nguwakapa Ellen White twaambo ooto tukasya kulya nyama na? Ncobeni peepe.
Ellen White wakacenjezya batobeli bakwe mu Cikombelo ca SDA kuti kuunka “Kujulu’ ncintu ciyeeme mukuyaamuka kulya zyakulya zilaa nyama. Mukwiimpanya cinicini kuli ncaakayumya Paulu kuti ‘bulelo bwa Yahuwah takuli kulya nyama akunywa; pele bululami, luumuno, a kukkomanina Muya Uusalala.’ BaLoma 14:17
Walo wakacenjezya akuti kulya nyama ncintu cinyonganya muuya wesu akutucokacoka bunyama mu muuya wesu. Saa mbubuti muuya wa Yahushua wabunyama mbuwakabambililwa akweendelezyegwa, nokuba kuti wakali kulya nyama kataninga fwa anaakabusyidwe kuzwa kubafu? Mbubuti bashinshimi bakali kusyomeka mbubakalijata zisusi zya nyama kumwi kabalya nyama?
Ncobeni Muuya Uusalala ulaamba kuti ciindi ciza bamwi bayoosiya lusyomo. Bayoogama kuswiilila njiisyo zyabubeji zizwa kumyuuya mibi. Njiisyo eezi nzya babeji basikuupaupa aameso babeji, bali aamyoyo yakatilibala mbuli kuti yakadintwa aansimbi iipya. Balo mbabalesya bantu kukwatana akulesya kulya zilyo zimwi. Pele zyakulya eezyo Leza wakazilengela kuti aabo basyoma akuziba zyabwini balye cakulumba Yahuwah. Kayi zyoonse Yahuwah nzyaakalenga nzibotu, tazyeelede kulesyegwa naa zyatambulwa cakulumba Yahuwah. (1 Timoti 4: 1-4)
|
Paulu utucenjezya bamayi babeji
Mu kusumpauzya ooko Ellen White nkwaakabikka akulilesya kulya nyama zisalala, Ellen White wakazuzika kwiinda muli nzyaakalemba mikonzyanyo minjaanji ya bamayi babeji aabo Paulu mbatucenjezya, aabo banooli citondezyo ca mazuba aamamanino.
Muuya ulisalizyide kwaamba kuti mumazuba aamamanino bamwi bayoosulaika lusyomo akutalika kutobela myuuya yalweeno a zintu ziyiisyigwa aa madaimona. Ziiyo zili boobo ziboolela mu babeji basikuupaupa ameso, aabo mizeezo yabo. Ncobeni Muuya Uusalala ulaamba kuti ciindi ciza bamwi bayoosulaika lusyomo. Bayoogama kuswiilila njiisyo ziyiisyigwa aa madaimona. Njiisyo eezi nzya babeji basikuupaupa aameso babeji, bali aamyoyo yakatilibala mbuli kuti yakadintwa aansimbi iipya. Balo mbabalesya bantu kukwatana akulesya kulya zilyo zimwi. Pele zyakulya eezyo Yahuwah wakazilengela kuti aabo basyoma akuziba zyabwini balye cakulumba Yahuwah. Kayi zyoonse Yahuwah nzyaakalenga nzibotu, tazyeelede kulesegwa naa zyatambulwa cakulumba Yahuwah. (1 Timothy 4:1-4)
Atwaambe kuti yebo ucisyoma Ellen White kuti taakasulaika lusyomo lwakwe akutalika kukazya zyakulya eezyo Taata Yahuwah nzyaakasalila bantu Bakwe mpoonya Walo kaciya kumbele akumusala kuba mutumwa wa mamanino aaciindi ku bantu Bakwe. Nkokuti kuti kacili boobo, yebo inga watusyoma aswebo ikuti twataminina kuti tujisi zizabukilo zyongaye buyo zyakukusambala amyuulo yaandeene.