Twaambo Tukazya Bbaibbele twa Ellen White twakasolweda Cikombelo ca SDA kutambula lusyomo lwa Baleza Botatwe

Kunyina kudonaika kuti Ellen White wakaluujisi kukwelelezya cikombelo ca SDA akucigwasyilizya kuti caatuke mpucaayimvwi kutasyoma muli baleza-botatwe akumaninizya kutambula lusyomo lwa baleza botatwe. Kuzwa nicakaanzwa cikombelo mu 1844 kusikila kumamanino aa musela wa 19, bunji bwaba Adventi bakasulaika muzeezo wakuti kuli baleza botatwe. Ba Adventi bakafumide kuba mucikombelo tiibakabwene bumboni nobuceya mu bbaibbele bwakuti kuli bantu botatwe mumutwe wa Buleza.

Lino nikwaasimbwa bbuku lya Ellen White lyakuti Desire of Ages mu1898, kwakaba musemo wakupindula bweende bwa lusyomo mu kuteelela mutwe wa Buleza kwaba Adventi alusyomo lwa baleza botatwe.

A peeji litaanzi lya bbuku eelyo, Ellen White wakayumya kuti: “Kuzwa kumazuba aa kuteeli, Mwami Jeesu Kristu wakali omwe a Taata” (19).

Mu caandaano ca kubuka kuzwa kubafu kwa Lazalosi, Ellen White waamba kuti “Muli Kristu kuli buumi bwa kuliponenena, butaanzi, butali bwa kubbweleka, alimwi bwatakazyila kumbi. . . . Buleza bwa Kristu nce cisyomezyo ca buumi butamani kumuntu uusyoma” (530).

Mu kwaamba kubuka kuzwa kubafu kwa Messiah, Ellen White uya kumbele kupampula kuzwa ku kasimpe ka Bbaibbele kaamba kuti, “Mufutuli wakabuka kuzwa mu cuumbwe kalaa buumi bwakali muli Nguwe lwakwe mwini” (785).

Lino aawo kasumpauzyide buleza bwa Kristu kubantu babala nzyalemba,,wakaya kumbele kugantauka Muya Uusalala mukujuzya makani aatajanwi mu Bbaibbele mubbuku ndyeenya aakuti “Cinyonyoono cakali kukonzya kukakwa akuzundwa kwiinda munguzu zipati zya Muntu Watatu mumutwe wa Buleza” (671).

Nokuba boobo, Ellen White wakazuunyene kubandika ciiyo ca buleza bwa Kristu. Walo wakacenjezya bantu babala bbuku lyakwe lya, The Great Controversy, ‘kulubila kulaa ntenda’ kwa kukaka buleza bwa Kristu.

“Akumwi kulubizya kulaa ntenda, ndusyomo lukaka buleza bwa Kristu, akutaminina kuti walo taakali kupona kataninga boola munyika eeyi. Ooyu muzeezo wakatambulwa akukkomaninwa ankamu mpati iiluulwa kusyoma Bbaibbele; pele ukazya cigaminina twaambo tuubauba twa mbobeendelana Mufutuli wesu a Taata, ciimo cakwe ca bulemu, abuumi mbwaakali kupona kataninga zyalwa. Eeco tacikonzyi kukkomaninwa kakwiina kupalanganya Mangwalo. . . .Ikuti bantu basulaika bumboni bwa Mangwalo Aakayoyelwa moza kujatikizya buleza bwa Kristu, tacikwe mulimo kukazyanya kasimpe aaka ambabo; nkaambo kunyina kukazyanya, nokuba kukosozya makani kuli buti, ooko kunga kwabazula. . . .Kunyina muntu wiimvwi mukulubila ooku uukonzya kumvwisyisya ciimo camasimpe nokuba mulimo ookwa kristu, nokuba makanze mapati ookwa Leza ku lufutuko lwa muntu.” (GC88 524)

Mubbuku ndeenya lya, The Great Controversy, walo utondezya Kristu kubee baleelene a Taata alimwi mulengi wa zintu zya kujulu zyoonse:

“Kacitaninga njila cibi, kwakali luumuno akukkomana mu mulengalenga woonse . . . . Kristu wakali Jwi, simuzyalwaalikke ookwa Leza, wakali omwe a Taata uuteeli,--kabalaa bubambe bomwe, ciimo comwe, amakanze omwe—alikke ncecilengwa leza mumulengalenga woonse wakali kukonzya kunjila mumalailile amumakanze ookwa Leza. Kwiinda muli Kristu, Taata wakabamba zilengwaleza zyoonse zikkala kujulu . . . . alimwi kuli Kristu, kweelanya akuli Taata, Ijulu lyoonse lyakapa kulemekezya.” (GC88 493)

Tulakonzya kukosozya makani kuti aaka kaambo kokwa Ellen White kali mbuli nkanka mu ciiyo ca mutwe wa buleza, mbuli mbwaakaciteelede, nkankako kaagwasyilizya cikombelo ca SDA kutalika kuba Cikombelo cipaila Baleza Botatwe:

“Muumbulizi ooyo Kristu ngwaakasyomya naakatantide kujulu, Muuya wini mubuzwide bwa mutwe wa Buleza woonse, kalitondezya kubaa nguzu zya lweengelelo lwa bulemu kuli baabo boonse bamutambula akusyoma muli Kristu kuti Mufutuli uubagaminina. Aaba mbantu botatwe bazumi bakujulu; mu zina lya nguzu zipati zyotatwe zyabo—mbaa Taata, Mwana, a Muya Uusalala—aabo bakatambula Kristu kwiinda mukupona kabala lusyomo luzumi bakabbizyigwa, mpoonya eezi nguzu ziyokweendelana abaabo bakamantana ajulu mukukakatila kwabo kupona buumi bupya muli Kristu.” (SpTB07 63)

Lino, kuli boonse basyoma kuti Taata Yahuwah wakasala Ellen White kuba mutumwa Wakwe wa mamanino aaciindi, atumubuzye mibuzyo iitobela:

• Hena yebo inga weezyeezya Taata Yahuwah kusala mutumwa kuti afundisye malailile aayandika kapati, pele ooyu mutumwa, kwiinda mumalembe aakwe, waanka kucinca mpociimvwi cikombelo kweendelanya aciiyo ca baleza botatwe cakuti limwi cikombelo casyoma Baleza botatwe? Hena kuli mushinshimi/mutumwa ngozyi yebo mu Bbaibbele wakabeleka kukazya kasimpe kakayubunudwe aa batumwanyina bakasalwa aa Yahuwah na?
• Hena yebo inga weezyeezya Taata Yahuwah kuti uyoosala mutumwa unooyintide kusungilizya buleza bwa Kristu, kacenjezya kuti lufutuko lwesu luyeeme mukutambula buleza bwa Kristu?
• Eelyo nasala mutumwa/mushinshimi, hena yebo inga weezyeezya Taata Yahuwah kuti ulabikkila maanu naa ooyu mutumwa uyoosyomeka ku kasimpe kamu Bbaibbele?
• Hena yebo inga weezyeezya kuti Taata Yahuwah uyoosala mulanda ooyo kakwiina uumugwasya kusolweda cikombelo ca Bunakristu coonse abantu baco bali zyuulunzuma makumi obile amusanu kuzinguluka nyika kuti batambule lusyomo lwa Baleza botatwe oolo lusumpauzya Cikombelo ca Katolika , eeco Taata Yahuwah ncaakasinganya kuti ngu Nyina wa Basibwaamu?

Atwaambe kuti yebo ucisyoma kuti Ellen White mutumwa uusalidwe ookwa Yahuwah [mbuli mbutwakali kusyoma kusikila mu 2017] nokuba zintu zikazyanya aa Bbaibbele mu malembe aakwe. Nkokuti mukaambo kaako, yebo inga walangilwa akusyoma ndiswe kuti twataminina kuti tulaa zizabukilo zisyoonto zya kuulisya amuulo muubauba.