Kuleleka Zina lya Yahuwah mu Makondo Eesu

Cipati citaanzi muli Jobu cizubulula Jobu, naakabuka cifumofumo bumwi buzuba kali umwi akataa bavwubi ba Kujwe, wakacaazya cinkwa maanza akucetaalila limwi kalitaninga sika kumabbililo aabuzuba oobo. Mafumofumo, wakacilaa ŋombe zili cuulu a mbongolo zili myaanda yosanwe: pele kusukila kumangolezya ngeenya aayo, kunyina lyo ancaakacijisi. Mafumofumo , wakalaa mbelele zili zyuulu zili ciloba a nkamela zili zyuulu zyotawe; kusikila mangolezya aayo, zyakajayigwa nokuba kubbigwa. Mafumofumo, wakalaa bana basankwa bali ciloba abana basimbi botatwe; kaataninga sika mangolezya aayo, taakacijisi naba mwana omwe. Mafumofumo, wakalaa balanda banjaanji; kaataninga sika mangolezya aayo, wakasyeezye buyo bone – boonse kabamuletela makani aamawuse aa lunyonyooko lwakasikila buvwubi bwakwe.

Koyezyeezya kuti nooli mucibaka ca Jobu, omucaangu. Mbubuti mbonga waingula manyongwe aayo? Ino kuti zambangulwe lya meenda, mulilo, kapepele, nokuba cilengwa leza cimwi ca lunyonyooko catumwa aa Yahuwah cakusiya wacetaala a kubula mwana kotaninga zyokela ku maanda aako kuzwa ku cikombelo ndeenya sunu?

Cipati ca Jobu cilaa bwiinguzi bwa bwakwe ku penzi lilemu eeli. Kutaanguna, walo wakagwitila kubaa buumba mucamba. Mu kampango 20 tubala kuti: “ Elyo Jobu wakanyamuka, wazapaula cikobela cakwe,” Eeyi yakali micito yakutondezya kuusa kwakwe. Bikkila maanu kuti tacili cibi kuusa eelyo Yahuwah natulekela kunjila mu masunko mu maumi eesu. Kuli ciindi ceelede ku cintu coonse – a ciindi ca koomoka! Eelyo makatazyo naatuboolela, swebo tatweelede kuyeeya kuti tatukonzyi kulila, naa kuti tweelede kuliyumyayumya nkaambo ka bantu bali mumbali lyesu. Jobu wakafwa buumba, aboobo aswebo tulakonzya. Mu kuusa kwesu, tulakonzya koomoka. Pele tatukonzyi kutamikizya Yahuwah cabweeleenzi!

Cabili, Jobu wakaingula isunko lyakwe kwiinda mukutembaula Yahuwah. Swebo tubala kuti mu kampango 20, naakayaulula cikobela cakwe akukunta masusu woonse amutwe wakwe, “wakalinyoola akuwida ansi kakomba cakulibombya.” Ootu twaambo tutondezya mbwaakayimvwi a ciimo ca muya wakwe naakali kutembaula. Wavwuntama busyu bwakwe ansi, eeco ciimo citondezya kulitolaansi kwa muntu uulibwene mbwatakwe lugwasyo alimwi akuyaamina luzutu ali Yahuwah

Catatu, Jobu wakalyeempa zinyonyoono mu kampango 21: “Ndakazwa mwida lyabaama ndili acinswe, ndilajokela mumo nkendi ecinswe. Yahuwah wakapa, Yahuwah wandinyanga-kalumbwa Yahuwah.” Kwiinda mu majwi aaya. Jobu utondezya kuti ulasata kakkazyikide camba. Kapati kuzwa mukulyeempa kwa Jobu, tweelede kubweza ciiyo. Atuzubulule kuya kumbele kutegwa tuceendelanye ku mapenzi eesu tobeni notuli mumakondo.

1. KUZUMINA NGUZU ZYA BULEMU BWA YAHUWAH

Kulyeempa kwinikwini kwa Jobu nkwakuti: “Yahuwah wakapa, alimwi Yahuwah wandinyanga.” Jobu ulazumina kuti eeco camucitikila, mulimo ookwa Yahuwah, uutondezya nguzu zya bulemu bwa Yahuwah.

Kukulyeempa ooku, swebo tweelede kwiingula kwiinda mukwaamba kuti, “Peepe, Jobu, yebo walubila, ooyu tuuli maningi mulimo ookwa Yahuwah mbuli mbowuli mulimo wa Saatani.”

Ncobeni, eeco caandaano cizubulula mulimo wa Saatani mu kupenzyegwa kwa Jobu. Twiiya kuti bumwi buzuba bana ba Yahuwah, kwaamba bangele, bakaboola kunembo lya Yahuwah kujulu. Bakabunganina kukomba Yahuwah akutambula milawo kuzwa kuli Nguwe, eeyo njibakeelede kuzuzika. Nokuba boobo, antoomwe abangele baluleme, Saatani awalo wakalitola kuti akaakulibonye kujulu. Kalutaninga sika lufu lwa Kristu, Saatani wakali kuzumizyigwa kusika munsaa mpobubede bulemu bwa Yahuwah.

Yahuwah wakamubona Saatani akumujuzya. Lino kazyi kuti makanze ookwa Saatani akali aakunyonyoona bulelo bwa Yahuwah, akoolawula milimo yokwa Yahuwah yoonse, akulibikka lwakwe kubee nguula nguzu zya masimpe mumulengalenga, Yahuwah wakabuzya Saatani, “Elyo Yahuwah wakati kuli-Saatani, Sena wakabona kuti taakwe muntu munyika uuli mbuli muntu wangu Jobu, muntu uutakwe mulandu, uululeme, uulemeka Leza akuyoowa cibi?” (Kampango 8). Kwakali kubaanga Yahuwah wakali kubuzya Saatani kuti, “Ikuti yebo kosyoma ncobeni kuti inga wavwuntamuna bulelo bwangu, Saatani, hena wamubona kuti Jobu muntu uusyomeka munyenzi mubulelo bwangu uusyomeka na?”

Mukwiingula, Saatani wakazumina kuti wakaalilwa kuzyola Jobu kuti aleke kusyoma Yahuwah. Nkaambo Yahuwah wakapede Jobu buvwubi bunji kapati, Saatani wakakazya kuti Jobu inga taazumanana kusyomeka. Walo wakali kusendekezya ceeco cakali kupa kuti Jobu abaa luyando akuteelela, kataminina kuti, Jobu naakanyonena kufumbwa uumupa kuvwuba akukkala kaliibide.

Yahuwah wakaateelela masendekezya aayo. Ikuti Jobu naatakali kubelekela Yahuwah mu nguzu eezyo Yahuwah nzyaakamupa mbuli mwanaakwe wakazyalululwa nkaambo buyo kakuti Yahuwah wakamupa buvwubi akumukkomanisya, nkokuti Jobu taakali mwana uusyomeka bwinibwini nokuba munyenzi bwinibwini. Aboobo, Yahuwah wakeelede kutondezya kuli Saatani kuti kusendekezya kwa Saatani kwakalilubide. Mbwaanga Saatani wakali kuzumbauzya kuti Jobu wakali kubelekela Yahuwah nkaambo biyo kakuti Yahuwah wakapa Jobu buvwubi, Yahuwah wakazumizya Saatani kuti amunyange zyoonse nzyaakajisi.

Mumaanu amwi, nkokuti, isunko lya Jobu wakali mulimo wa Saatani. Wakali muzeezo wa Saatani kuti Jobu apenzyegwe mbuli mbwaakapenga. Alimwi wakali mulimo wa Satani nkaambo walo nguwakapegwa nguzu zya kuzwidilizya cintu eeco – nokuba kuti keendelezyegwa aa nguzu zya Yahuwah. Aboobo swebo inga twaamba kuti Jobu, yebo walubila! Yebo ulilubide mukwaamba kuti Yahuwah ngu wakakupa, alimwi Yahuwah nguwakunyanga! Alimwi inga twaamba akuti, eelyo masunko naatusikila swebo: Yahuwah tali nguwe wakaatumina pe!

Pele inga katunoolubide aswebo. Jobu uliluleme. Jobu uzumina kuti Yahuwah mubwinibwini nguuli kumbele kupa kuti zyoonse zitole busena eezyo zyaacitika. Walo tayelede akumvwisyisya kuti mbubuti alimwi nkaambo nzi ncapezyegwa kuti azumine kaambo aaka. Walo taakeelede akuzyiba mubandi wa Yahuwah a Saatani kujulu. Walo uyandika buyo kumvwisyisya kuti Yahuwah alikke nguulela alimwi nguukonzya kuzwidilizya zyoonse nzyaakakanza kucita mu busongo Bwakwe! Nkaambo kunyina citusikila pele buyo eeco Yahuwah ncazumizya akututumina, ntoonse swebo a Jobu tulazumina nguzu zya bweendelezi bwa Yahuwah: “Yahuwah wakandipa, alimwi Yahuwah wandinyanga.”

Ambweni cibeela citaanzi ca kulyeempa kwa Jobu cilaboola munzila ngubauba kuli ndiswe: “Yahuwah wakandipa.” Zimwi ziindi, tulawuntuluzya kasimpe aaka kakuti: zintu zyoonse zizwa kuli Yahuwah, pele kanjaanji tulalisumpula kuti tulaa nguzu zya kulijanina buvwubi, kuyaka maanda, akukomezya bana besu. Nokuba boobo, Yahuwah ulainduluka kutwiibalusya kuti koonse kukutauka kwesu kwa mubili amu muuya tukucitila kwiinda mu nguzu zyokwa Yahuwah. Bana besu nzipego zizwa kuli Yahuwah, alimwi zintu zyesu zyoonse nzileleko zizwa kuli Nguwe. Nokuba kuti tulakonzya kulijanina zintu kwiinda mu kubeleka canguzu, eezyo nguzu zyakucita boobo azileleko nzyotupedwa kukakatila kwesu, zyizyila kuli Yahuwah. Yahuwah nguupa zintu zyoonse.

Eeci cilembedwe lino aawa ciyiisya kuti eeco cintu icili masimpe casika ku kwaabila, nkokuti lyoonse cili masimpe casika akukunyanga. “Yahuwah wandinyanga.” Yahuwah ulapa bantu Bakwe kweendelanya ku makanze a busongo Bwakwe, akutondezya nguzu Zyakwe aluyando. Eelyo Walo natola bayandwa besu nokuba zintu zyesu, eeco cileendelana a makanze aakwe abusongo Bwakwe; cilatondezya a nguzu zya bweeendelezi Bwakwe akutondezya luyando Lwakwe ku bantu Bakwe muli Messiah.

Utaambi kuti, omuyandwa, Yahuwah wakapa alimwi Saatani wandinyanga! Yahuwah wakakanzide kuti Ime ndisunge zintu zyangu abayandwa bangu, pele kuli nguzu zipati kwiinda zyokwa Yahuwah zyakandinyanga zintu zyangu ambabo! Kunze lyaboobo, kolyeempa nguzu zya bweendelezi zyokwa Yahuwah! Walo alikke ngo Leza! Walo ulakonzya kucita kufumbwa mbocimubotela! Alimwi Walo ulakonzya ulakonzya kubeleka kwiinda muzintu zyoonse kuti alete bulemu ku zina Lyakwe!

Pele ino nkaambo nzi Walo ncabatola? Nkaambo nzi ncatunyanga cintu ncotuyandisya? Ucitila boobu mu luyando Lwakwe!

2. KUSYOMA MU LUYANDO LWA YAHUWAH

Jobu wakasyoma mu luyando lwa Yahuwah lusyomeka. Walo wakalimvwisyide kuti makatazyo aayo akatuminwa aa Yahuwah mu luyando.

Saatani wakasoleka mu ciindi ca makatazyo eeco kupindaula Jobu kuti asyome kuti Yahuwah wakali kumucimwa. Walo wakataanguna kucita eeci kwiinda mukutumina manyongwe aaya mubuzuba butaanzi bwa mvwiki. Swebo inga twayeeyela kuti bwakali buzuba butaanzi bwa mvwiki nkaambo twaambilwa kuti bana ba Jobu bakali kupobola muŋanda ya mweeninyina mupati wabo akuti omwe omwe wa beeninyina wakali kuyoocita pobwe eelyo muvwiki yomweyomwe. Aaya mapobwe akali kutobelezya bweende bwa mvwiki, alimwi aboobo eeyi mvwiki yakali ku matalikilo. Lino, kumamanino aa kuzinguluka kwa mvwiki, twaambilwa kuti Jobu wakatuuzya cipaililo ca bana bakwe boonse. Kunooli mangolezya akaainda nokuba cifumofumo ca buzuba oobo Jobu naakasunkwa manyongwe aakwe, walo wakatuuzyide kale cituuzyo ca kuumpa acituuzyo ca cinyonyoono, wakali citide kufumbwa ciyandika kuti abedwe aa lweengelelo, akukkazyika camba kazwide kusyomezyegwa luyando lwa Yahuwah akubedwaa lweengelelo abana bakwe. Saatani wakabelesya bweende bwa zintu eezi mukukakatila kusungilizya Jobu kuti adonaike luyando lwa Yahuwah. Mbweenya buyo kuti yebo nokuba ndime notumvwa mulumbe uutontozya moyo, twalya a tebule lyokwa Yahuwah, akulimvwa bupya mu kulekelelwa zinyonyoono zyesu, mpoonya tucizyokela kumaanda twaakujana malweza mapati ngaayo atungana mulongo asika amunzi ali ndiswe – Saatani kalutide kubuzyabuzya ndiswe kuti, nduyando lwamusyobo nzi oolu?

Cabili, bikkila maanu kuti eelyo makkamela, basune, a mbongolo nizyakabbigwa, mbelele zyakanyonyoonwa munzila yaandene – zyakapya mulilo ookwa Yahuwah ooyo wakaloka kuzwa kujulu akuzisyukuta. Eezi mbelele zyakali banyama aabo Jobu mbaakali kubelesya lyoonse mu kuumpa zituuzyo kuli Yahuwah. Aboobo, Yahuwah wakazinyonyoona mumucito wa kubeteka ca bululami! Koibaluka kuti, eelyo mulilo nuusika kuzwa kujulu mu Mangwalo, ciiminina lubeta lwa Yahuwah. Koyeeya Yahuwah mbwaakalosya mulilo a sulufa muminzi ya Sodoma a Gomorrah. Komvwisya kuti Yahuwah ulatumina mulilo kuzwa kujulu mubuzuba bwa lubeta kutegwa amwayaule nyika eeyi a busofwaazi bwayo. Lino, Saatani uyanda kubuzya Jobu kuti, “Nkaambo nzi Yahuwah ncandibeteka kwiinda mukunduumpila mbelele zyangu? Hena zilamucima zituuzyo zyangu na?”

Mucibeela catatu, boonse bana ba Jobu bakanyonyoonwa. Jobu wakalizyi makanaa cizuminano. Nokuba kuti Jobu taakali kunga wacimvwisyisya bwinibwini kusalalilwa mbuli ndiswe, walo wakaibaluka kuti cizuminano cokwa Yahuwah cilazumanana mu misela yoonse. Aciindi eeci, Jobu kunooli wakalaa muzeezo wakuti, “Yahuwah tajisi cizuminano kuli ndime. Walo wacizimaanya buyo.” Munzila nzyeenya, Saatani ucengamika mizeezo yesu ku makatazyo aayo Yahuwah ngazumizya mu maumi eesu akusola kutuyeezya kuti Yahuwah ulatucimwa.

Kusikila antaamu imwi, Jobu wakalimvwisyide luyando lusyomeka lwa Yahuwah. Kwiinda mukubelesya zina lyokwa Yahuwah, Jobu wakatondezya kuti makatazyo aakwe akazyilide kuli Leza wakwe mwini, Leza uuli alikke. Aaya makatazyo taakazyilide ku baleza baba Kasidi nokuba mituni yaba Seba; akazyila kuli Yahuwah, ngweenya ooyo Leza mwini wakali kuyandisya Jobu! Kuyungizya waawo, kwiinda mukoompolola zina lya Yahuwah, Jobu wakatondezya kuti walo wakaibaluka luyando lwa Yahuwah. Mukaambo kaako, mulimo ookwa Yahuwah mukutumina manyongwe uliimpene kulaale ku mulimo wa Saatani mu manyongwe aayo. Ncintu ciyandika kwiibaluka kuti masunko a manyongwe ncintu cikonzyene, alaboola munzila zikonzyene. Nokuba boobo, Saatani upelengusya masunko aayo kuti adyakaizye lweengelelo lwa Yahuwah kuli ndiswe akusungilizya kuti tucimwe. Mukwiimpanya, Yahuwah ubelesya ziindi nzyeenya eezyo amanyongwe aayo kuti ayumyeyumye lusyomo lwesu akwiima katusimpidwe nji mu luyando Lwakwe kuli ndiswe.

Aayo mapenzi Yahuwah ngatumina bantu Bakwe lyoonse, aboolela mu luyando Lwakwe. Walo kunyina cimbi ncayandila kutumina makatazyo aayo. Kwiinda mu masunko aaya, Walo utubambila busena bwesu mu bulemu Bwakwe! Masunko amanyongwe, aboobo, aboolela buyo bana ba Yahuwah – ncipego ca lweengelelo ku babisyi mbuli ndiswe, eeco cakali kuyandika lufu lwa Messiah aciciingano kuti cipegwe kuli ndiswe.

Ooko nkokuteelela kwa Jobu awalo. Kunyina nokuceya mu cibalo mpokulembedwe kuti Jobu wakayeeyela kuti lino Yahuwah wakali mucimidwe, nanka kuti Yahuwah wakamudukwida syule, naa kuti luyando lwa Yahuwah muziindi zyakainda lwakali lwa kucengeezya buyo, pe. Mubwini, ikuti Jobu naakali kuyeeyela kuti lino Yahuwah wakali mucimidwe, walo naakali kutamikizya Yahuwah cabufubafuba! Pele taakacita boobo pe. Mukwaamba kuti, “Yahuwah wakapa, alimwi Yahuwah wandinyanga,” Jobu wakali kuyanda kwaamba kuti, “Yahuwah wacita eeci mu luyando Lwakwe. Walo ucindiyanda ime!”

Kulyeempa kwesu kweelede kuba mbweenya mu masunko eesu. Yahuwah tacinci. Walo wakatondezya kale luyando Lwakwe mu cikombelo Cakwe kwiinda mukutumina Messiah kuzyoofwa aciciingano. Yahuwah kunyina nanga wacimwa cikombelo! Walo wakatondezya aluyando Lwakwe kuli omwe-omwe wa bana Bakwe kwiinda mukubeleka bubotu bwa lufutuko mu myoyo yesu kwiinda mu Muuya wa Kristu. Kunyina pe Yahuwah nanga wacimwa ndiswe! Kufumbwa ncatutumina ucitumina mu luyando Lwakwe. Walo ulatumina naaba manyongwe aapenzyensya ca kweetezya mu luyando. Mu luyando, Walo ulalulamika, ulatoolola, ulatusalazya, alimwi ulatusetekanya, mbweenya mbuli golide mbwiisalazyigwa mu mulilo. Pele lyoonse, muu luyando.

Hena yebo inga wasyoma cintu eeco na? Inga walyeempa oobo kuti wasika amunzi wako kuzwa ku cikombelo wajana zintu zyako zyabbigwa abayandwa bako balifwide? Kwiinda mu nguzu zya Kristu a luzyibo lwa masimpe lwa Yahuwah, tulakonzya! Aboobo kucita boobu, swebo tweelede kusyoma amu busongo bupati bwa Yahuwah.

3. KUSYOMA BUSONGO A BUPATI BWA YAHUWAH

Busongo bwa Yahuwah nkukonzya Kwakwe kweendelezya kufumbwa citola busena eeco cigozya makanze Aakwe. Makanze Aakwe, mbuli mbotwaazyi, mbulemu bwa zina Lyakwe mu lufutuko lwa cikombelo Cakwe. Eelyo Yahuwah natumina makondo mu maumi eesu, comwe akataa zintu zyobile cili masimpe: kunooli Yahuwah wakalubila lyo makanze Aakwe, akutubikka mu ntenda, NAA zyoonse zitucitikila mubuumi bwesu, kusanganya a manyongwe aatucisa, zibelekela makanze aayo. Ncili ncoyeeyela kuti ncencico, omuyandwa? Hena Yahuwah inga wabikka mu ntenda makanze Aakwe mwini na? Kutali Leza wesu; Walo ngu Leza wa busongo.

Cibalo cesu cilatondezya munzila zyobile kuti Jobu wakasyoma muli Yahuwah kuti ngu Leza wa busongo. Kutaanguna, tubala kuti, “ Mulizyoonse ezi Jobu takwaakabija, takwaakakolomena Yahuwah.” Mubwini: “taakatamikizya Yahuwah ca bufubafuba.” Eeci ciiminina kuti Jobu taakaamba Yahuwah kuti, “Mufubafuba.” Walo taakatamikizya bufubafuba kuli Yahuwah pe. Mbwaanga Muuya ukwelela maanu eesu mu cibalo kuli ceeco Jobu NCAATAKACITA, nkabela swebo mpeenya aawo tuyeeyela kuti ino WAKACITA nzi – wakazyiba busongo bwa Yahuwah.

Cabili, kutondezya kuti Jobu wakasyoma mu busongo bwa Yahuwah tubala kuti: “Ndakazwa mwida lyabaama ndili acinswe, ndilajokela mumo nkendi ecinswe." Aawa, ibbala lyakuti ” mumo " liiminina “mubusena mbweenya alimwi.” Inzya ncobeni, Jobu taambi kuti walo uyoojokela mwida lya banyina; pele, walo wiiminina kuti uyoojokela mu bulongo bwaansi. Mumizeezo yakwe Jobu kwakali majwi ookwa Yahuwah aakaambila Adamu kuti: “nkaambo uli bulongo buyo, akooko kubulongo nkoelede kupiluka.”

Kwiinda mu majwi aaya – “Ndakazwa mwida lyabaama ndili acinswe, ndilajokela mumo nkendi ecinswe” – Jobu wakatondezya mbwaakalimvwide kubula bulemu kujatikizya buvwubi mbwaakajisi aciindi cimwi. Walo wakanjila munyika katakwe nociba comwe alimwi kunyina ncaakali kunga wavwola kuzwa kuli Yahuwah. Boonse bana ba Jobu a buvwubi bwakwe zyakali zyokwa Yahuwah. Lino Yahuwah wakazitola mu bweendelezi bwa bulemu Bwakwe.

Pele mu majwi aaya, Jobu wakazyibya busongo bwa Yahuwah. “Ndakazwa ndili ecinswe,” mbwaamba. Walo wakaboola kalaa mutundulu kuzyoobelekela Yahuwah, kutali lwakwe mwini! Nkaambo walo wakaboolela kunyonena Yahuwah, walo taakali kuyandika kuzyalwa kalaa buvwubi. Yahuwah wakamupa Jobu abuzuba zintu nzyaakali kuyandika kubaa zyo mu mulimo wakwe. Alimwi aciindi ca lufu lwakwe, walo taakali kuyandika kubaa zintu. Aboobo, Jobu wakazyiba kuti Yahuwah naakamugwisyila zintu nzyaakajisi, wakali kumubambila buzuba bwa lufu lwakwe. Swebo tatweelede kukosozya kuti Jobu wakasyoma kuti buzuba bwa kufwa kwakwe bwaswena pe. Walo wakazumanana kupona kazyi buzuba oobo alimwi wakalanganya Yahuwah naakatola zintu zyakwe mu mumuni wa kuteelela ooko.

Hena swebo tulabubona busongo bwa Yahuwah mu makatazyo eesu na? Mbubuti mbocituubaubila kuyandisya kutamikizya Yahuwah ca bufubafuba! Swebo twaamba kuti, “Nkaambo nzi Yahuwah ncaandilekelezya boobu? Makanze aangu woonse apoila. Ime nsyemvwisyide Walo mbwayanda kuti ndimubelekele ciindi cino.” Ciimo cesu cisendekezya kuti Yahuwah taatucitila kabotu. Nokuba boobo, Jobu utuyiisya kuzyiba busongo bwa Yahuwah. Kufumbwa citucitikila cilacitika amakanze aa lufu lwesu, kupegwa bulemu, a bulemu bwa Yahuwah!

Hena yebo inga wazyiba busongo bwa Yahuwah? Hena yebo wamvwa ciyubunuzyo ca busongo Bwakwe bwa kuvwuna bantu Bakwe kwiinda muli Kristu? Nkabela, yebo ulazyiba akuti zyoonse zicitika zilatucitikila mu luyando oolo lutondezya busongo bwa Yahuwah.

Eelyo notulangana aa makatazyo, ikuti twalyeempa akuzumina nguzu, luyando, abusongo bwa Yahuwah, swebo tulilibambide kwaambilizya ceeco Jobu ncaakatobela kwaamba waawo: “Kalumbwa Yahuwah.”

4. KUYANDISYA ZINA LYA YAHUWAH UULELEKEDWE

Yahuwah lyoonse uleleka zina Lyakwe kwiinda mukubona kuti bantu bamuyanda, bamulemekezya, akumunyonena. Kuyandisya kwa Jobu, mbuli mbokwaambidwe mu cibalo, kwakapa kuti Jobu abalanda bakwe bone bakaimvwi munsi lyakwe- aabo bakali bakamboni bakalibonena ntongola meso manyongwe mapati aali boobo- kakwiina kwiindilizya kwaamba ceeci: “Kalumbwa Yahuwah!” mu milimo Yakwe yoonse a munzila Zyakwe!

Nobayandwa, mwaalumi uuli woonse, mwanakazi, amwana uumvwa makanaa manyongwe aaya aambe kuti sunu, “Alilelekwe zina lya Yahuwah!” Aayandwe Leza ooyu! Kofugama amagondo aako ansi akumukomba Walo! Alimwi eelyo manyongwe aali boobu naasikila nduwe, koimba kapati nyimbo ya bupati Bwakwe! Koambila bamwi kuti baboole bakuumbulizye kuti, “Ime nsyekwe kubuzya makanze Aakwe nokuba myeendelo Yakwe; Ime ndapa biyo bulemu boonse kuli Nguwe.”

Mukulyeempa koonse ooku, kapati mukuyandisya Kwakwe kuti zina lya Yahuwah lilelekwe, Jobu wakatondezya luzyalo lwa Yahuwah lubambilila bantu Bakwe lyoonse. Aawa, tulabona kuti Yahuwah wakatabula makanze ookwa Saatani. Saatani wakati, “uzookusinga kubusyu bwako!” (kampango 11). Walo wakapelengusya kulengelezya manyongwe aakacitikila Jobu mukuyanda buyo kuti asungilizye Jobu kudonaika nguzu, luyando, abusongo bwa Yahuwah, aboobo akumusungilizya kuti asampaule Yahuwah. Nokuba boobo, kulaale kuzwa kukutukana Yahuwah, Jobu wakaambilizya kuti, “Kalumbwa Yahuwah!”

Nkooku kuumbulizyigwa mu masunko eesu. Hena yebo ulayeeya, kacitaninga citika, mbonga waleleka zina lya Yahuwah mu masunko aaciyookucitikila kumbelaa ciindi? Koyaamina muli Yahuwah – Luzyalo Lwakwe lulatupa nguzu zya kucita boobo! Hena yebo wakaleleka kale zina lya Yahuwah mumasunko aakainda kale? Lweengelelo Lwakwe lwakapegwa bulemu. Kubedwaa lweengelelo oolo, swebo tweelede kuzumina nguzu Zyakwe zya bweendelezi, luyando lusyomeka, a busongo bupati. Kwiinda mu nguzu, luyando a busongo Bwakwe, Walo ulavwuna akutugwasya kuleleka zina Lyakwe! Muziindi zya kusunkwa, bana ba Yahuwah zimwi ziindi inga batamikizya Nguwe bufubafuba. Mpoonya Walo, ulayubununa nguzu, busongo, a luyando kwiinda mukusolweda bana Bakwe ku kweempwa akubaa buumba masimpe nkaambo ka zinyonyoono zyabo, akulitondezya kuti eeco Walo ncaakacita wakacicitila bubotu bwesu.

Nkaambo Yahuwah ulazwidilila! Mu nkondo akataa Yahuwah a Saatani, Yahuwah nguyoojana kuzunda! Swebo tulakonzya kulimvwa akulitondezya kukoma mu mapenzi eesu kwiinda mukuleleka zina lya Yahuwah! Eelyo swebo notuzyiba luyando lwa Yahuwah kuli ndiswe muli Messiah akupailila lweengelelo kuti tulemekezye Yahuwah mumasunko eesu, Walo uyootupa kuti tukonzye kwaamba antoomwe a Jobu kuti, “Alilelekwe zina lya Yahuwah.” Akube boobo.

Eeci ncibalo citali ca-WLC ca Mufundisi. Doug Kuiper.

Twakagwisya mucibalo citaanzi woonse mazina aa mituni ngobaita Taata a Mwana, kubikka mucibaka cangawo mazina mataanzi ngubaapedwe. Kuyungizya waawo, swebo twakajokolosya mu Mangwalo mazina ookwa Taata a Mwana mbuli mbwaakalembedwe kutaanguna abalembi ba Bbaibbele bakayoyelwa moza. Nkamu ya -WLC