|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Ezekiya 24:15-24
Lino izwi lya-Yahuwah lyakandisikila, kaliti, 16 O mwanaa muntu, swiilila, Ndakoongomokela kukunyanzya muyandwa wameso aako, nekubaboobo toyelede kulila nikuba koomoka nikuba kumbulumusya misozi. 17 Sintimuka cakuumuna buyo. Utalili uufwide pe. Anga citambala cako akusama insangu zyako kumaulu. Utavwumbi milomo yako nikuba kulya zilyo zyabasidilwe. 18 Lino cifumo ndakaambila bantu, nkabela mangolezya mukaangu wakafwa. Lino nibwakaca, ndakacita mbubonya mbundakalaililwa. 19 Lino bantu bakandibuzya kuti, Sa toyandi kutupandulwida aya makani mbwaamba? Nkaambonzi ncocita boobo? 20 Ndakabavwiila kuti, Izwi lya Yahuwah lyakandisikila, liti, 21 Ambila luzubo lwa-Isilayeli kuti, Mbuboobu mbwaamba Mwami Yahuwah. Ndaamba kubisizya busena bwangu busalalisya, mbumulikankaizizya canguzu, cintu ciyandwa cameso aanu, myoyo yanu nciiyandisya. Abalo bana banu balombe abasimbi mbemusiide bayoojazigwa ipanga. 22 Pele muleelede kucita mbubonya mbundacita mebo, Mutavwumbi milomo yanu nikuba kulya zilyo zyabasidilwe. 23 Zitambala zyanu zibe amitwe yanu, ansangu zyanu kumaulu aanu. Mutalili nikuba koomoka. Munooya bukotela-kotela mukati kamilandu yanu akutongela umwi aumwi kumweenzinyina. 24 Aboobo Ezekieli uyoomubeda citondezyo. Zintu zyoonse nzyaakacita, anywebo muyoocita mbubonya. Lino aya makani naazooba, muyooziba kuti ndime Mwami Yahuwah.’”
Kuli zintu zinjaanji nzyotumga twaamba zijatikizya kampango kali atalaawa pele citaanzi: nkampango keenzu kapati. Aaka nkampango keenzu mu Mangwalo. Kuti Yahuwah uzyooboola ku mulanda Wakwe muyandwa akumwaambila kuti uyoomukwempula ciindi comwe kuzwa kuli nguwe, eeco tacili ciimo ncotuyeeyela Yahuwah. Tacili ciyumu kweezyeezya kuti Walo wakagwisya yooyo uukkomanisya meso ookwa Ezekiya. Ooyo mukaintu taakaciswa kwa ciindi cilamfu, coonse ncotuzyi ncakuti aciindi cimwi, Yahuwah wakamutola.
Kuyungizya kukunyandya kuli boobu kuli malailile Yahuwah ngaakapa mutwanga Wakwe Ezekiya kuti atoomoki dilwe. Kwamyaanda ya myaka kataninga sika Ezekiya alimwi amyaanda-myaanda ya myaka kuzwa waawo, BamaJuuda bakali kunga balila caantangalala dilwe lyakufwidwa bayandwa. Aciindi ca lufu, kuwoolola akukwemba kapati kulamvwika akataa mukwasyi alimwi kutali mumukwasyi ulikke buyo. Bantu bakali kunga babbadelwa mali kuboola kukoomoka adilwe.
Bantu bamukwasyi wakafwida bakali kunga balifwampaila mamvwu, zimwi ziindi kulifwampaila twe lya mulilo atalaa mitwe yabo. Bakali kulivwumba cibeela ca busyu kusikila amulomo a cisitilizyo. Tiibakali kusama zisoti nokuba zitambala, bakali kulikuna mamvwu amitwe, akulicesya kapati kutondezya mbobakotede. Mpoonya bakali kuliimya kulya kusikila mangolezya eelyo balongwenyina abamukwasyi nibaali kunga babaletela cakulya ciitwa kuti Cinkwa ca Buumba.
Aawa Ezekiya waambilwa kuti atalyi cakulya eeco balongwenyina abamukwasyi ncibaamweetela, wakaambilwa kubbama mulomo, akuti atalifwampaili mamvwu amasizi atalaa mutwe wakwe. Walo weelede kuzumanana kujata bubi kubee kunyina caacitika. Taakazumizyidwe nokuba kulosya dosi lyomwe lya misyozi kuzwa mu liso. Ikuti naa wakali kuyanda kuswa ciya, wakeelede kucita oobo mucamba. Ikuti naa wakali kuyanda koomoka wakeelede kucita oobo mukaziziizi munzila iinga kunyina uunga wazyiba.
Saa inga ayebo wazumina kuti aaka nkampango keenzu? Inzya, Yahuwah ubelesya Ezekiya mbuli mukonzyanyo wa ceeco ciyootola busena akataa bantu bana Isilayeli.
Mumyaka iili fuka yakainda musyule, Nebuchadnezzar wakaboola akusaala munzi wa Jelusalema. Taakawudilimuma pele wakatola myeelwe-myeelwe yabantu bamu Jelusalema ku Bbabbuloni anguwe, kunooli ndendilyo Daniele, Shadrach, Meshach, a Abednego nibaatoleelwa. Wakaatula Jehoiakimu, mwami, akumutola ku Bbabbuloni, alimwi wakabikka Zedekiah, acisyanyina, acuuno cabulelo bwa Judah.
Mubuzuba bwini eelyo mukaintu wa Ezekiya, Nebuchadnezzar wakazyokela ku Jelusalema akuzinguluka munzi woonse nkaambo Zedekiah, mwami, wakazangila Nebuchadnezzar. Kuzinguluka kuli? Ooko nkucingilila mumbalaa munzi alumamba lwako kutegwa kubule uuzwa mukati nanka uunjila mukati. Mubufwaafwi, munzi woonse wakaunjizya mu nzala. Yebo waubuzya nguzu kusikila munzi wasala kulilekela mumaanza aa bafumpi.
Mbombuboobo, Yahuwah mbwaakacita kuti Ezekiya abe mukonzyanyo waceeco cakali kuyanda kucitikila munzi wa Jelusalema niwaafumpwa. Kwa myaka yobile, Nebuchadnezzar wakacingilila mumbalaa munzi. Kwa myaka yobile wakalindila kakkazyikide camba kulindila ciindi ceelede kuti anjile mumunzi akuwoolawula. Bantu bana Isilayeli bakakkazyika myoyo kuyeeyela kuti kufumbwa biyo kuti tempele lya Yahuwah kaliciliko, Yahuwah ulabamvwida lubomba bantu, nokuba kuti bakali toledwe buzike kunyika yeenzu. Tiibakaninga syoma kuti Yahuwah inga wabadukwida syule bantu ba Judah. Nkaambo nzi? Nkaambo ka zintu zyakali kukkomanina meso aabo, majwi ngeenya Yahuwah ngaakabelesya mukwaamba mukaintu wa Ezekiya, itempele lyakali kuyoo dilimunwa. “Amulange, Ime njoosampuzya busena busetekene Bwangu, kulidunda kwenu, ciyandwa mumeso eeni, cili kumyoyo yenu.” Kufumbwa ciindi nilyakaciimvwi itempele bakali kulikulwaizya akulangila kuti Yahuwah wakacili aambabo nokuba kuti bakanjide mu kukomba mituni akumuzangila. Yahuwah wakali kuyoodilimuna tempele Lwakwe mwini akubatondezyela limwi kuti Walo, ciindi comwe akuzwa waawo, waabasulaika akubayaamuka nkaambo balo mbibaataanguna kumusulaika akumuyaamuka Mwami.
Balo tiibakalaililwa kulilesya koomoka dilwe mbuli bwakaambilwa Ezekiya, pele bakali kuyoonyandwa cakuti bakaalilwe kulitondezya mbobalimvwide antangalala. Myaka yobile kuzwa nicaashinshimwa eeco, Jelusalema wakafumpwa mpoonya tempele lyakoolawulwa. Bantu bakagambwa akukankama kuli ceeco caacitika—eeco cakaimpene kapati ancibaali kusyoma—cakuti bakaalilwa akoomoka.
Hena yebo kuli noninga myongwa bula kumvwa makani aamause cakuti waalilwa akulila na, yebo tookakonzya kulimvwa nociba cili buti, yebo wakabaa cinywe nkaambo ka manyongwe aayoosya? Eeci ncecitondezyo ca Ezekiya a mukaakwe. Ooku kunyonyooka, ndubeta lutaambwi mumunzi wa Jelusalema, lwiimpene aceeco ncibakali kusyoma, cakuti bakanyandwa cakwaalilwa akulila.
Pele eeci cicili cintu ceenzu kuyeeya kuti Yahuwah wakali kubweza umwi musale uusyomeka akataa balanda Bakwe, ooyo wakali kumuteelela Walo nokuba kuti bamwi kabamuzinga kumukazya, mpoonya akumucitila cintu cili boobu. Kumunyanga mukaintu wakwe? Eeco tacimvwiki aanga ngu Yahuwah uucita ceeco. Ino inga twacipandulula buti?
Kanjaanji eelyo notuswaanganya tumpango mbuli bwa kaaka, kapati mu Cizuminano Cakale, tukalendekezya biyo kuti nkampango kaku Cizuminano Cakale. Twaamba kuti eeyo njenzila Yahuwah mbwaakali kucita zintu ciindi eeco. Walo wakali kucita zintu zyeenzu azintu zikankamusya. Pele, inzya, lino tuli mumusela wa Cizuminano Cipya alimwi tucaamba kuti Yahuwah taciti zintu zili boobo akutonkela biyo kumbali zintu eezyo kubee nimbeta zyaacitigwa myaka minji yakainda kale musyule.
Omuyandwa ooyandika, oobo tabuli bwiinguzi bweelela pe. IBbaibbele litwaambila kuti Yahuwah taninga cinca alimwi takonzyi kucinca. Kunyina cimvwule ca kudonaika, nokuba kucincauzya. IBbaibbele lyaamba kuti, “Ime Ndime Yahuwah Leza wako, Ime nsyecinci pe.” Walo taninga cincide pe. Walo uli mbweenya ijilo, sunu, alimwi lyoonse alyoonse. Ooyu Leza wa Cizuminano Cakale ngo Leza wa Cizuminano Cipya. Aboobo mbubuti mbotunga twapandulula makani aaya?
Yebo uliteelede kuti iBbaibbale ndibbuku lya ciyubunuzyo ca Yahuwah amaknze aakwe aakuyubununa ciciya kumbele kuyubununwa. Yebo tokonzyi kumvwa zyoonse zili mubbuku litaanzi. Yahuwah, mumisela minjaanji, wakayubununa zimwi azinjaanji zyakuti Walo nguni ambwabede, alimwi anzila Zyakwe. Aboobo, kumatalikilo aabbuku eeli, tulabona Yahuwah katondezya muntu kuti Walo ulisetekene—Walo ulaandene kuzwa kuli ndiswe cinicini. Walo kunyina ncotunga twamulesya kucita. Walo tali mbuli umwi akati kesu—aboobo Walo wakali kwaamba kuti kuli Mozesi kuzwa mukasanzu kakali kuyaka mulilo, “Ime Nde Ndime.”
Yebo tokonzyi kutondeka umwi akwaamba kuti, “Yahuwah uli mbuli nguwe. Yahuwah uli mbuli yuulya.” Peepe. Walo ulaandeene cakumaninina. Walo takonzyi kupandululwa mubukkweme Bwakwe. Walo ulaandeene kuzwa ku zilengwa Leza Zyakwe cakuti “Ulisetekene.” Ncenciceeci bbala lya kusetekana ncoliiminina. Walo ulaandeene kapati kuzwa kuli zyoonse nzyaakabamba. Kunyina cili mbuli Nguwe.
Mu kusetekana Kwakwe, Walo Ulilondokene. Bweende Bwakwe bulainda bulemu bwa muntu ngoninga swaanganyide. Yahuwah ulainda kubota kwiinda mwaalumi wiinda kusetekana nokuba mwanakazi ngoninga zyiba. Kusalala mu kulyeendelezya Kwakwe kulainda majulu. Walo mubotu koonse-koonse. Walo ulaa luyando koonse-koonse.
Muzibeela zyakainda zya Jwi lilembedwe lya Yahuwah, kunyina zinji mbuli zyeezyo nzyonga wabona. Yebo ulabona Yahuwah wa bululami butakonzyi kunyonaunwa kaambilizya kuti Walo uliluleme alimwi mukowa wabantu woonse ulilubide. Walo waamba kuti mukowa wabantu woonse wakazanga aboobo bakacokacoka bukali Bwakwe a mbeta Zyakwe alimwi akuti eeco cili kabotu. Webo noyaa kweenda mubumboni bwa mangwalo aasetekene kumbelaa Myaanda ya myaka kuzwa aciindi ca ndabo amizuzumo eelyo Yahuwah naakaselukila a Mulundu wa Sinai kuzyoopa Mulawo amabwe kuli Mozesi, tusika ku mwaalumi wiitwa kuti Davida.
Davida wakatyola mulawo ookwa Yahuwah kwiinda mukulalika akujaya mwaalumi wa mukaintu ngwaakacita mamambe awe. Kweendelanya amulawo, kwakanyina cituuzyo ca zinyonyoono zyobile eezyo. Kwakanyina cakujaila cituuzyo mumulawo ookwa Yahuwah ku mulandu wa kujaya muntu awa kulalika. Bulikke bwiinguzi bululeme ku zinyonyoono zyobile eezi bwakali bwakutola baabo bakacita zinyonyoono eezi akubadinkaula mabwe akubajaya mpeenya aawo.
Pele, mushinshimi wa Yahuwah wakeza kuli Davida akumutondeka minwe mubusyu bwakwe, kaamba kuti, “Yebo nduwe oocita ceeci. Yebo ndonduwe. Yebo wacita cinyonyoono kuli Yahuwah. Yebo wasampaula zina Lyakwe kunembo lya masi, pele tokoofwa. Yebo walekelelwa.” Wakaamba ceeci kutegwa Davida abone cintu cimwi muli Yahuwah eeco naba Mozesi ncaatakabona. Eeci nciyubunuzyo ciciyaa kuyubununwa kumbele. Ooku nkubona zinjaanji zijatikizya Yahuwah. Davida wakalemba mupailo wa kweempwa kwakwe mu Intembauzyo 51 akwaamba kuti, “Zituuzyo zya kuumpa buumbulu a zyaabilo, Webo tozikkomanini, biyo biyo naanga neekutuuzyila nzizyo, pele muya wuuside amoyo uutyompedwe Webo toukaki.”
Walo wakabona cintu cimwi muciimo cokwaYahuwah eeco cakamuyubunwida Muuya wa Yahuwah, ngweenya Muuya ngwaakapa Mozesi amabwe aapapalele. Kusikila ciindi notunjila mu Cizuminano Cipya, tubona ciyubunuzyo cimaninide, mubukkweme, cokwa Yahuwah mu ciimo ca Yahushua Messiah. Nkaambi nzi cili boobu? Nkaambo Yahuwah ulalitondezya kwiinda mumubili wanyama. “Alimwi twakabubona bulemu Bwakwe, ibulemu bwa simuzyalwaalikke ookwa Taata, uuzwide luzyalo akasimpe.” Mumubili wa Yahushua Messiah momwakabede bukkwene bwa Yahuwah. Yahushua wakati, “Ikuti naa mwandibona Ime, nkokuti mwamubona Taata.
Luyando lyoonse lujisi kuyandisya kubaa luzyibo lwa muntu ooyo ngoyanda. Ncenciceeci mulimo wa kusendana naa kweebana mbuubede. Yebo unjila muluyando alimwi yebo uyanda kuzyiba zinjaanji zya muntu ooyu. Nkaambo akataa tumwi aaka Yahuwah ncaakatupeda cintu cibotu ncotwiita kuti cikwati. Cikwati ncintu cisetekene naa mbusena oomo banabukwetene, kapati banalumi, mobakonzya kusoma akwiiya bamakaintu babo. Balakonzya kusika ambaakani imwi kuzyiba akuteelela bamakaintu babo. Ncenciceeci Petulo ncaakaamba muli 1 Petulo 3, “Bamalumi, amukkale antoomwe abamakaintu benu mu kuteelelana.” Eeci munzila ngubauba ciiminina biyo kuti mulimo wa mulumi nkusoma mukaintu wakwe munzila iisetekene, akumuyandisisya muluyando. Yebo ulakonzya kumumaninizya myeendelo yakwe. Yebo ulati, “Eeco ncintu citakonzyeki. Ede inga wakakatila kuzyiba Yahuwah kwiinda kuti uzyibe zyoonse zya mukaintu wako.”
Pe ma, mulongwaangu ooyandwa, inzya mukaintu ulipilingene cinicini, pele yebo ulaa ciindi cakumuzyiba buumi bwako boonse. Kufumbwa biyo Yahuwah nacikupede buumi, mukaintu weelede kuba luzyibo lwako ndokakatila kuzyiba. Yebo weelede kumubendelela, kumuzyiba, akumuyanda. Nkaambo nzi? Nkaambo yebo ulamuyanda. Yebo uyanda kuti umuzyibe ncobeni. Walo ulakukondelezya yebo. Yebo nduwe kukondwa kwakwe.
Mulongwaangu, hena eeco tacili masimpe kujatikizya Yahuwah? Hena toponi buumi bwa cilongwe ciyandisi Anguwe na? Ikuti koli mbopona oobo, yebo ulayandika kumuzyiba bwinibwini Walo. Kuli kuyandisya aawa. Yebo tokkutide mu kusyoonto nkomuzyi kale Walo. Aboobo kozumanana kumutandila Walo. Hena tucite cintu eeco cifumofumo sunu na? Naa tukosozye cibalo eeci akwaamba kuti, “Mbo ccita yaaya, Yahuwah kumuzyiba. Nguni uunga wamuzyiba ncobeni?”
Nee peepe. Yahuwah wakatupa Cizuminano Cipya. Cizuminano Cipya nje mboni eeyo motulangila akuzyokela ku Cizuminano Cakale akucisandulula. Calo ngo mulazyo uutupa kumvwisyisya akusandulula nzila a kuyanda kwa Yahuwah mu Cizuminano Cakale.
Aboobo, eeco Ime nceyanda kucita muciindi cesu ciceede nkujuzya zibalo zyotatwe mu Cizuminano Cipya eezyo zitubonya mbuli mboni akubikka kampango aaka atala kutegwa tumvwisyisye cicitika.
Aaka kampango kataanzi nkakutugwasya mbotweelede kubaa ciimo ciluleme notuswena munsaa Ezekiya 24. Tatukonzyi biyo kuyandisya kuzyiba ncacita Yahuwah kumulanda wakwe uuyandwa Ezekiya, pele tuleelede akuboola katulaa mizeezo iiluleme amoyo uulaa mulemeko. Aaka kampango kalatugwasya kucita boobo.
Kukazya kwa mwaapositolo Paulu koonse nkwakuti Yahuwah ulalilela, aboobo Walo ulaa lwaanguluko lwakucita kufumbwa ncayanda kucita mukati ka munyinza wa ciimo Cakwe. Yahuwah takonzyi kucita cintu anze lya munyinza wa ciimo Cakwe. Kunyina uukonzya kucita ceeco, kusanganya a Yahuwah. Kuli zintu zimwi Yahuwah nzyatakonzyi kucita. Walo takonzyi kubeja, mbwaamba Walo. Walo takonzyi kweempwa mbuli muntu mbwayempwa. Tacili mu ciimo Cakwe kuunina nokuba kucinca mizeezo Yakwe camavwambukila katalibambide mbuli bucita muntu. Pe nokuba asyoonto pe. Yahuwah ucingilidwe aa ciimo Cakwe mwini. Nokuba boobo, mukati kamunyinza wa ciimo Cakwe, Walo ulaa lwaanguluko lumaninide akucita kufumbwa ncayanda kucita. Yebo tokonzyi kubaa lwaanguluko luli boobo, nanka ndime pe.
Swebo tulaa lwaanguluko lwakusala. Yebo ulakonzya, mulwaanguluko lwako, kusala kweendelanya aciimo cako pele eeco mukati ka munyinza wa Yahuwah. Inzya, yebo ulaa lwaanguluko lwakusala, pele tokwe lwaanguluko lumaninide lwa kusala kufumbwa mboyanda.
Paulu utonkomene amakanaa lwaanguluko lumaninide ndwajisi Yahuwah uulilelede, alimwi ubelesya mikonzyanyo imwi. Walo ujuzya muzeezo wa nkamu ya BamaJuuda mubbuku lya BaLoma oomo mobakazya makani aaya. Walo ulizyi ncobayanda kuti bamwaambile, “Lindila aasyoonto. Yahuwah wakabamba zizuminano zimwi a BamaJuuda, balunyungu lwa Abulahamu; nkaambo nzi ncozitasiki mpozizuzikwa?” bunji bwa bana ba Isilayeli bakamusulaika Messiah. Tiibakasyoma, alimwi mbasyoonto BamaJuuda bakafutulwa. Paulu ulondolola mubuzyo ooyo. Walo ujokelela ku caandaano ca fuka kaamba kuti, “Tabali bana ba Isilayeli boonse ba lunyungu lwa Abulahamu. Yahuwah, mu busongo Bwakwe, wakasala, basale, bamwi akataa mukowa wabantu aabo mbayanda akufwida nkumbu mubulemu.”
Eeci nciiyo a mulazyo uujisi buyo bantu bangaye bacitambula. Mubwini, Ime ndaamba kuti muntu uuli woonse uuzyedwe walangila mankusa kasimpe aaka kakuti Yahuwah ulaa lwaanguluko lutagoli lwa kusala kufumbwa ngwayanda Walo kuti afutulwe alimwi akuti ooyo ngwatasali, Walo tamufutuli. Ngamakani woonse aaya. Aawa, Paulu ubelesya mukonzyanyo wa Pharaoh. Yahuwah waamba Pharaoh kuti, “Ime ndakamwiimpuda mulimo wangu uugaminina kutegwa nditondezye Nguzu Zyangu, kutegwa zina Lyangu likaambilizyigwe atalaa nyika yoonse. Aboobo, Ime ndakayumya moyo wa Farao cakuti walo takalekezyi bantu Bangu bana Isilayeli kuti baunke, nkabela Ime ndatondezya lubeta lwangu anguzu Zyangu atalaa bulelo bwakwe.” Ncenciceeco cini Yahuwah ncaakacita.
Mpoonya Paulu waamba kaambo kanyandya mu kampango 18, “Aboobo Walo ulaa luzyalo ali woonse, kufumbwa Walo ngwayanda, alimwi Walo ngwayumya moyo.” Eeci ncintu cizyibika. Aaka kampango takeelede kukazyanyigwa. Kunyina busena bwa kuzelauka nanka kubandika. Paulu ulacaamba munzila iisalala akumvwikisya: Yahuwah ulasala kufutula bantu bamwi, alimwi Walo ulasala kutafutula bamwi.
Mbubuti mboteelede cintu eeci? Inga twacipandulula buti eeci? Cimvwika kuba cintu ca “kusalauzya.”
Ime nketaninga ingula cintu eeco, Ime njanda kuti yebo usanyangule cintu ncobakazyanya. Paulu waamba majwi aakazya mu kampango 19. Ncenciceeci muntu uubala ncatiikazye mu kulikwabilila. Langa kukazyanya naa kukaka ncokuzumbauzya. Ooko nkweezyeezya kuti kaambo ka Paulu nka masimpe. Aawa bakaka tabakazyi, “Pe, pe, pe, Yahuwah takonzyi kusaluzya muntu Walo ngwayanda. Cili mumaanza aamuntu! Cili kuli nguwe kusala. Eeci tacili luzyalo kwa bulemu oolo lusala akwiimikizya umwi kakutaninga kuba matalikilo aanyika.” Pe, ooko takuli kukazya. Ooyo uukazya weezyeezya kuti muzeezo wa kusalilwa nkobugama buumi bwako kotaninga zyalwa ngwa masimpe.
Walo uzumbauzya mubuzyo wakwe mukampango 19.
“Yebo uyoondaambila ciindi ciya kuti, ‘Nkaambo nzi ncocilaa kaambo? Nguni waakaka kuyanda Kwakwe’”
Mumajwi amwi nkokuti, “Paulu, twakulekela kuti uliluleme. Pele mukaambo aako kakuti Walo ulafwida luse kufumbwa ngwayanda akuyumya moyo kufumbwa ngwayanda, mbubuti Yahuwah mbwatujanina mulandu iswe? Tucita biyo ceeco ncaakatulengela kucita. Mbubuti Walo mbwanga wabeteka naba uuli buti? Mbubuti Walo mbwanga wabweza Farao akumubeteka akumusinganya? Ede walo wakacita biyo ceeco Yahuwah ncaakamucitya.”
Twiingula buti makanaaya? Paulu ulaingula. Tabuli busanduluzi buzuunyene bwa mulazyo wa kusalwa, bwiinguzi mbwakuti Yahuwah ulaa lwaanguluko lumaninide kucita kufumbwa ncayanda Walo.
Atulange mubuzyo ooyu. Nguni waakaka kuyanda Kwakwe? Nguni watakacita ceeco Yahuwah ncaakamubamba kuti acite? Mubuzyo ngwakuti naa Yahuwah tasalululi. Mpampawo coonse eeci mpocigeme, kusendekezya kuti Yahuwah ulasalauzya. Ooyu mubuzyo ulwana bululami bwa Yahuwah. Nobayandwa, kufumbwa ncalwana Saatani cizinguluka akaambo aaka kakuti: Yahuwah tali mubotu. Ikuti Yahuwah kalaa lwaanguluko lutagoli lwa kusala kufumbwa Walo ngwayoofutula ayooyo ngwatakafutuli, nkabela munzila imwi, eeci citondezya kuti Yahuwah tali kabotu alimwi takonzyi kusyomeka kucita cibotu. Nkokutamikizya kwini ooko dyabooli nkwaakasungilizya Eva mu Muunda. “Inzya, hena Yahuwah taakaamba kuti, Inywe mulakonzya kulya kufumbwa ku musamu uuli mu muunda? . . . Nkaambo Yahuwah ulizyi kuti oobo buzuba mwaakulya ku musamu ooyu, meso eenu ayoojaluka, nkabela muyooba mbuli Yahuwah, kamuzyi cibotu acibi.”
Aawa kusungilizya koonse nkwakuti yebo tokonzyi kumusyoma Yahuwah nkaambo Yahuwah tali mubotu kuli nduwe. Walo ukulesya bubotu Bwakwe. Omuyandwa, Yahuwah ulaangulukide kucita kufumbwa ncayanda kucita Walo, alimwi Walo ncayanda kucita lyoonse ncintu cibotu. Ncenciceeci Bbaibbele ncolitweetela cijatikizya Yahuwah.
Ono nsyetigame ku lusyomo lwa kusalwa akusola kukutabilila webo nkaambo mwaapositolo Paulu taciti boobo pe, mbuli mbotutiibone mutunzumina tusyoonto tutobela, pele andikupe cintu cimwi cakuti ulizeeze. Ninzi nconga wayanda kubaa ncico kuti wabaa ciindi cakubaa cintu, mbuli bunji bwa bantu mbobayeeyela zintu zya ncobeni, bantu bobile balaa lwaanguluko lumaninide lwa kusala, ibalaa mizeezo yiimpene? Mubupaizi bumwi eeci baciita kuti kuba bantu babili mumubili omwe. Balaa Baleza bobile baimpene beelene kubaa lwaanguluko lwa kusala alwaanguluko lwakucita kufumbwa mbobayanda. Ipenzi ndyakuti, mukukosozya kuli boobu, yebo ubamba Saatani kuti ayelane aa Yahuwah, eeco citali boobo.
Saatani ncibeela ca zilengwa Leza zyokwa Yahuwah, mbweenya mbuli nduwe andime mbotubede. Kweelede kuba buyo omwe uulaa lwaanguluko lumaninide lwa kusala mbuli mbocimukkomanisya Mwini; kunze lya boobo, yebo inga walangila biyo kupyopyongana—yebo toninga bwene kupyopyongana kwini. Ikuti Yahuwah kali ngo Leza, ooyo ngonguwe ncobeni, Walo uukonzya kubeleka akusala kweendelanya abubotu Bwakwe bukkwene aluyando. Walo teelede kubaa cimusinkila.
Ooyu mubuzyo uuyasa mumoyo wakuti: Hena Yahuwah ulakonzya kuba Leza, mpoonya hena yebo ulacikkomanina eeco na?
Aawa kuli penzi liliko. Eelyo notulanganya zintu mbuli Ezekiya naambilwa kuli Yahuwah kuti teelede koomoka caantangalala, eeco cimvwikaanga nkubaa lunya, kutaloma, kubula luyando, cakuti moyo ulawizuka kucimwa akuzangila Yahuwah. Ciyubununa kubula lusyomo mu bubotu Bwakwe.
Langa lino Paulu mbwaingula cintu eeci. Walo ulakazya kaimvwi kulubazu lwa malengelo.
Pele inzya, O muntu, nduweni yebo ootongookela Yahuwah? Hena icintu cibumbidwe inga caambila yooyo waacibumba kuti, “Nkaambo nzi ncookandibumba boobu?” 21 Hena mubumbi tajisi nguzu atalaa bulongo na, kuzwa ku mulwi wa bulongo ngweenya kubumba cibumbwa cilaa bulemu alimwi acimbi citakwe bulemu?”
Ooku nkokukazyanya kupati kuzwa ku mwiyi uuluulwa wakaponede. Yebo tojisi busanduluzi butonkomene oobu, yebo ujisi cakukazya comwe buyo: Hena Mulengi takonzyi kucita mbuli mbwayanda a zilengwa Leza Zyakwe na? Ooku nkukazya canguzu. Nkukazya kwa busongo. Nkukazya kutajokolosyegwi. Nguni uunga wakazya kuti mulengi uuli woonse ulaa lwaanguluko lwakucita cili coonse ku zilengwa Leza Zyakwe mbuli mbocimukkomanisya?
Atuye ku mubumbi, katuya? Atweende ku mwaalumi uubumba zintu zyeebeka kuzwa kubulongo. Hena mubumbi tajisi lwaanguluko lwakubikka bulongo atalaa cibumbilo akubumba cili mumizeezo yakwe na, kweendelanya ambuli mbwayanda? Mbwaanga nkakaambo nkeenya aaka mwaapositolo Paulu nkabelesya, atwaambe kuti eelyo mubumbi naamanizya kubumba mupika nokuba nongo ya bulongo akwiibikka ambali anze kuti iyume, mpoonya kakwiina kulangilwa, eeyi nongo yabulongo yakonzya kukanana alimwi yaambaula ncobeni. Ino kuti yaambila mubumbi wayo kuti, “Koswiilila, nkaambo nzi ncootakandibumba kuba nkomeki ya mwami kuleka kundibamba kuba ncemba yakusubila?”
Bamwi benu tamwiizyi kuti ninzi ncemba. Babikka mupika kunsaa bulo wakusubila kuti kabatajisi cimbuzi cakuzyuli. Ooyu muzeezo uusesemya, tee kayi? Eeco ncecakali cimbuzi cakaliko cilikke. Bakali kunga babumba mpoto akwiisyonkela kunsaa bulo.
Ono njeeyi ncemba yakazwaa kubumbwa aa mubumbi, yabweza ciimo ca mulomo akubaa jwi, akwaamba kuti, “Ime ndakaka! Nkaambo nzi webo ncootakandibamba kuba cinywido ceebeka ca mwami eeco mwami ncanga wayandisya kunywida mumo?” Inga wayeeya nzi yebo? Ikuti nicali kukonzyeka, eeco ncotuzyi kale kuti tacikonzyeki, mubumbi ulaa lwaanguluko lwakwiipanga kufumbwa ncayanda. Hena tozumini oobo na?
Pele nongo zilaambaula ncobeni. Hena ulizyi eeco Yahuwah ncaakabambya muntu? Ibulongo bwaanyika. Yebo uli nongo biyo yabulomgo alimwi yaandukide kuyungizya waawo. Yebo uli nongo yaandukide, taali masesya aayo pe. Nguulya mpaakaimvwi, cibumbwa camuntu wa bulongo, caabambwa aa Silutwe Mubumbi, ooyo wakayoyela Muya Wakwe muli Adamu, alimwi Bbaibbele lyaamba kuti muntu, nongo yabulongo, wakali kwaambaula.
Ooyu mukonzyanyo taweeleli. Mbubuti Ime, eenyina ambwebede pele ndecilwi ca kasuko, mbwenga ndalibbakamuna kubaa busongo akulitukumuna nguzu kuti ntalike kukazyanya aa Yahuwah akupunda kufumbwa nceliyandila ndemwini? Ncintu citayeeyeki eeco. Alimwi ooko nkokugola buzangi kwinikwini. Yahuwah, mbuli mubumbi wako, ulaa lwaanguluko lwakucita kuli nduwe kufumbwa Walo ncayanda. Ikuti yebo waamba kuti eeco cimvwikaanga nkubula coolwe alimwi nkuyandisya citakondelezyi, yebo toyandi Leza wamusyobo ooyo. Leka nkwaambile makanaa Mulengi Yahuwah ooyu—Mubotu alimwi kufumbwa ncacita ncibotu. Yebo ulakonzya kumusyoma ncobeni Walo.
Eeco cindeeta ku cibalo cabili ncotweelede kubweza kuzwa mu Cizuminano Cipya akucileta kuli Ezekiya 24.
II. Ime Ndakaulwa a Muulo Uutapimiki
Ime ndiyanda kukwaambila mbwali mubotu Leza wako. Mubotu buti ooyu Yahuwah waangulukide kucita kufumbwa cimukkomanisya Walo? Hena ulakonzya kusyomwa na? Paulu waamba kuti ulakonzya kusyomwa Walo.
“Saa webo tozyi kuti mubili wako ndi tempele lya Muya Uusalala ooyo uukkala muli nduwe, ooyo ngojisi kuzwa kuli Yahuwah, webo toli lwako olikke? 20 Nkaambo wakaulwa muulo; nkabela kopa bulemu kuli Yahuwah mumubili amumuuya wako, eezyo nzyookwa Yahuwah.” (1 Bakolinto 6:19-20)
Mubili wako, muzimo, amuntu woonse mbwazulwa tuuli wako pe. Yebo wakaulwa. Mbweenya mbuli bamwi mbobaula cintu mpoonya balaa lwaanguluko ku cintu eeco, awalo ulaa lwaanguluko lwakucita ku cintu Cakwe ncaakaula mbuli mbwayanda.
Nkaambo nzi Yahuwah ncanga waula nduwe? Kalikke kaambo komwe biyo nkakuti Walo ulakuyanda. Mubotu buti ooyu Leza, uumaninide kwaanguluka kucita Walo kufumbwa cimukkomanisya? Walo ulakuyanda cakuti, alimwi mubotu cakuti Walo inga watumina Mwanaakwe kuti azyoo fwe. Yebo wakaulwa a muulo. Muulo nzi ooyo? Mbulowa butakonzyi kusofwaala bwa Yahushua Messiah. Tabukonzyi kusofwaazyigwa. Bulasalala, bulisetekene, alimwi wakaulwa kubelesya bulowa oobo.
Eeci ncintu ciyumu kumvwisyisya. Nciyumu kumvwisyisya kwiinda lwaanguluko lwa kusala lwa Yahuwah. Ime nsyekwe kaambo a Yahuwah, mbwali Mulengi, kacita kufumbwa ncayanda kucita ku cintu cili coonse Walo ncabamba. Ino nkaambo nzi Walo, ncanga wapeda Mwanaakwe kuti afwide nongo zya bulongo zitakwe mpindu boobu?
Yebo wakaulwa. Eeco caambilizya kuti Leza Uulilela uulaa lwaanguluko lumaninide ulakonzya kucita kufumbwa Walo ncayanda kuli nduwe. Yebo wakazuminwa kumakani aaya. Nje milazyo ya kulilela mumaanza aakwe. Njenzila ya kuzyalululwa abuumi bupya antoomwe muli Yahuwah—kumulemeka. Ime nsyeli wangu ndemwini, Ndakaulwa amuulo. Buumi bwangu tabuli bwangu kusala ndemwini pe, Ime ndakaulwa amuulo. Ime ndili waano kuti ndibelesyegwe aa Nguwe mu milimo njetakonzyi kumvwisyisya. Cili kabotu eeco nkaambo Ime nsyebulide kumuvwisyisya nkaambo Ime ndizyi kuti Walo ulandiyanda.
Swiilila. Ime inga nkesesemya akweelela kuya ku mulilo uutamani, pele kumeso ookwa Yahuwah, ndi cintu cilaa mpindu. Ime ndaa mpindu imwi kuli Leza wangu. Ndaa mpindu iili buti? Ndaa mpindu iili mbwiibede. Ndilaa mpindu kwiinda mbotunga twateelela. Walo takulangi aanga uli cinzuma cizwide zisesemyo. Walo nakulanga ubona Mwanaakwe ooyo ngwakkomanina. “Ooyu ngo Mwanaangu muyandwa ooyo ngwakkomanina kapati.”
Kuli ziindi zimwi mbuli mwanaa Yahuwah neyeeya kuti, “Pe ma takonzyi kundaamba boobo.” Pele lufutuko Lwakwe lulaandeene cakuti ulakonzya kucita boobo.
Mbube atuleke makani aaya mu cibalo. Tulijisi Leza uukonzya kucita kuli Ezekiya a mukaintu wakwe kufumbwa ncayanda kucita , alimwi akwiindilizya waawo, Ezekiya ngumwi wa baabo bakanununwa aabulowa. Walo ncibeela cabo. Walo ulakonzya kucita kuli Ezekiya ncayanda kucita, alimwi eeco Walo ncayanda kucita nceciinda kubota kuli Ezekiya alimwi akumusanganya mu makanze Aakwe aateeli.
Leka ndikubuzye mubuzyo. Toonse tulayanda kukkala buumi bwakulikwaya, buubauba, alimwi bukondelezya. Tulayanda zintu ziinda kubota, pele ino ninzi ciinda kubota? Kubaa zintu ziinda kubota naa kulikotamika kuli Yahuwah, nguni uucita kabotu zintu zyoonse? Kuba mucibeela ca makanze aateeli, Walo ngaakabamba kataninga lenga. Hena ulayanda kuti buumi bwako abwalo bubaa mpindu na? Kunyina cinkonzya kubamba buumi bwako kuti bubaa mulimo kwiinda kuteelela akukamantana aa Taata a makanze Aakwe ku buumi bwako.
Acimwi cibalo.
III. Kukkwaninina kwa Luzyalo lwa Yahuwah
Ninzi ncenga ndabweza kuzwa mukampango aaka akucibelesya mbuli cakubonya kabotu muli Ezekiya? Kukkwaninina kwa luzyalo lwa Yahuwah.
“Lino nkaambo kaziyubunuzyo zipati zigambya nzindakayubunwidwa, kuti nkasigwe kulisumpula cakwiindilizya, ndakapegwa cisongozyo ciyasa mubili wangu, mutumwa wa-Saatani wakundidinkaula, kuti ntakaindilizyi kulisumpula. 8 Nkabela ndakakumbila ziindi zyotatwe ku-Mwami Yahuwah nkaambo kacintu eci, kuti cindizwide, 9 pele wakandaambila kuti, Lulakuzulila luzyalo lwangu, nkaambo inguzu zyangu zilaswiililika loko mukati kabukompami. Aboobo ndalikankaizizya makompami aangu cakukondwa, kuti inguzu zya-Kristo zindipopele. 10 Akaambo kaako makompami azyuumo amapakasyo amapenzi amamanikizi, ezi zyoonse buyo ndazibotelwa nkaambo ka-Kristo, ikuti ciindi ncinkompeme nciconya nciindi ca singuzu.” (2 Bakolinto 12:7-10)
“Luzyalo lwangu lulakuzulila muli nduwe.” Yebo tokonzyi kubala Ezekiya 24 kakwiina kampango aaka. Yebo weelede kumvwisyisya akusyoma kuti kufumbwa Yahuwah ncabuzya, nokuba basaante aabo ba Cizuminano Cakale, naba Ezekiya kuti asweekelwe mukaakwe, Yahuwah upa cintu ciyandika kutegwa cikkalilile akumupa bulemu Walo. Luzyalo lwa Yahuwah lulikkwaninide kuli nduwe.
Hena ulizyi kuti luzyalo lwa Yahuwah ninzi? Kanjaanji, alimwi ndalubizya kuyeeya, iswe tuyeeyela luzyalo lwa Yahuwah kubee ncakusungilizya naa ninguzu eezyo nzyatupa Yahuwah. Pele tabusyi mbocibede oobo pe. Zibeleka aanga ncikulwaizyo pele kutali cikulwaizyo, nguzu, nokuba citakwe muya. Ninzi luzyalo? Ngu Yahuwah Lwakwe.
Mulimo wa Yahuwah mukati ka nduwe, ncecikupa kuyandisya anguzu zya kucita ceeco webo lwako ncotakonzyi kulicitila. Ndoluzyalo lwa Yahuwah mbolubede. Ngu Yahuwah uubeleka muli nduwe. Mbuli bwakaamba Paulu, “Kusikila ku magolelo aaya Ambeyo ndabeleka, nkekakatila kweendelanya amulimo Wakwe ooyo uubeleka milimo muli ndime canguzu” (Bakolose 1:29). Mbolubede luzyalo oobo. Luzyalo ngu Yahuwah uuya kukubeleka muli nduwe kulenga kuyandisya a kukupa nguzu zya kucita mbuli mbwayanda Walo, eeco ncotakonzyi kulicitila yebo lwako omwini .
Eelyo Walo naamba kuti, “Luzyalo Lwangu lulikkwaninide,” Walo waamba kuti, “Ime ndikkwanide. Ime Ndendime Yooyo Uukkwaninide, alimwi ndakonzya kubeleka muli nduwe akukupa kuyandisya anguzu zya kucita zintu eezyo zilibonya aanga zilakatazya kapati. Ime ndinooliko alimwi ndinooliko munzila yakuti Ime ndinoobeleka cakuti webo unoojatene mujanza a Ndime, alimwi webo unookkomene nkaambo kakubula nguzu kwako.”
Ikuti swebo twamvwisya kampango aaka, iswe nitwali kunga twaimikila akoompolwesya majwi katuti, “Ndime aano, kocita kufumbwa ncoyanda ali ndime. INZYA! Nkaambo mulimo Wako mu buumi bwangu ulikkwaninide.”
Nobalongwema, kunooli ziindi nolimvwide mbuli Ezekiya mu buumi bwako, alimwi zyoonse ziiyo zyabuleza zya zyakupelengusya tazikonzyi kukugwasya. “Inzya, Yahuwah ulalilela,” alimwi “Zintu zyoonse zibelekela antoomwe kucita cibotu kuli baabo bamuyanda Yahuwah. Kuli baabo baitidwe kweendelanya a makanze Aakwe” ziyokuubauba mbuli meenda aakunkulika kusyule lya dada. Taakwe ciyoobatyompokezya nokuba kabamvwide cicisa.
Pele kuti wabweza tusimpe totatwe ootu—lwaanguluko lumaninide lwa Yahuwah Uulilela; kuti yebo wakaulwa amuulo uutasofwaazyigwi, uutapimiki; akuti luzyalo lwa Yahuwah lulikkwaninide kuli nduwe—yebo ulakonzya kulanduka muziindi eezyo nolimvwide mbuli Ezekiya. Eelyo Yahuwah nacita zintu zyeenzu mu buumi bwako zitaboneki kuba kabotu alimwi eelyo Walo nalibonya aanga uli zyuulunzuma zinjaanji zya bamaile kulaale anduwe, yebo ulakonzya kuyuma nta mbuli bbwe akuzumanana. Tacaambilizyi kuti yebo totilimuki mumoyo wako pe. Tacaambilizyi kuti lusyomo lwako zimwi ziindi talweenzuki. Pele yebo ulanjila ciindi eeco kosyomede kuti Yahuwah ulaa lwaanguluko lwakucita kuli nduwe kufumbwa Walo ncayanda. Alimwi kuyungizya waawo, kuleka biyo kuti yebo uli cilengwa leza Cakwe pele nkaambo kakuti Walo wakakuula abulowa bwa Mwanaakwe, alimwi Walo wakasyomezya kulyaangulula Lwakwe muli nduwe mbuli luzyalo lubeleka mulimo Wakwe muli nduwe, kukupa ncoyandisya anguzu zya kucita ceeco webo lwako omwini ncotakonzyi kulicitila—kuyandisya Kwakwe kubotu.
Mbombuboobo Ezekiya mbwaakakonzya kulanduka muciindi cakwe eeco, alimwi mbobubo ayebo mboyookonzya kwiinda muziindi zyako nolimvwide mbuli Ezekiya akuzikkomanina. Akube boobo.
Eeci ncibalo citali ca-WLC cakalembwa aaba S. Michael Durham.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
