Cikwati cakali cipego cibotu ciinda zyoonse cakapegwa mukowa bantu mumvwiki ya Malengelo. Naakamanizya kulenga nyika iisumbwide, iijisi kufumbwa cintu cikonzya kupa buumi bubotu, akukkomanisya myoyo amizeezo yabantu, mpoonya, Yahuwah wakati, “Tacili cibotu kuti muntu akkale alikke; Ndamubambila wakumugwasya uumweelela.” (Matalikilo 2:18, NKJV)
Kubaa cilongwe caamoyo antoomwe amuntu ooyo waambwa kuti “uli mafuwa aamafuwa aangu, alimwi uli nyama ya mubili wangu”1 eeco ncipego ciindene kumukowa wabantu. Tiicakapegwa ku bangele nokuba mikowa imwi yatakanjila mucinyonyoono. Cakapedwa buyo twaambo tobile: 1) kuleleka mukowa wabantu kwiinda mukubumba muntu mucinkonzya ca mulengi; 2) kuyubunwida zilengwe zyoonse ciimo cokwa Yahuwah caluyando.
Ootu notwaambo twini Yahuwah ncaakalengela zibeela zyobile zibamba mukowa omwe wabantu. Boonse bobile, mwaalumi amukaintu, bakalengwa mucinkonzya cokwa Elohimu: “Aboobo . . . [Elohimu] wakalenga muntu mucinkonzya cakwe mwini, mucinkonzya ca . . . [Elohimu] wakamulenga muntu; mwanalumi a mwanakazi wakamulenga.” (Matalikilo 1:27, KJV)
Kuswaanganya antoomwe mwaalumi amukaintu ciyubununa zibeela zya ciimo cokwa Yahuwah eezyo zitakonzyi kuteelelwa munzila imwi. “Nkaambo kaako mwanalumi uyoosiya wisi abanyina, akusangana ku mukaintu wakwe, alimwi balo bobile bayooba mubili omwe.” (BaEfeso 5:31)
Cikwati cabantu bobile balyaabide kulemekezya Mulengi wabo, mbumboni bulaa nguzu kapati munyika yoonse. Zikwati zyeendelezyegwa a Mwami Yahuwah zilamulemekezya Elohimu akuleleka bamwi. Saatani ulizyi makani aaya alimwi wakagaminina kupalanganya zikwati zyabantu acikwati cini kucigaminina mbocibede kuti mulimo wabulemu.
Kuli twaambo tunjaanji bantu ntobapeda kukwatana. Atwalo ooto twaambo tuliindene mbweenya mbobayindene bantu. Tumwi twaambo twakuyandana: Ooyu nkalungu kangu kaamoyo. Ime tulayandana anguwe. Tumwi twaambo tulaa makanze aabuntu: Cikwati ciyoondipa bukwabilizi. Ooyu nguundipa nzyeyanda zibotu. Zimwi ziindi kutonkaikwa mumukowa mokkede inga cakusungilizya kuti ukwate: Ime ndimitide. Ndakomena, ndiyaa kucembaala; kuti nditakwatwi iino kunyina pe nenjookwatwa.
Cikwati cako cinooli ciyumu nta mbweenya buyo mbuli kaambo nkookataanguna kukwatila
Aboobo citobela ncakuti, “kaambo keni nkokwatila nkakasungila bweende bwacikwati cako.”2
Mbuli kaambo nkookakwatila mbokabede kubaa maanu, acalo cikwati cako mbocinoobede kuyuma alimwi akuyungizya kukkomana webo nkoyoojana kuzwa muli ncico. Mbweenya buyo kujanza limwi, kaambo nkookatwatila mbokatakwe maanu, mbweenya acalo cikwati mbocinoobede kubula lukondo, alimwi mukuya kwaciindi, akulekana. Kutegwa kube cikwati cikkalilila akuleleka boonse bali mucikwati eeco, yebo weelede kubaa kaambo kabotu kakukwatila. Mangwalo ayiisya kuti alikke Yahuwah ngo “mubotu.” Aboobo, kufumbwa cintu cibotu ceelede kweendelana a Mwami Yahuwah.
Kalikke kaambo “kabotu” kakukwatanina nkakuti, aabo bantu bayanda kukwatana bobile basyoma kuti ooko nkuyanda kwa Mwami Yahuwah mumaumi aabo. Eeci tacaambilizyi kuti inga wakwata kufumbwa muntu ngoyanda mpoonya wakumbila Mwami Yahuwah kuti aleleke kusala kwako. Eeci ciiminina kulyaaba ku Mulengi wako abe nguuzumizya akweendelezya muntu ngosala wakweebana limwi.
Syoma Mwami Yahuwah amoyo wako woonse utaccilili maanu aako omwini, koyeeya Mwami Yahuwah mumilimo yako yoonse eelyo uyookululamikila nzila zyako. Utalipi kasongo-songo lwako omwini lemeka Mwami Yahuwah, uleke zibi. Wacita boobo unoopona kabotu, mubili wako unoolimvwide. (Tusimpi 3:5-8.)
Makanze eeni aakusangana antoomwe mucikwati ngakuti, bantu bobile baboole antoomwe akuba “mubili omwe”. Nokuba kuti muzeezo wako mutaanzi wakukwata tiiwakali muzeezo mubotu, ulakonzya kukomena mumizeezo kwiinda waawo, kolaa zileleko zyokwa Yahuwah, akusimpa cikwati cako munyika iitazungaani. Eelyo nyobile nomuyaa kupangana kuti mukaabe cikwati cenu kuli Yahuwah, Walo uyooleleka makanze eenu alimwi kuswaangana kwenu inga kwapa bulemu kuli Nguwe.
Mulazyo uusimpa cikwati uyeeme mumajwi aakuti: “ Nkaambo kaako mwanalumi uyoosiya wisi abanyina, akusangana ku mukaintu wakwe, alimwi balo bobile bayooba mubili omwe.” (Matalikilo 2:24, NKJV) Banabukwetene balaa lukondo mucikwati kweendelanya mbuli mbobaswaangene kuba “mubili omwe” mucileleko cokwa Yahuwah. Mbweenya buyo, kucisa moyo akutakkomana kuli mucikwati kuleelene a kwiimpana kuli mucikwati eeco.
Saatani uluuzyi kabotu mulazyo ooyu alimwi wakasolekesya kugwalanganya kukkomana kwa buleya kwiinda mukusolweda banabukwetene kuti babe “bomwe” munzila zitaleteli buumi bubotu nokuba nzila zileta kutundulula bamwi. Gregory L. Jackson wakavwuntauzya makani manjaanji mucintu ciiminina cikwati mumilazyo ya Bbaibbele. Buvwuntauzi bwakwe buyubununa nzila zyotatwe zibelesyegwa kanjaanji abanabukwetene kuti babe “bomwe.” Inzila zinjaanji zilaa nguzu zipati nokuba nguzu zisyoonto, pele kunyina akataa nzila eezyo iikkomanisya pe. Ilikke nzila yane, njeyeendelana amilazyo yabulemu bwa kujulu akusolweda kukukkomana kwamasimpe kukkalilila.
Ncintu ciyandika kapati kuzyiba akumvwisyisya nzila eezyi, nkaambo yebo nosoleka kuba “omwe” amukaako, ulakonzya kuyaka nokuba kudilimuna cikwati cako. Kuti nzila iiluleme yabelesyegwa, yebo amukaako inga mwayumya kukamantana akuswaangana antoomwe. Pele kuti nzila iilubide yabelesyegwa, yebo amukaako inga mwaimpana akwaandaana kamuyaa kuya kulaale kusikila cikwati cawubuka akubula nguzu.
Jackson ulandabika nzila zyotatwe zitaluleme eezyo nzyobabelesya banabukwetene kuti babe “bomwe” kwiinda mukubelesya nsaamuzi zyotatwe zyakujana namba yomwe. Eezi nzila nzya: kusanganya, kugwisyila a kunjizya mukati.
Nzila ya Kusanganya
Nkaambo kakuti muntu takonzyi kulembwa kuti 0 naa kunyina muntu, eeyi nzila ibelesya zisela zya namba kusanganya antoomwe akujana namba yomwe: ½ + ½ = 1. Eeyi njenzila iibelesyegwa kapati abantu bayeeyela kuti tabakkwene mubuumi bwabo pele buyo kuti muntu umwi wasangana ambabo mubuumi bwabo. 
Balo basyoma kuti kutegwa bakkwanine kuyandwa akuzulila kukkomana mubuumi bwabo, beelede kubaa muyandwa wabuumi boonse. (Nokuba kuti ooku nkokusyoma kwabo, pele kusimpidwe atalaa musemo waandaukide, nkaambo Mwami Yahuwah alikke nguukonzya kuzuzya muya wamuntu uulendeledwe uulangila kuyandwa.)
Aabo babelesya nzila ya kusanganya eeyi, mbantu balaa luyando bavwuzya kwaamba zintu mbuli zyakuti: Mbuti mbwenga ndapona kakwiina nduwe? Yebo nduwe oondikkwanya. Ime nsyezyi ncenga ndacita kuti kotako Yebo. Yebo nduwe zintu zyangu zyoonse. Nokuba kuti aaya majwi amvwikaanga “nduyando lwamasimpe,” pele alalezya kuzuzika kuba “bomwe” kwamasimpe ooko Bbaibbele nkolyaamba kuti nkokuyandisya kwa moyo wabuntu – alimwi Yahuwah nkokuyandisya kwa bana Bakwe.
Jackson upa twaambo totatwe eeyi nzila yakusanganya nciitakonzyi kuleta banabukwetene antoomwe kuti beendelane mbuli mubili omwe:
Kutaanguna, kusanganya ninzila iiyeeme kucintu citaluleme kutegwa ulimvwe kukkwana akuzuzyigwa. Ijwi lyokwa . . . [Yahuwah] lyaamba kuti:
Amucenjele kuti kutabi naba omwe uunyonyoona lusyomo lwanu abusongo bwabuntunsi buli mbwalucengo buyo. Kayi eezyi zyizwa kutunsiya-nsiya twabakaindi akumizeezo yabuntunsi buyo, kutali kuli [Yahushua] pe. Nkaambo mulinguwe buleza boonse bulikkede mumubili wakwe. Nkabela muli [Yahushua] anywebo mulijisi buumi buzwide. Yahushua nguuyinda mami amalelo woonse. (Bakolose 2:8-10)
Inzila yakusanganya ilatupoizya nkaambo ituyiisya kuti muntu weelede kuyaamina kumuntu wanyama umwi kuleka . . . Mufutuli [Yahushua] kutegwa alimvwe kukkuta akuzula mumoyo wakwe.
Cabili ncakuti, inzila yakusanga isungilizya kuti muntu abaa muzeezo uutaluleme mukaambo keni kakukwatana . . . . makanze ookwa [Yahuwah] mu cikwati akali aakuyaka cinkonzya aciimo Cakwe muli ndiswe. Aabo batobela nzila yakusanganya eeyi, kaambo keni nkobakwatanina nkakujana wakubakasaazya akubakkutya akubazuzya mumoyo.
Catatu ncakuti, eeyi nzila ibelesya musyobo waluyando lutaluleme kulanganya mukaako. Aabo babelesya nzila eeyi balalangana munzila yabusyaacivwulemwangu, luyando lwabuunyu nkaambo makanze aabo ngakukasaazyigwa buyo akukkutya busa bwankwela . . . pele luyando lwa [Yahuwah] luyandisya kubikkila maanu kuli umwi, nduyando lwakutaliyanda nkaambo makanze aaluyando oolo nga kubambilila muntu umwi muli ceeco ncabulide.3
Banabukwetene aabo bayakila cikwati cabo munzila yakusanganya bayakila atalaa makanze aakuzuzikwa akukkutya myoyo yabo. Eeci ciletela mapenzi nkaambo mulikke muli Yahuwah muntu mwakonzya kuzuzyigwa akuyandwa cakumaninina. Kulangila muntu ngomukwetene limwi kuti akuzuzye ncobulide, ncintu citaluleme kuyaka cikwati nkaambo cibikkila maanu kumuntu umwi kutali ku Mulengi wako. Luyando lwamusyobo ooyo, ndwakuliyanda, kwiinda kuyanda muntu umwi, mbuli luyando lwa Mwami Yahuwah mbolubede kuti abe omwe antoomwe amuyandwa.
Nzila ya Kugwisyila
Inzila yakugwisyila mukuba bomwe mucikwati, ipa kukkutya muntu kwiinda mukugwisyila namba mpati kuzwa ku namba nsyoonto mbuli boobu: 2 – 1 = 1. Akataa nzila zyotatwe zibelesyegwa kapati, eeyi njenzila iilangilwa kubelesyegwa cabuyamba akunyengelela muntunyoko. Aabo banabukwetene babelesya nzila yakugwisyila, basyoma kuti umwi muntu weelede kwiinda nguzu atalaa muntunyina. Zimwi ziindi banalumi babelesya nzila eeyi kuti badyaaminine ansi bamakaintu babo. Bavwuzya kwaamba kaambyo kakuti “Ime ndime eesama buluke mumukwasyi uuno! Ime ndendime mutwe wa ŋanda iino alimwi yebo weelede kunditeelela 'me!”
Eeyi nzila abalo bamakaintu bakali kwiibelesya mukulilekelela kaambo keni ncobataliyeeyeli mizeezo yabo (akulivwuntawida makani) lwabo. Eelyo mumuni mupya atusimpe tusumpula kuya kumbele notweetwa kumukaintu uuli mucikwati camusyobo ooyo, walo kanjaanji wiingula kuti, “Mulumi wangu nguulaa maanu aakusanyangula zintu mbuli zyeezyo. Ndilindizya buyo nguwe ndimvwe ncatindaambile.”4
Bantu babelesya nzila yakugwisyila balayandisya kudyaaminina bantunyina akubaa nguzu. Abalo aabo balaa ngobakwetene limwi uuli boobo mucikwati balayandisya kulimvwa boobo, ncenciceeco ncobasala kulisanganya amuntu ngobayeeyela kuti ulaa nguzu; ooyo uukonzya kubakkutya akubayandawida nzyobabulide.
Mbweenya mbuli banabukwetene bazyibide nzila yakusanganya kutegwa bajane wakubakasaazya, abalo banabukwetene babelesya nzila yakugwisyila kutegwa bajane uubakasaazya, bacita cintu eeco mukuyandisya kulimvwa kubaa nguzu abweendelezi kwiinda mumuntu ngobakwetene limwi. Eeyi nzila yakugwisyila ilaalilwa kujata mulimo mbweenya mbuli nzila yakusanganya: iyeeme kumuzeezo uutaluleme wakulangila muntunyina ngobakwetene limwi kuti azuzike ncobabulide kuti balimvwe kubaa nguzu akweendelezya. Nkaambo kakuti ooyu muzeezo mubyaabi wakuyandila kukwatana, luyando lutaluleme lulalibonya muli baabo bakakatila kuba bomwe munzila eeyi.
Nzila ya Kunjizyanya Namba
Inzila yakunjizya namba ambweni njenzila iilaa mpuwo iibelesyegwa abakubusi mazubaano. Akataa nzila zyotatwe eezi, eeyi njeyiinda kubota, nokuba boobo, mbuli mbotibone, ayalo tayeeleli pe.
Inzila yakusanganya ijana namba 1 kwiinda mukusanganya zisela zyobile zitakkwene; inzila yakugwisyila ijana namba 1 kwiinda mukugwsyilila namba nsyoonto kuzwa munamba mpati, pele nzila yakunjizyanya namba iyiisya kunjizya namba yeelene anjiyo mpoonya bwiinguzi lyoonse bweelede kuba namba yomwe, 1. Ngooyu mukonzyanyo, 4 ÷ 4 = 1. 
Banabukwetene babelesya nzila yakunjizyanya namba basyoma kuti cikwati ceelede kuba kuswaanganya bantu bobile beelene. Balo tabayandi kunjila cikwati kutegwa balimvwe kuzulila nokuba kulimvwa kubaa nguzu zyabweendelezi pe. Mbantu balimvwide kale bajisi kufumbwa ncobayanda alimwi balimvwa kabotu. Balo tabakaki muzeezo wa cikwati, pele balimvwa kuti balakonzya kupona akukkomana kakwiina cikwati. Muzeezo wacikwati ulabanyomenezya eelyo nuubaletela nzila yakuti babe beelene amuntunyina uujisi kale buvwubi alwiiyo mbuli mbabo (Bamwi balayungizya amizeezo yabupaizi aawa). Balo basyoma kuti nzila yiinda kubota yakujana namba 1, njakuswaanganya bantu bobile beelene kutegwa namba iijanwa yakubaswaanganya antoomwe lyoonse kiili yomwe.5
Nokuba kuti nzila yakunjizyanya namba inga kiili mbotu kwiinda zyoonse zyakujanya cikwati ceebeka, icilezya kululama ayalo nkaambo katwaambo totatwe mbweenya mbuli nzila zyobile zitaanzi: ilangila kubusena butaluleme, kumuntunyina kutegwa ooyo muntu alimvwe kweelana mbuli umwi, aboobo tiili kaambo kaluleme kakukwatana, alimwi nkaambo kaako, oolo nduyando lutaluleme lutondezyegwa mucikwati eeco.
Nzila yiinda Kubota
Inzila yiinda kubota yakujana lukamantano luyandisyigwa mucikwati, njakubelesya nsaamuzi yakusanganya namba zyobile cakuti zyoonse zyobile zyakomena. Mucikwati citalikwa munzila eeyo, mbweenya mbuli mu nsaamuzi, namba zyobile zilasangana akukomezyana akugwasyililana kuti zibe namba mpati yomwe.
Kusanganya: ½ + ½ = 1
Kugwisyila: 2 – 1 = 1
Kunjizyanya: 2 ÷ 2 = 1
[Mu] nsaamuzi zyakukomezya namba, namba yomwe ilakomezyegwa ziindi zyobile. Munzila zimwi zyoonse namba yomwe ilacesyegwa nokuba kwiindululwa anamba njobeendelana limwi , pele mu nsaamuzi zyakukomezya namba, namba yomwe ilakomezyegwa anamba eeyo iisanganyigwa kuli njiyo. 
Tiikomezyegwi mweelwe wanjiyo, pele nguzu zyanamba eeyo zilakomena. Kuti walanga namba eeyo ubona buyo namba yomwe 1, pele nguzu zyanamba eeyo zimvwika kuti ninguzu zyanamba zyobile. Nzila yokwa [Yahuwah] yakuba bomwe njakusanganya bantu bobile beelene kuti babe muntu omwe akwiindila kubaa nguzu. Balaingaila kweendeenda mubuumi bwabo boonse kabali bomwe, pele nguzu nzyobajisi mubuumi nzyabantu bobile. Eelyo bantu bobile nobeendelana akuba bomwe mbweenya mbuli [Yahuwah] mbwaakakanzide, abwalo buumi inga tabucili mbweenya pe, inga bwaindila kubota.
Kutegwa eeyi nzila yakukomezya namba ibeleke, banabukwetene beelede kuba bazwide kabataninga kuba bomwe. Balo tabakonzyi kunjila cilongwe kutegwa batambule; banjila cilongwe kutegwa baabile bamwi. Omwe-omwe wabo weelede kuleta zipego anguzu zyaandeene mu cikwati. Omwe-omwe weelede kubonesya, kukkomanina, akulyaaba zipego anguzu zyakwe kuli umwi. Alimwi omwe-omwe weelede kuliyandila kupa zipego anguzu kucikwati nokuba kuti zyayuma zyitete buti zintu, bacinoolisungwide kukkala antoomwe.
Aabo babelesya nzila yakusanganya balaalilwa kusika aciimo cokwa [Yahuwah]cakuba omwe nkaambo bageme kuyandisya kutambula kwiinda kwaabila. Nokuba kuti balapa, eeci bacicitila buyo kutegwa batambule alimwi. Aabo batobela nzila yakugwisyila balaalwilwa kusikila aciimo cakuba omwe cokwa [Yahuwah] nkaambo balo tabaibaluki, tabakkomanini, alimwi tabalyaabi zipego anguzu zyabo kuli umwi pe. Aabo batobela nzila yakunjizyanya balaalilwa kusika aciimo cakuba bomwe cokwa [Yahuwah] nkaambo tabayandide kwaaba nguzu zyabo azipego zyabo munzila yabwaabi. Inzila ya namba zikomezyanya njenzila ilikke iiletela zyoonse zikondelezya kutegwa bakwetene babe bomwe munzila eeyo [Yahuwah] njaakali kuyanda. Eeyo nzila ilakkwanya ciimo eeco nkaambo ilikke njenzila yeelela makanze ookwa [Yahuwah] mu cikwati.6
Kampango ka Bbaibbele kainduluka kwaamba mukugwasyilila nzila iitaluleme yakuba bomwe nkakuti: “Nobamakaintu, amulibatamike kubanalumi benu.” (BaEfeso 5:22) Bamwi bantu basyoma kuti, ikuti mulumi kayanda mukaintu wakwe kuti acite cintu citaluleme mumulawo nokuba mubupaizi, walo weelede kuteelela alimwi mulumi wakwe nguula mulandu wacinyonyoono eeco.
Aaka kampango kalabelesyegwa kapati akataa banabukwetene aabo babelesya nzila yakugwisyila ayakusanganya kuti bajane mbobanga baba bomwe mucikwati. Aabo babelesya nzila yakunjizyanya namba, mubwini bakaka kampango aaka kuti muzeezo buyo ookwa Paulu uuyeeme kumazuba aayo ngaakali kupona naakalemba muzeezo ooyu. Nokuba boobo, inzila iini aaka kampango mbokasandululwa tiiyendelani amakani aali mukampango aaka pe. Aboobo, takeelede kusulaikwa nkaambo buyo kakwaalilwa kusandulula kabotu.
Kweezyeezya kumwi nkwakuti Mangwalo alailila bamakaintu “kulibatamika” ku balumi babo, akulaya banalumi kuti “bayande” bakamaintu babo. Ooku kuteelanya zintu kwakajulila mulyango wakuumputana akucimwana. Bamakaintu basyoma kuti banalumi babo beelede kubayanda, aboobo baliminidwe mukuli wakuyeeya kuti bacita cinyonyoono eelyo nobakaka “kulibatamika” pele coonse balumi ncobeelede kucita “nkuyanda” buyo.
Kuteelela kampango kululeme kukonzya buyo kujanwa kuti kwabelesyegwa nzila yakukomezya namba kuti zyibe namba yomwe. Ooto tumpango tobile tuletela kuzingwa mizeezo ntwakuti:
Nobamakaintu, amulibatamike kubanalumi benu, mbuli kuli Yahuwah.
Nobaalumi, amuyande bamakaintu benu, mbweenya mbuli Yahushua mbwaakayanda ekklesia akulyaaba Lwakwe kuli nguwe. (Bala BaEfeso 5:22 a 25.)
Bamakaintu beelede kulibatamika ku balumi babo mbweenya mbuli ku Mwami Yahuwah. Yahuwah kunyina pe naambila muntu naba omwe kuti acite cintu cisofweede mumulawo nokuba mubupaizi. 
Mubwini, Yahuwah kunyina pe nasinikizya muntu kuti acite nociba buti katayandide lwakwe pe. Alimwi eeco nceciyubunudwe mumalailile ku banalumi kuti: amubayande bamakaintu benu mbweenya Yahushua mbwaakayanda cikombelo ca Ekklesia akufwida ncico! Aawa bamakaintu banji inga baingana kuvwakkamuka akulijata mukasolo kumwi kabati, “Mulumaangu ulandiyandisya cakuti inga wasala kuti andifwide!” Mukaintu uuli woonse uyandisya kusyoma kuti mulumaakwe mbwabede ncobeni oobo. Pele eeco tacili ncokaamba kampango aako pe.
Yahuwah usyomezya lwaanguluko lwa kusala kuli boonse. Eelyo Adamu a Eva nibakacita cinyonyoono, ziimo zyabo zyakali mbuli ciimo cokwa Yahuwah, zyakabwaya akunjila ntenda ya Saatani. Adamu a Eva abalunyungu lwabo boonse nibakacaala kabali bazike bokwa Saatani – KUTI Yahuwah naatakasungula Mwanaakwe kufwida babisyi akubapa ciindi cabili cakuti basale.
Bikkila maanu aawa: lufu lwa Yahushua aciciingano tiilwakasinikizya muntu naba omwe kuti akavwunwe katayandide. Lufu lwa Yahushua lwakaangulula bantu boonse kutegwa balisalile ooyo ngobayanda kubelekela: Yahuwah naa Saatani. Mumajwi amwi ooku nkwaamba kuti, inzila eeyo Yahushua njaakayanda ekklesia yakali yakusyomya nguwe lwaanguluko lwa kulisalila – nokuba kuti oolo lwaanguluko lwakulisalila lwakapa bantu kuti bamukake alimwi.
Mwanalumi uuyanda mukaakwe mbweenya mbuli Yahushua mbwaakayanda ekklesia, kunyina nanga wasinikizya mukaakwe kucita cintu cimwi ncatayandi kucita walo. Kuti walo kamuyanda ncobeni mukaintu wakwe mbweenya mbuli Mufutuli Yahushua mbwaakayanda ekklesia, walo inga kayandide kufwa kutegwa avwune lwaanguluko lwa mukaintu wakwe – nokuba kuti kabatamvwene akusala kwamukaintu wakwe! Ooko nkokuyanda mukaintu wako “mbweenya awalo Yahushua mbwaakayanda ekklesia akulyaaba Lwakwe mucibaka cakwe.”
Munzila yakukomezya namba kuti babe bomwe, cilainda kubula ntenda kuti bamakaintu “balibatamika” ku banalumi babo, akubabambilila kubapa luyando mbuli mafuta aankuku, kubapa luyando ooli luzyila mumoyo wa Mulengi.
Mbweenya buyo, luyando mbuli luyando luteeli lupati lokwa Yahuwah, lulapegwa kumukaintu eelyo mwanalumi wakwe namuyanda akulipa cakutaliyanda, ndoluyando oolo Mufutuli Yahushua ndwaakatondezya naakaaba buumi Bwakwe kutegwa asyomye lwaanguluko lwakulisalila ku babisyi.
Aabo banabukwetene babelesya nzila yakukomezya namba kuti babe bomwe, batalika kubaa cilongwe ciyumu nta nkaambo kaluyando lokwa Yahuwah. Balo tabasinkilidwe akulimvwa kuti bajane wakubakasaazya, uubakkutya, uulaa nguzu, nokuba weendelezya kabotu nokuba ngobeelene limwi. Cikwati cabo nciyumu nta nkaambo boonse bobile balalyaaba cakutaliyanda kutegwa batondezye bubotu buli muli umwi. Eelyo nobaindizya kutondezya bubotu bwa umwi, balaindila “kuba bomwe” alimwi balaindila kukkomana antoomwe.
Luyando luli boobo nduyumu nkaambo luyeeme muluyando lwa Yahuwah. Luyando lupati luli mukwaabanya, kupa cakutaliyandila akuliluba lwakwe muntu, kuli umwi. Talusinsi cintu kuzwa kuli umwi pe, pele lulayandisya kwaaba zyoonse kutegwa abotelwe umwi mucikwati. Aboobo, akwalo kulibatamika inga kwalibonya kuba cintu cilaa mpindu nkaambo kunoolangilwa mumuni uuzumizya mukaako nokuba mulumi wako kuti abelesye zipego nzyaakapegwa kuli Yahuwah kuti abotesye cikwati, aboobo akukkutya boonse bali mucikwati eeco. Kulibatamika takucesyi muntu pe, nkaambo kuyeeme mukusala. Muntu omwe-omwe ulabotya cikwati kwiinda mukubelesya zipego nzyapedwe. Banabukwetene mbuli “bomwe” balakonzya kukkomanina mulimo wamuntu omwe-omwe mucikwati mpoonya cilongwe cabo antoomwe cilazwidilila.
Kweelede kuteelelwa, nokuba boobo kuti, inzila yiinda kubota ya cikwati, njiyeeyo iikonzya kubeleka lilikke eelyo boonse bobile nobalyaabide omwe-omwe kuli Yahuwah. Lilikke eelyo mwanalumi amukaintu boonse bobile nobalangila Mulengi kubakkwana nzyobabulide, mpoonya boonse bobile eelyo nobayandana aluyando lutaliyandi, luyando lulyaaba lokwa Yahuwah, ndendilyo cikwati nocinga cazwidilila. Eeci cikonzya buyo kucitwa kwiinda kukulyaaba abuzuba kuli Yahuwah; kulazyika ansi zintu nzyoyanda, mizeezo yako ambolimvwide, bulangizi aziloto zyako kuti zyeendelane a Nguwe.
Ooyo muntu uuyandisya kweendelanya cikwati cakwe kunzila yakukomezyanya, pele ooyo ngobakwetene limwi nabelesya zimwi nzila akataa zyotatwe zitaluleme, inga walijana kuti ulidwa masuku amutwe aboobo akutalika kulimvwa aanga wabijilwa. Eeci ncecituzingulula kujokela mpotwatalikila cibalo eeci: alikke muntu weelede kukwata nguyooyo uuzyi kuti nkuyanda kwa Mwami Yahuwah. “Eelyo yebo makanze aako aakukwata naayeeme mumizeezo yako nokuba mbolimvwide, pele kutali mboyandide kusyoma mukuyanda kwa Mwami [Yahuwah] mubuumi bwako, nkabela makanze aako aakulekana inga anoolangilwa kuyakilwa atalaa mizeezo njeenya eeyo.”7
Ilikke nzila iitakwe ntenda kumuntu uuli woonse, uutakwete nokuba uukwetwe, njakuyandisya omwini kutobela kuyanda kwa Mwami Yahuwah mubuumi bwako. Kufumbwa naa uluujisi kulibambila nokuba kuti uciyeeya buyo kukwatana, nokuba kuti uli kale mucikwati cili kabotu nokuba cikwati cikuminya, kuti yebo walyaaba kuyanda kwako kuluyando lwa Mulengi wako, Walo inga wakusolweda munzila zitakwe ntenda.
Syoma Mwami Yahuwah amoyo wako woonse utaccilili maanu aako omwini, koyeeya Mwami Yahuwah mumilimo yako yoonse eelyo uyookululamikila nzila zyako. (Langa Tusimpi 3:5, 6.)
Cisyomyo cokwa Yahuwah kuli nduwe acikwati cako ncakuti:
Nkaambo ndizyi kale makanze ngindakamubambila. Mbwaamba Mwami Yahuwah. Makanze aaluumuno kutali busofwaazi, woonse ayoozwidilila, alimwi nsikooyoomucisa pe. Makanze aapa lulangilo kumazuba aaboola. (Langa Jelemiya 29:11.
1 Matalikilo 2:23
2 Gregory L. Jackson, How Surrender Makes Marriage Happier, Divorce a Blessing, the Single Life Fulfilling, p. 18. Balembi babbuku balemekezya buvwuntauzi bwa ba Jackson. Bunji bwa twaambo tusanganyidwe mucibalo eeci twakazyila mubbuku lyabo.
3 Jackson, pp. 39-40.
4 Ooyu muzeezo ulajatikizya cilongwe cili akataa babelesinyina abalo. Kwiinda kuti balibalile Mangwalo lwabo, bantu banji bayandisya buyo kwiide kutobezya ncobabaambila beembezi babo kuti nkakasimpe, kakwiina kubikkila maanu ku bumboni butondezya kuti cilubide muli ncobabaambila.
5 Jackson, pp. 41-42.
6 Ibid., pp. 43-44.
7 Ibid., p. 18.
