BALEZA BOTATWE: Lweeno lwa Saatani Lumaninide

Mulimo wa mulumbe ooyu uli muzibeela zyobile. Kutaanguna, aabo basyoma "kuba omwe" kwa YAHUWAH, atulangile kuti eeci cilayumyayumya lusyomo lwabo. Cabili, kuli baabo basyoma muli Baleza Botatwe, kuli imwi mibuzyo ilaa busongo. Imwi mibuzyo Ime ndasola kuyiingula, imwi ndiisiya kuti yebo ulizeeze lwako. Kuli bumboni bunjaanji buliko bujatikizya bunji bwa lusyomo lwa "Bunakristu" mu malembe aa misela mbuli ookwa Alexander Hislop aakuti "Two Babylons" amalembe ookwa Will Durant "The Story of Civilization", eeco inga capa kuti muntu umwi ayeeye mbobalanganya Yahuwah a jwi lyakwe lisetekene, iBbaibbele. "Nkaambo Yahuwah tali mulengi wa kupyopyongana, pele ngwa luumuno, mbuli muzikombelo zya basaante zyoonse" (I Bakolinto 14:33). Yahuwah kunyina pe naakabuzya muntu kuti asyome kufumbwa cintu citamvwikisyi kubee uloofweede. Alimwi zintu zisyomwa Baleza botatwe tazimvwikisyi.

Amulangisye kuti Ime ndibelesya bbala lyakuti zisyomwa eelyo liguminizya baleza botatwe muciindi ca kubelesya bbala lyakuti lusyomo. Lusyomo lweelede kuba cintu cimwi eeco cikombelo ncociyiisya cikonzya kubonwa mu mabbuku aa mangwalo. Zisyomwa ndileelyo muntu napunga mulwi wa zintu zyakusyoma kuti eeci cibe lusyomo, kufumbwa naa zilakonzya kubonwa naa pe. Ikuti cintu cimwi kacitakonzyi kujanwa mu Bbaibbele, taceelede kulanganyigwa kuti ndusyomo. Kwiindilizya waawo, kusungilizya bantu kusyoma mu cintu cimwi kubee ndusyomo kakwiina kubonwa, eeco cintu taceendelani a kuyanda kwa YAHUWAH. Pele eeci cinicini ncecaacitika kujatikizya Baleza botatwe.

Kunyina noliba bbala lyakuti baleza botatwe nokuba muzeezo wa cintu eeci mu Bbaibbele pe. Kuba "omwe kwa" YAHUWAH kulisinizyidwe mu mangwalo woonse. "Koteelela O Isilayeli: MWAMI leza wesu MWAMI omwe" (Ciibalusyo 6:4). "Nkaambo kuli Leza omwe, alimwi kuli simwiimaakati ka Yahuwah abantu omwe, muntu ooyo ngu Kilisito Yahushua" (I Timoti 2:5). "Nywebo mulazumina kuti Yahuwah ngumwi buyo, ncibotu. Ayalo myuuya mibi ilazumina oobo akukankama."(Jemusi 2:19). Nguni weendelezya badyaaboli amadaimona? Saatani. Ninzi Yahushua ncaakamba kujatikizya ciimo ca Saatani? "Nywebo muli bana bauso Saatani, aboobo muyandisisya kucita ziyanda nguwe. Walo mujayi kuzwa kumatalikilo. Usulide bwini, nkaambo tajisi bwini mulinguwe. Naamba cakubeja ulilungulula mbwabede mwini, mmubeji, alimwi ngowisi wababeji boonse." (Johane 8:44). Kwakali kubeja kuti nzi kutaanzi kwa Saatani? "Kufwa peepe tamukafwi ncobeni" (Matalikilo 3:4). Kakwiina kuvwelanya cilweela, walo wakayungizya mu cisyoonto 5 kuti, "Inywe muyooba mbuli baleza." Saatani wakajuzya muzeezo wa mubunji naa baleza banjaanji, akataa baabo Baleza botatwe mbabainda kujanwajanwa. Saatani wakapa muntu muzeezo wakulisumpula kuti abe uumbi kunze lya LEZA YAHUWAH. Eelyo boonse nobayeeyela boobu, yebo inga wajana kuli baleza banjaanji (mubunji). "Ncobeni bakalimuzi Yahuwah, nikuba boobo tiibakamulemeka akumulumbaizya, pele bakali kuyeeya buyo zyabuyo, nkabela mudima wakazula mumyoyo yabantu bafuba-fuba aabo." (BaLoma 1:21).

"Inywe muyooba mbuli ba leza" (KN) naa "Inywe muyooba mbuli YAHUWAH" (ESV). Mbuli = Kukonzyanya. Cintu cinjila acibaka naa caatula cintu ca masimpe. "Ime njootanta atalaa bulamfu bwa makumbi; Ime njooba mbuli Singuzuzyoonse" (lzaya 14:14). Saatani wakeena muntu kuti abe muzike wa manjezyeezya aakwe. "Bakasiya zyabwini zya Leza akutobela zyabuyo. Balalemeka akubelekela zilengwe mubusena bwakulemeka akubelekela Mulengi walo ngotweelede kulemeka lyoonse. Akube boobo." (BaLoma 1:25). Kufumbwa kupindula sikale, cinyama, nokuba kukomba zilengwa leza eeco mukonzyanyo waceeco Paulu ncaakali kwaamba. Tacigambyi kuti manjezyeezya aamuntu akalengelezya baleza banjaanji mu kuzangila Yahuwah LEZA. “Basikale besu taakwe ncobakajisi ccita baleza bakubeja, mituni yabuyo eeyo yatakabacitila zibotu pe. Sena bantu balakonzya kulipangila baleza babo beni? Iiyi, pele tabali baleza beni pe!?"(Jelemiya 16:19b-20).

Kwiinda mu kukwelelezyegwa aa Saatani, muntu wakatalika kupanga baleza balweeno akubamba bupaizi bwa kugwasyilila baleza aabo. Inzila ntaanzi yakali mu Bbabbuloni wansiku. Mubbuku lisandululla mabala lyaba [Strong], kuli twaambo tobile tubelesyedwe kupandulula Bbabbuloni: kupyopyongana [BaHebulayo.8:94] alimwi kwiinda mu nzila ya kudyaaminina [Gr.897]. Nimrod wakatalisya munzi wa Bbabbuloni. "Alimwi walo

wakali muvwimi mupati kwiinda munyika yoonse wakalitukumuna kumbelaa MWAMI. Ncenciceeco asunu bantu ncobacijisi kasimi kakuti, “Ooyu mmuvwimi mupati mbuli Nimulodi kuli Leza.” "(Matalikilo 10:9-10a). Alimwi mu bbuku lisandulula mabala lyaba [Strong]: singuzu [ciHebulayo.1368] = sikudyaaminina alimwi uujisi nguzu wiingilila kumbele [BaHebulayo.6440] = uulwana. Nimrod, muwezi sikudyaaminina wakabukila MWAMI. Amulangisye bbala lyakuti sikudyaaminina! Kudyakaizya ndibbala libelesyedwe kusandulua Bbabbuloni a Nimrodi antoomwe. Sikudyaaminina ciiminina muleli walunya. Kanjaanji bajana nguzu munzila iitaluleme alimwi iitali mu mulawo. Aabo mbantu balakwempula akujatilisya nguzu kwiinda mukusinikizya. "Alimwi ankumo yakwe kwakali zina lyakalembedwe, MASESEKE, BBABBULONI MUPATI, BANYINA BA BASIMAMAMBE ALIMWI CISESEMYO CA NYIKA" (Ciyubunuzyo 17:5). Maseseke = aatakonzyi kupandululwa. Bbabbuloni = kupyopyongana. Banyina = nkwaakazyila, kumatalikilo, naa kutalikilwa. Basimamambe a Zisesemyo = boonse aabo basulaika YAHUWAH abupaizi bwa lweeno boonse mbubakalipangila mucibaka ca kasimpe.

Bbabbuloni wakali matalikilo aa misyobo ya bupaizi bwa mituni. Mukuya kwa myaka, eeyi misyobo ya bupaizi yakalaa baleza banjaanji. Balaa baleza bapatipati abaniini. Baleza botatwe bapati aabo bali atalaa boonse balaswaanganyigwa

antoomwe mumubili omwe. Kuli baleza botatwe bajanwa mu bupaizi bwa cisi (Bbabbuloni, Egipita, Gilisi, Loma) nokuba mu bupaizi bwa tunsiyansiya twa bantu (ba Hindu, ba Norse, mu Bunakristu buna Plato). Kufumbwa naa baambwa kuti mbantu botatwe = muntu omwe, nokuba kuti mbantu botatwe beelene, boonse mbaaleza botatwe. Hena baleza botatwe majwi aamvwika mbuli majwi ookwa Izaya? "Mbuboobu mbwaamba SIMALELO Mwami wa Isilayeli, amunununi wakwe MWAMI wa makamu; Ndime mutaanzi, alimwi ndime wamamanino, alimwi kunze lyangu, kunyina Leza." (Izaya 44:6). "Mutakankami, mutayoowi. Sena tiindakacaambilizya akucilungulula kale-kale eeci. Ndinywe bakamboni bangu. Sena kuli leza uumbi kunze lyandime? Peepe, kunyina naba uumbi, taakwe ngwezi pe." (Izaya 44:8). Izaya, mbuli balembi ba Bbaibbele banjaanji, wakazuunyana kwaambilizya "kuba omwe" kwa Yahuwah.

Ikuti Yahuwah kali muzibeela zyotatwe, nkaambo nzi ncokutaambidwe boobo mu mangwalo? Nkaambo nzi kunze lyaboobo ncokwiindulukidwe kwaambwa Yahuwah mbwali "omwe"? Nkaambo tacikwe makani naa yebo ubelesya nsaamuzi zyamusyobo uuli buti; tokonzyi kupanga kuti zyotatwe zibe = comwe nokuba comwe cibe = zyotatwe! Koibaluka kuti, twakaambide aakale kuti Yahuwah tali nguwe uutalisya kupyopyongana. Walo tayandide nokuba kulangila ndiswe kuti tusyome cintu cimwi citeendelani abube bwakwe bwakuba "omwe." Walo tayandi nokuba kulangila ndiswe kusyoma cintu citakonzyi kumvwisyigwa. Yahuwah uyanda alimwi ulangila ndiswe kuti tumusyome Walo akumuteelela mbuli mulengi alikke uusunga nyika. Kaambo kasinizyidwe mu Bbaibbele nkakuti ngumwi, ngwa masimpe, ngu Yahuwah uupona waandeene kuzwa ku baleza bakubeja bakabambwa aamuntu waa nyika. Aboobo hena cimvwika kuba cintu ca maanu kuti Yahuwah katondezyegwa kuba mu ziimo zinjaanji zya baleza ba mituni na? Eeco ngo mulimo ngobacita baleza botatwe baswaangene mumubili omwe, eeco muntu uucinca Yahuwah ncayanda kuti abe, kuleka ceeco Yahuwah lwakwe ncayanda.

Nokuba baabo basumpauzya Baleza botatwe balizyi kuti tabajanwi mu Bbaibbele.

IBbaibbele lya Zifwanikiso:

"Ibbala lyakuti Baleza botatwe talijanwi mu Bbaibbele .. .Tiilyakajana busena mu lwiiyo lwa buleza bwa cikombelo kusikila mumusela wane."

Encyclopedia of Religion:

"Bamayi bayiisya zya buleza mazubaano balazuminana kuti Bbaibbele lya ciHebulayo talijisi lusyomo lwa Baleza botatwe."

The New Catholic Encyclopedia:

"Lusyomo lwa Baleza botatwe taluyiisyidwe mu Cizuminano Cakale."

The Triune God lyakalembwa aaba Jesuiti ba Edmund Fortman:

"Kunyina bumboni bwakuti mulembi uusetekene naba ni kuli naakali kuyeeyela kuti kuli Baleza botatwe mu Mutwe wa Buleza ... Nokuba kubona kwaalikizya nokuba masendekezya mu Cizuminano Cakale aa 'zitondezyo zivwumbilidwe' zya baleza botatwe muciimo ca buntu, ooko nkutaaluka kwiindilila majwi nokuba ncibaakanzide kulemba balembi basetekene."

The New Encyclopedia Britannica:

"Ibbala lyakuti Baleza botatwe nokuba lusyomo lwalyo talujanigwi mu Cizuminano Cakale."

The Paganism in Our Christianity lyakalembwa aaba Arthur Weigall:

"Ikuti Yahushua Messiah naakaambide cintu caacitika cili boobo, alimwi kunyina pe mu Cizuminano Cipya ibbala lyakuti 'Baleza botatwe' mpolilibonya. Muzeezo ooyu wakatambulwa buyo mucikombelo kakwiindide myaanda yotatwe ya myaka kuzwa naakafwide Mwami wesu."

The Encyclopedia Americana:

Lusyomo lwa Baleza botatwe lwa musela wane tiilwakatondezya bwinibwini lwiiyo lwa Bunakristu lujatikizya ciimo ca Leza; kunze lyaboobo, bakali kwaampanya kuleya kuzwa ku lwiiyo oolo."

The New Catholic Encyclopedia:

"Kuzwa akataa musela wane kuya kumbele, nokuba boobo, muzeezo wa Bunakristu wakakwelelezyegwa kapati mu busongo buna Plato a ziyanza zyamaseseke aa bulozi."

History of Christianity lyakalembwa aaba Edward Gibbons:

"Ikuti Kukomba Mituni nikwaazundwa aa Bunakristu, cileelene akuti Bunakristu bwaasofwaazyigwa aa Kukomba Mituni. Bupaizi busalala bwa banakristu bataanzi ...bwakacincwa, aa Cikombelo ca Loma, kuya ku lusyomo lutamvwiki lwa Baleza botatwe. Bunji bwa ziyanza zya kukomba mituni, eezyo zyaabambwa aa bantu baku Egipiti akubikkwa mumizeezo ya Plato, zyakakkalilila kubee nzintu ziyandika kusyomwa."

Kweezyekanya twaambo tuli atala aawa ku kucenjezya kwa Mwaapositolo Paulu: "Amucenjele kuti kutabi naba omwe uunyonyoona lusyomo lwanu abusongo bwabuntunsi buli mbwalucengo buyo. Kayi eezi zizwa kutunsiya-nsiya twabakaindi akumizeezo yabuntunsi buyo, kutali kuli Messiah pe." (Bakolose 2:8). Baleza botatwe baswaangene mumubili omwe mubili uusangenwe busongo bwaansi, tunsiyansiya, a lweeno.

Acimwi cibeela ca musela. Kunooli yebo wakamvwa Mulazyo wa Justinian. Ooyo wakali mulazyo wakazyila ku mulawo mutaanzi wa BaLoma ooyo wakasungilizya kubikka mulawo wa nyika yoonse kusikila mazubaano. Justinian wakali mbuli Constantine kapati a Nimrodi: wakali kusinikizya kusyoma zintu zimwi atalaa bantu boonse.

Nceeci cimwi cizyila mu Mulazyo wa Justinian: Bbuku 1—Mutwe wamakani 1.

KUJATIKIZYA BALEZA BOTATWE BASUMPUKIDE A LUSYOMO LWA KATOLIKA ALIMWI KUTI KAKWIINA MUNTU UUSOLA KUKAKA MBABO ANTANGALALA.

"... swebo tweelede kusyoma kuti Taata, Mwana a Muya Uusalala mbababamba Leza Omwe, kabeelene bulemu, alimwi kabakamantene muli Baleza botatwe Basetekene.

(1) Swebo tulailila bantu boonse aabo batobela mulawo ooyu kuti balyaambe kuba Banakristu Bakatolika alimwi akulanganya bamwi boonse kuti balicinkukide akusondoka, Swebo tulailila kuti aabo beelede kupegwa mulandu wa buzangi ... "

Bulelo bwa BaLoma © Luzyibo lwa Misela ¹

Eeci nce cibeela citaanzi cini ca Mulazyo; citondezya kuti baleza botatwe bakali musemo wa bupaizi bwa BaLoma. Kusinikizyigwa kusyoma muli Baleza botatwe, nanka kulanganyigwa kuti yebo wakali similandu mumeso aa Bulelo bwa BaLoma! Hena eeci cimvwikaanga nkukomba Yahuwah cakuliyandila, muluyando alimwi munzila iiluleme na?

Peepe! Ooku nkusinikizyigwa akunyonaunwa kwa ciyanza caku Bbabbuloni, kumunzi mutaanzi wa bupaizi bwa Baleza botatwe. Eeci cakali cibeela ca Mulazyo ooyo wakagola mumwaka wa 529 AD. Hena tacigambyi kuti mbukwaayindila biyo myaka kkumi ayibili kuzwa mulazyo wakusinikizya ooyu niwaabikkwa kwakavwundumuka bulwazi bwa kalowa oobo bwakanyonyoona cooko ca Bukuwa mpoonya musela wa Musinze mpuwaatalikila? Cilakondelezya kuti, oobu bulwazi bwakaletwa ku Bukuwa mu mato aayo aakali kususa maila kuzwa ku Egipiti; kumunzi umwi waazyibidwe nsiku lini kubaa bupaizi bwa Baleza botatwe. Sunu, makunga aa mabbuku akalembwa kaasola kupandulula Baleza botatwe. Pele, ku busanduluzi bupilingene boonse, bwa busongo akumvwikaanga bupa busanduluzi buli mumulawo, cilikke eeco bakomba baleza botatwe ncobazuminana ncakuti aaya "maseseke aa lusyomo." Maseseke = aatazyibidwe, aatakonzyi kupandululwa. "Kuti bantu boonse baanyika bazyibe kuti Yahuwah ngu Leza alimwi akuti kunyina uumbi kunze lyakwe" (1 Bami 8:60). Mbubuti yebo mbonga wasinizya masimpe kuzyiba Yahuwah ikuti yebo kotakonzyi kumupandulula walo? Nokuba boobo, "Banakristu" banji bacilanganya Baleza botatwe kuti "ngo mulazyo uuli akatikati ka lusyomo." Akataa zintu zyoonse zyaapedwa mibuzyo muciindi ca Kubambulula Lusyomo, lusyomo lwa Baleza botatwe tiicakali cimwi akataa zintu eezyo. Basikukazya naa ba Protestanti abalo bakali kanzide mbweenya mbuli Bakatolika mu kucimwa Michael Servetus. Nkaambo nzi? Nkaambo walo taakali kusyoma muli Baleza botatwe alimwi wakali kubakazya caantangalala. Servetus wakawumpwa acisamu akaambo ka milandu yobile njaakatamikizyigwa; walo taakali kusyoma muli Baleza botatwe alimwi wakali kukaka kubbizya bana bavwanda. Yahuwah nguuzyi mweelwe wabantu bakajaigwa mukuya kwa ciindi akaambo kakukaka kusyoma muli Baleza botatwe. Alimwi mbweenya mbuli Michael Servetus, banji bakajaigwa kutali aabaabo bakomba mituni pele abaabo "baluulwa" Bunakristu.

Mbube, ikuti Baleza botatwe kabali "akatikati ka lusyomo" lwa Bunakristu, nkaambo nzi NCOCITAAMBIDWE mu Bbaibbele? Ikuti kobala cintu cilaa mulimo kapati, hena taceelede kwaambwa nokaceya, ziindi zinjaanji alimwi munzila imwi? Peepe, TABALI Baleza botatwe baambwidwe mu Bbaibbele; kwaambidwe "kuba omwe" kwa Yahuwah! Kanjaanji alimwi kupandulula kabotu-kabotu. Mu Cizumanano Cakale, ooku kuba "omwe" nkokwaandaanya Yahuwah muzumi wamasimpe, kuzwa kuli baleza balweeno ba manjezyeezya aa bantu. Ngweenya ooyu mutwe wa ciiyo nguli mu Cizuminano Cipya eelyo mulumbe mubotu nowaamwayikila ku bantu ba masi. Koyeeya bantu mbaakaswaanganya Paulu ku Athens aku Efeso. Lyoonse kwakali kwaandaana kupati akataa Yahuwah a baleza bakapangililwa aa bantu baanyika.

"Bantu aabo bali boobo mbatumwa babeji, mbabelesi balweeno, balicita mbuli batumwa ba Messiah. Tacigambyi eeci pe, nkaambo awalo mwini Saatani ulalisandula mbuli mungelo wamumuni. Aboobo tacili cintu ceenzu kuti naa babelesi bakwe balalisandula beni mbuli babelesi babululami. Mamanino aabo azooba mbuli bubede milimo yabo. (II Bakolinto 11: 13-15). "Lino kwakali basinsimi babeji akati kabantu besu mbubonya oobo aakati kanu kuyooba bamayi babeji. Bayoonjizya cakusisikizya njiisyo zinyonyoona, nkabela bayookaka Mwami wabo wakabanununa. Nkaako bayoolyeetela lunyonyooko cakufwambaana." (2 Petulo 2:1). "Bantu aabo bakali aandiswe kaindi, pele tiibakali bamwi besu pe. Nkaambo nibakali bamwi besu nibacilikkalilide andiswe. Pele bakazwa mukuti kubonwe kuti tiibakali bamwi besu." (I Johane 2:19). "Nguni mubeji, tee nguyooyo uutazumini kuti Yahushua ngo Munanike wa Yahuwah? Ooyo uukaka Taata a Mwana ngosinkondonyina a Messiah." (1 Johane 2:22). Saatani wakalwana Bunakristu busimpidwe mu Bbaibbele kutalikila mobuli mukati, asyoonto-syoonto kasanganya mizeezo ya bupaizi bwa kukomba mituni yaazyila ku Bbabbuloni (mbuli baleza botatwe) kuti bube Bunakristu buyeeme ku busongo bwa bantu. Eeci ncecakali "cintu cikasaala mbuli cimbwali" mu bupaizi eeco Constantine ncaakatalisya ku munzi wa Nicaea mu 325 AD. Pele Constantine wakali kubikkila maanu kukukamantanya Bulelo bwa Loma mu mapolitikisi kwiinda mukuzumanana kubambilila Bunakristu kuti kabutakwe kampenda. Mulazyo wakatobela waku Nicaea wakalibonya aanga malembe aakabikkwa aa mulawo waku Wee, Cheatim, aku Howe. Alimwi kuzwa ciindi eeco banakristu batabalwi bakacengwa a Mulazyo waku Nicaea a zintu zyawo ziindene. Bakatobela tunsiyansiya twa bantu muciindi cakutobela Bbaibbele. Mukuya kwa ciindi, Musaante Nicholas wamasimpe (Santa Claus) wakaanzwa, alimwi awalo lwakwe usyoma muli Baleza botatwe. Munzi wa Nicaea wakabamba Bukatolika kuti bube "cikombelo ca mulawo" wa Bunakristu. Eeco Constantine ncaakatalisya ku Nicaea, Justinian wazumanana kusikila wacigozyela mu Mulazyo wa bantu ba cisi. Yebo kosyoma muli baleza botatwe, ccita koyanda kulanganyigwa aanga uli muzangi asimilandu, ooyo weelede kusubulwa kusanganya alufu.

Alimwi, Baleza botatwe tabajanwi mu Bbaibbele; pele "kuba omwe" kwa?,, Yahuwah nkokuli mu Bbaibbele. Yahuwah kunyina pe naambidwe kuba bantu botatwe mumuntu omwe, pele kuli kucenjezya kapati kwa bashinshimi babeji amulumbe wabo wa lweeno. "Kuyoosika basinsimi banji babeji, bayoosowa bantu banji." (Mateyo 24: 11 ). "Nkaambo kuyooba balyaamba kuti, ‘Ndime Messiah,' alimwi kuyooba bamusinsimi babeji! Bayoocita zitondezyo azintu zigambya, kuti naa kakukonzyeka bakacenge baabo Yahuwah mbaakasala." (Mateyo 24:24). "Nkaambo kuli babeji banji-banji bamwaikide kale munyika, aabo batazumini kuti Yahushua Messiah wakaba muntu ncobeni. Ooyo muntu uukaka zyeezyi mucengi alimwi ngosinkondonyina a Messiah." (2 Johane 1:7). Eelyo muntu umwi naamba kuti Yahushua ngu Leza, aabo bantu bakaka kuti Yahushua muntu nsini waanzeene alimwi uukonzya kulibambila mizeezo yakwe mwini. Balo bakaka Yahushua kuba mwiiminizi akataa Yahuwah a bantu. Eeci cakagozya kucitwa kwiinda mu kupindula Bunakristu busalala kwiinda mu busongo buna Plato oobo bwakaselemuka kuzwa ku Bbabbuloni aku Egipiti. Alimwi cintu ciindizya kugozya kupindula Bunakristu kuti bube kukomba mituni cakali ca kupunga baleza botatwe: Lweeno lwa Saatani Lugozyedwe! Walo wakatalikila mu Muunda wa Edeni mukwaambila muntu kuti, "inywe muyooba mbuli baleza"; mpoonya batobeli bakwe bakabamba Yahushua kuba LEZA. Saatani ngu silweeno, mubeji, alimwi mujayi nkaambo usolweda muntu kuti atateeleli milawo yokwa YAHUWAH. "Ooyo waamba kuti ndilimuzyi pele katabambi milawo yakwe, mubeji, alimwi kunyina kasimpe muli nguwe." (1 Johane 2:4). Kucenjezya kwamamanino mu Bbaibbele kucenjezya kulesya kuyungizya (mbuli kusanganya: baleza botatwe) akugwisyila (mbuli kugwisya:"kuba omwe" kwa Yahuwah). "Mebo nde Joni, njanda kucenjezya muntu umwi aumwi uuswiilila majwi aabusinsimi bwamubbuku eeli kuti, kufumbwa muntu uuyungizya cintu kumakani aaya, Yahuwah uyoomuyungizizya mapenzi aalembedwe mubbuku eeli. Awalo ooyo uugwisya cintu kumajwi aabbuku lyabusinsimi eeli, Yahuwah uyoogwisya caabilo cakwe kumusamu uupa buumi, amumunzi uusalala, zyalo zili zilembedwe mubbuku eeli." (Ciyubunuzyo 22:18-19).

Eeci ncibalo citali ca-WLC cakalembwa aaba John Fyfe.

1 – Cifwanikiso cakazyila ku https://www.historyskills.com/classroom/ancient-history/roman-empire-size/

Twakagwisya mucibalo citaanzi woonse mazina aabakomba mitubi amazina aamilimo ookwa Taata a Mwana, alimwi twakabikka mucibaka ca ngawo mazina mataanzi ngubaapedwe. Kuyungizya waawo, twakayobolola mu Mangwalo aayindulukidwe kwaambwa mazina ookwa Taata a Mwana, mbuli mbwaakalembedwe kutaanguna abalembi ba Bbaibbele basetekebe bakayoyelwa moza. –Nkamu ya WLC