Kupona Kotaninga Zyalwa a Kuzyalululwa Mizeezo ya Kukomba Mituni Kutali ya Bbaibbele
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu ku Tusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Kunyina pe bbaibbele mpolyaamba “kusanduka ciimo,” alimwi aboobo akuba “muzimo uupona kataninga zyalwa.” Kuli malweza manjaanji aakasobelela kunjila mu lusyomo aayo aatali “lusyomo lwakataangunide kupegwa ku basaante” (Juda 1:3).
Muzeezo woonse wa kupona kotaninga zyalwa akuzyalululwa uyakilidwe atalaa kusendekezya “muzimo uutafwi.” Kuyiisya kuti muzimo tuufwi nciiyo ca malweza. Lusyomo lwa bakomba mituni ndwakuti “muya” ncibeela ca muntu, icintu, eeco citafwi. Inzya ncobeni, Saatani wakatalikila kubeja ooku mumuunda, ooko nkwaakaambila Eva kuti, “Yebo tokafwi ncobeni” (Matalikilo 3:4).
Ooyu muzeezo wa bukombi bwa mituni wakuti muzimo tuufwi wiiminina kuti ooyo wiitwa kuti “yebo lwako ncobeni” takonzyi kufwa; “mubili” biyo ulikke nguufwa! Mbeenya aabo balacita aceeci akuli Yahushua; ategwa taakafwa ncobeni, akuti wakali
mubili biyo wakwe nguwakafwa, akuti wakazumanana kupona buumi kalimvwide bulanga. Munzila njeenya, ooku kuyiisya kwa lweeno nkokwaambwa ndiswe ategwa tatufwi ncobeni. Bukombi bwa mituni bwakajana ncobeni busena aakunjilila mu bunakristu-bwa-tunsiyansiya amunyika yoonse mbwiizulwa. Banyonganya mizeeo kubelesya ibbala lya “muzimo” alyakuti “muya.” Kuyiisyigwa kuti “muzimo” wa muntu ngo “muya” wakwe akuti ooyu “muya” ulazumanana kupona lyoonse.
Eeci tacili masimpe.
(Mubili uutakwe buumi) + (Muya uuzwa kuli Yahuwah) = (Muntu muzumi)
‘Mpoonya Mwami Yahuwah wakabamba muntu wa bulongo bwaansi, akumuyoyela mumpemo zyakwe muya wa buumi; mpoonya muntu WAKABA muntu muzumi. ` Matalikilo 2:7
Kwiinda waawo kuli mutunta. Kunyina cibeleka. Kusikila buyo leelyo Yahuwah “naakamuyoyela muya wa buumi mumpemo” (muwo: ruach/muya) eelyo Adamu NAAKABA muntu muzumi. Walo NGU muzumi, kutali kuti ulaa muzimo. Zinyama zyalo nzizumi mbweenya biyo.
Kuzyokoloka musyule, eelyo muya nuutusiya, muntu muzumi ulacaala kafwide. Kunyina cijatikizya muntu uupona ooyo cizwa mumubili wakwe eelyo nafwa pe. Ikuti muntu muzimo nokuba muya kuutafwi, nkokuti inga caambilizya biyo kuti wakali kupona kuutaninga njila mumubili wanyama aboobo alimwi weelede kuzumanana kupona eelyo mubili nuufwa. Kunyina makani mbotunga twasotausya akukwabaula muzeezo ooyu, ikuti mubili wesu kuuli buyo waciindi cisyoonto alimwi muya kuutafwi, mbuli mbotuyiisyigwa, eeco cigaminide biyo ku muzeezo wa “kupona kotaninga zyalwa.”
Ooyo muya uuyeeyelwa kuti tuufwi, ooyo uutegwa nduwe lwako kukugama ncobeni, ulazyokela kuli Yahuwah, ooyo wakuupede.
Muya [ruach-kuyoya] wa muntu ulabweeda ku MWAMI Yahuwah, ooyo wakuupede, alimwi mbweenya biyo akwalo ku zinyama mbocibede oobo. Eeci taakwe ncocaambilizya ciguminizya “muya uutafwi” nokuba “muya” mbuli cintu caanzeene cili mukati ka muntu, kunyina makani naa balemba twaano baamba kuti nzi.
Lino bantu baamba kuti eelyo muntu nafwa, muya upiluka kuli Yahuwah kakubee kwiinda mu ‘muya’ ooyu ucilaa cibeela caanzeene cicilimvwide bulanga. Muntu lwakwe kumugama ucizumanana kupona kali anze lya mubili pele kakkede kalikwaide antoomwe a Yahushua kujulu kweendelanya a Mukambausi. 12:7:
“mpoonya bulongo bulajokela mu nyika mbweenya mbubwakabede, awalo muya ulabweeda kuli Yahuwah ooyo wakuupede.”
Umwi mulembi (JFB) ulati: “muya — ulapona kuutakwe mubili; kusendekezya kuti tuufwi.”
Barnes waamba kuti: “Muya – Lusyomo lwa buumi kalwiindide lufu ncecisungilizyidwe aawa…”
Ikaambo kalikke ncobaamba kuti “cisendekezyedwe” nkaambo bakakwelelezyegwa aampuwo ya busongo buna Plato mu Giliki amizeezo ya busongo eeyo Paulu njaakatucenjezya (Bakolose. 2:8). Wakali Plato ooyo wakapona myaka 300-400 kataninga zyalwa Yahushua iwakapa muzeezo wabusongo walweeno wakuti muntu muli lwakwe tafwi.
Kujatikizya Mukambausi. 12:7, Ime ndasyoma busanduluzi butobela kuti busanduludwe cabululami:
“Aboobo mibili yesu ilajokela ku bulongo, awalo muya uupa buumi ulabweeda kuli Yahuwah.”
Atuyeeye aceeci kwakaindi kasyoonto. Ikuti bantu kabayanda kuyiisya kuti “muya” wa muntu wazyokela kuli Yahuwah alimwi ucizumanana kupona buumi kalimvwide bulanga kalwiindide lufu, nkokuti balo beelede akuzumina kuti eeyo milandu ya BAGWEBENGA BASOFWEEDE CINICINI (mbuli Hitler) ayalo ili aa Yahuwah ecino ciindi cini. Ncobeni eeci ncintu cimvwika kusampauzya.
Alimwi penzi lya lusyomo lwa kupona kotaninga zyalwa oolu ndyakuti oolu lusyomo lujatana kabotu amuzeezo wa kuzyalululwa. Kuyiisya kwa bukombi bwa mituni kwa “kuzyalululwa” nkwakuti muya ujisi mubili wa nyama. Tulijisi kusanduka ciimo a kuzyalululwa – inzila yiinduluka kucitika oomo cilengwa leza ca muya mocibaa mubili kusikila ooyo mubili wafwa mpoonya muya ulazumanana kuya mumubili uumbi kusikila awalo wafwa, mbweenya oobo kaciyaa kuzumanana kuya kumbele. Kunyina wakaselemukila kunjila mu mubili wanyama, kusanganya a Yahushua.
Yahushua taakali kupona, buumi kalimvwide bulanga mbuli “cibumbwa ca muya” nanka kali “mwanaa Yahuwah,” uutafwi, ooyo wakasiya busena bwakwe mbwaakali kukkala kujulu kuti azyoonjile mu mubili wa nyama anyika eeyi. Ooku nkukambauka “Kristu uumbi.” Notuba ndiswe tatuli batafwi, katukkede mumubili wa nyama, pele ooku kuyiisya kucizumanana mu zikombelo zinjaanji amu Hollywood (mbuli mu cipekupeku ca “Ghost,” kupa mukonzyanyo, amuzipekupeku zimwi zinjaanji).
IBbaibbele lyaamba kuti Yahuwah alikke nguutafwi (1 Timoteo. 6:16), eeco ciiminina kuti Walo takonzyi kunjila mu lufu. Swebo tulangaula kutafwa (BaLoma. 2:7). Mbuli Yahushua, bumwi buzuba, tuyoosamikwa mubili uutafwi, kakwiina kulangana kabili alufu (1 Bakolinto. 15:54).
Ikuti Yahushua kali wakaboola munyika eeyi katafwi, nkokuti Yahushua kunyina naakafwa ncobeni! Ikuti swebo katuli twakaboola munyika eeyi katutafwi, nkokuti tatufwi, pele eeco cililubide kweendelanya ku Mangwalo. Caamba biyo kuti kubeja kwa dyabooli kwakakopa bantu banji kuti aayo masimpe.
Bantu banji bacizumanana kuti mubili wa Yahushua – mubili wakwe- wakafwa aciingano, akuyubununa kuti Yahushua mwini kumugama (muuya) wakacili kuzumanana kupona. Nobantu, eezi nziiyo zyuusya nsoni zya bupaizi bwa Gnosticizimu. Ikuti muntu umwi wasyoma bupaizi bwa Gnosticizimu, nkokuti tayandiki kubusyigwa kuzwa kubafu; aboobo, Yahushua taakabusyigwa ncobeni kuzwa kubafu. Bantu balyaanzikide atalaa bbala lya “mubili.” Ikuti twadibaula aasyoonto, swebo inga tiitwajana nokaba kaambo komwe kaamba “kubuka kwa mubili kuzwa kubafu!” Swebo tulaa twaambo mbuli kakuti “ikubuka kuzwa kubafu,” “kubuka kwa Yahushua Messiah,” “kubuka nokuba kuzwa kubafu” naa “kubuka kuzwa kubafu kwa baluleme,” pele kutali “kubuka kuzwa kulufu kwa mubili.” (Mateyo. 22:23; 28, 30, 31; Mateyo 27:53; Maako 12:18, 23; Luka 14:14, 20:27, 33, 35, 36; Johane 5:29, 11:24, 25; Milimo 1:22, 2:31, 4:2, 33, 17:18, 32, 23:6, 8, 24:15, 21; BaLoma 1:4, 6:5; 1 Bakolinto. 15:12, 13, 21, 42; Filimoni. 3:10, 11, 2 Timoteo. 2:18; Hebulayo. 6:2, 11:35; 1 Petulo 1:3, 3:21; Ciyubunuzyo. 20:5, 6). Kubuka kuzwa kubafu kujatikizya muntu woonse mbwazulwa.
Imuya (pneuma/kuyoya) ncibeela cipati naa ninguzu ziyandika mukati ka zintu zizumi zyoonse. Yahushua wakati,
“Taata, mumaanza aako Ime ndalekela muya wangu!”
Eeci ciiminina kuti Yahushua wakayoya muya wamamanino. Yahushua wakoompolola mujwi pati kuti,
“Taata, mumaanza aako Ime ndalekela muya wangu [pneuma].”
Eelyo walo naakamanizya kwaamba boobu, walo wakayoya kamamanino. -Luka 23:46 Eelyo Yahushua naakati, “Mumaanza aako, Ime ndalekela muya wangu,” walo taakali kwaamba kulekela cibeela caanzeene cakwe kuti cizwe mu mubili akuyoozumanana kupona anze lya mubili wakwe kacicilimvwide bulanga pe. Walo wakalekezya buyo “kuyoya” kwa buumi bwakwe, mumaanza ookwa Taata. Kuyoya ncecintu cibweeda kuli Yahuwah, kutali cilengwe, cilimvwide bulanga. Jemusi ulati mu kampango 2:26 “…mubili kakwiina muya (pneuma/kuyoya) ulifwide.”
Bantu beezyeezya kupona kataninga zyalwa a kucinca ciimo kwa Yahushua. Ooyu muzeezo tuukwe musemo mu mangwalo pe. Swebo tuyakila atalaa museenga eelyo notuyaamika zintu atalaa manjezyeezya. Kunyina makani nokuba kuti cimvwika kuba camaanu buti ikuti ooko kusendekezya kakulubide, zyoonse zililubide.
Imuzeezo wakuti Yahushua wakali kupona kalimvwide bulanga kataninga zyalwa mu Betelehema ngwa buyanga. Yahushua uli alimwi lyoonse wakali muntu susu mbweenya mbuli ndiswe, kutali “mungele” ooyo wakacinca ciimo kuba muntu, nokuba “cilengwa leza ca muya” eeco cakaba muntu, nokuba “mwanaa Yahuwah uutafwi” ooyo wakaba muntu. Tiikwakanyina kupona kataninga zyalwa nokuba kucinca ciimo. Nkokuti Maliya “naakatambula” cilengwa leza ca muya cicincide ciimo kwiinda “mukumita mwana.” Kunze lyaboobo, Messiah lyoonse wakali mumizeezo amu makanze ookwa Yahuwah. Messiah wakali syomezyedwe. Messiah wakaboola mu buumi eelyo naakamitwa mwida lya Maliya.
Mpawo mungele wakati kuli nguwe, “Utayoowi, Maliya, nkaambo yebo wafwidwa luzyalo kuli Yahuwah. Lino kolanga, yebo uyoomita mwida lyako akuzyala mwana musankwa, alimwi uyoomwiita zina lyakwe kuti Yahushua. -Luka 1:30-31
“Kupona kotaninga zyalwa” a “Kucinca ciimo” tuuli muzeezo wamu Bbaibbele. Nkukomba mutuni.
Eeci cibalo citali ca-WLC cakalembwa aaba dividingword.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC