Twaambo Tukazya Bbaibbele twa Ellen White Mbwaakazubulula Cilengaano Cakwe Citaanzi
Amubajencelele bashinshimi babeji, aabo baboola kuli ndinywe kabasamide zikobela zya boya bwa mbelele anukuti mukati mbaawumpe babutambo.” Mateyo 7:15 |
Ellen White wakalaa myaka yakuzyalwa iili 17 eelyo naakalaa cilengaano citaanzi. Mucilengaano eeci, wakabona bantu bana Adventi kabeenda kuya kujulu. Mucilengaano eeci, ‘Muya Uusalala’ wakamutondezya bantu ba Adventi mukazila kasyaanikide, kakuli mumuni uumwekesya kusyule lyabo, mbube Kristu kabasolweda bantu bakwe kuya ku Munzi wa Kujulu.
Atutalisye kwiinduluka ncaakamba Ellen White mukuzubulula cilengaano cakwe citaanzi:
Cilengaano Cangu Citaanzi
Kuya Kujulu
Toonse twakanjila mukkumbi antoomwe, alimwi twakali kuyaa kutanta kwa mazuba aali ciloba atalaa lwizi lwa cimbonimboni, eelyo Jeesu naakaleta misyini mpoonya wakiibikka atalaa mitwe yesu ajanza lyakwe lyalulyo lini. Walo wakatupa tunkobela twa golide a malala aakutembauzya mukuzunda. Aawa atalaa lwizi lwa cimbonimboni bantu bali 144,000 bakaimikila, mumindando yeelene muciimo ca bbokesi. Bamwi akati kabo bakalaa misyini iibekema kapati, kakuli bamwi tiiyakali kumwekesya. Imwi misyini yakali kulangikaanga yakali kulema kubaa nyenyezi, kakuli imwi yakajisi zisyoonto biyo. Boonse bakali kkomene kapati amisyini yabo. Alimwi boonse bu akasamide mulembo uubekema uutuba kuzwa makkuko kusikila kumatende aabo. Bangele bakali mumbali lyesu eelyo nitwakali kuyaa kweenda atalaa lwizi lwa cimbonimboni kuya ku mulyango mupati wa munzi. Jeesu wakaimpula janza lyakwe lya bulemu, wakjata mulyango wangale, wakaujula kuujisilili kutwaanzyo twawo tumwekamweka, akutwaambila kuti, "Inywe nomwakasanzya zikobela zyanu mu bulowa Bwangu, nomwakaimikila nji mu kasimpe Kangu; kamunjila mukati." Twakanjila mukati akulimwa kuti twakalaangulukide kuba mumunzi.
Oomo twakabona muasmu wabuumi a cuuno cokwa Leza. Mulonga wameenda aasalalizya wakali kukunka kuzwa mucuuno, alimwi kubbazu lya mulonga lyomwe-lomwe kwakali musamu wa buumi. Kubbazu lyomwe kwakali cibeela ca musemo wa cisamu eeco, alimwi kubbazu limbi kwakali musemo wa cisamu nceenya kwalo, zyoonse zyobile kabambidwe aa golide iibalangala alimwi iisalazyidwe. Kutaanguna Ime ndakayeeya kuti ndabona zisamu zyobile. Ndakalangisya alimwi, mpoonya ndakabona kuti ziliswaangene kuba cisamu comwe atala. Aboobo kwakali musamu wa buumi kubbazu lyomwe-lyomwe lya mulonga wa buumi. Mitabi yawo yakali koongomene aawo mpeekaimvwi, alimwi micelo yawo yakali kubekema kapati; yakali kulangikaanga ni golide iisanganyidwe nsiliva.
Toonse twakaunka kuyokwiiminna mujungusi lya musamu, mpoonya twakakkala katulangilizya bulemu bwa busena oobo, eelyo Basazima ba Fitch a Stockman, aabo bakali kumbabauka mulumbe wa bulelo, alimwi aabo Leza mbaakalazyika mu cuumbwe kuti abavwune, bakaboola kuli ndiswe akutubuzya muzintu mutwakainda eelyo nibakali koona. Swebo twakasoleka kuzubulula masunko eesu pele akali kulangika kuceya kapati kweezyekanya aa cikkelo ca bulemu buteeli oobo bwakatuzingulukide, cakuti twakaalilwa kupozya majwi, mpoonya twakoompolola kuti, "Alleluia! Ijulu lilicipide kapati!" alimwi twakajata tunkobela twesu twa bulemu akuzuzya ziluli zya julu anyimbo.
Neekazwa mu cilengaano, zyoonse zyakali kulangikaanga zyacinca; kwakavwuukide mudima atalaa zyoonse nzyaakabona. Ma, eeyi mbuyaali kulibonya kusiya mudima kuli ndimwe! Ime ndakalila ndeekalijana aawo, ndakalendelelwa kuyandisya kumunzi kwesu. Ndabona nyika yiinda kubota, eeco cakapa kuti lino aawo zyoonse zindibijile.
Ime ndakalungulula cilengaano eeci ku basyomi ku Portland, aabo bakakkazyikide camba kuti cakazyide kuzwa kuli Leza. Balo bakasyoma kuti Leza nguwaasala nzila eeyi, nicaayinda ciindi cakutyompokelwa kupati mu mwezi wa Kavwumbi Kaniini, kuti awumbulizye akuyumyayumya bantu Bakwe. Muya wa Leza wakasindikila bumboni oobu nkabela bulemu bwa kutamani kuteeli kwakakkala ali ndiswe. Ndakanjilwa kuzulila kunyandwa kutaambiki, cakuti Ime, eekali mukubusi uutakwe nguzu boobu, inga ndasalwa kuba cibelesyo eeco Leza kwiinda muli ncico ncanga wapa mumuni ku bantu Bakwe. Lino neekacili munguzu zya Mwami, Ime ndakazulila kukkomana, ndakalimvwa aanga ndizingulukidwe bangele basetekene mu masena aabulemu aakujulu, ooko zyoonse nkozila luumuno akukkomana; alimwi cakali cintu cuusisya akucisya moyo alimwi kusinsimuka akuzyoolijana mubuumi bwaansi bukonzya kufwa. (Christian Experience and Teachings of Ellen G. White, pp. 59-61)
Lino, atulandabike twaambo tupati mu cilengaano citaanzi cokwa Ellen White akusanyangula naa makani aakwe aleendelana a Bbaibbele nokuba kuti, kaciinda waawo, taakali kuzwa mu bbaibbele alimwi ngakukkomanisya buyo:
- Kaambo kapati mu cilengaano cakwe mbusanduluzi bwa musinzo wakuzunda wa bana Adventi kabaya ku Munzi Wakujulu kabasololelwa aa Kristu. Ooyu mulumbe wa ‘kuunka kujulu’ ulimaninide kutajanwa mu bbaibbele ziindi mwaanda mu mwaanda. Kunyina nokaba kampango komwe mu bbaibbele kayiisya kuti ijulu mbobulumbu bwa basalali mu ciindi ca myaka iili cuulu nokuba canikwiindide Cuulu ca Myaka. IBbaibbele liyiisya kuti bulelo bwa Yahuwah buteeli buyoobeda anyika.
- Ellen White wakaamba kuti naakamanizya kupandulula cilengaano ku basyomi, boonse bakazulwa kuti eeco cakali cilengaano cizwa kuli Yahuwah, walo wakazwide kunyandwa kuti mukubusi watakajisi nguzu mbuli nguwe kuti wakasalwa kuba ‘cibelesyo eeco kwiinda muli ncico Leza mwanoopeda mumuni ku bantu Bakwe.’
Hena yebo inga weezyeezya kuti Taata Yahuwah wasala Ellen White kuba cibelesyo ca kupeda mumuni ‘mupya’ kubantu Bakwe ooyo uunooyimpana amumuni waapedwe bashinshimi Bakwe bakainda musyule?
|
Lino atubuzye mubuzyo waanu ooyu ku mutobeli wa Ellen White uuli woonse: Hena yebo inga weezyeezya kuti Taata Yahuwah wasala Ellen White kuba cibelesyo ca kupeda mumuni ‘mupya’ kubantu Bakwe ooyo uunooyimpana amumuni waapedwe bashinshimi Bakwe bakainda musyule? Ba Daniele, Davida, Izaya, Jelemiya, Mika, Johane, alimwi wamacaalizyo pele kutali musyoonto ali boonse, Yahushua, boonse bakayiisya kuti Bulelo Buteeli bwa Yahuwah bunooli anyika kutali kujulu. Hena cimvwika kubaa maanu kweezyeezya kuti ooyo [Taata Yahuwah uutacinci] inga wakazya mumuni ngwaakapede kutaanguna mu bashinshimi Bakwe bakasalidwe alimwi lino akupa Ellen White mumuni uubambuludwe wa kubusena kuyoobeda bulelo bwakwe buteeli kuzwa Anyika kuya Kujulu? Masimpe, nkusampaula kusendekezya kuti Taata Yahuwah mbuli mbwali Leza uutacinci muzeezo Wakwe amilumbe Yakwe kuti inga wasumpauzya nguzu zya bulemu mu mulimo wa Ellen White. Swebo tatuyandide kutola cibeela mu kusampaula ooku. Taata Yahuwah tacinculuki, aboobo mumuni amilumbe yakwe ayalo mbweenya buyo.
Pele atwaambe kuti yebo ucisyoma kuti Taata Yahuwah wakasala Ellen White kuti ape bantu Bakwe mumuni uubambuludwe ooyo uukazyanya amumuni ngwaakapede bashinshimi Bakwe. Mukaambo kaako, yebo inga walangila akutusyoma aswebo kuti twakwaambila kuti tujisi zizabukilo zyakuulisya amyuulo yaandeene.