Cuulu ca Myaka: Kupunga Bulelo Bwa Myaka iili Cuulu Butali mu Bbaibbele

Kwiimina amuzeezo wakuti kunyina bulelo bwa myaka iili cuulu ncecintu ceendelana aa mulumbe wamu Bbaibbele. Ooku kukosozya boobu kuyeeme mu lwiiyo lwamu Bbaibbele a mulaka uubelesyedwe mu Ciyubunuzyo 20.

Bubambe bwa Lwiiyo lwa Cishinsimi lwamu Bbaibbele

Mangwalo akacisalazyila limwi, munzila iitonkomene, iiteeleleka kusandulula alimwi eeyo iigwisyila limwi muzeezo wakuti kuyooba bulelo bwa kujulu kiitaninga talika myaka iili cuulu. Eeyo nzila ndo lusyomo lwa "misela yobile" (Muci Giliki ategwa: aiōn; "musela"): "musela ooyu" akuti "musela uciboola." Ibbala lya misela yobile " lilajanwajanwa mu Cizuminano Cipya, kalitavweledwe, alimwi kalipa bubambe bwa lwiiyo lwa Bbaibbele. Liiminina cintu comwe—lyeezyeezya cintu ncimunya, cibambidwe munzila ngubauba—kufumbwa mpolibelesyedwe." Kuli zintu zyobile ziimpanya musela ooyu kuzwa ku musela uuciboola. Kutaanguna, ooyu musela amusela uuciboola iliimpene bupati a zintu ziyoocitika mumo. Ooyu musela ngwa ciindi cisyoonto buyo; musela uuciboola ngwa lyoonse kukabe kutamani. Uuno musela uzyibidwe mukubaa cinyonyoono, lufu, kukwatana, azimwi zyoonse zijatikizya ku mubili ooyu; musela uuciboola uzyibidwe ku kusetekana a buumi bupya, bwa kubuka kuzwa ku bafu.

Cabili, misela yobile eeyi ijatikizya mulongo wa ciindi woonse, alimwi musela uuciboola mpeenya-mpeenya utobela musela uuno. Mwaalumi Vos utondeka kaambo kakuti, "Izina lini lyakuti 'aion uuciboola' talyaambi biyo cintu ciciboola kumbelaa mazuba, pele muli lwalyo lini ndibbala lyaamba kutobelana… Kwaamba kuti cinyonyoono tacikalekelelwi mumusela uuno nokuba mumusela uuciboola nicataaba cibelesyo citondezya cintu citalekelelwi kukabe kutamani ad infinitum, Mateyo. xii. 32, ikuti nikwali mwaako akataa misela yobile eeyi."

Lino kakwiindide kuboola kwa Messiah kutaanzi, inguzu zya musela uuboola zyaka "fumpa" musela uuno alimwi zyaka "labilwa" abantu bawo (BaHebulayo 6:5). Nokuba boobo, kuli ciindi ciliko cigaminide "musela ooyu" nuuyakumana mpoonya "musela uuciboola" nuyoomaninina kuzwidilila bulemu bwawo boonse. "Mangwalo alizuunyene kutwaambila kuti ooyo mweengo uucimbula akataa misela yobile eeyi ngwa kuboola kwabili kwa Mwami wesu." Zyoonse zibalo zya Bbaibbele eezyo zijatikizya kuboola kwabili (nkokuti, mu ciGiliki kuti parousia), zyaamba buyo kuboola komwe, naa buzuba bomwe, kumamanino aa musela ooyu, eeco caambilizya zintu zyotatwe: (1) Kubuka kuzwa ku bafu kwa bantu boonse, baluleme abasofweedwe mbweenya bwakaamba (Daniyele 12:2; Mateyo 13:30, 39-42, 48-50; 25:31-32; Luuka 17:22-37; Johane 5:25-29; Milimo 24:14-15; Ciyubunuzyo 20:11-15.); (2) Lubeta—kulumbulwa kwa baluleme a cisubulo ca basofweede (Mateyo 7:21-23; 10:32-33 (Maako 8:38); Mateyo 13:24-30, 36-51; 16:27; 24:42-51; 25:10-13, 14-30, 31-46; Luuka 12:35-48; 17:22-37; 19:12-27; 21:26-28; Johane 5:25-29; Milimo 17:31; BaLoma 2:5-16; 14:10-12; 1 Bakolinto 4:5; 2 Bakolinto 5:10; 2 Batesalonika 1:6-10; 2 Timoti 4:1; BaHebulayo 6:2; Jemusi 5:7-9; 2 Petulo 3:7-13; Ciyubunuzyo 19:11-21; 20:11-15; 22:12); a (3) Kulengulula zilengwa leza (Milimo 3:19-21; BaLoma 8:17-25; BaHebulayo 1:10-12, 2 Petulo 3:3-13).

Lusyomo lwa Bulelo Kacitaninga sika Cuulu ca Myaka lukazya Bube bwa "Misela-yobile" bwamu Bbaibbele a Musyobo wa Buumi buyootobela Kuboola Kwabili.

Kutegwa muzeezo wa "cuulu ca myaka" ubeleke kuli baabo basyoma kuti cuulu ca myaka ciyoosika kakutaninga sika kuboola kwabili, kweelede kuba kuzumanana "akunjilaukana" akataa "musela uuno" a "musela uuciboola" nokuba kwanikwiindide kale kuboola kwabili kwa Messiah. Busofwaazi bweelede kuzumanana kuba antoomwe a bululami; aabo batanunudwe, balaa zinyonyoono, alimwi a bantu bakonzya kufwa, beelede kunookkala antoomwe abantu ibakabuka kuzwa ku bafu, batakwe cinyonyoono, alimwi batafwi. Nokuba boobo, ooyu muzeezo wiingilila makani aali muzibalo zimbi, aayo aasindingenye kupandulula kuboola kwa Messiah kuti kwiiminina mamanino aa musela, kubuka kuzwa ku bafu kwa banunudwe abatanunudwe, lubeta lwa baluleme abasofweede, a kulengulula nyika bupya.

Waldron ukosozya bubi bwa makani aa Lusyomo lwa Bbaibbele oolo lujatikizya misela yobile ku muzeezo wa ciindi eelyo kwakwiindide kuboola kwabili [parousia] naa "cuulu ca myaka" ca kaindi kasyoonto buyo: Mpaali aawo cuulu ca myaka mpocinga casekkelelwa ikuti kakuli biyo misela yobile? Hena inga cabikkwa mu musela uuno naa mu musela uuciboola? Masimpe ngakuti cuulu ca myaka taceeleli mumisela yobile pe. Nkaambo nzi ncociteeleli mumusela uuno? Nkaambo cuulu ca myaka cicitika kuzwa a kuboola kwabili kwa Messiah. Nkaambo nzi ncociteeleli mumusela uuciboola? Nkaambo kunoonyina muntu uusofweede uutaninga buka kuzwa kubafu uucinooliko mumusela ooyo. Eelyo notwiibaluka kuti kunyina ciindi cilaakatikati ka misela yobile eeyo alimwi kunyina ciindi cimbi kunze lya misela yobile eeyo, nkokuti kunyina busena buceede bwa muzeezo wakuti kuboola kwabili kuyoosolweda cuulu ca myaka.

Ciyubunuzyo 20 Cilainduluka Kwaamba, Muciindi ca Kutobela, Zintu zicitika mu Ciyubunuzyo 19:11-21.

Mu Ciyubunuzyo 19:11-21, Messiah ulazunda akunyonyoona masi woonse aalwana bulelo bwakwe. Mulaka wa kuzunda kwa Messiah ulizukide, uligozyede, alimwi ulimaninide. Ikuti Ciyubunuzyo 20 nicali kunga cabalwa kutobelanya ciindi, tacimvwiki kubaa maanu mukwaamba kwaangwa kwa Saatani kuti alesyegwe kucenga masi nkaambo masi aayo Saatani ngaakali kweena aciindi cimwi akamaninina kukomwa. . . .

Kutaanguna, 1 Bakolinto 15:25-26 baamba kuti Messiah "Nkaambo uleelede kweendelezya mane do Yahuwah nanoyoobikkide basinkondonyina boonse kunsi lya maulu aakwe. Sinkondonyina musyaalizi uuyoolobesegwa ndufu." Eeco cijatikizya "Ndilyonya naayooba mamanino, nayootambika bwami kumaanza aa Yahuwah wisi, nayoolobesezya boonse beendelezi abami abasimutwe" (1 Bakolinto 15:24). "Mamanino" (15:24) aleendelana a kunyonyoona lufu (15:26), eelyo mibili yesu iikonzya kufwa noyiyoosandulwa a "kusamikwa butafwiki" (15:52-54). Ciyubunuzyo 19:11-21 cipandulula ciindi ca kuboola kwabili (muci Giliki ati parousia) kwa Messiah mpeenya aciindi eeco kufwa akunyonyoonwa kwa zintu "zyoonse." Ciyubunuzyo 20:7-9 acalo cifwanikisa kunyonyoonwa akufwa kwa masi aayo aakabungene antoomwe kuti azinge "kulwana" Messiah a cikombelo cakwe "eelyo cuulu ca myaka caakusika kumamanino." Zyoonse zintu eezyo ziyoocitika a "kuboola" kwa Messiah, nkokuti aciindi ca parousia (1 Bakolinto 15:23). Eeco ciiminina kuti Ciyubunuzyo 20 ceelede kwiindulula kwaamba caambidwe kale mu Ciyubunuzyo 19, mpoonya ciindi ca parousia ceelede kucitika kuzwa waawo, kutali kiitaninga sika "myaka iili cuulu."

Venema ukosozya kuti, "Kweendelana akataa zilengaano eezi—mu mulaka, mumikonzyanyo, mukubelesya cishinshimi ca Cizuminano Cakale, a zintu zicitika muli ncico—cili sindingene akujatila maanu cakuti cikonzya buyo kwaambilizya busanduluzi bomwe: zyoonse zyobile zisandulula ciindi ca musela nceenya, zintu zicitika nzyeenya amamanino aamusela ngeenya." Kusanganya waawo, mbwaanga akuboola kwa Yahushua uyoopa bulemu kuli boonse basyoma muli nguwe (mbuli bwaamba, Mateyo 24:31; Johane 6:39-40), alimwi kweendelanya a Ciyubunuzyo 19:18, 21, bamwi boonse bayoozaya, kunyina uutikacaale kuti akanjile mu musela uutobela-parousia wa "myaka iili cuulu" akuzuzya nyika lwabili.

"Myaka iili Cuulu" a "Kubuka Kuzwa Ku Bafu Nziindi Zyobile"

Makani eeni aali mu Ciyubunuzyo 20 atondezya kuti, majwi aakwaamba kuti "myaka iili cuulu", maambila mbali nokuba aamikonzyanyo, kuleka myaka iili cuulu bwinibwini.

Ciyubunuzyo 20:4 caamba baabo "baboola ku buumi" (muci Giliki = ezēsan), eeco caambwa kuti "nkubuka kuzwa ku bafu kutaanzi" mu Ciyubunuzyo 20:5b. Aabo basyoma kuti kunyina bulelo bwa myaka iili cuulu balanganya "kubuka kutaanzi" kuti mbobuumi bwesu bupya akukamantana aa Messiah, nokuba kubuka kwa Messiah oomo basyomi mobayootola cibeela kabali mu moza. Mabala aakanana Ciyubunuzyo 20:4-6 apa twaambo twini ncokubelesyegwa bbala lya [ezēsan] ziindi zyobile kuti taliiminini kubuka ncobeni mumubili kwaandaanyidwe myaka iili cuulu pe.

Zibalo zikonzyene mu Cizuminano Cipya a Cizuminano Cakale mu Ciyubunuzyo 20:4-6, zitondezya kuti "kubuka kutaanzi" nkwamu moza alimwi kuyootola busena kakutaninga sika kubuka kwamamanino, kwa bantu boonse, mumubili aciindi ca kuboola kwabili naa [parousia].

Busanduluzi bwa kubuka ooko kuli muli Johane 5 amu Ciyubunuzyo 20 kuleendelana kapati. Muli Johane 5:25 "iwoola lya kuboola kwabili nkolili kale: kubukila ku buumi kwa baabo bafwide mumubili kulalibonya cino ciindi mbuli buumi bwa baabo bafwide mu muuya," kakuli muli Johane Johane 5:28 "mazuba aacizya kumbele, aa kubuka kwa ciindi ca kuboola kwabili ngaatondezyedwe. Ijwi lya Mwana lilaa nguzu kapati zya kulenga buumi bwa muuya cino ciindi, aboobo linoolaa nguzu kapati kuciindi eeco zya kubusya bafwide."

Kulisalazyidwe akataa BaEfeso 2:5-7 a Ciyubunuzyo 20:4-6. BaEfeso 2:5-6 babelesyede majwi mbuli aakuti "wakatupa buumi," "wakatubusya kuzwa kubafu," akuti "wakatupa busena mubulemu bwa kujulu" nobaambilizya kubuka mu moza antoomwe a Messiah mumusela uuno, wa mazubaano. Mbuli mulembi wa Cizuminano Cipya Wright mbwaamba, "Kakwiina kudyakaizya bulangizi bwa kubuka kuzwa ku bafu kwa masimpe ooko kuciboola, mbwaanga cikombelo cipona muciindi cilaakatikati ka kubuka kwa Messiah abuumi bwaco buciboola, eeco ciiminina kuti kubelesyedwe twaambyo mukwaamba 'kubuka kuzwa ku bafu'; mulaka ulakonzya kuyiisyigwa kwaamba bukkale bwa Bunakristu oobo bupanduludwe mu [BaEfeso] 2:10." Eeco cileendelana a Ciyubunuzyo 20:4-6 mukuti, mutwaambo tobile toonse, majwi aamba buumi akubuka kuzwa ku bafu alabelesyegwa mu moza amu maambila mbali, aabo batola cibeela mu zintu eezyo balikkede kabaliibide mumasena aakujulu, alimwi eeco ciindi ncicecino. Mulaka uukonzyanya wa kuzyalululwa mumoza nanka "kubuka kuzwa ku bafu", majwi aakusandulula kubuka kuzwa ku bafu mbuli bwaambidwe mu Bakolose 5:17; Galatiya 6:15; Bakolose 2:12-13; and 3:1-4. 21

Eeci cileendelana aceeco Yahushua caakaamba muli Luuka 20:37-38 (langa amuli Mateyo 22:31-32; Maako 12:26-27), "Lino kumakani aakubusyigwa kwa bafu, sena tamunabala mubbuku ndyaakalemba Mozesi mpaakalemba akaambo ka citeyo cakali kuyaka, aawo walo mpaamba Mwami LEZA WA ABULAHAMU, A LEZA WA ISAKA, A LEZA WA JAKOBO. Lino ooyo tali Leza wa bafwide pele ngu Leza wa bazumi; nkaambo boonse baponena muli Nguwe." Ibbala ndaakabelesya Yahushua lya "kubusyigwa" mu kampango. 37 ndyakuti egeirō, ngumwi muyanda wa mabala aabelesyedwe mu Cizuminano Cipya aayo aambilizya "kubuka kuzwa ku bafu". Ikaambo keni aawa nkakuti Yahushua wakali kusalazya kubelesya mulaka wa "kubuka kuzwa ku bafu" mukusandulula Abulahamu, Isaka, a Jakobe kabali muciimo cilaakatikati, kutali ciimo ca mubili uubusyidwe kuzwa ku bafu. Mumajwi amwi, Yahushua ubelesya bbala lya egeirō muli Luuka 20:37, munzila njeenya aabo basyoma kuti kunyina bulelo mu cuulu ca myaka mbobabelesya bbala lyakuti anastasis, mu Ciyubunuzyo 20:5-6.

Kwiimpanya inzila zya "kutaanzi-kwabili" mu Ciyubunuzyo 20:4-6:

Kuyungizya waawo, kuli "majwi aayubununa" cakugaminina mu Ciyubunuzyo 20:4-6 aalulamika kusandulula bbala litaanzi lya ezēsan (mu Ciyubunuzyo 20:4) mu moza, mpoonya lyabili lyakuti ezēsan (mu Ciyubunuzyo 20:5) kuti lijatikizya mubili. Mu Ciyubunuzyo 20:5-6 "kubuka kutaanzi" a "lufu lwabili" ziligaminide kwaambwa; "kubuka kwabili" a "lufu lutaanzi" tazyaambidwe, pele zyaambwa cakubembeleka mumbali. Nokuba boobo, ibbala lyakuti 'kutaanzi' (prōtos) antoomwe alya "kubuka", kunyina kumbi nkolijanwa mu Bbaibbele pele buyo waawa. Kubelesya

Bbala lya "kutaanzi" antoomwe alya "kubuka", litupa cijuzyo eeco citondezya kuti ooko "kubuka kuzwa kubafu kobile" kwaambidwe mu Ciyubunuzyo 20:4-6, mubwini, kuliimpene bweende.

Kwiinda myaka iili 200 yakainda, Alexander Fraser wakatondeka kuti, "Mabala aakuti, kutaanzi a kwabili, alibelesyedwe mu Mangwalo mukwiimpanya ziiyo eezyo munzila imwi kazikonzyanya, pele munzila zimwi kaziimpene, nkaambo inga katuyoolubizya kuyeeyela cimwi mucibaka ca cimbi." Mu Ciyubunuzyo amumasena aambi, kubelesya bbala lya "citaanzi" a "cabili," "cakaindi" a "cipya," "citaanzi" a “camacaalizyo" aayo mabala aandaanya bweende bwa zintu, kuleka buyo kutobelana kwa zintu zitola busena zikonzyanya. Aboobo, mu "kubuka kutaanzi" takuli buyo kutaanzi mu kubuka kuzwa ku bafu kobile kukonzyanya pele kulaandaanyidwe kuzwa ku "lufu lwabili" antoomwe a "kubuka kwabili" ooko kusendekezyegwa. Ncobeni, masimpe kuti "kubuka kwabili" takwaambidwe cigaminina muli lwako, aboobo oobo mbo bumboni bwakuti kubuka "kwabili" nkwa musyobo wiindene kuzwa ku kubuka "kutaanzi": "Johane ulakaka kupunda zina lya 'kubuka kwabili' mu kampango 20:13 [nokuba muli ka 20:5-6], kutali nkaambo kakuti kubuka kuzwa ku bafu takuli mumuzeezo, pele nkaambo kakuti walo ulombozya kulesya muzeezo wini ooyu … wakuti 'bamwi bafwide boonse' bayoopona 'buumi' mukwaamba cabwinibwini eelyo nobaya 'kwiimikila alimwi' kabalaa mibili… ‘Kubuka,' kwabili kwa baabo bateempwi, takukonzyi nokuba aasyoonto kwaambwa boobo nkaambo takutozyi ku buumi butamani, pele ku lufu lwabili."

Ooku kubelesya bbala lya "kutaanzi" a "kwabili," "kwakaindi" a "kupya," "kutaanguna" a "kwamacaalizyo" mbuli majwi aayimpana, kutali aatobelana akutola busena, kulajanwa mu Cizuminano Cipya coonse. Fraser waamba kuti, "Mangwalo ziindi zinji aambilizya kuzyalwa kwabili naa kupya. Kuzyalwa kutaanzi nkwakuzyalwa mu mubili. Saa ncintu ciyandika na akuli bwabili na? … Kuzyalwa kwabili kakwiina kudonaika nkwa maambila mbali.

Mu 1 Bakolinto 15:22, 42-46, "Adamu mutaanzi" wakalaa mubili uufwa, wa bulongo alimwi wakaleta lufu; "Adamu wamacaalizyo" wakalaa mubili uutafwi, wa moza alimwi wakaleta buumi. Mu 1 Bakolinto 15:47-49, "muntu mutaanzi" wakazyila ku bulongo alimwi ngwa bulongo bwaansi; "muntu wabili" uzyila kujulu alimwi ulaa bulemu bwa kujulu. Mubandi ookwa Paulu wa "Adamu mutaanzi a wabili" a "muntu mutaanzi a wabili" ncibeela ca mibandi mipati ya zintu zya kwiimpanya, kusanganya a mubili "mutaanzi" naa "waanyika" ("wabulongo") mpoonya nkokutobela mubili wamu "muuya" ("wakujulu") (1 Bakolinto 15:42-44, 46-49).

Muli Maako 2:21-22 Yahushua ubelesya "cakaindi" a "citana fwinyana" (cisani ; waini a nkomo zya makutu) kwiimpanya buumi "bupya" oobo ngo mulumbe mubotu Yahushua ngwaakaleta, mukwiimpanya ku tusinyansiya a ziyanza zya buJuuda "zyakaindi" (langa amuli Luuka 5:36-39). Mu 2 Bakolinto 5:17 Paulu nabelesya bbala lya "zintu zikulukulu" a "zipya" , eeco cilisalazyide kutondezya kwiimpana ncobeni kuponena buumi muli Messiah kwiinda kupona buumi kakwiina Messiah. Mbweenya buyo, mu BaEfeso 4:22-24 amu Bakolose 3:9-10 Paulu wiimpanya "buntu bukulukulu" (muntu uutaninga sanduka) ku "buntu bupya" (muntu wakasanduka).

Kaambo keni ka Ciyubunuzyo 20:6 nkakuti ibafwide mu Ciyubunuzyo 20:4 mbabaabo, kwiinda mukutola cibeela mu "kubuka kutaanzi," bakainda kuzwa ku lufu kuya ku buumi kabataninga fwa lufu lwa mubili; mbube, balaangulukide kuzwa ku nguzu zya lufu lwabili eelyo nobafwa mumubili. Balo balaa lwaanguluko oolu nkaambo, kabataninga fwa mu mubili, Messiah wakabaangulula kuzwa kubuzike bwabo kwiinda mu bulowa bwakwe, akubabamba bulelo bwa bapaizi. Alikke uufwide kali Munakristu ngulaa coolwe cakulelekwa boobo. Mumajwi amwi, Ciyubunuzyo 20 ncileleko ca Banakristu bafwide.

Kuzisanganya zyoonse, "kubuka kutaanzi" kucitika mumusela uuno, nkwa mumuuya (nkokuti, kukamantana aa Yahuwah kwiinda mukweendelana aa Messiah), alimwi eeci cijatikizya basyomi balikke; "kubuka kwabili" kusendekezyegwa nkubuka kwa boonse kumamanino aa musela, nkwa mubili, alimwi kuguminizya bantu boonse. "Lufu lutaanzi" (lusendekezyegwa) ncibeela ca buumi buno, ndwa mubili, ndwa kaindi kasyoonto, alimwi lujatikizya bantu boonse; "lufu lwabili" luyoocitika bwanoomanide buumi buno, ndwa mumuuya (nkokuti, kwaandaanyigwa kuzwa kuli Yahuwah nkaambo kakwaandaana aa Messiah), nkwa lyoonse kukabe kutamani, alimwi kujatikizya buyo baabo batasyomi.

Kukosozya Makani

Cizuminano Cipya cituletela nzila zyobile oomo "musela ooyu" wa cinyonyoono a zintu zya ciindi cisyoonto, muutobelwa aa "musela uuciboola" ooyo uunooliko lyoonse kukabe kutamani kakwiina cinyonyoono. Nokuba kuti wakatalisyigwa aa kuboola kwa Messiah kutaanzi, "musela uuciboola" uyooloba aciindi ca kuboola kwakwe kwabili, eeco ciyokwiiminina kubuka kuzwa ku bafu kwa bantu boonse, bacipona abafwide, akuyakulula zilengwa leza zyoonse. Zyoonse zyobile, Ciyubunuzyo 20 a Mangwalo woonse taakwe busena, bwa ciindi cisyoonto nokuba bwa ciindi cilamfu, nokuba "buleli bwa myaka iili cuulu" bwa Messiah abasaante bakwe butobela kuboola kwabili [ parousia].

Eeci cibalo tacili ca-WLC cakalembwa aaba Jonathan Menn, J.D., M.Div.

Twakagwisya mucibalo citaanzi woonse mazina aabakomba mituni ngobaita Taata a Mwana, akubikka mucibaka cangawo mazina aabo eeni. Kuyungizya waawo, twakajokolosya mu Mangwalo mazina aa Taata a Mwana, mbuli mbwaakalembedwe kutaanguna a balembi ba Bbaibbele bakayoyelwa moza. Nkamu ya-WLC