Inyimbo zyizwide zyiimbo zilumbaizya Jeesu mbuli zyakuti “Away in a Manger” (Kulaale mu cimpati) kusikila kuli cakuti “Jeesu Ulaboola Alimwi,” Banakristu baimba nyimbo zya Yahushua. Baimba zyiimbo zya kuzyalwa Kwakwe, milimo, bulowa, lufu Lwakwe a Kuboola Kwakwe. Nzisyoonto buyo nyimbo zitembaula Taata alimwi akataa zyeezyo, zigeme buyo bulemu Bwakwe, kumweka abukali Bwakwe.
Ooku kugamika mizeezo kuli Yahushua acituuzyo cakutaliyanda ncaakatupa, kanjaanji ciinda kumbali kasimpe ka Mangwalo kakuti: Nguni Mufutuli wini.
Nguni Mufutuli wini?
Mufutuli wa babisyi kwiina awumbi pele ngu Yahuwah Lwakwe.
Muli bakamboni Bangu, mbwaamba Mwami Yahuwah.
“Alimwi Mutwanga Wangu ngwindakasala.
Kutegwa muzyibe akusyoma muli Ndime,
Akumvwisisya kuti Ime Ndime Nguwe.
kuti taakwe uumbi kunze lya Ndime.
Ime Ndime Mwami Yahuwah endikke,
kunze Lyangu taakwe uumbi mufutuli.” (Bala muli Izaya 43:10-11.)
Ooyo Uupa-Buumi nguwaabamba nzila ya kunununa bantu. Ncobeni, Yahushua nguuyelede kupegwa luyando lwesu akulumbaizyigwa, pele Saatani wakasisa kasimpe kainda bulemu kuti Yahuwah Lwakwe ngo Mufutuli wesu wini. Muciindi cakuti luyando lukwelele miya yabantu kuli Yahuwah akulanganya cipego Cakwe cipati kuli ndiswe, Saatani wakazuzya mizeezo yabantu abukandu bwakuyoowa Taata cakuti bakagamika luyando akukomba kuli Yahushua — pele Yahushua lyoonse wakali kutozya kulumbaizya kuli Taata.
Bumwi buzuba umwi mukubusi wakavwubide wakabuzya Yahushua kuti, “Omwiyi mubotu, ninzi nceelede kucita Ime kutegwa ndikatambule buumi butamani?” Yahushua wakamwiingula mpeenya aawo kuti: “Nkaambo nzi ncondiitila kuti omubotu? Kunyina mubotu pele AlikkeYahuwah.” (Bala Mateyo 19:16-17.)
Bafutuli balavwuna!
Mulimo wa Mufutuli ngwa kuvwuna! Mumangwalo woonse, Yahuwah wakaimikizya bafutuli banjaanji. Ncobeni, makani aayinduluka kumvwika lyoonse mumusela wabana ba Isilayeli nga kuzanga mumoza akuzundwa abasinkondonyina, alimwi kabajokela kukukomba Yahuwah, alimwi Yahuwah kabasalila mufutuli wakubavwuna ciindi aciindi.
Kumane bantu bako bakakuzangila akutakuswiilila,
bakafutatila milawo Yako.
Bakajaya basinsimi aabo bakali kubacenjezya,
aabo bakali kubaambila kuti bajokele kulinduwe.
Bakali kukusampaula ciindi aciindi.
Nkaako wakalekela basinkondonyina kuti babazunde akubalela,
mumapenzi aabo bakakulilila, wakabavwuwa kuzwa kujulu.
Mulweengelelo lwako lupati wakabatumina basololi,
aabo bakabavwuna kuzwa kuli basinkondonyina. (Nehemiya 9:26-27, NKJV)
Bana Isilayeli bansiku bakalizyi kabotu kuti Yahuwah wakali Mufutuli wabo ncobeni, ooyo wakabambilwa kuvwuna Isilayeli. “Ime, Ime ncobeni, ndime Yahuwah, alimwi kunyina Mufutuli uumbi kunze lya Ndime.” (Bala Izaya 43:11.)
Lufutuko lwa Yahuwah
Yahushua, mbweenya mbuli Joshua wakaliko kumbele lyakwe, wakali mufutuli, wakakomezyegwa aa Yahuwah, kuti asolwede bantu bokwa Yahuwah kuya ku Nyika ya Cisyomyo. Mungele wakaambila Josefa kuti: “Webo uyoomwiitta zina lyakwe kuti ngu Yahushua, nkaambo walo uyoovwuna bantu bakwe kuzwa kuzinyonyoono zyabo.” (Mateyo 1:21, NKJV) Izina lya “Yahushua” liiminina kuti “lufutuko lwa Yahuwah.” Nkokuti Yahushua ngonguwe; ncobeni lufutuko lwa Yahuwah.
Pele mulimo wa Yahushua wakali mupati kwiinda buyo kuvwuna bana ba Isilayeli kuzwa kuli baLoma bakabatolede buzike. Yahushua wakatuminwa kuzyoonununa nyika iizwide babisyi!
Eelyo Johane Mubbizyi naakazyalwa, wisi wakwe, Zacharias, wakakkomana kumwi kaamba kuti:
“Atumulumbaizye Mwami,Yahuwah wa Isilayeli!
Waboolela kugwasya bantu bakwe wabanununa.
Watupa Mufutuli Singuzu,
uuzwa kulunyungu lwamuntu wakwe Devedi.
Mbubonya mbuli mbwaakaamba nsiku, kwiinda mubasinsimi bakwe basalala.
Kuti uyootufutula kuzwa kuli basinkondoma,
Akutuvwuna kuzwa mumaanzaa abaabo batusulide.
Wakaamba kuti uyootubeda aaluzyalo mbuli mbwaakabeda bamatata aaciindi,
alimwi uyoobamba cizuminano Cakwe cisalala.
Acikonkezyo cipati wakasyomezya kuli taata Abulahamu,
wakasyomezya kuti uyootuvwuna kuzwa kuli basinkondoma,
kutegwa tukamubelekele cakutayoowa,
akweenda cabusalali abululami kunembo Lyakwe,
mazuba aabuumi bwesu boonse. (Bala Luuka 1:68-75.)
Ndakanununwa nceyandisya koompolola makani aayo!
Sinkondonyina mupati wa muntu tali yooyo ngobakkede limwi munsimunsi uunyemede pe, nokuba muzyali (naa mukaakwe) uumupenzya, nokuba cisi ciyandisya kuvwundula nkondo pe. Ngu Saatani, sinkondonyina wa miya yesu. Yahuwah wakatupa Yahushua kuti atuvwune kuzwa ku cibi. “Nkaambo Ooyo watakazyi cibi wakatubeda cibi cesu, kutegwa tukonzye kubaa bululami bwa Yahuwah muli nguwe.” (Bala 2 Bakolinto 5:21.)
Oobu bululami bulipedwe kufumbwa muntu uubutambula kwiinda mukusyoma. Aboobo, nguzu zya bulowa bwa Yahushua zilavwuna aabo basyoma kuzwa kuzyibi zyabo, kakuli bubotu bwa buumi bwakwe butakwe cibi bubalilwa mucibaka cesu!
Bunji bwa bana Isilayeli mumazuba aa Messiah bakali kulangila Messiah kuti abavwune kuzwa kuli basinkondonyina ba mapolitikisi. Basyoonto buyo bakamvwisyide bupati bwa mulimo wakwe. Umwi akataa basyoonto aabo wakali Simeoni.
Ooyu mwaalumi wakali mululami, uutonkomene wakali kulindizya Kuumbulizyigwa kwa cisi ca Isilayeli, aboobo Muya Uusalala wakali ali nguwe. Wakayubunwidwa aMuya Uusalala kuti takooyoofwa kusikila akamubone Messiah ookwa Yahuwah. Aboobo wakaboola ku tempele keenzyegwa aa Moza. Mpoonya bazyali nibakeeta Mwana Yahushua, kuti acitilwe mbuli ciyanza ca mulawo, walo wakamubweza mumaanza aakwe akulumbaizya Yahuwah akwaamba kuti:
“Mwami, ncobeni wabamba cisyomezyo cako, lino ndileke ndemubelesi wako mfwe muluumuno. Nkaambo lwangu ndemwini ndali bonena lufutuko lwako, lwalo ndoobambila bantu boonse kababwene. Ooyu ngomumuni uuyubununa luyando lwako kuli bamasi, nguuleta bulemu Bwako kubantu bako” (Bala Luuka 2:25-32.)
Naakamanizya kupona buumi butakwe cibi, Yahushua wakatufwida mucibaka cesu. Mpoonya Yahuwah wakamubusya mubuzuba bwatatu akumusumpula kweendelanya abulumbu bwa cituuzyo ncaakatupa. “Pele Yahuwah wakamusumpula akumukkazika kululyo lwakwe. Wakamucita kuti abe Musololi a Mufutuli, kuti bantu ba Isilayeli beempwe akutambula kulekelelwa kwamilandu yabo.” (Bala Milimo 5:31.) Mbombuboobo Yahuwah mbwakuyanda yebo!
Mbweenya buyo Yahuwah mbwaakakomezya bafutuli muciindi cakale kuti bavwune bantu bakwe kuzwa kuli basinkondonyina baanyika, mbweenya mbwaakakomezya Yahushua kuti anunune bantu Bakwe kuzwa kuzibi zyabo. “Nkaambo obuya Yahuwah mbwaakiiyanda nyika cakuti wakiipa Mwanaakwe Simuzyalwaalikke, kutegwa kufumbwa uusyoma muli Nguwe atakafwidilili pele akabaa buumi butamani. Nkaambo Yahuwah taakatumina Mwanaakwe munyika kuti azyoosinganye nyika pe, pele kutegwa nyika kwiinda muli Nguwe ikakonzye kufutulwa.” (Bala Johane 3:16-17.)
Caabilo ca lufutuko cicipedwe. Boonse balipedwe kakwiina muulo aabo bacengulukila kuli Yahuwah Mufutuli wesu akutambula cipego Cakwe cipati kwiinda mulusyomo, nkaambo “Lufutuko ndulwa Yahuwah.” (Bala Jona 2:9.)
