Hena kuba Mwami wa Bami ciiminina kuti Yahushua ngu Yahuwah na?

Ibbuku lya Ciyubunuzyo liita Yahushua ziindi zyobile kuti mwami wa bami a simalelo wa basimalelo. Mu zibalo eezi, walo upanduludwe kuti Mwanaambelele ooyo wakalwanwa aamunyama abami baanyika, pele kumamanino, wakabazunda boonse basinkondonyina. ¹

Ciyubunuzyo 17:14 “ Alimwi bayoolwana a-Mwanambelele, pele Mwanambelele uyoobazunda, nkaambo ngonguwe mwami wabami, ngu mweendelezi wa beendelezi. Abalo balazunda mbali abo, baitidwe, basale, basyomi.”

Ciyubunuzyo 19:16 Nkabela kucikobela cakwe akucibelo cakwe kwakalilembedwe izina. Izina lyakwe ndeeli, MWAMI WA BAMI, MWEENDELEZI WABEENDELEZI.”

Bantu banji basandulula cuuno ca mulimo eeci kuti mbobumboni bwakuti Yahushua ngu Leza. Ikaambo keni nkobataminina nkakuti alikke Yahuwah nguukonzya kukkala acuuno eeci; nkabela, Yahushua weelede kuti awalo kali Leza. Kanjaanji, twaambo twa Paulu kuli Timoti tulabelesyegwa kutabilila muzeezo ooyo kuzwa mu mangwalo:

1 Timoti 6:13-16 Ndakulailila kubusyu bwa-Yahuwah, uupa buumi kuzintu zyoonse, akubusyubwa-Kristo Yahushua, uwakalyaamba lulilungululo lubotu kunembo lya-Pontiyo Pilato, 14 kuti uyobole aya makani ngowalaililwa, cakubulaimpuna nka kampenda, mane do kubuzuba mbwayoopompa Mwami wesu Yahushua Kristo. 15Oko kupompa kuyooba kuciindi ceelede, nkaambo uyookuleta Singuzu uutembaulika, uuiide alike, Mwami wabami, Mweendelezi wabeendelezi, 16uupona amuya myaaka, uukede mumumuni uutavulwa afwaafwi, uutanabwenwe nokuba kukonzeka kubonwa kumuntu. Abe abulemu anguzu zitamani. Akube boobo.

Bamwi bataminina kuti ibbala lyakuti “Walo” mukampango 15 lyambilizya Yahushua, aboobo akumubamba kuba “muleli alike luzutu, Mwami wa bami, a Mweendelezi wa Beendelezi.” Balagozya akuti Yahushua, mbube, ngu Yahuwah. Nokuba boobo, Paulu waambaTaata Yahuwah aawa, kutali Yahushua. Swebo tulizyi oobu nkaambo Paulu upandulula kuti ooyu “Walo” nguyooyo uutanabwenwe aa muntu nabani “uutanabwene nokuba kukonzeka kubonwa ku muntu.” Mangwalo ayiisya ndiswe kuti Yahuwah takonzyikubonwa.² Kujanza limwi, Yahushua wakabonwa amakunga aabantu muciindi ca mulimo wakwe anyika. Kunze lyaku baLeza uutalibonyi, Yahushua mukonzyanyo wa Leza uutalibonyi [Yahuwah].

Hena kuba Mwami wa Bami Ciiminina Kuti Yebo Nduwe Yahuwah na?

Bamwi inga kabazicumanana kuganta kuti, nokubaboobo, kuti nkaambo kakuti Taata Yahuwah a Yahushua boonse bobile balaa zina lya cuuno likonzyene, eeco ceelede kwiiminina kuti boonse bobile mbaa Leza. Ooku kuyeeyela kuli boobu kulubide takubikkili maanu kubumboni buzwide boonse bwa Mangwalo. Malembe aa Bbaibbele alembedwe bantu bambi abalo bakapedwe zina lya cuuno eeli. Masimpe, swebo nitwatali kukonzya kukosozya kuti, abalo, mbaa Yahuwah. Ngooyu mukonzyanyo, Mwami Artaxerxes, muleli sikukomba mituni, wakali kulyaamba kuba mwami wa bami:

Ezula 7:11-13 Lino ngaaya majwi aalugwalo mwami Aritasasta ndwaakapa Ezara mupaizi mulembi, sikulemba majwi aamilazyo ya-MWAMI ambetaz yakwe nzyaakabikila ba-Israyeli. 12 “Aritasasta mwami wa bami”ulalembela Ezara mupaizi uulemba makani aamulao wa-Yahuwah wa kujulu. Koba aluumuno kuciindi caambwa. 13Ndalailila kuti boonse bantu ba-Israyeli, abapaizi bakwe, aba-Levi bakwe, bajanwa mubwami bwangu, bayanda mu myoyo yabo kuya ku-Jerusalemu, bakusindikile.

Eelyo eeli zina lya cuuno nokuba kuti lyakali lya kulyuulika mu kaambo ka Artaxerxes, Yahuwah ngonguwe wakaulikide mwami simituni wiitwa kuti Nebuchadnezzar:

Ezekiya 26:7 Nkaambo mbuboobu mbwaamba Mwami YAHUWAH. “Amubone! Ndaletela Turo Nebukadinezara mwami wa-Babuloni, mwami wa bami, uuzwa kulubazu lwa kunyika, Uleza ambizi ankalaki abasimabbiza amakamu makamu aabantu.”

Ikuti mwami wa bami kalili zina lyeelela buyo kuulikwa baleza, mbubuti Yahuwah mbwakali kunga kaluleme kwiita mwami uutazyi leza kubelesya zina eelyo? Cili boobu nkaambo eeli zina lya mulimo talibelesyegwi buyo kuli Yahuwah.

Milaka yabu Juuda kanjaanji ibelesya bbala lya cintu kuti lisalazye zina limbi muciindi ca kupandulula cintu nokuba muntu umwi mumabala aanungilidwe mbuli mbotucita swebo. Njeeyi mikonzyanyo imwi iili mu Mangwalo oomo bbala lya cintu mbolibelesyedwe kusalazya zina limbi alimwi ambotukonzya kulyaamba munzila yiindene mazubaano:

• Nebuchadnezzar wakaita Yahuwah kuti “leza wa baleza” nkaambo Leza wa Daniele wakali kukonzya kusandulula maloto.³ Mumulaka wesu swebo inga twaamba kuti, Leza wa Daniele ngo mupati wa boonse naakuti Walo ngo mupati wa baleza boonse.
• Noah wakaamba kuti Canaani uyooba “mulanda wa balanda.”⁴ Ncociiminina eeci cilatugwasya kumvwisyisya kuti mwanaa Noah musyoonto ali boonse wakali kunoolanganyigwa kuti ulaansi lya boonse nkaambo kacinyonyoono cakwe.
• Izyuli lya mukati mwini mu civwuka ca kupailila, alimwi aakale mu Tempele, oomo mwaakabede Yahuwah, mwakali kwiitwa kuti “busena busalalisya,” naa, mbuli mbotunga twaamba, busena bwiinda kusetekana naa busena busetekene atalaa masena woonse.⁵
• Mwami Solomoni waambwa kuti wakalemba nyimbo zisika 1,005. Lwiimbo lwa Solomoni ciiminina “lwiimbo lwa ziimbo” naakuti, mbuli mbotunga twaamba, lwiimbo lwiinda Kubota ziimbo zyoonse.⁶
• Ibbuku lya Mukambausi lyaambilizya buumi kakwiina Yahuwah kuti “ nzya buyobuyo“ naa icintu ciinda kubula mpindu atalaa zyoonse, mbuli mbotunga twacaamba.⁷
• MuciHebulayo citaanzi, Mozesi wakaamba kuti Yahuwah ngo mukamwini wa “julu lya majulu.” Lino kutugwasya kumvwisyisya ncociiminina, basanduluzi bakapindula kaambo kuti kaambe kuti “ijulu lili atalaa woonse.” ⁸

Nokuba kuti kuli mikonzyanyo minjaanji iikonzya kulungululwa, eeyii ilatugwasya kubona kuti majwi aakuti mwami wa bami ninzila yabuJuuda yakwaamba muntu umwi kuti ngo mwami mupati aali boonse. Ikuti mungele mu cilengaano ca Johane ca mamanino aaciindi nakayandide kuti Johane andiswe tuzyibe kuti Yahushua ngu Leza, walo nakaamba kuti Yahushua ngu leza wa baleza alimwi mwami wa bami, nkaambo mbombuboobu Yahuwah mbwapanduludwe:

Ciibalusyo 10:17 “NkaamboYahuwahLezawanungu-Leza wa baleza, mwami wa bami, Leza mupati singuzu uuyoosya, uutalangi ziimo zya bantu, uutatambuli makulo.

Pele eeci tacisyi mungele ncaakali kuyanda kwaamba. Kunze lyaboobo, mungele wakaamba Mwanaambelele kuti nguuli atalaa bami boonse, alimwi ngo simalelo wa basimalelo boonse. Artaxerxes wakali mwami mupati ali boonse mubuzuba bwakwe, mbweenya Nebuchadnezzar mbwaakabede mumazuba aakwe. Ncociiminina Ciyubunuzyo, nokuba boobo, cipandulula kuti Yahushua ngo mwami mupati ali boonse a simalelo, kutali buyo mumusela uupedwe, pele kwaciindi coonse.

Nkaambo nzi Yahushua Ncayitwa kuti Mwami wa Bami?

Nkaambo nzi Yahushua ncalaa zina lya cuuno lisumpukide eeli? Kunyina Mangwalo naapandulula nokuba kusendekezya kuti ooku kulemekezyegwa kuyiila buyo kuli nguwe nkaambo walo ngu Leza pe. Nanka kuti walo wiitwa kuti ngu Leza wa baleza mbuli Yahuwah mbwabede mukampango kali atala aawa. Kunze lya boobo, swebo twaambilwa kuti ooyu mutwe wa cuuno uusumpukide wakapedwe kuli Yahushua kuzwa kuli Yahuwah:

BaEfeso 1:17, 20-23 Ndakomba kuti Yahuwah wa-Mwami wesu Yahushua Kristo, Wisi wa bulemu, amupe muuya wa maanu awa ciyubunuzyo, mube aluzibo lwa nguwe. Nzizyonya zyakalibonya muli-Yahushua Kristo kuciindi eco ncaakamubusya kuzwa kubafu akumubika kujanza lyakwe lya lulyo mumyeenya ya mujulu, ²¹kuti ainde loko boonse beendelezi abapati abasinguzu abami, akulemekwa kwiinda mazina oonse aambwa, nikuba kuciindi ecino nikuba kuciindi ciciza, 22Wakabika zintu zyoonse kunsi lya maulu aakwe, alimwi wakamubika kuti abe simutwe wazintu zyoonse kumbungano. ²³ Imbungano njiyonya ngumubili wakwe, mbobuzule bwayooyo uuzula zintu zyoonse.

Yahuwah wakabusya Yahushua kuzwa kubafu akumusumpula abusena bwiinda kubaa nguzu zyabweendelezi mu bulelo butamani buciboola, kutali nkaambo kakuti walo ngu Yahuwah, pele nkaambo kakuteelela Leza wakwe [Yahuwah], mbuli Paulu mbwapandulula mulugwalo lwakwe kuli Bafilipo.⁹

Yahuwah Nguusumpula Bami ba Kulela mu Bweendelezi Bwakwe

Mangwalo alembedwe kuti Yahuwah wakasala bantu kuba bami mu bweendelezi Bwakwe bwa bulemu. Ngooyu mukonzyanyo, eelyo bana Isilayeli nobakali kulombozya kubaa mwami mbuli masi aambi, balo bakapenzya mushinshimi Samueli. Pele Yahuwah wakamwaambila kuti acite mbuli bantu mbubakamukumbila, alimwi tiibaakaka Samueli pele Yahuwah kubabeda mwami.

1 Samueli 8:6-7 Pele makani akabija mumeso aa-Samuele nibakaamba kuti, Utupe mwami wakutubeteka, nkabela Samuele wakakomba kuli-Yahuwah, ⁷ Lino Yahuwah wakaambila Samuele wati, “Swiilila majwi aabantu mbuli makani oonse ngobakwaambila, nkaambo kakuti teensi nduwe ngubasampaula, ndime ngubasampaula kutaba mwami kuli mbabo.”

Mpoonya Yahuwah wakaambila Samueli kuti ananike Saulu kuba Mwami wa Isilayeli mutaanzi (muntunsi). Yahuwah wakali muleli mupati wa Isilayeli,10 alimwi aabo bakali kulela mucibaka Cakwe bakapedwe zina lya bulemu lya cuuno ndeenya.

Aakale, kwakashinshimwa kuti Yahuwah uyoosumpula muntu kuti abe mwami, kutali buyo wa Isilayeli, pele wanyika yoonse. Mwiimbi wakaamba kuti Yahuwah uyoosimpa mwami Wakwe mu Ziyoni akumupa nguzu zya bweendelezi atalaa masi oonse amwi:

Intembauzyo 2:6-12 Waamba kuti, Ndime ndakazika mwami Wangu Acilundu cisalala ca-Zioni. ⁷ Ndaluula makani. Yahuwah wandaambila kuti, Nduwe mwanaangu, Ndime ndakuzyala mubuzuba obuno.⁸ Kumbila kuli ndime, elyo njookupa masi kuti abe lukono lwako, Amagolelo aanyika ukaavube.⁹ Uyoobavwinyauna amusako walubulo Uyoobapwaya mbuli zibumbwa zya mubumbi.¹⁰Lino amucenjele, nubami. Amuswiilile, nubabetesi baansi.¹¹Amukombe Yahuwah cakuyoowa, kusekelela cakukankama.¹² Amulibombye kumwanaakwe, naatakooyookalala, Kuti mutanyonyooki munzila, Nkaambo bukali bwakwe bulafwamba kubuka. Bali acoolwe boonse bamusyoma.!

Cishinshimi Daniele ciinduluka ceeco ca mwiimbi:

Daniele 7:13-14 “Lino ndakabona muzilengano zya masiku, ndabona umwi uuli mbuli mwanaa muntu uleza amayoba aakujulu, wasika afwaafwi akuli-Sinsiku, watambulwa kuli nguwe. ^{14 “}Nkabela wakapegwa bweendelezi abulemu abwami, kuti bantu bazisi zyoonse abamisyobo yoonse abamyaambo yoonse bamumanine milimo. Bweendelezi bwakwe mbweendelezi butamani butakonzyi kweela, abwami bwakwe tabukonzyi kunyonyoonwa.

Ikuti Yahushua kali Leza, malengelo woonse anguzu zya bweendelezi nizyali kale zyakwe. Pele nakamana kumubusya kuzwa kubafu Yahuwah, Walo wakamusumpula akumupa bweendelezi, bulemu, abulelo butamani. Akaambo kaako, Yahushua ngo muleli wa bami baanyika:

Ciyubunuzyo 1:5 akuzwa kuli-Yahushua Kristo, ngu kamboni uusyomeka, iwakasaanguna kuzyalwa kuzwa kubafu, alimwi ngu mweendelezi wa bami banyika. Kuli nguwe iwakatuyanda, akutusanzya ku zibi zyesu mubulowa bwakwe mwini.

Yahushua Weendelezyegwa aa Yahuwah

Nokuba kuti ulaa busena busumpukide. Yahushua, walotayelene a Yahuwah mu bubambe nokuba mu ciimo. Walo, nokuba boobo, uleelene mu mulimo amumakanze. Kusumpulwa kwa Josefa kuba uutobela Pharaoh mu kupa malialile, kusalazya kweelana ooku, kupanduludwe mumulazyo naa mulawo wa bwiiminizi. Mukonzyanyo wa Josefa utupa kulangila kuboola kwa Messiah:

Matalikilo 41:39-41 Pharaoh wakaambila Josefa kuti, “Mbuli Leza mbwaakuzibya aya makani oonse, ncobeni taakwe musongo uucenjede mbuli nduwe. ⁴⁰Uyooendelezya iŋanda yangu abantu bangu boonse baleelede kulibamba mbubonya mboamba. Mubwami luzutu njooba mupati kwiinda nduwe. ⁴¹Alimwi Farao wakaambila Josefa kuti, Bona! Ndakubika kuti ube mweendelezi wanyika yoonse ya-Egepita.”

Nceenya cintu inga caambwa ku cilongwe ca Yahushua a Yahuwah. Nokuba kuti Yahuwah wakapa Yahushua nguzu zya bweendelezi akumubombezyela zintu zyoonse, nokuba boobo, mbuli mwiiminizi ookwa Yahuwah, Yahushua ucili mubweendelezi bwa Yahuwah.

1 Bakolinto 15:24-28 Ndilyonya naayooba mamanino, nayootambika [Yahushua] bwami kumaanza aa-Yahuwah wisi, nayoolobesezya boonse beendelezi abami abasimutwe. ²⁵Nkaambo uleelede kweendelezya mane do nanooyoobikide basinkondonyina boonse kunsi lya maulu aakwe. ²⁶Sinkondonyina musyaalizi uuyoolobesegwa ndufu. ²⁷Nkaambo zintu zyoonse Yahuwah WAZIBOMBYA KUNSI AMAULU AAKWE [Yahushua]. Pele nakwaambwa kuti zintu zyoonse zilibombesedwe, ncobeni nkokuti teensi kwaamba oyo iwakamubombesezya zintu zyoonse. ²⁸Lino naamana kumubombesezya zintu zyoonse, elyo alakwe Mwana mwini uzoolibombya kuli yooyo iwakamubombesezya zintu zyoonse, kuti Yahuwah abe malondwedo aazintu zyoonse.

Eeci citugwasya kumvwisyisya kaambo keni Yahushua ncaamba kuti Wisi wakali mupati kwiinda nguwe:

Johane 14:28 “Naakamvwa mbwendakamwaambila kuti, Ndainka, alimwi ndaboola kuli ndinywe. Kuti nomwali kundiyanda, nomwali kukondwa nkaambo njakuli-Taata, nkaambo Taata mupati kwiinda ndime.

Yahuwah wiitwa cabululeme kuti ngu Leza wa baleza, mwami wa bami, a simalelo wa basimalelo, nkaambo Walo nguulaa nguzu zya bweendelezi zipati ali zyoonse. Pele mbuli mwiiminizi ookwa Yahuwah Uutobela Nguwe, Yahushua ulakonzya kwiitwa cabululeme kuti mwami wa bami alimwi akuti simalelo wa basimalelo. Nkaambo wakali Yahuwah wakasumpula Yahushua kubaa busena bwa Mwami a Kristu (nkokuti, mwami wakananikwa)

Milimo 2:36 “Aboobo iŋanda yoonse ya-Israyeli izibisye kuti oyu Yahushua nguwenya ngo mwakabambula, Yahuwah wamucita abe Mwami a-Kristo.”

Kutegwa Yahushua ayitwe kuti mwami wa bami a simalelo wa basimalelo, eeco nkulemekezyegwa cinicini, pele taciiminini kuti walo ngu Yahuwah pe.

1 Ciyubunuzyo 19:19;20:1ff

2 Kulonga 33:20; Bakolose 1:15; 1Johane 4:12

3 Daniel 2:27-28, 46-47. Daniele2:27-28, 46-47

4 Matalikilo 9:25

5 Kulonga26:33

6 1Bami4:32; Lwiimbolwa Solomoni1:1

7 Mukambausi 1:2;12:8

8 Ciibalusyo10:17

9 Bailipo2:5-11

10 Yahuwah waambwa kuti mwami wa Isilyeli. Izaya 43:15; 44:6 atumwi tunjaanji

Eeci ncibalo citali ca-WLC. Cakazyila ku: https://oneGodworship.com/does-being-king-of-kings-mean-Jesus-is-God/

Twakagwisya mucibalo citaanzi woonse mazina aa mituni ngobaita Taata a Mwana, kubikka mucibaka cangawo mazina mataanzi ngubaapedwe. Kuyungizya waawo, swebo twakajokolosya muMangwalo mazina ookwa Taata a Mwana mbuli mbwaakalembedwe kutaanguna abalembi ba Bbaibbele bakayoyelwa moza. Nkamu ya -WLC