Manjezyeezya Aa Lucengo: Kusyoma kuti Cishinshimi Cakazuzikwa Kale
|
Eeci cibalo tacili ca WLC. Eelyo notubelesya zilembedwe aabalembi balaanze lyankamu, tusimba buyo zyeezyo zyeendelana 100% a Bbaibbele a lusyomo lwesu cino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano yamilimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu kuTusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkako tulavwuntauzya kufumbwa nkokakonzya kujanwa. |
Lusyomo lwakuti cishinshimi cakazuzikwa kale, ninzila iipilingene yakusyoma "mazuba aamamanino," cisi ca BaJuuda, myaka iili cuulu, azimwi ziiyo zijatene aazyeezyo. Lulaa mpuwo mpati kapati alimwi lulasumpaulwa cinicini ku Nyika lya ku Amelika. Ime ndatondezya ansi aawa oolu lusyomo mboluyakilidwe atalaa manjezyeezya aa lweeno aalikumbatizya ku Mangwalo. Ikuti KUFUMBWA kweezyeezya kwa lusyomo oolu kakutaluleme, nkokuti loonse lusyomo luladenuka mbuli mulwi wa njuka.
Kusendekezya Kutaanzi
Kusyoma kuti cishinshimi cakazuzikwa kale kusungilizya kuyeeyela kuti Yahuwah ulanganya bantu munzila ziindene muziindi zyaandeene nocizuzikwa cishinshimi [mbube ncobulaa zina eelyo]. Nokuba kuti kuli kwiimpana akataa basyomi balusyomo oolo, bunji bwabo balazumina kuti kuli ziindi zyaandeene eelyo nicaazuzikwa cishinshimi zili ciloba. Milimo yokwa Yahuwah akataa bantu ilangwa kuti ilaandeene, ambweni imwi iliswaangene.
Basaante ba Cizuminano Cakale bakali kulangila ceeco Kristu ncaakali kuzyoocita a Ciciingano, alimwi iswe, notuli mumusela wa Cizuminano Cipya, tulanga musyule kuli ceeco Walo ncaakacita.
|
Hena makanze ookwa Yahuwah alaandaudwe muzipaanzi ziindene zyakulanganya bantu muziindi zyaandeene na? Ooku nkweezyeezya kulaa ntenda nkaambo eeco caambilizya kuti Yahuwah ulacincauzya cakuti tazyibiki kabotu. Walo wakalaa makanze aateendelani muziindi zyakainda alimwi kunooli ujisi makanze aandeene ku misela iicizya kumbelaa ciindi. Alimwi eeco caambilizya kuti lufutuko mu ziindi zimwi nicaazuzikwa cishinshimi lwakali kukonzya kucitika kakwiina ciciingano. Lino mukuyeeyela kuli boobu, bamwi bantu balafutulwa nkaambo biyo ka mikowa azisi nkobazulilwa.
"Mpawo Yahushua wakamwiingula wakati, Mulawo mutaanzi ali yoonse ngwakuti, Koswiilila, O Isilayeli; Yahuwah Leza wesu, Yahuwah ngumwi" Maako 12:29
Leza omwe ciiminina makanze omwe kukabe kutamani.
"Yahushua wakati kuli nguwe, Ime ndendime nzila, kasimpe, abuumi: kunyina muntu kuboola kuli Taata pele kwiinda muli ndime." Johane14:6
Kuli biyo nzila yomwe iiya kuli Yahuwah: Yahushua Messiah. Basaante ba Cizuminano Cakale bakali kulangila kuli ceeco Messiah ncaakali kuzyoocita a Ciciingano, mbube aswebo, notuli mumusela wa Cizuminano Cipya, tulanga musyule kuli ceeco Walo ncaakacita.
Eelyo notuyaa kuswata bwinibwini Zizuminano, Yahuwah tajisi nzila ziimpene zyakulanganya bantu muziindi zyaandeene zya kuzuzika cishinshimi. Kunze lyaboobo, Walo ulaa makanze omwe aayaa kuyubununwa muzibeela ziindene. Ciga comwe-comwe, ciyakilila atalaa ceeco cakainda musyule lyaco akuyungizya atalaa ncico.
Kusendekezya Kwabili
Kusyoma kuti cishinshimi cakazuzikwa kale kusungilizya kuyeeyela kuti kuli nzila kwiinda yomwe iiya kuli Yahuwah. Mubwini, BamaJuuda banyenzi balanganyigwa kuti mbabasale bokwa Yahuwah alimwi balivwunidwe kale nkaambo ka nkobazulilwa, kutali nkaambo ka mulimo wa Messiah aciciingano. Bamwi balayindilizya kuya kumbele kusungilizya kuti ikuti BamaJuuda nibaamutambula Yahushua, nkokuti ciciingano nicataayandika nokuceya.
Lufu lwa kunununa lwa Messiah lwakali makanze ookwa Yahuwah ngaakajisi kuzwa kumatalikilo aa nyika.
|
"Masimpe, kweendelana a Mulawo, zintu zilasalazigwa abulowa; aboobo zinyonyoono tazilekelelwi kakutakwe kutilwa kwabulowa.." BaHebulayo. 9:22
Kakwiina kutila bulowa bwa Messiah, kunyina naba omwe wakali kunga wafutulwa: muJuuda naba muntu wa masi.
"Bantu boonse bakkala munyika bayoomukomba, boonse aabo batakalembwa nyika kiitanalengwa mubbuku lya buumi lya Mwanaa mbelele wakajaigwa." Ciyubunuzyo. 13:8
Lufu lwa kunununa lwa Messiah lwakali makanze ookwa Yahuwah ngaakajisi kuzwa kumatalikilo aanyika.
Kusendekezya Kwatatu
Kusyoma kuti cishinshimi cakazuzikwa kale kusungilizya kuyeeyela kuti Yahuwah taninga zuzika cisyomyo ca Nyika ncaakabamba kuli Abulamu.
"Mwami Yahuwah wakalibonya kuli Abulamu, wakamwaambila kuti, “Eeyi njenyika njeyoopa lunyungu lwako.” Nkabela mpoonya aawo Abulamu wakayaka cipaililo ku Mwami Yahuwah, ooyo wakalibonya kuli nguwe." Matalikilo. 12:7
"Mpawo Mwami Yahuwah wakandaambila kuti, ‘Nyamuka, usolwede bantu kunyika eeyi njindaakonkezya kuli basikale banu.’]." Ciibalusyo.10:11
Yahuwah wakaambila Mozesi kuti Walo wakali kuyanda kubapa nyika bana baIsilayeli mbuli mbwaakasyomezyede.
"Mbombuboobu Mwami Yahuwah mbwaakapa BaIsilayeli nyika yoonse eeyo njaakakonkezya kupa kuli basikale babo. Bakiitola akukkala mulinjiyo." Joshuwa 21:43
Kwaamba kuti Yahuwah uciyandika kuzuzika cisyomyo Cakwe kuli Abulamu nkukaka kuyiisya kusalazyidwe kwa Mangwalo.
|
Mangwalo alembedwe kuti Yahuwah wakazuzika cisyomyo Cakwe kuli Abulamu mubweendelezi bwa Joshuwa.
"Aalumbwe Mwami Yahuwah ooyo wakapa luumuno kubantu bakwe mbubonya mbuli mbwaakasyomezya kuti uyoobacitila. Walo wakabamba zyoonse zisyomezyo nzyaakapa kwiindila muli Mozesi mubelesi wakwe." 1 Bami 8:56
Isilayeli wakakona nyika kwa ciindi CABILI mu buleli bwa Davida a Solomoni.
Kwaamba kuti Yahuwah uciyandika kuzuzika cisyomyo Cakwe kuli Abulamu nkukaka kuyiisya kusalazyidwe mu Mangwalo. Yahuwah wakabapa nyika ziindi zyobile mbuli bulembedwe mu Mangwalo alimwi ambweni akuyungizya ciindi comwe– citalembedwe mu Mangwalo – muciindi ca Maccabeesi. Yahuwah wakazuzika cisyomyo Cakwe!
Kusendekezya Kwane
Lusyomo lwakuti cishinshimi cakazuzikwa kale, lweezyeezya kuti kuli mwaako akataa ciindi mu cibumbwa ca Daniele 2. Kunooli kaambo kamwi mukuti, zituta zya cibumbwa zilizandudwe kuzwa kumiindi. Daniele taakacibwene eeco pe. Walo wakabona cibumbwa cikkwene—kakwiina mwaako akataa miindi a zituta! Hena wacibona eeco mu cifwanikiso na? Nkaambonzi aabo basyoma kuti cishinshimi cakazuzikwa ncobabikka cisena aawa? Kalikke kaambo nkakusyonkelela Mangwalo kuyeeyela kwabo kuti kweelele mu makanze aacishinshimi.
"Mutwe wacibumbwa wakali wa ngolida iini-ini, camba caco amaboko akali aansiliva, ida lyaco azibelo zyakali zyamukuba, maulu aaco akali aalubulo, zituta zyaco zyakali zyalubulo luvwelene abulongo buumpidwe. Lino kaceebela, kwakakolomoka bbwe, tiilyakakolomonwaa muntu pe. Lyakauma cibumbwa eeco kuzituta zyaco zya lubulo luvwelene abulongo akupwaya zituta zyaco. Mpawo lubulo, bulongo, mukuba, nsiliva angolida zyakapwasyauka ciindi eeco nciconya akuba mbuli bungu acuumino camaila cilimo. Luuwo lwakakungulula zyoonse, taakwe kakasyaala pe. Pele bbwe eelyo lyakauma cibumbwa lyakaba dundu lini lyakazuzya nyika yoonse.." Daniele. 2:32-35
Eeci cifwanikiso cilibotela ca bulelo bwa Yahuwah [ibbwe] bubambwa mumazuba aa bulelo bwa Loma [aciindi ca lufu akubuka kuzwa kubafu kwa Messiah] akukomena kusikila bwazuzya nyika cilipilingene akugwalanganina kukkomanisya munzila iitakwe mulimo.
Kusendekezya Kwasanu
Lusyomo lwakuti cishinshimi cakazuzikwa kale, lupeekezya kuti ooyo mwaako uuli akataa zituta amiindi ni Mvwiki zili Makumi aali Ciloba. Langa kampango aaka. Langa ncokaamba. Hena kuli busena na? Hena Yahuwah taakamba kuti mvwiki zili 70 zyagantwa? Hena Walo wakati 69 kusanganya busena butakwe cacitika nkokusika a 70 na? Nee peepe! Yahuwah ulizyi bwakubalila. 70 utobela 69.
Mvwiki ya 70 nce ciindi ca mulimo wa Messiah.
|
"Kwabikkwa mvwiki, myaka, amazuba aali makumi aali ciloba avwuzigwe aciloba ku bantu bokwanu amunzi uusalala kuti nsotoko zimane, muleke kucita zinyonyoono, mukombelezezye babi, mutalike kucita ziluleme zyalo, zilengaano abusinsimi zimane, busena busalala busalazigwe." Daniele. 9:24
Kusikila munsaa boonse balazumina kuti mvwiki zili 69 zitusisya ku ciindi ca Messiah. Mvwiki ya 70 aboobo nceciindi camulimo wa bufundisi bwa Messiah. Ikuti yebo walangisya kabotu-kabotu mulongo wa zintu atala aawa, ulakonzya kubona kuti Yahushua nguwaacita zyoonse.
Kusendekezya kwa Cisambomwe
Lusyomo lwakuti cishinshimi cakazuzikwa kale, lusendekezya kuti mwanaa mwami ooyo waambwa muli Daniele. 9:26-27 ngu simukazya-Kristu uuciboola kumbelaa mazuba.
"Kwaakwiinda mvwiki zili makumi aali cisambomwe azibili, Munanike uyoogwisigwa, taakwe ncanoojisi. Bantu bamuleli aabo bayooboola bazoonyonyoona munzi abusena busalala. Mamanino ayooboola mbuli zambangulwe. Nkondo inooliko mane kusikila kumamanino, nkaambo kwakalaililwa kuti zinyonyoonwe., Daniyeli: 9:27
Kusyoma kuti cishinshimi cakazuzikwa kale kubweza mulimo uulibotela, uusetekene aciciingano, akuukumbatizya kuli simukazya-Kristu wa kumbelaa mazuba!
|
Uyoobamba cizuminano abantu banji mumvwiki yomwe, pele akati kamvwiki eeyo, walo uyoolesya zipaizyo azituuzyo. Lino sikusaala ooyo uyooboola azisesemyo kumagolelo aaŋanda ya Leza, mane kusikila alakwe bukamweelele." Daniele. 9:26-27
Bayiisya kuti simukazya-Kristu, ooyo uuli Mwanaa mwami, uyoopangana cizuminano a BamaJuuda, azimwi zinjaanji. Balo bayeeyela kuti ibbala lyakuti" walo" liiminina mwanaa mwami. Ibbala liitwa cintu liiminina ciiyo cili mukaambo. Eeco ciiyo cili mu kaambo kainda ngu Messiah, kutali mwanaa mwami. Ngu Messiah uuyoobamba cizuminano, azimwi zinjaanji. Kunyina pe nzila iiluleme kubelesya mabala ibbala lyakuti "walo" mbolinga lyayiminina mwanaa mwami—mukaambo kageme kutondezya busena.
Langa tumpango tuli atala aawa. Yahushua wakabamba cizuminano—Walo wakati wakaboolela kuzyoofutula basweekede baŋanda ya Isilayeli. Lufu lwakwe aciciingano kwakagozya kuyandika kwa zituuzyo zyoonse, azimwi. Lusyomo lwakuti cishinshimi cakazuzikwa, lwaatula mulimo mubotu, uusetekene ookwa Messiah aciciingano akusumpauzya simukazya-Kristu uumbi uuciboola kumbelaa ciindi! Nkaambo nzi? Kutegwa kabacizumanana kusungilizya nzila ya cishinshimi yabo kuti kiiciimvwi. Mbwaanga, kupelengusya Mangwalo aaya njenzila ilikke njobakonzya kujanya myaka iili ciloba yamanyongwe, eeyo iilaa mulimo ku lusyomo lwabo.
Kusendekezya kwa Ciloba
Lusyomo lwakuti cishinshimi cakazuzikwa lusendekezya kuti kuli Kuboola Kwabili ziindi zyobile. Balo baimpanya akataa ciindi Messiah nazyokela ANTOOMWE a basaante a leelyo Messiah NABOOLELA kuzyoocinga basaante. Balo zimwi ziindi basoleka kweeleba penzi eeli kwiinda mukupelengusya kuti kuboola kwabili kuli muzibeela zyobile. Nokuba boobo, eezyo zibeela zyobile zyaandaanyidwe kwa myaka iili ciloba nkuboola kwabili kwiimpene ziindi zyobile. Koswata Mangwalo aaciiyo ca Kuboola Kwabili, mbube ulabona kuti kuli Kuboola Kwabili komwe buyo. Amwi Mangwalo aguminizya buyo cibeela ca Kuboola Kwabili mu ciga comwe, pele kuti yebo walanga cifwanikiso coonse , inga wabona kuti kuli buyo Kuboola Kwabili komwe.
Kusendekezya kwa Lusele
Lusyomo lwakuti cishinshimi cakazuzikwa lusendekezya kuti aayo majwi aakuti "ooyu musela" muli Mateyo. 24:34 akaliimpene kuzwa kuli yooyo Yahushua ngwaakali kukananina. Cintu cikondelezya, Thomas Ice ooyo uusyoma kuti cishinshimi caazuzikwa kale, ulazumina kuti lyoonse kufumbwa nolibelesyedwe bbala lya "musela" mu bbuku lya Mateyo, liiminina musela wakali kupona aciindi eeco. Pele muli Mateyo 24, lilakonzya kwiiminina musela uuciboola kumbelaa mazuba ooyo uyoobona zintu zyakashinshimwa kuzwa kumatalikilo. Nkaambo nzi ncocili boobu? Ikuti Yahushua naakali kwiiminina ncaakamba walo, nkokuti zyoonse zitondezyo zya cishinshimi nizyaacitika kale alimwi tazyikonzyi kuyoocitika kumbelaa ciindi. Muzeezo woonse wakuti cishinshimi caazuzikwa kale mbuulanganya manyongwe aaciboola kumbelaa mazuba inga wanyonyooka ikuti Yahushua naakali kwiiminina ncaakali kwaamba ncobeni. Ikuti Yahushua naakali kwiiminina musela wakacili kuzya kumbelaa mazuba, Walo naakaamba munzila ngubauba kuti, "Imusela uubona zitondezyo eezi lino watalika," pele walo teesyi mbwaakaamba.
"Ncobeni ndamwaambila kuti, bantu basunu tabakooyoomaninina kufwa mane zintu eezi zyoonse zikacitike." Mateyo. 24:34
Kusendekezya kwa Fuka
Kusyoma kuti cishinshimi cakazuzikwa kale kusungilizya kuti aayo majwi aali mu Ciyubunuzyo, mbuli bwa "kufwambaana" "linolino," taayiminini cintu ciciyoocitika mumazuba alaafwi kusika.
|
Lusyomo lwakuti cishinshimi cakazuzikwa lusendekezya kuti mabala aali mu Ciyubunuzyo, mbuli bwa "kufwambaana" a "linolino," taayiminini cintu cimwi cicitika mumazuba masyoonto. Mbweenya mbuli kusendekezya kwa lusele, aaba basyoma boobu balasyoma akuti balo balizyi mulembi ncaakali kwiiminina, kunze lya ceeco ncaakaamba. Balo bataminina kuti ooko kweezyeezya kuli mu Ciyubunuzyo kwa zintu zicitika kufwambaana cakali kwiiminina kuti eelyo zintu zyaakutalika kucitika, ziyoocitika cakufwambaana. Ikuti eeco kacili ncencico mulembi ncaakali kwiiminina kwaamba, naakacaamba mumajwi aayo. Pele teesyi Walo ncaakaamba.
Kusendekezya kwa Kkumi
Lusyomo lwakuti cishinshimi cakazuzikwa lusendekezya kuti bamaJuuda banyenzi acisi ca Isilayeli mpaakatikati aazingulukide makanze ookwa Yahuwah woonse. BamaJuuda baatula Messiah. Langa zifwanikiso zyabo zimwi, mpoonya yebo inga wabona kuti zyoonse nzyobaambilizya nzya bamaJuuda. Yahushua ubikkidwe kumbali. Hena Yahuwah ulabayanda bamaJuuda na? Inzya we, Paulu ucisalazyila limwi mu BaLoma amumasena amwi kuti bamaJuuda banyenzi tabacijisi busena bwaandeene mumakanze ookwa Yahuwah. Aa mulimo nzi wa cisi ca bamaJuuda mu Cizuminano Cakale? Cakali cizyalilo biyo oomo Messiah mwaakali kuzyoozyalilwa kuti azyooleleke masi! Cikombelo ca nyika yoonse lyoonse ngaakali makanze. Cisi ca buJuuda cakali ciyandisi alimwi cakali cibelesyo ciyandika mukuzuzika makanze aayo. Nkabela kuti nibaazumanana kusyomeka kuli Yahuwah mbuli cisi nikwaakuba cileleko cipati kutali bwaacitika mumwaka wa AD 70. Yahuwah tasalauzyi pe; masi woonse cino ciindi alimwi lyoonse kukabe kutamani alitambidwe kuboola aawo mpabede kwiinda muli Yahushua Messiah.
Eeci cibalo tacikanzide kubuzyilila mbolusyomeka lusyomo lwa muntu naba ni. Bunji bwa baabo basyoma kuti cishinshimi caazuzikwa kale balamuyanda Yahuwah. Mbanakristu babunyina abacizyi. Nokuba boobo, misyobo ya lusyomo lwabo kujatikizya zintu eezi ililubide akubaa ntenda kapati. Ikuti yebo walanga nzyobasungilizya kusyoma, kusyoma kwabo, akataa zintu zimwi, kugwisya bulemu kuzwa kuli Messiah aciciingano. Eelyo yebo nozubulula zintu eezi, vwuntauzya amu Mangwalo kolaa muzeezo uujukide kuti ubone naa eezi zintu mbozibede bwini naa pe. Swebo tweelede buyo kuzumina kuyiisya kuli koonse – nokuba kuti kakukondelezya naa kubaa mpuwo iili buti – ikuti buyo ooko kuyiisya kakusimpidwe nji mu Mangwalo ncaayiminina cinicini.
Lusyomo lwakuti cishinshimi cakazuzikwa, mumuzeezo wangu, lunyonganya Banakristu akubakulwaizya kusowa ciindi cabo, akutozya mali aabo ku nzila iisweesya muciindi cakuti bayungizye kukomezya Bulelo bwa Yahuwah.
Eeci ncibalo citali-ca-WLC cakalembwa aaba Glenn Davis.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
