Yahushua Ulakombwa, nkokuti Awalo Weelede Kuba Yahuwah. Mwati Masimpe Aayo Na?

Kutaminina kuti "Yahushua weelede kuba Yahuwah nkaambo awalo ulakombwa":

1. Nkutamvwisyiysa nokuba kutazyiba cili mu Bbaibbele. Mabala nzi aaci Hebulayo nokuba aaci Giliki nokuba aasanduludwe kuti “kukomba”? Nguni uukombwa bwinibwini? Hena cili luleme kwaamba kuti, “Alikke Yahuwah nguuyelede kukombwa” na?
2. Cintu citalangilwi mu kutaminina kuti, “Yahushua ulakombwa, aboobo kunooli weelede kuba Yahuwah” nca simukazya-kristu, mbwaanga cikazya kuti Yahushua Messiah muntu susu. Aabo bataminina boobu bazumanana kuti banookomba biyo Yahuwah. Balo tabakombi muntu. Balakaka kukotamina Messiah ookwa Yahuwah muntu susu.

Aabo basyoma “Buleza bwa Kristu” balalizambaila lwabo beni. Balo bazuunyene kuti Yahushua “muntu mubukkwene.” Ikuti Yahushua kali “muntu mubukkwene,” mbuli Bakomba baleza botatwe mbobataminina, nkokuti bakomba muntu. Pele mpoonya aawo balacenguluka akukaka kuti bakomba muntu. Yebo oosyoma Buleza bwa Messiah: hena ukomba muntunyoko mbuli nduwe, naa pe? Bikkila maanu aako.

Atulangile afwaafwi twaambo tobile ootu.

Kutazyiba Bbaibbele

Kutaanguna, ooko kutaminina kuti "Yahushua weelede kuba Yahuwah nkaambo awalo ulakombwa" nkubula luzyibo lwamu Bbaibbele. Kuli zinjaanji ziiyeeme munzila njotusandulula bbala lyakuti "kukomba." Mbubuti ibbala lya “kukomba” mbolibelesyegwa mu Bbaibbele, alimwi nguni uukombwa? Alimwi aawa ngooyu mubuzyo mupati: Nkaambo nzi ncobakombwa? Hena balakonzya kukombwa cabululeme pele kutali mbuli bukombwa Yahuwah? Hena Messiah ookwa Yahuwah, mumukonzyanyo,ulakonzya kukombwa kutali kuti nkaambo ngu Yahuwah pele nkaambo ngu Messiah ookwa Yahuwah? Hena cililume kweendelanya ku Bbaibbele, kutaminina kuti: “Yahuwah alikke nguukonzya kukombwa”?

Ime ndaamba kuti, ooku kutaminina kuti “Yahushua ngu Yahuwah nkaambo ulakombwa” kulandicumba aasyoonto nkaambo ooku kwaamba boobu, takululeme kweendelanya aa Bbaibbele. CILI KABOTU, nkaambo ka kutamvwikisya kwa bbala lya “kukomba” mu Cikuwa amanjezyeezya aa Basanduluzi ba Bbaibbele lya Cikuwa, swebo inga twamulekelela muntu uutaminina kuti wakamvwa majwi aayo aboobo wiinduluka biyo ncaakamvwa.

Pele kutaminina kuti “Yahushua ngu Yahuwah nkaambo ulakombwa” , eeco inga taalekelelwa mufundisi nokuba Mwiyi wa Bbaibbele uuzyi aasyoonto mulaka wa ci Giliki nokuba waci Hebulayo. Alimwi mukubula coolwe, Ime ndakamvwa basicikolo bakamanizya kwiiya cikolo ca cikombelo kabandaambila kuti, "Ikuti Yahushua kakombwa, nkokuti weelede kuba Yahuwah.” Kuli ndime eeco ncintu cipa kulikwezya mumutwe, “Mwati masimpe aayo? Kobala biyo Bbaibbele aasyoonto. Vwuntauzya ujane mabala aa CiGiliki aci Hebulayo aayo aakasandululwa kuti “kukomba” mu Bbaibbele, ubone naa aayo mabala aambwa kutozyegwa kuli ni. Hena kuli umbi mu Bbaibbele uukombwa bwinibwini cabululeme pele katali Yahuwah?”

Bwiinguzi bwa mubuzyo ooyo mbwakuti “INZYA, MBANJI bantu bali boobo.” Kwakali bantu banji, bantususu, aabo bakali kukotaminwa, inzya, “bakali kukombwa” mu Bbaibbele. Aboobo, tacili masimpe kutaminina kuti “Yahushua ulakombwa, aboobo kunooli ngu Yahuwah.”

Tacitoli ciindi cilamfu kubala Bbaibbele kuti ubone kuti mabala aaci Hebulayo aci Giliki aayo aamba “kukomba”, aambwa kutozya ku bantu baansi mu malembe manji.

Ibbala lini lijatikizya kutaminina kuti “Yahushua ngu Yahuwah nkaambo ulakombwa" ndibbala lyaci Hebulayo lya shahah הִשְׁתַּחֲוָה alyeenzinyina lyaci Giliki lyakuti, proskyneō προσκυνέω.

shahah שחה הִשְׁתַּחֲוָה
(BDB): “kukotama ansi, kulibatamika, kunembo lya muleli naa silutwe, mu kulemekezya.”

proskyneō προσκυνέω
(Gingrich New Testament Lexicon) (kuwa ansi) kukomba, kulemekezya, kulibatamaika kunembo, kulumbaizya, kutambula camulemeko

Aaya mabala aaci Hebulayo aci Giliki kanjaanji ayiminina "kukotama ansi" a “kulumbaizya” silutwe, kufumbwa naa ooyo silutwe kali muntu susu waansi nokuba wakujulu.

Njeeyi mikonzyanyo:

Matalikilo 22:5 Mpoonya Abulahamu wakati ku balanda bakwe basankwa, "Amusyaale aano antoomwe a mbongolo; Ime a mulombe tulaya ookuya tukapaile, twaakumana tulaboola aalimwi okuno kuli ndinywe." 22:5 ESV)

נִֽשְׁתַּחֲוֶ֖ה προσκυνέω

Matalikilo 23:7 Abulahamu wakaimikila wakakotamina ku bantu banyenzi, bana ba Heti. (Matalikilo 23:7, 12) וַיִּשְׁתַּ֥חוּ προσκυνέω

Abulahamu ucita mbweenya mbuli kunembo lya Yahuwah a kunembo lya bana ba Heti. Lino, ncobeni, bana ba Heti a Yahuwah bakombelwa twaambo twiindene. Abulahamu wakakomba bana ba Heti nkaambo kakuti bakali bani. Abulahamu wakakomba YAHUWAH nkaambo YAHUWAH ngu Leza. Pele ndeenya bbala lyomwe ndelibelesyegwa mukwaamba ziindi zyobile eezyo

Aaka nkakaambo kamwi Ime ncegambwa aasyoonto eelyo balongwema nibaandilembela kabaamba kuti, “Yahushua ngu Yahuwah nkaambo ulakombwa mbuli Yahuwah” Ime ndakali kubala Bbaibbele lyaci Hebulayo kwa myaka makumi otatwe kusikila aciindi eeco, ooko kutamauka kuli boobo kwaka pyolongene, kwakali kweenzu nokuba kuli ndime nkaambo Ime ndakalibwene kuti eelyo bbala lisandululwa kanjaanji kuti “kukomba”, lyakali kubelesyegwa akuli bamwi, kutali biyo kuli Yahuwah alikke.

Kuli mikonzyanyo minji ayimwi ya bantu bakakombwa mbweenya mu Bbaibbele (babunyina Josefa bakamukomba, nkokuti), pele Ime ndasotokela kuli Davida. Hena ulizyi kuti Davida wakakomba Saulu na?

1 Samuele 24:8 Mpawo musule alakwe Davida wakanyamuka, wakazwa mumpangala, wakoongolola Saulo wakati, "Simalelaangu O Mwami!" Lino Saulo wakacebuka, nkabela Davida wakavundama ansi akumukotamina.”

Ibbala lya “kumukotamina” ndyakuti וַיִּשְׁתָּֽחוּ. Inzya, iBbaibbele talyaambi kuti Davida wakakomba Saulu mbuli Yahuwah. Kunze lyaboobo, Davida ulemekezya Saulu nkaambo Saulu ngu Messiah ookwa Yahuwah.

Bantu banji bakamulumbaizya Davida mu Bbaibbele. Baleelede kucita boobo nkaambo David wakali Messiah Mwami ngwaakasala Yahuwah.

Abigelo mukonzyanyo umwi muli 1 Samuele 25:23: “Mpawo Abigayeli naakabona Davida, wakafwaambaana kuseluka kumbongolo, wakuvwuntama ansi kumeso aa Davida akumukotamina.”

Majwi aasanduludwe kuti “kukotamina” ngamabala eesu aa shahah, proskyneō. Alimwi, Ime njanda kutondezya akuti Abigelo wakaita Davida kuti “Mwami” ziindi kkumi azitatu mu caandaano eeco. Walo wakali mukaintu musongo. Wakaita Mwami Davida kuti “Simalelo,” alimwi wakamukomba.

Nceeci cakavwundula makani. Mwami Davida wakali kukombwa antoomwe a YAHUWAH mu 1 Makani 29:20.

“Mpawo Davida wakaambila imbungano yoonse yabantu kuti, "Amulumbe YAHUWAH Leza wenu." Nkabela Bantu boonse bakalumba YAHUWAH, Leza wa bamawisaabo, bakotama, balemeka Yahuwah amwami”

Ibbala lyaci Hebulayo lyakuti, וַיִּשְׁתַּחֲווּ lijatikizya boonse bobile YAHUWAH a Mwami Davida.

Mpoonya mu Ntembauzyo caandaano 72, hena ni Intembauzyo ya kusamika bwami ku Mwami Solomoni? Mu Intembauzyo 72:11, Mwiimbi waamba Solomoni kuti, “Bami boonse bamukotamine: misyobo yoonse imumanine milimo.” Ibbala yaci Hebulayo lyakuti “kukotama ansi” ndibbala lyomwe alyakuti שחה eelyo lisanduludwe kuti “kukomba.”

Kwaamba makanaa bantu bana Isilayeli, Izaya 45:14 waamba kuti, “Mbuboobu mbwaamba Yahuwah "Imbono zya Ijipiti, azisambalilo zya (Etiyopia), a Baseba, bantu balamfu, zyoonse ziyooinda kuli ndinywe, Ziyooba zyanu, bayoomutobela bayooinda balaangidwe ankeetani akumukotamina. Bayoomukombelezya cakwaamba kuti Yahuwah uli kuli ndinywe luzutu alimwi taakwe umbi, taakwe baleza bambi pe.'"

Kuli myaanda myaanda ya mikonzyanyo oomo bantu mobakombwa cabululeme mu Caandaano Cakale. Ino mbuti mu Cizuminano Cipya? Hena bbala lyaci Giliki lyakuti proskyneō licimbudwe biyo kukukombela Yahuwah na?

Bwiinguzi mbwakuti peepe.

Mateyo 2:8 ‘Elyo wakabatuma ku Betelehemu wakati "Kamuya mukamuyandaule kabotu mwana, mwaakumujana muzoondaambile kuti nze ambebo kukumukomba."

Mateyo 8:2 Mpawo kwasika sicinsenda wakamukomba, "Mwami, kuti koyanda, ulakonzya kundiponya."

Mateyo 9:18 Lino naakacili kubaambila boobo kwakasika mwami umwi, wamufugamina wakati, "Mwanaangu musimbi wafwa lino-lino, nekubaboobo uboole, ukamwaampe ajanza lyako, elyo ulapona."

Mateyo 18:25-26 Nkabela mbwaatakajisi cakulya mwami wakwa wakalailila kuti awuzigwe amwanakazi wakwe, abana bakwe azintu azyoonse nzyaakajisi kuti mulandu umane. 26 A Mpawo muzike wakawida ansi wamukomba waamba wati, Mwami undikkazikile moyo, nzookuliya oonse.'

Mu Bbuku lya Ciyubunuzyo, basyomi muli Yahushua bakakombwa. Ku cikombelo caku Philadelphia, Yahushua wakati: " Ciyubunuzyo 3:8-9 "Ndizyi milimo yako mbwiibede. Bona ndibikkide kumembo lyako mulyango uujulidwe, Nkabela taakwe muntu uukonzya kuujala, nkaambo ulijisi nguzu ziniini, wakajatisya makani aangu, alimwi tokwe nookalitama izina lyangu. 9 Bona, njookupa aabo basimbungano ya Saatani, aabo balyaamba kuti MbaJuuda anikuti tabali baJuuda, balabeja buyo, njoobaboozya kuti bakombe ku maulu aako, bazibe kuti ndakakuyanda."

KJV: “Njoobaboozya kuti bakombe kumaulu aako.”

Pele hena Cizuminano Cakale a Yahushua tabaambi kuti “nkukomba Yahuwah alikke”?

Ciibalusyo. 8:19 (cf. Kulonga. 20:2-5): “Ncobeni naa mwaluba Yahuwah Leza wanu naa mwatobela baleza bambi akubamanina milimo akubakotamina, ndamucenjezyela loko buzuba obuno, kuti kasimpe muyoonyonyooka.”

Yahushua: “…kulilembedwe kuti, "' Nguwenya Yahuwah Leza wa ngoyeledeo, alimwi walo alikke ngoyelede kukomba, nguwenya alikke ngoyeledeo kumanina milimo" (Mateyo. 4:10)

Ooyu mulawo lyoonse nguuli mumalembe oomo kukomba baleza bambi mbuli Yahuwah mokugamininwa kukasyigwa. Kaambo keni aawa takuli biyo kukomba nokuba kulemekezya Yahuwah mbuli Leza—kuleka uumbi kunze lyakwe.

Cintu cikatazya ncakuti, kukomba Yahushua, nokuba Baleza botatwe, mbuli Leza, ooko nkukomba mituni. Yahuwah wakalailila kutakomba uumbi kunze lyakwe mbuli Leza. Mbangaye bantu baambidwe mubbala lyakuti “nguwe”? Ikuti Baleza botatwe kabatali Leza, mpoonya yebo kokomba Baleza botatwe mbuli Leza, yebo kosala – hena ukomba mituni?

Ku bbala lyaci giliki liimpene lisanduludwe kuti kukomba naa kunyonena, λατρεύω latreuo, eelyo lyakazandwidwa Yahuwah alikke luzutu mu Cizuminano Cipya. Talijatikizyi Yahushua. Eeli ndebbala eelyo Yahushua ndyaakabelesya eelyo naakaamba makani aa Yahuwah kuti “nguwenya alikke ngoyelede kumanina milimo.” (Mateyo. 4:10). Alimwi, eeco cijatene aa bweende bwa malembe aa kubelekela Yahuwah mbuli Leza, alimwi kakunyina uumbi kunze lyakwe.

Kukomba simalelo, naa mwami, nokuba muleli tacaambilizyi kusotoka mulawo ooyu nkaambo aaba tabakombwi mbuli Leza. Ikaambo keni Ime ncekotamina kunembo lya umwi nkakalaa mulimo mupati. Ikuti Ime nkekotama kunembo, inzya, kukomba mwami nkaambo walo mwami, Ime nsyesotoki mulawo wakukomba buyo Yahuwah mbuli Leza.

Yahushua ulalemekezyegwa akukombwa, kutali mbuli Yahuwah, eeco inga caba kusotoka mulawo, pele mbuli umwi waasumpulwa aa Yahuwah kuba Mwami naa Mupaizi Messiah. Yahushua ulalemekezyegwa akukombwa mbuli umwi waafwida ndiswe alimwi kuli nguwe nguzu zyoonse kujulu aanyika nkozipedwe.

Mulazyo wa kulemekezya/kukomba ooko kupegwa Yahuwah Messiah ulisalazyidwe mutumpango mbuli bwa 1 Makani. 29:20 (kukomba Yahuwah a Davida) amu Intembauzyo 72:11 (kukomba Solomoni). Swebo tulemekezya Yahuwah kwiinda mukulemekezya Mwanaa Yahuwah, Mwami waasalwa aa Yahuwah (1 Samuyele 25:24-25, 30 a BaFilipo. 2:9). Ikuti bantu nibakakomba bami mbaakasumpula Yahuwah, Davida a Solomoni, kwiindilizya waawo, Mwanaa Davida uukondelezya (Intembauzyo. 110:1) “kuli nguwe iwakatuyanda akutusanzya ku zibi zyesu mu bulowa bwakwe mwini, akutubikka kuba bami abapaizi kuli Yahuwah wisi.”

Mwaalumi Yahushua talemekezyegwi akukombwa biyo mbuli Mwami Messiah kataninga fwa akubuka kuzwa kubafu, pele kutaanguna nkaambo ka kusumpulwa kwakwe ooko Yahuwah Taata nkwaakamupa, Yahushua wakabusyigwa akupegwa bulemu. BaFilipo 2:9-11: Nciceeco Yahuwah ncaakamusumpula akumupa izina ibotu kwiinda mazina woonse, kuti boonse bafugame mazwi cakulemeka zina lya Yahushua, nibaba baansi, nibaba ba kujulu nibaba bali kunsaa nyika. Alimwi ikuti indimi zyoonse zizumine kuti Yahushua Messiah ngo Mwami, cakulemeka Yahuwah Taateesu.

Bantu boonse bayoofugama akuluula kuti Yahushua muntu ngo Mwami (kutali Yahuwah), kupeda bulemu kuli Taata Yahuwah (Leza uulaalikke).

Kukaka Buntu bwa Yahushua

Kwaamba kuti Yahushua ulakombwa, aboobo weelede kuti kanooli Yahuwah ooko nkukaka kuti Yahushua muntu susu. Ooyu ngo muuya wa simukazya-Kristu.

Hena tukotamine Mwami muntu, Messiah ookwa Yahuwah, naa tumufwide bweemya Messiah muntu ookwa Yahuwah? Hena tulakaka kukotamina kunembo lya Mwami muntu Munanike ookwa Yahuwah, katulikanazya mumyoyo yesu kuti, “Peepe Yahuwah, tatuyandi kutambula Messiah muntu, ooyu mwanalumi Yahushua waku Nazaleta. Yebo kotujanina Messiah wiimpene. Hena Yahuwah wafwa na”?

Ikuti aabo bakomba Baleza botatwe kabataminina ciluleme, kuti “alikke Yahuwah nguukonzya kukombwa’, mpoonya Yahushua ulakombwa, nkokuti Yahushua tali muntu susu.

Yahushua ulakombwa, kweendelenya a kutaminina kwa buleza bwa Kristu, pele takonzyi kuba muntu. Walo takonzyi kuba muntu susu, nokuba kubaa “ciimo ca buntu.” Ikuti muntu susu kateelede kukombwa, ncobeni, awalo ooyo uulaa ciimo ca muntu susu teelede kukombwa. Kutaminina Buleza bwa Kristu nkukazya kuti Yahushua Messiah, ooyo wakaboola mumubili wa buntu akuti Yahushua, uuli muciimo ca buntu tali muntu nokuba cintu citali mumubili wa muntu eeco cinga ceelela kukombwa.

Eeco kucaamba munzila iimbi, ikuti yebo wataminina kuti kunyina weelede kukotama ansi nokuba kukomba muntu, nkokuti yebo waamba kuti Yahushua tali muntu.

Mbuli bunji bwa Bakomba baleza botatwe mbobayandisya kuzuunyana kuti Yahushua muntu mubukkwene alimwi ngu Leza mubukkwene, ooku kutaminina kuti “Yahushua weelede kuba Yahuwah nkaambo kakuti awalo ulakombwa” nkukaka buntu bwa Yahushua.

Ncuubauba kapati. Ikuti aabo Bakomba baleza botatwe kabatakonzyi alimwi tabakotamini muntu, nkokuti bakaka buntu bwa Yahushua. Alimwi, aabo basyoma buleza bwa Kristu bakananina kumabazu obile aamakanwa aabo. Balo baamba kuti Yahushua “muntu uukkwene,” pele balacenguluka akwaamba kuti yebo tokonzyi kukotama ansi akukomba muntu. Kobikkila maanu aako akusala. Hena Yahushua muntu ncobeni mubukkwene na? Ikuti kali boobo, nkokuti yebo ukomba muntu.

Takali Kasimpe kamu Bbaibbele, pele nka Tunsiyansiya

Kweelede kusinizyigwa kuti ooku kutamiina kuti, “Yahushua ngu Yahuwah nkaambo kakuti awalo ulakombwa,” nkusendekezya biyo. Ooyu muzeezo tuuli kutaminina kwa IBbaiibele ooko kujatikizya Yahushua. Kunyina Yahushua naba mulembi wa Cizuminano Cipya waamba majwi “aakukazyanya,” aayo kaamba kuti, “Yahushua weelede kuba Yahuwah mbwaanga awalo ulakombwa.” Ooku kutaminina kuzyila nizyakaindide ziindi zya musela wa Cizuminano cipya nizyakaambwa abalembi aakale. Nkutaminina kuyeeme mu busongo bwa lweeno bwa kusungilizya akupilinganya mulaka. Ooku kutaminina nkwakuti: “Kukomba Yahushua kulesya busongo bwangu bwa masendekezya butali bwamu Bbaibbele.”

Ino mbuti ziindi zyobile mu Bbuku lya Ciyubunuzyo eelyo Johane naakavwuntama kunembo lya mungele wakali kumusolweda, mpoonya ooyo mungele wakaamba kuti, “Utaciti boobo, Ime ndimutwanga mbuli ndiwe.”? Ikuti Johane Muyubunuzi naakali kuyeeya mbuli Bakomba baleza botatwe ba mazubaano, walo naakayeeya kuti ooyo mungele wakali kumusolweda wakali Yahuwah mbwaanga "Yahuwah alikke luzutu nguukonzya kukombwa." Masimpe ngakuti Johane Muyubunuzi wakavwuntama ansi kuti alemekezye mungele.

Pele ooyo mungele wakaambila Johane kuti lino, mbokuli mwaalumi uusumpudwe Yahushua kujanza lya lulyo lyokwa Yahuwah, inguzu zyakabambululwa. Yahushua, muntu susu alimwi mwiiminizi wa mukowa wabantu, ulaa nguzu atalaa bangele boonse. “Bangele bokwa Yahuwah boonse abamukombe (bamukotamine ansi) kunembo lyakwe.”

Inzila Yiinda Kubota

Aboobo nkooku kuteelela kwamu Bbaibbele kwiinda kumvwikisya kumakani aa kukomba:

Kuli buyo Leza omwe, יהוה, Taata.

Swebo tukomba Yahuwah kuti ngo Leza. Swebo kunyina uumbi ngotukomba mbuli Leza kunze lya Yahuwah, Taata.

Swebo tukomba Yahushua kuti ngo Messiah ooyo wakapa buumi bwakwe mucibaka cesu alimwi ooyo Yahuwah ngwaakapa nguzu zyoonse kujulu aa nyika, kuleka buyo mumusela uuno pele amumusela uuciboola.

Eeci cibali citali ca-WLC cakalembwa aaba Bill Schlegel.

Twakagwisya mucibalo citaanzi mazina aamituni woonse ngobaulikide taata a Mwana, akubikka mucibaka cangawo mazina mataanzi ngubaapedwe. Kuyungizya waawo, twakojokolosya mu Mangwalo mazina aa Taata a Mwana, mbuli mbwaakalembedwe kutaanguna a balembi ba Bbaibbele bakayoyelwa moza. Nkamu ya-WLC