Kuzyokela Kwa Yahushua Kuyooba Mbuli Nkondo Yakavwumbu a Kutalangilwa kapati

Muya Uusalala wa Taata Yahuwah wakatuzula ncokuyandika kuzubulula zishinshimi zya Bbaibbele eelyo notuvwuntauzya kasimpe. Tunsiyansiya twesu kuzwa mu zikombelo mutwaakomenena twakazwide ziyanza zya misela, eezyo zyakajatikene kapati mu bweende akuteelela lwesu kwa zintu zya mazuba aamamanino. Nokuba boobo, eelyo nitwaabaluluka ciiyo eeci, meso eesu akajaluka, alimwi twakali kukonzya kubona katusalalidwe makanaa misela mbwaakali kutusinkila kuti kuvwinsyisya Bbuku lya Ciyubunuzyo a Mulumbe waku Oliveti.

Tunsiyansiya twa Misela

Tunsiyansiya twa misela tusendekezya kuti zishinshimi zya mamanino zyokwa Daniele a Ciyubunuzyo zyakazuzikwa mu misela yoonse; mbube, nkaambo ka zina eelyo. Kuyaamuka makanaa misela kwakatusolweda kukuzimaanya myaanda-myaanda ya zintu nzitwaalembede, mu mulumbe ya sikapepele, amu zipekupeku.

Kusowa zilubide akubikka mucibaka cazyo kasimpe ka Bbaibbele lyoonse ncintu cikkomanisya kuli baabo basyomeka kuvwuntauzya kasimpe. Nokuba boobo, kusowa tunsiyansiya twa misela kwaatuletela kusandula zintu nzyotusyoma eezyo nzyotulanganya kuti nzya lufutuko. Twaamba kuti zijatikizya lufutuko nkaambo tunsiyansiya twa misela, mbuli mbutwaazubulula kaindi alimwi mbuli mbotulanganyigwa mu bunji bwa mbungano zya Bunakristu, zilesya baabo batobela kumvwisyisya ziiyo zya Simalelo Yahushua mu Bbuku lya Ciyubunuzyo amu milumbe mubotu, kapati Mulumbe waku Oliveti. Mumajwi amwi, tunsiyansiya twa misela tuyiisya kwiimpanya ku ziiyo zisalazyidwe zyokwa Yahushua.

Kusyoma mu makanaa misela kupyopyongana mu kuyiisya (kwa Yahushua):

1. Pele Banakristu ba musela uuli woonse balangila kuti Messiah uyoozyokela mumusela ngobapona.

Mbube, musela omwe-omwe wakalipeekezya kulangila zitondezyo zili nsini zya ciindi mu mazubaayo ngobapona. Bamwi mumusela uuli woonse bakaunzumuka kuganta buzuba, mbuli bwa bana Millerite mbubaacita muma 1840, eelyo nibakaambilizya buzuba bwa Kavwumbi Kaniini 22, 1844, kuti mbobuzuba bwa kuzyokela kwa Yahushua anyika. Bantu banji muma 1840 ku Amelika, alimwi aasyoonto, kucooko ca Bukuwa akumabazu aambi bakatalika kukkomanina kuyiisya ooku akucinca maumi aabo kutobelanya mbweenya. Mbombuboobu mbu bakatyompokelwa cuusisya eelyo kulangila kwabo nikwataazwidilila. Ooku 'kutyompwa kupati’ kwakabayumya myoyo basikunonga banjaanji alimwi, kwiindilizya waawo, kwakasyuusya mbungano mpya ya, Cikombelo ca Balangila Kuboola Kwabili ba Buzuba bwa Ciloba (SDA). Muciindi ca kusiila limwi tunsiyansiya twa misela ooto twaabatyompokezya mukusandulula cishinshimi ca Bbaibbele, eeyi mbungano yakazumanana kuyakilila atalaa lusyomo lwaco lwaandeene kutegwa cilesye zyuulunzuma zya bantu munyika yoonse kumvwisyisya cabululeme ziiyo zya Yahushua mu Milumbe mubotu amubbuku lya Ciyubunuzyo.

2. Eeci cikombelo cakasolwede Banakristu kuti babe baabo ‘balangilizya zitondezyo’ muciindi cakuti kabaswata Mangwalo.

Aboobo, zintu zicitika mazubaano a akutobelezya milumbe yaansi akaba nga makanze aabo. Kufumbwa cintu cipati caacitika cakasandululwa kuti ncitondezyo ca ziindi—kufumbwa naa nkuzungaana kwa nyika, nzala ya bbenda matako, inkondo, maŋunuŋunu aankondo, kuzangila mfulumende mucisi, azimwi zinjaanji. Mu nkamu ya WLC, aswebo, mbweenya, twakali cedwe mukooze ka lweeno oolu, nkabela twakatalika kusumpauzya manyongwe mapati aacitika mazubaano kubee ncitondezyo ca kuboola kwa Yahushua ooko kuzyaa kuswena. Twaacita cintu eeci mukaambo ka kulubizya kuteelela Mulumbe waku Oliveti a bbuku lya Ciyubunuzyo. Twakali kuyeeyela kuti eezyo zitondezyo Yahushua nzyaakapa mu Mulumbe waku Oliveti mucibeela cimwi zyakali kuguminizya kuwa kwa Jelusalema kuti mubwini zyakali zitondezyo zya Kuboola Kwabili kwa Yahushua.

Nokuba boobo, kuteelela kuli boobo takuluzi alimwi kukazya makani aayo Yahushua ngaakasisya kuli Petulo, Andulo, Jamusi, a Johane. Zitondezyo zya Yahushua mu Mulumbe waku Oliveti zyakali zitondezyo zya kunyonyoonwa kwa Tempele amunzi wa Jelusalema mu 70 A.D. alimwi kunyina ncizyakali kuguminizya cijatikizya Kuboola Kwabili kwa Yahushua.

Yahushua kunyina naakapa citondezyo nociya ca Kuzyokela Kwakwe.

Cilikke ncaakagantauka Yahushua wakapa basikwiiya cakali cakuti Kuboola kwakwe kunooli mbuli nkondo ya kavwumbu alimwi eelyo nokutalangilwi kapati.

Kuyungizya waawo, kuleka mbuli kudilimunwa kwa Tempele a munzi wa Jelusalema, ooko Yahushua nkwaakapeda zitondezyo zigaminina abweende bwa ciindi cakucitika, Walo wakaamba kuti kunyina naba omwe (naba nguwe lwakwe) uuzyi buzuba nokuba woola lya kuboola kwakwe pele Taata alikke. (Mateyo 24:36)

Pele Yahushua wakapa maŋunuŋunu aakuti kuzyokela kwakwe kuyoolelema. Tulabona kugantaganta makani aaya mu twaano tutobela:

Mukonzyanyo wa Zipego: “Nkaambo Bulelo bwa kujulu buli mbuli mwaalumi umwi wakabweza lweendo kuya ku cisi cimwi kulaale... Nikwakaindide ciindi cilamfu, simalelo wa balanda aabo wakazyokela kuzyoo balingula kuti bamupandulwide mbubaabelesya mbono nzyaakabapa.” (Mateyo 25:14)

IMukonzyanyo wa Mubelesi Uusyomeka a Utasyomeki: “Simalelo wangu wamuka ciindi.” (Mateyo 24:48)

Mukonzyanyo wa Banakalindu bali kkumi: “Mwanaa Muntu aakuboola mubwami bwakwe ciyooba mbuli cakacitika ku banakalindu aaba: “Kwakali banakalindu bali kkumi bakabweza malambe aabo, akuunka kuyoocinga sibwiinga., Muli baaba bosanwe bakali bafuba-fuba, pele bamwi bosanwe bakalicenjede., Ciindi bafuba-fuba nibakabweza malambe aabo, taakwe nibakabwezelezya mafuta aakkwana., Pele basongo bakabwezelezya nsazi zyamafuta aamalambi aabo., Nkaambo kakuti sibwiinga wakamuka kuboola, boonse bakafukula boona., Lino aakati kamasiku kwakamvwigwa kuyobeka kwakuti, ‘Amuswiilile sibwiinga waboola! Amuzwe mukamucinge!.’” (Mateyo 25:1-6). Banakalindu bakali kuyeeyela kuti sibwiinga waswema, aboobo bakabinda kuyoomucingauzya. Pele taakaboola aciindi nibakali kuyeeyela kuti ulasika. Kuboola kwa sibwiinga kwakatola ciindi cilamfu kuleka mbubakali kulangila. Aboobo bwakazumanana kulindila. Pele mbuli mbucakali kuyaa kulampa ciindi, bakatalika kufukula. Limwi, ŋonzi zyaabakola boonse (basongo a bafubafuba) bakaanka koona. Kumamanino, akataa masiku, wakaboola. Mbube mu mukonzyanyo, tujana maŋunuŋunu aa kumuka kuboola antoomwe kuvwundumuka kwa Kuboola ooko. Kwakanyina zitondezyo zya ciindi eelyo sibwiinga naakali kuboola.

Buumi bwaa Nyika on bunikweenda kabotu-kabotu mbweenya buyo eelyo Messiah nayoozyokela kakwiina kulangilwa.

Aaka kaambo kanyandya kazwa ku nkamu ya WLC kweendelanya a zipekupeku zyesu zya myeembo ya Ciyubunuzyo a kupyopyongana kuyooyobelana mu myeembo eeyi atalaa nyika, twakamwayaula zipekupeku eezi nkaambo zyakali zya kweezyeezya buyo akugaminina kukazya ceeco Yahushua ncaakayiisya mu Mulumbe waku Oliveti.

Atumvwe Yahushua ncaakaamba kuti cinooli ciimo ca nyika kataninga boola Walo.

Mbweenya mbucaabede mumazuba aa Nowa

“Pele taakwe naba omwe uubuzi buzuba niciba ciindi. Bangelo abalo tabazi, naba Mwanaa Muntu, pele Taata alikke nguuzi.. Mbubonya mbuli mbukwakabede mumazuba aa Nowa, akuboola kwa Mwanaa Muntu mbokuyooba. Nkaambo mumazuba aa Nowa maanzi naatakana paya, bakali kulya akunywa akukwata akukwatisyigwa, mane do buzuba oobo Nowa naakanjila mubwato. Taakwe ncibakazi kusikila maanzi naakabalobya boonse. Mbubonya oobo mbokuyooba kukuboola kwa Mwanaa Muntu.” Mateyo 24:36-39

Yahushua wakaamba kuti kuzyokela kwakwe kuyooba mbuli muzuba aa Nowa. Saa, ninzi ncotuzyi cijatikizya mazubaayo? Akali mazuba abusofwaazi butaambiki abujayi bwiindilide. Akali mazuba aa mantu mapati aba Nephilimu baazyila ku bangele bakawa kusoleka kunyonganya mukowa wa bantu. Akali mazuba aakuyumya myoyo Ku milumbe ya kucenjezya yakali kuboolela muli Nowa. Yahushua kunooli wakabelesya mikonzyanyo yoonse eeyi kweelanya mazuba aana Nowa kuli yaayo aaciindi ca Kuboola kwakwe.

Pele walo taakabelesya nokuba mukonzyanyo omwe akataa yeeyo.

Ino wakati bakali kucita nzi mumazuba aana Nowa eeco cinookonzyene amumazubq ngayoozyokela? Bakali kulya, akunywa, akukwata, akukwatizya bana basankwa akukwatya bana basimbi. Mu kampango kamwi muli Luuka 17, walo waamba mazuba aana Loti. Alimwi, cakali cuubauba kuti walo aambe busofwaazi a musyobo ya mamambe kuti naakali kuyanda.

Pele taakaamba boobo.

Bakali kulya, kunywa, kukwatana, kuula, kuuzya, kusyanga akuyaka. Eeci mbocinoobede eelyo Yahushua aakuzyokela. Aboobo, ninzi aawa Yahushua ncazuunyana kwaamba? Walo ugeme kuti buumi bunikweenda kabotu-kabotu mpoonya Walo uyoozyokela kakwiina kwaambilizya a Nyika. Bantu tiibakakubwene mumazuba aana Nowa kuti lubeta lwakali kuzyaa kuswena pele bakaluukwete kujata bubi mumazuba ngubaali kupona aayo. Masimpe, kwakali Nowa uusondokede kayaka bwato amukwasyi wakwe kwa misela minjaanji, pele baka muuntulizya akumwaanga kuti mudaala wakacinkuka. Mbweenya biyo, bantu tiibakakubwene, kuti lubeta lwakali kuzyaa kuswena mumazuba aana Loti. Bakali kucita kufumbwa nzibakali kukkomanina kucita lyoonse, mbuli kulya, kunywa, kuula, kuuzya, kusyanga, a kuyaka. Muziindi zyobile zyoonse, buumi bwakali kweenda kabotu-kabotu mbweenya mbuli lyoonse kusikila baluleme nibaatolwa kubusena butakwe ntenda, mpoonya lubeta lwakasika.

Aboobo, ninzi ncotunga twayiya kuzwa muli zyoonse zyaambwa atalaawa?

Tweelede kulibambila mu maumi eesu buzuba abuzuba ku kuboola kwakwe, nkaambo Walo uyooboola aciindi ncotutalangili. Tulalangilwa kufwa kufumbwa buzuba kwiinda Yahushua Kuboola mubuzuba bwakuganta. Mbwaanga tatuli ndiswe tweendelezya ciindi notuyoofwa aboobo lyoonse tuleelede kukkala katulibambide mu maumi eesu.

Kukosozya makani.

1. Yahushua wakapa citondezyo ca kuboola kwakwe kwabili.
2. Yahushua wakagantauka kuti kuyootola ciindi kuboola kwakwe.
3. Yahushua wakatondezya kuti kuboola kwakwe kuyooba ciindi nokutalangilwi kapati alimwi ciyooba cigambyo cipati kwiinda zyoonse.
4. Swebo tweelede kukkala katulibambide buzuba abuzuba bwa maumi eesu, katuzyi kuti cilakonzyeka kapati kuti lufu lwesu Inga lwafwamba kusika kwiinda kuboola kwakwe. Izitondezyo eezyo tazisolwedi kudenuka kufwa lwesu nanka kuboola kwakwe.
5. Buumi bunikweenda kabotu-kabotu a Nyika kaindi kasyoonto kataninga zyokela. Ncenciceeci bunji bwa Banakristu bayoo janikizyigwa munzila iigambya eelyo walo aakuzyokela. Nokuba boobo, aabo balibambide tabakajatwi mu cibi.

Mupailo Wakujala:

Taata Yahuwah,

Twakulumba kusolweda nkamu ya WLC kuti isowele lyo tunsiyansiya twa misela kutegwa tumvwisyisye ziiyo zya Yahushua a kucenjezya kwakwe munzila iiluleme. Twakulumba kutulekela Ku kuuntuluzya kwesu a zibi nzitwaacita kaindi, twalyeempa kapati mukaambo ka zyeezyo. Kotugwasya kupona cakuti abuzuba katulibambide kufwa nokuba kucingauzya Simalelo wesu Yahushua kuzyokela a Nyika. Twalitembaula zina lyako lyoonse kukabe kutamani nkaambo ka luzyalo lwako luteeli akutweengelela muzintu nzyotucitila iswe.

Mu Zina lya Yahushua, twapaila kuli ndiwe.

Akube boobo.