|
Eeci cibalo tacili ca WLC. Eelyo notubelesya zilembedwe aabalembi balaanze lya nkamu, tusimba buyo zyeezyo zyeendelana 100% a Bbaibbele a lusyomo lwesucino ciindi munkamu ya WLC. Aboobo eezyo zibalo inga zyalanganyigwa kuti nzya nkamu ya WLC. Twakalelekwa kapati amulimo wabalanda ba Yahuwah banjaanji. Pele tatukulwaizyi ndinywe nobeenzuma kutalika kubala zyaalembwa abantu aabo. Eezyo nzibaalemba, twakazigwisya mumalembe eesu nkaambo kanjaanji zililubide akubaa tumpenda. Cintu cuusisya ncakuti tucilangaula mbungano ya milimo iitakwe kampenda. Ikuti konyandidwe nkaambo ka [zibalo/milumbe] iitali ya WLC, kobikkila maanu kuTusimpi 4:18. Kuteelela kwesu nkwakuti kasimpe Kakwe kalazyokoloka, eelyo mumuni nuuyaa kumwesya munzila yesu. Tulakayandisya kasimpe kwiinda buumi, nkanko tulavwuntauzya kufumbwa nkokakonzya kujanwa. |
Kufumbwa majwi aamacaalizyo aamuntu alaa mulimo mupati, pele majwi aacaalizya ookwa Yahushua ajisi mulimo uukubwene. Kaindi kasyoonto kataninga yoya kamamanino, Yahushua wakaamba majwi aakuti, “Kwamana.”
Yahushua wakalizyi kuti lino mulimo wakwe wagola, aboobo kutegwa azuzike zyakalembedwe mu Mangwalo, walo wakati, “Ime ndafwa nyota.” Kwakali nongo yakajisi waini wa ndulwe yakali munsimunsi lyawaawo, aboobo bakanyika nsinsa mundulwe akwiibikka kukasamu ka mululwe akumusyonka kumulomo. Yahushua naakasipa nsinsa wakati, “Kwamana.”Mpoonya wakakotamika mutwe wafwa. [Johane19:28-30]
Aako kaambo nkakasandulula bbala lyomwe lyakuti, “tetelestai,” mu mulaka mutaanzi wa Bbaibbele. Eeli bbala ndyabuvwubi alimwi lyakasalwa kabotu-kabotu. Liimiina cintu cilaanguzu. Atuvwuntauzye zimwi nzyolijatikizya.
Tetelestai – Cituuzyo Camanizyigwa
Kufumbwa mu Juuda aawo inga wafwamba kuzyiba bbala eeli kuti lyeelene aamajwi aaci Hebulayo aayo aakali kubelesyegwa mu zipaizyo zya Cizuminano Cakale. Mwaka omwe-omwe, mu buzuba bwa baJuuda bwiitwa kuti Buzuba bwa Kunununwa, Silutwe Mupaizi wakali kunjila mu tempele kuti atuuzye cituuzyo caandeene ca zinyonyoono zya bantu baIsilayeli. Mpeenya buyo naakali kunga wamanizya kujaya kanyama, wakali kubbuka kuzwa mubusena bwa kujayila kanyama akwaambilizya kumbungano yabantu iilindila anze kuti, “Kwamana” mu ciHebulayo. Mu cituuzyo eeci, zyoonse zinyonyoono zya banaisilayeli zyakali kubikkwa amugutu wa mbelele yaajayigwa akusubulwa mucibaka cabo. Pele Bbaibbele liyiisya kuti eeyi nzila tiiyakamaninide kuzukila nokuba kukkwaninina nkaambo kutuuzya mbelele ooko tiikwakalondokede alimwi kwakali kwa ciindi cisyoonto buyo. Pele eelyo Yahushua naakafwa aciciingano, walo wakaba cituuzyo cilondokede alimwi cikkwene ca zinyonyoono. Ibbuku lya BaHebulayo lipandulula Yahushua kuti wakali Mwanaa mbelele ookwa Yahuwah, alimwi kwiinda mu cituuzyo cakwe, mulimo wa kulekelela wakazuzikilwa limwi.
Aboobo, mukwaamba kuti, “Kwamana,” Yahushua wakali kupa citondezyo kunyika ya buJuuda kuti tiikwakacili kuyandika zituuzyo nokuba matempele nkaambo mulimo wakwe wakagozya kuzuzika kwinikwini eeco cakali kulangilwa mu mikonzyanyo eeyo yakali zituuzyo zyabo.
|
Aciindi naakaakunjila mutente akunjilila limwi mubusena busalalisya, taakwe naakatolele zyabulowa bwa mpongo naa bwa boombe kutuula zipaizyo, pele walo (Yahushua) wakatola lomwe buyo bulowa bwakwe mwini, eelyo wakatubambila lununuko lutamani. Nkaambo nikwalikunga ulapenga ziindi zinji-zinji kuzwa kumalengelo aanyika. Pele lino wakalibonya lomwe buyo kwiiminina boonse kumamanino aamusela kuti agwisye zinyonyoono kwiindila mukulipaizya lwakwe mwini. [BaHebulayo9:12-26]
Aboobo, mukwaamba kuti, “Kwamana,” Yahushua wakali kupa citondezyo kunyika yabuJuuda kuti tiikwakacili kuyandika zituuzyo nokuba matempele nkaambo mulimo wakwe wakagozya kuzuzika bwini-bwini eeco cakali kulangilwa mu mikonzyanyo yazituuzyo zyabo.
Tetelestai – Wagola Mulimo
Mumazubaa Cizuminano Cipya, eelyo mubelesi naakamanizya mulimo wabuzuba bomwe naa ncito, wakali kunga waambila simalelo wakwe kuti, “Tetelestai.” Eeci cakali kupacitondezyo cakuti kufumbwa ncaakapedwe kucita lino camanizya kucitwa. Mbweenya buyo, eelyo mulembi wa zifwanikiso naakali kunga wamanizya cifwanikiso comwe, wakali kunga watola ciindi cakuti ayubunune kutondezya cifwanikiso eelyo naakali kwaambilizya kuti “tetelestai.” Eeci, acalo, cakali kutondezya kuti cifwanikiso cakwe cilondokede camanizya kubambwa. Kucinyina cakacili kuyandika kubambulula nokuba kucinculula, Mulimo wakamanizya kucitwa. Eelyo Yahushua naakaboola munyika eeyi, walo wakaambila ndiswe kuti mulimo wakwe wakali wakupa lufutuko kubasweekede abatyokede munyika.
Nkaambo Mwanaa Muntu wakaboolela kuyandaula akuvwuna baabo basweekede. [Luuka19:10]
Mumajwi aakwe aamamanino, Yahushua wakaambilizya kuti mulimo wakwe ngwaakaboolela wakamanizyigwa. Mulimo wa kujana lufutuko lwa nyika wakamanizyigwa aciciingano. Kwakacinyina zyakuyungizya nokuba zya kubambululazya eezyo zyakacili kuyandika—lufutuko lwakoonda mulimo.
Tetelestai – Cikwelete Cabbadelwa Mubukkwene
Ambweni cintu cakali kujanwa kanjaanji mukubelesya bbala lya “tetelestai” mu mazubaa Yahushua, cakali mu kuyobolola zikwelete. Eelyo muntu naakamanizya kubbadela cikwelete, wakali kunga wapegwa cizyibyo cijisi bbala lya“tetelestai,” eeco caambilizya kuti cikwelete cabo cakabbadelwa mubukkwene. Eeci cakali cisimbo cakali kutondezya kuti ooyo muntu taakacili kuyandika kubbadela cikwelete eeco akuti kufumbwa ncaakakweletede cakabbadelelwa limwi kwa lyoonse. IBbaibbele lyaamba kuti cinyonyoono cesu cakaleta cikwelete kuli Yahuwah alimwi cikwelete eeco ncitwatakali kukonzya kubbadela muli lwesu tobeni. Pele eelyo Yahushua naakafwa, walo wakali kubbadelela limwi cikwelete ca cinyonyoono cesu kwa lyoonse alyoonse. Alimwi, iBbuku lya baHebulayo lipandulula kugozya kubbadelela zinyonyoono zyesu nkwaakacita Yahushua.
Nkaako Silutwe Mupaizi wesu wakalipa lwakwe kuli Yahuwah lomwe buyo cipaizyo cakugwisya zinyonyoono. Cipaizyo eeco ncalili alili. Amane wakaakukkala kubbazu lya lulyo lwaYahuwah. Lino ooko ulalindila mane kusikila Yahuwah akabikke basinkondonyina kuti babe cilyatilo camaulu aakwe. [BaHebulayo10:12-13,18]
Kwamana
Zyoonse ziindi zya kubelesya bbala lya tetelestai zilaswaangana mu kasimpe kalibotela—kuti Yahushua wakamanizyila limwi mulimo wa lufutuko kwa lyoonse alyoonse. Eeci caambilizya kuti tacicili kuli ndiswe kuyungizya cili coonse, kumanizya cili coonse, nokuba kugozya cilicoonse kuti casika kukumaninizya lufutuko lwesu—Yahushua wakacita kale zyoonse. Aboobo lino, eelyo notubikka lusyomo lwesu mu mulimo ngwaakamaninizya Yahushua, tulakonzya kukkazyika myoyo mu lufutuko lwesu akutandila kuli Yahuwah a myoyo yesu yoonse.
Eeci ncibalo citali-ca-WLC cakalembwa aaba Micheal Maynard.
Twakagwisya mucibalo citaanzi mazina aabakomba mituni ngobayita Taata a Mwana, akubikka mucibaka cangawo mazina mataanzi ngubaapedwe. Kuyungizya waawo twakajokolosya mutumpango ntotulembulude akubikka mazina aa Taata a Mwana, mbuli mbwaakalembedwe kutaanguna abalembi bamu Bbaibbele bakayoyelwa moza. Nkamu ya-WLC
