Mwanaa Muntu

Cifwanikiso ncaakalibambila mukamwini Renè Magritte, ca Mwanaa. Muntu, ncecilaa mpuwo kapati. Muli ncico, ooyu muntu uucita zinfu zyeenzu zikankamanisya waku Belgium kasamide zyeete ya cisobano ca kukunkulisya bbola, cibeela ca busyu bwakwe kabuvwumbilidwe kunze lya mucelo wa nyanzabili. Mumajwi maubauba, imuzeezo wini wakali kunzaa cifwanikiso cokwa Magritte ngwakuti cintu cilibonya pele cilisisidwe aciindi nceenya.¹

Mulumbe wa sunu awalo ujisi zinji zikonzyene a cifwanikiso cokwa Magritte, kutali buyo mutwe wa cibalo. Kwiinda mu kuzubulula Mangwalo, swebo tulabbukizya kuti kuzyibya Yahushua mbuli Mwanaa Muntu kulisinkilidwe mu cibeela cimwi, kutali aa mucelo wakulya, pele kusinkililwa aa lusyomo lwakatobela nilyakalembedwe kaindi Bbaibbele, lwakuti Yahushua wakalaa ziimo zyobile, eezyo zizibidwe akuti kukamantana kwa ziimo zya bulemu. Pele kutali mbuli cifwanikiso cokwa Magritte, swebo tulagwisya cisinkilizyo eeco kutegwa tuyubunune kuti nguni Mwanaa Muntu ooyu.

Nokuba kuti majwi aakuti “mwanaa muntu” alalibonya ziindi zili 195 mu Mangwalo, tabali bantu boonse bazyi ncaayiminina nokuba ncaayandikila. Kubelesyegwa kwa ngawo kulaabanyidwe bweelene akataa Cizuminano Cakale a Cipya. Muci Hebulayo, mwanaa muntu ngu ben adam. Adamu ndibbala liiminina muntu naa mukowa wabantu; mbuli mbozyi kale, ndizina lya muntu mutaanzi Yahuwah ngwaakalenga. Aboobo, mwanaa muntu, naa mwanaa Adamu, wiiminina mukowa wabantu. Limwi bbuku lya lwiiyo lwa buleza lizuunyene kwaamba kuti, “Kuulika zina lyakuti ‘mwanaa muntu’ nkwaamba biyo kuti ‘muntususu’ [naa] ‘muntu.'”²

Kwakali kuli Adamu, naa ku muntu ooko Yahuwah nkwaakapa bweendelezi bwa malengelo Aakwe:

Matalikilo 1:26 Eelyo Leza wakaamba kuti, “Atupange muntu mucinkozya cesu, abe mbubonya mbuli ndiswe. Baendelezye inswi zyamumaanzi, abayuni bakujulu, aŋombe, anyika yoonse, abauka boonse bayavula ansi.”

Cizubuluzyo ca Bbaibbele ca [Wycliffe Bible Commentary] cipandulula mwanaa muntu mutaanzi alunyungu lwakwe mbubakeelela mu makanze aa bulelo bwa Yahuwah:

[Muntu] wakeelede kuba mwiiminizi munkutwe ookwa Yahuwah uusunga nyika, kuti abeleke kuyanda kwa Mulengi wakwe akuzuzika makanze aabulemu. Bweendelezi bwa nyika bwakali kuyoopegwa ku cilengwa leza cipya eeci. Eeci cilengwa leza ceebeka, antoomwe azibotu zitaambiki a mikuli milemu njaakapedwe, wakeelede kupona akweendeenda mu bwami.”³

Eeyi mizeezo ililondokede mu kweendelana aa Intembauzyo 8, oomo makani mwaatonkomene ku mwanaa muntu:

Intembauzyo 8:4-8 Ino muntu ncinzi nowamwiibaluka? Amwana amuntu ncinzi, nomuswaya? ⁵ Nekubaboobo wamupa bupati bwasi elane abwa-Leza, Wamusamika munsini wabulemu awabwami. ⁶ Wamupa bwami bwakweendelezya milimo yamaanza aako, Azintu zyoonse wazibika kunsi lyamaulu aakwe: ⁷ Imbelele aŋombe zyoonse, Abanyama bamusokwe;. ⁸ Bayuni bakujulu, answi zyamulwizi, Azyoonse zyeendeenda mukati kalwizi.

Kusanganya ku kwiiminina mukowa wa bantu mubunji, majwi aakuti mwanaa muntu alibelesyedwe amu Mangwalo kugaminina kwaamba bantu bamwi. Ngooyu mukonzyanyo, kuli baabo bazyibide cishinshimi ca Bbaibbele inga baibaluka eelyo Yahuwah naita mushinshimi Ezekiya kuti “mwanaa muntu” ziindi zili makumi aali fuka azitatu:

Ezekiya 2:1 Lino wakandaambila kuti, O mwana a-muntu, imikila, twaambaule ayebo!”

Kuyungizya waawo, mushinshimi Daniele wiitwa kuti “mwanaa muntu”:

Daniele 8:17 Lino wakaswena afwaafwi mpondakaimvwi, nkabela naakaswena, ndakayoowa, ndavunduma ansi. Pele wakandaambila kuti, Swiililisya, O mwana amuntu, cilengano ncecaciindi camamanino.”

Cimwi cipati cibelesyedwe mu Cizuminano Cakale cakwaamba kuti “mwanaa muntu,” alimwi cimwi cileta kwiiminina kupya mu Cizuminano Cipya nocibelesya majwi aayoo, ciboolela mu cilengaano ncaakapegwa Daniele eeco cijatikizya ziindi zya mamanino:

Daniele 7:13-14 “Lino ndakabona muzilengano zyamasiku, ndabona umwi uuli mbuli mwana amuntu uleza amayoba aakujulu, wasika afwaafwi akuli-Sinsiku, watambulwa kulinguwe. ¹⁴ Nkabela wakapegwa bweendelezi abulemu abwami, kuti bantu bazisi zyoonse abamisyobo yoonse abamyaambo yoonse bamumanine milimo. Bweendelezi bwakwe mbweendelezi butamani butakonzyi kweela, abwami bwakwe tabukonzyi kunyonyoonwa.

Nguni ooyu Mwanaa Muntu?

Nguni ooyu muntu uuletwa kunembo lya Yahuwah akupegwa bweendelezi, bulemu a bulelo butamani? Kweendelanya ku bbuku lisandulula mabala lyakuti [Dictionary of the Bible], Mwanaa Muntu mucilengaano ca Daniele ”, mutwe wa cuuno cabu messiah.”⁴ Kweendelana akataa Mwanaa Muntu ooyo uutapedwe zina muli Daniele a messiah wakasyomezyedwe, ncintu ca nsiku kapati. Stephen Miller, mubbuku lya [The New American Commentary] eelyo lilembedwe kujatikizya Daniele, waamba kuti:

Muzeezo wabu messiah ngwa kaindi loko alimwi, mu buJuuda a Bunakristu bwakainda ngo muzeezo wiinda kucembaala alimwi, mubusanduluzi bwa buJuuda a Bunakristu bwakainda, ngowakali muzeezo uujanika-janika.⁵

Cimwi cigaminina kapati, mulembi wa misela ya Cikombelo, Kegan Chandler, waamba kuti mbombuboobu Yahushua a balongwenyina mbubakali kunga bacipandulula:

Yahushua, antoomwe abamaJuuda bamwi ba mazubaayo, nibakateelela kuti ooyo “mwanaa muntu” waambwa bu Messiah muli Daniele 7:13.

Bamwi bakazya kuti cilengaano ca Daniele ca Mwanaa Muntu mu ŋanda ya cuuno ca bulemu kujulu, mbumboni bwakuti Yahushua wakali kupona kataninga zyalwa. Nokuba boobo, eeco inga caambilizya kuti kupona kwa Yahushua mbuli muntu kujulu, cakali cintu nobaba baabo Basyoma muli baleza botatwe ncibatakali kuyanda kusyoma. Kuyungizya waawo, makani ayubununa kuti ncilengaano ca cishinshimi buyo kutali kubona ntongola meso kujulu.

Yahushua wakali kuyandisya zina lyakuti “Mwanaa Muntu”

Mu milumbe mibotu, swebo tulajna bumboni bwakuti izina lya Mwanaa Muntu lyakali kubelesyegwa antoomwe aamwi mazina aana Messiah mbuli aakuti Mwanaa Yahuwah, Mwami wa Isilayeli, alya Kristu:

Johane 1:49 a 51 Natanayeli wakamuvuwa kuti, Rabi, nduwe Mwana a-Yahuwah, nduwe Mwami wa-Israyeli, ⁵¹ Wamwaambila kuti, Ncobeni ndamwaambila kuti, Muyoobona ijulu lyaba bukwazi, abaangelo ba-Leza balatanta akuseluka a-Mwana a-Muntu.”

Mateyo 16:13-16 Lino Yahushua naakasika kucisi caku-Kaisareya wa-Filipi, wakabuzya basikwiiya bakwe kuti, Ino mbobuti mbubaamba bantu kuti Mwana a-Muntu nguni? ¹⁴ Bamwaambila bati, Bamwi balaamba kuti nduwe Johane Mubapatizi, bamwi balaamba kuti nduwe Eliya, abamwi balaamba kuti nduwe Jeremiya naba umwi wabasinsimi. ¹⁵ Nkabela wabaambila kuti, Pele inywe mulaamba kuti ndimeni? ¹⁶ Lino Simoni Petro wakavuwa, wamwaambila wati, Nduwe Kristo, Mwana a-Leza muumi.”

Mbuli Messiah wakasyomezyedwe, Yahushua wakali kuyandisya kulyaamba lwakwe kuti Mwanaa Muntu kwiinda ziindi zili makumi lusele, kwiinda zina lili lyoonse. Bantu banji bakataminina kuti eeci ciiminina ciimo ca buntu cokwa Yahushua, kakuli izina lya mulimo lyakuti, Mwanaa Leza, liiminina ciimo cakwe ca bulemu. Aawa mpampawo eeni eeco ciiminina Yahushua kuba Mwanaa Muntu mpocisinkilidwe. Muciindi cakuti azumizye majwi kuti apandulule Yahushua mubukkwene bwini munzila njeenya njaapandulula buntu bwa Adamu, muli Ezekiya a Daniele, akabelesyegwa kutabilila lwiiyo lwa Kristu lutajanwi mu Mangwalo. Bamwi bataminina kuti ikuti majwi aakuti mwanaa muntu kaayiminina kuti Yahushua muntususu, nkokuti majwi aakuti mwanaa Yahuwah ayelede kwiiminina kuti ngu Leza alimwi akuti ujisi ciimo ca bulemu bwa kujulu. Nokuba boobo, ooko kuteelela kutondezya kubula luzyibo lweendelana aa Bbaibbele mbolibelesya majwi aakuti Mwanaa Leza. Mbanji bakaitwa kuti “mwanaa Leza” mu Mangwalo woonse, pele batakajisi bulemu bwa kujulu. Ngooyu mukonzyanyo, bangele a bantu, kapati aabo basyoma kuti Yahushua ngu Kristu, baitwa kuti mbana ba Yahuwah.⁶ Pele kunyina wakali kusola kutaminna kuti Banakristu baitwa kuti mbana ba Adamu kuti abalo bakalaa ciimo ca bulemu bwa kujulu mbwaanga bakali bana ba Leza.

Kunyina pe Mangwalo nayiisya kuti Yahushua wakalaa ziimo zya buntu zyobile; kunze lyaboobo, mulumbe mubotu ulakonzya kutondezyegwa kuti wakalembwa mukuya kwa ciindi. Mubbuku lyakwe lizubuludwe kapati, malembe ookwa Chandler akali kuyiisya ziimo zya buntu zyobile mbozinjilene a Bunakristu. Walo ulemba makanaa Mwiyi wa milumbe iitalembedwe ooyo wakalaa mpuwo kapati mumusela wabili wakalaa zina lya Valentinus:

…walo wakaanza lusyomo lwakabambilidwe kapati lwa ziimo zya bulemu zyobile zya Yahushua kaindi loko nziyatakaninga swaanganyide nkamu zya bweendelezi zya Cikombelo ca katolika. Muntaamu iili yoonse, kweezyekanya ziimo kutalisya kupyopyonganya: cimwi ncaakalemba Valentinus caamba kuti Kristu “wakalaa ciimo ca buntu aca bulemu bwa kujulu… wakazyila kujulu…mulengalenga kuutaninga bambwa” kakuli twaambo tulembedwe ooto twakaletwa aa Lusyomo lwa Baleza botatwe, atwalo twakali kubala kuti Kristu wakalaa “bulemu bwa kujulu a buntususu antoomwe” alimwi wakali “simuzyalwaalikke ookwa Taata kakutaninga ba manyika woonse.”⁷

Mangwalo, kujanza limwi, ayiisya kuti Yahuwah tali muntu:

Myeelwe 23:19 “Leza tali muntu, tabeji. Tali muntu uufwa, tatamauki, Na waamba makani, sa takoocita mbubonya? Sa ncaamba takoocizuzikizya na?

Nokuba boobo, kusinkililwa kwa buntu bwini bwa Yahushua, kwakayambukila mumisela yakatobela, akutalisya kupyopyongana mu ntaamu iili yoonse kusikila eelyo Muswaangano waku Chalcedon (451 AD) niwakakosozya kuti oolo lusyomo lwakaanzwa nilyakalembedwe kale Bbaibbele, lwakali lusyomo lwakazumizyidwe mu cikombelo. Nokuba sunu, aabo Basyoma Baleza botatwe balaa buyumuyumu kupelengusya ziimo eezyo zyobile mbozibeleka, kapati kulanganya mu mumuni wa Mangwalo.

Yahushua ngo Mwanaa Muntu mu Cishinshimi ca Daniele

Kujatikizya cishinshimi ca Daniele, Yahushua ulalyaamba ziindi zyobile kuti caambilizya nguwe. Iciindi citaanzi ndileelyo naakali aa basikwiiya bakwe eelyo naakali kulailila mbabo kujatikizya kuzyokela kwakwe azitondezyo zya mamanino aa musela. Ciindi cabili lyakali leelyo nakaimvwi kumbelaa ba Sanhedrini kabetekwa:

Majwi ngaakaamba kuli basikwiiya bakwe: Mateyo 24:30 “Lino kuyooboneka citondezyo ca-Mwana a-Muntu kujulu, mpawo misyobo yoonse yaansi iyoolila, nkabela bayoobona MWANA A-MUNTU UUBOOLA AMAYOBA AAKUJULU ANGUZU ABULEMU BUPATI.”

Majwi ngaakaamba kunembo lyaba Sanihedrini: Mateyo 26:63-68 Lino Yahushua wakaumuna buyo. Lino mupaizi mupati wakamwaambila wati, Ndakukonkezya kuli-Yahuwah muumi kuti utwaambile na nduwe Kristo Mwana a-Yahuwah. ⁶⁴Yahushua wamwaambila wati, Waamba. Alimwi ndamwaambila kuti KUZWA SUNU MULABONA MWANAA MUNTU ULIKKEDE KULULYO LWA-SINGUZU, ULEZA AMAYOBA AAKUJULU. ⁶⁵Mpawo mupaizi mupati wakayaula zyakusama zyakwe, waamba wati, Watukila Yahuwah! Tucilangilanzi bakamboni. Amulange! Mwaswillila lino mbwaatukila Yahuwah. ⁶⁶Ino muyeeyanzi? Nkabela bakavuwa, baamba bati, Uleelede kufwa. ⁶⁷Mpawo bakamuswida mate kubusyu bwakwe, bamudinkaula. Nkabela bakamuuma, ⁶⁸baamba bati, Tulungulwide­, uwe Kristo, Nguni wakuuma?”

Bikkila maanu kuti mupaizi mupati wakatamikizya Yahushua mulandu wa kusampaula Leza, kutali kuti nkaambo kakulyaamba kuba Yahuwah, pele nkaambo wakataminina kuti walo wakali Mwanaa Muntu wamu cishinshimi ca Daniele, ooyo wakali Messiah (Kristu) wakasyomezyedwe.

Abamwi abalo bakazyiba kweendelana akataa Yahushua a cilengaano cakujulu cokwa Daniele. Eelyo Stephen, umwi silutwe wa Cikombelo citaanzi, naakaangwa akuletwa kunembo lyaba Sanhedrini, walo wakabona Mwanaa Muntu kaimvwi kujanza lya lulyo lwa bulemu bwa Yahuwah. Daniele wakabona mu cishinshimi Mwanaa Muntu mu cibetekelo cakujulu cokwa Yahuwah, pele Stephen wakabona cishinshimi kacizuzikwa:

Milimo 7:54-56 Nobakamvwa obo, bakaciswa kumyoyo, bamulumina ntwino, ⁵⁵Pele walo, mbwaakazywide Muuya Uusalala, wakalangisisya kujulu, wabona bulemu bwa-Yahuwah, a-Yahushua uliimvwi kululyo lwa-Yahuwah, ⁵⁶wati, Amulange, ndabona ijulu lili bukwazi, a-Mwana a-Muntu uliimvwi kululyo lwa Yahuwah.”

Langisya kuti Yahuwah waambwa kuba muntu kutali Yahushua. Ncobeni tali ku janza lya lulyo lyokwa Yahuwah.

Kusanganya kukuteelela kwa Stephen kuti Yahushua wakali Messiah muntususu, Johane wakalembela zikombelo zili ciloba mu Ciyubunuzyo. Langisya zintu zyaambwa mu cishinshimi ca Daniele:

Ciyubunuzyo 1:4-7 Johane ulajuzya imbungano zili musanu azibili zili mu-Asiya, Amube aluzyalo aluumuno kuzwa kulinguwe Uuliko, Uwakaliko, Uuyoobako, akuzwa kumyuuya iili musanu aibili iili kunembo lyacuuno cakwe, ⁵akuzwa kuli-Yahushua Kristo, ngukamboni uusyomeka, iwakasaanguna kuzyalwa kuzwa kubafu, alimwi ngumweendelezi wabami banyika. Kulinguwe iwakatuyanda, akutusanzya kuzibi zyesu mubulowa bwakwe mwini, ⁶akutubika kuba bami abapaizi kuli-Leza Wisi, kulinguwe akube bulemu abwami lyoonse kukabe kutamani, Ameni, ⁷ AMUBONE ULEZA AMAKUMBI, nkabela meso oonse ayoomubona, abaabo bakamuyasa, elyo mikowa yoonse yanyika iyoolila nkaambo kakwe. Akube boobo.

Mbubuti Mwanaa Muntu mucilengaano ca Daniele mbwaakaba muleli wa bami baanyika? Kuli baabo baamba kuti Yahuwah takapi bulelo bwakwe ku muntu, swebo tweelede kwiibaluka kuti Yahuwah wakataangunide kusyomezya Malengelo aakwe ku muntu, Adamu mwini. Nkaambo ka cinyonyoono, nokuba boobo, Adamu wakaalilwa. Pele makanze ookwa Yahuwah, mbuli mbwaakananidwe mu Intembauzyo 8, akazumanana. Muntu wakali kuyoopegwa bulemu, bwami a nguzu zya bweendelezi bwa kulela mucibaka ca Yahuwah:

Intembauzyo 8:4-6 Ino muntu ncinzi nowamwiibaluka Amwana amuntu ncinzi, nomuswaya? ⁵Nekubaboobo wamupa bupati bwasi elane abwa-Yahuwah, Wamusamika munsini wabulemu awabwami.⁶ Wamupa bwami bwakweendelezya milimo yamaanza aako, Azintu zyoonse wazibika kunsi lyamaulu aakwe:

Ncobeni eelyo Yahuwah naakamubombezyela zintu zyoonse Mwanaa Muntu, ncintu ciyandika kwiibaluka kuti Yahuwah Lwakwe tali mubweendelezi bwa Yahushua:

BaFilipo 2:8-11 Lino naakabonwa kuti waba acikozyano camuntu, wakalibombya akuzumina nikuba kufwa, nkukuti kufwa kwakubambulwa aciingano. ⁹ Nciceeco Yahuwah ncaakamusumpula akumupa izina ibotu kwiinda mazina oonse, ¹⁰ kuti BOONSE BAFUGAME. MAZWI cakulemeka izina lya-Jesu, nibaba baansi nibaba bakujulu nibaba bali kunsi anyika, ¹¹ alimwi kuti ndimi zyoonse zizumine kuti Yahushua Kristo ngu-Mwami cakulemeka Yahuwah Taateesu.

Ikuti Yahushua naali Yahuwah, walo naatali kuyandika kupegwa bweendelezi, bulemu, a bulelo mbwaanga zyoonse nizyali kale zyakwe. Pele kuli Messiah muntususu, balo bakalumbulwa nkaambo kakuteelela Leza wakwe. Nokuba bwami bwa Yahushua bwakapegwa kuli nguwe kuzwa kuli Yahuwah. Tiibwakali bwakwe kutaanguna pe.

Milimo 2:36 “Aboobo iŋanda yoonse ya-Israyeli izibisye kuti oyu Yahushua nguwenya ngomwakabambula, Yahuwah wamucita abe Mwami a-Kristol.”

Milimo 5:31 “Oyu, Yahuwah wakamusumpulisya kujanza lyakwe lyalulyo, abe Mwami a-Mufutuli, ape Israyeli kweempa akujatilwa kwazibi.

Yahuwah takonzyi kusumpulwa abusena oobo walo mpabede kale. Pele Messiah muntususu, Mwanaa Muntu, wakasumpulwa–kutali nkaambo kakuti walo wakali leza–pele nkaambo ka kuteelela Leza. Kuyungizya waawo, makanze eeni aakusumpulwa kwa Yahushua mbo bulemu bwa Taata Yahuwah. Ikuti Yahushua kali Yahuwah, swebo nitwali kunga twalangila kuti eeco nca bulemu bwakwe nokuba ca Baleza botatwe.

Mutwe wa cuuno wakuti Mwanaa Muntu, ulayandika kapati nkaambo uzyibya buntu bwa Yahushua munzila eeyo iigwasya ndiswe kubona kuti nokuba kuti Adamu, mwanaa muntu wakaalilwa mulimo ngwaakapedwe, makanze ookwa Yahuwah aakulela atalaa milimo ya maanza Aakwe (Matalikilo 1; Intembauzyo 8), taakalesyegwa pe. Paulu ulemba kuti Adamu mutaanzi wakali “mukonzyanyo wa yooyo wakacili kuboola.”⁸ Yahushua, Adamu wamamanino,⁹ wakatumwa aa Yahuwah kuti azyoojokolsye ceeco Adamu mutaanzi ncaakasweekelwa:¹⁰

Milimo 3:19-21 “Aboobo amweempe, musanduke, kuti zibi zyanu zijatilwe, kusike ziindi zyakulyookezya izizwa kubusyu bwa Yahuwah, ²⁰ atume Kristo ngomwakaimikizizigwa, nguwe Yahushua, ²¹ uuelede kutambulwa julu mane kube ziindi zyakubukulusya zintu zyoonse, nzyaakaamba Yahuwah kumilomo yabasinsimi bakwe basalala kuzwa kumalengelo aanyika.

Mbuli bbuku lisandulula mabala lya [Unger Bible Dictionary] lyaamba kuti, mutwe wa cuuno wakuti Mwanaa Muntu: utondezya Nguwe [Yahushua] mbuli Mwiiminizi wa Muntu. Lizyibya Nguwe kuti ngu ‘Adamu wamacaalizyo’ mu kwiimpanya kuli ‘Adamu mutaanzi’ (1 Bakolinto. 15:45)

Daniele 7:27 ‘Lino bwami abweendelezi abupati bwazisi zyoonse zyaansi, zyoonse ziyooabwa mumaanza aabantu babasalali ba-Sijulu, Bwami bwakwe mbwami buteeli, nkabela misyobo yoonse iyoomulemeka akumumanina milimo.’

Ciyubunuzyo 5:9-10 Mpawo bakaimba lwiimbo lupya lwakuti,. Nduwe uuelede kubweza ibbuku, Akunamatula zinamatizyo zyalyo. Nkaambo nduwe wakayaswa akutufutula kuli-Yahuwah abulowa bwako, Swebo tebantu bamisyobo yoonse amilaka yoonse amikowa yoonse, azisi zyoonse, ¹⁰ Akutubika mbuli bami abapaizi ba-Yahuwah wesu, Nkabela tuyooendelezya ansi.”

Kwa ciindi cilamfu kapati, oolo lusyomo lwakabbuka kalilembedwe kale Bbaibbele, lwakasinkila buntu bwini bwa Yahushua a bupati bwa mutwe wa cuuno wakuti Mwanaa Muntu. Casika ciindi lino cakumvwisyisya Bbaibbele kutegwa Yahushua alemekwe bwinibwini mbuli Messiah muntususu, ooyo wakazunda masunko, wakapenga akukoma lufu kuti ajokolosye bweendelezi kuli baabo batobela nguwe.

¹ “The Son of Man,” Wikipedia, cakazubulwamu 7-26-19, https://en.wikipedia.org/wiki/The_Son_of_Man

² W.S. Lasor, D.A. Hubbard, F. W. Bush, Old Testament Survey: The Message, Form and Background of the Old Testament, (Grand Rapids: Eerdmans, 1996 [1982]), peeji. 581.

³ The Wycliffe Bible Commentary, Charles F. Pfeiffer, ed., (Chicago, IL: Moody Press, 1962), peeji. 4.

⁴ “Son of Man,” Dictionary of the Bible, John L. McKenzie (New York, NY: Macmillian Publishing Company, 1965), peeji. 831.

⁵ Stephen Miller, The New American Commentary: Daniel, (Broadman & Homman Publishers, 1994), peeji.209.

⁶ Ngooyu mukonzyanyo: Matalikilo 6:2; Jobu 1:6; Mateyo 5:9; BaGalatiya 3:26.

⁷ Kegan A. Chandler, The Yahuwah of Yahushua in Light of Christian Dogma, (McDonough, GA: Restoration Fellowship, 2016), peeji. 96.

⁸ BaLoma 5:14

⁹1 Bakolinto 15:45

¹⁰ Mateyo 17:11

¹¹ “Son of Man,” Unger’s Bible Dictionary, Merrill F. Unger, (Chicago: Moody Press, 1966), peeji. 1038.

Eeci ncibalo citali ca-WLC. Source: https://oneGodworship.com/the-son-of-man/

Twakagwisya mucibalo citaanzi woonse mazina aa mituni ngobaita Taata a Mwana, kubikka mucibaka cangawo mazina mataanzi ngubaapedwe. Kuyungizya waawo, swebo twakajokolosya muMangwalo mazina ookwa Taata a Mwana mbuli mbwaakalembedwe kutaanguna abalembi ba Bbaibbele bakayoyelwa moza. Nkamu ya -WLC