Yahushua Muntu, Mwiiminizi ookwa Yahuwah

Mbubuti Yahushua mbwaakali kucita milimo yokwa Yahuwah a kuyiisya kalaa nguzu zya Yahuwah pele katali Yahuwah lwakwe? Bwiinguzi aawa ngo mulazyo wa butumwa, muzeezo ooyo bafundisi ba buleza abasicikolo ngobateelede kabotu pele uutamvwisyidwe akataa buleya.

Mu bbuku lya The Principle of Agency in the Old Testament amu New Testament, twakayiya kuti mutumwa nguyooyo “wakazumizyigwa kucita mulimo mucibaka ca umwi.” Mumajwi aaba Hebulayo, mwiiminizi naa “ooyo wakatumwa” wiitwa kuti shaliah. Ibbala eelyo lizyila kubbala lya kucita cintu lyakuti shelach eelyo liiminina kutuma. Ibbala lyeelene aalyo mu Cizuminano Cipya ndya mwaapositolo naa apostolos muci Giliki, alimwi liiminina: mutumwa, ooyo wakatumwa kuyoocita mulimo. Kweendelanya a Bbuku lisandulula Mabala a lya Cizuminano Cipya, ooyo wakatumwa ulanganyigwa kuti mwiiminizi mumulawo wa yooyo wakamutuma. Kuzyibana aa mwiiminizi cakeelene mbuli kulangana busyu-abusyu ayooyo wakamutuma. Kulangana “busyu-a-busyu” cakali cibeela cimwi mu butumwa bwa buJuuda eeco cimvwika bweenzu mukuyeeya kwesu ku cooko ca Kumbo. Mufundisi Marianne Thompson upandulula kweendelana akataa mutumwa a yooyo uumutuma:

Kamwi kaambo kakali kumvwugwa kanjaanji akataa bamayi bamilawo kakali kakuti “ooyo wakatumwa uli mbuli yooyo wakamutuma” naa “mwiiminizi wa muntu uleelene a muntu ooyo lwakwe. Nkaambo saliah [shaliah] ulakonzya kucita milimo mucibaka ca yooyo wakamutuma, eelyo umwi nabeleka antoomwe ayooyo wakatumwa [saliah] cilikonzyene akubelekela antoomwe a yooyo wakatuma muntu ooyo.¹

Ngooyu mukonzyanyo, muzibalo zyaatuminwa kaindi twakabona muziindi zimwi Mozesi naakaitwa kuti ngu “Yahuwah” nkaambo wakali mwiiminizi wa Yahuwah. Kusanganya waawo, twakaiya kuti Josefa wakali kulanganyigwa aanga uleelene a Falao nkaambo wakali mwiiminizi wa mwami. Twakabbukizya kuti micito ya basikwiiya ba Yahushua ayalo yakali kulanganyigwa kuti micito yakwe, eeco ncintu cakazumizyidwe mu ziyanza zyabo nkaambo basikwiiya bakasalidwe aanguwe. Kumvwisyisya mulazyo wa butumwa akukonzya kuuzyiba, cilatugwasya kumvwisyisya Mangwalo. Mbuli mufundisi a mulembi, David Burge, waamba kuti, butumwa “nce cijuzyo ca kumvwisyisya cilongwe akataa Leza omwe wakasimpe a Mwanaakwe, Yahushua Messiah.”² Lino katulaa muzeezo ooyu, atusanyangule Cizuminano Cipya mbocilanganya Yahushua muntu, mwiiminizi ookwa Yahuwah.

Yahushua wakatumwa aa Yahuwah.

Mulaka uubelesyegwa mu butumwa ulabelesyegwa kujatikizya Yahushua mu Mangwalo woonse. Kwiinda ziindi zili makumi otatwe, Cizuminano Cipya caamba Yahushua kuti wakatumwa aa Yahuwah, bunji bwa ziindi eezyo zili mumalembe ookwa Johane. Kweendelanya azibalo eezi, makanze mapati aayo Yahushua ngaakatuminwa akali aakukambauka mulumbe mubotu wa bulelo bwa Yahuwah akuzyooba Mufutuli wa nyika.

Luuka 4:43 Pele wakabaambila kuti, Ndileelede kwiikambaukila minzi imwi Makani Mabotu aa-Bwami bwa-Leza, nkaambo nkonkuko nkwendakatuminwa.”

1 Johane 4:10 a 14 Oolu nduyando ncobeni, Teensi kwaamba kuti swebo twakayanda Yahuwah, pe, pele walo nguwakatuyanda swebo akutuma Mwanaakwe kuti azoobe mulungo wazibi zyesu... ¹⁴Nkabela twakabona, alimwi tulalungulula kuti Taata wakatuma Mwana kuzooba Mufutuli wanyika.

Aabo basyoma kuti Yahushua ngu Yahuwah, bayeeyela kuti wakali muzeezo wakwe kufutula nyika nanka kuti walo wakatola cibeela ceelene aca yooyo uuli mumutwe wa baleza botatwe aabo bakaanza muzeezo ooyo. Nokuba boobo,Yahushua ulatwaambila mumajwi aataleyileyi kuti yakali micito yokwa Yahuwah Taata kutali yakwe mwini pe:

Johane 8:42 Yahushua wakabaambila wakati, Kuti Yahuwah naali uso, nomwali kundiyanda, nkaambo ndakazwa kuli-Yahuwah. Nsikalizidide ndemwini, pele wakandituma.

Mwiiminizi uuboola mucibaka ca yooyo uumutuma, mubwinibwini, tali yooyo uutuma. Yahushua ulaamba kutandila ziindi zili cisambomwe mu mulumbe wa Johane ulikke kuti walo taambauli nokuba kucita cintu mukuliyandila kwakwe. Nokuba mukulyaaba buumi bwakwe bwini, kwakacitwa kwiinda mukulailila kwa Taata. Zyoonse eezi zyakacitilwa kweendelenya a mulazyo wa butumwa.

Mbuli mwiiminizi wa Yahuwah, Yahushua wakacita buyo kuyanda kwa Yooyo wakamutuma.

Nciiyo ciyandika kapati kumvwisyigwa mu Cizuminano Cipya kuti Yahuwah wakatuma Yahushua kuzyoomaninizya kucita kuyanda Kwakwe. Yahushua wakainduluka kwaamba kuti walo wakali kucita buyo kuyanda kwa Taata alimwi kutali kwakwe pe. Ngooyu mukonzyanyo:

Johane 5:30 “Nsikonzyi kucita cintu ndemwini, mbuli mbwemvwa kuli-Yahuwah, ndabeteka mbubonya, alimwi kubeteka kwangu nkwakululamika, Nkaambo nsiyandauli luyando lwangu, pele luyando lwayooyo uwakandituma.

Ikuti Yahushua kali Yahuwah, swebo inga twalangila kuti walo inga kuyanda kwakwe kakweelene a kuyanda kwa Wisi, Yahuwah alimwi kwiinda mukucita kuyanda kwa Yahuwah, walo inga kamaninizya akucita kuyanda kwakwe mwini. Nokuba boobo, kuli ziindi zyongaye, Mangwalo naayubununa kuti Yahushua a Yahuwah bakalaa makanze aakayimpene. Aboobo, Yahushua wakasala kucita biyo kuyanda kwa Yahuwah, ooyo wakamutuma. Eeci cileendelana cinicini a mulawo wa butumwa. Kweendelanya acibalo cimwi, shaliah naa mwiiminizi “ucita milimo iilaa cikkelo mumulawo mucibaka ca yooyo wakamutuma kutali kuliyandila kwakwe.” ³

Mbuli mutumwa wa Yahuwah, Yahushua waakanana buyo majwi ngaakapegwa kukanana.

Aabo basyoma kuti Yahushua ngu leza, batamauka kuti walo wakali kupona kujulu kataninga zyalwa kali muciimo ca Jwi lya Yahuwah. Aboobo, kali mbuli Jwi lya Yahuwah, swebo inga twamulangila kukanana majwi aakwe akufundisya ziiyo zyakwe mwini. Pele ncotubbukizya, nokuba boobo, ncakuti Yahushua taakacita cintu cili boobo nociceya. Kusikila ziindi zili fuka, Yahushua wakaamba kuti majwi aakwe, taakali kuzyila kuli nguwe lwakwe, pele kuli Yahuwah Wisi ooyo wakamutuma. Ngooyu mukonzyanyo:

Johane 7:15-17 Nkaambo kaako ba-Juda bakaankamana bakati, Ino muntu oyu ulizi buti kubala uwatakaiya? ¹⁶Yahushua wakabavuwa wakati, Kwiisya kwangu takuli kwangu ndemwini, nkukwakwe uwakandituma. ¹⁷ “Kwanooli muntu uuyanda kucita luyando lwakwe, ulaziba kwiisya kuti na kuzwa kuli-Yahuwah naa ndilalyaambila buyo ndemwini.

Johane 8:28 “Nkaambo kaako Yahushua wakabaambila kuti, Mwaakwaanzika Mwana a-Muntu, nomuti kazibe kuti ndime yooyo, akwalo kuti nsilicitili cintu ndemwini, pele ndaamba aya mbuli mbwandiisya Taata.”

Cilanyandya kuti, Mwiyi Mupati, mbuli mbwaakali kwiitwa kanjaanji Yahushua, awalo wakalaa Mwiyi wakwe! Mbweenya Yahuwah mbwaakayiisya mwiiminizi wakwe Mozesi cakwaamba, mbombubo Yahuwah mbwaakayiisya Yahushua ca kwaamba. Kuyungizya waawo, Yahushua wakainduluka kwaamba kuti ooko kwakazyila majwi aakwe, aayo ngotwiita kuti mulumbe mubotu, tiikwakali kuli nguwe lwakwe mwini pele akapegwa nguwe kuzwa kuli Yahuwah:

Johane 12:49-50 “Nkaambo nsilyaambilide ndemwini, pele Taata uwakandituma, nguwakandilailila mbwenjelede kwaamba ambwenjelede kukanana, ⁵⁰ “Alimwi ndilizi kuti kulailila kwakwe mbobuumi ubutamani, nkaambo kaako makani ngenamba, ndaamba mbubonya mbwaakandyaambila Taata.”

Johane 14:24 “Oyo uutandiyandi tabambi majwi aangu, alyalo ijwi ndomumvwa talili lyangu, pele ndilya-Taata uwakandituma.

Yahushua wakali mwiiminizi wa Yahuwah ooyo ngwaakasala kukanana kasimpe kabulemu ku nyika. Yahushua wakati:

Johane 8:40 “Pele eno muyanda kundijaya, ndi muntu uumwaambila bwini, mbwendakamvwa kuli-Yahuwah. Abrahamu takacitide bobuya pe.

Yahushua wakacita buyo milimo ya Yooyo wakamutuma.

Kusanganya kukukanana buyo majwi ookwa Yahuwah, mbuli mbwaakali mwiiminizi wakwe, Yahushua wakacita buyo milimo eeyo Yahuwah njaakamupa kuti abeleke:

Johane 4:34 Yahushua *wakabaambila kuti, “Icakulya cangu nkucita luyando lwayooyo uwakandituma, akulondola milimo yakwe.

Ikuti Yahushua naakali Yahuwah swebo inga twalangila nguwe kwaamba kuti “mulimo wesu” nanka kuti, “mulimo wangu,” pele kunze lya boobo walo waamba kuti wakamanizya kubeleka mulimo wa Leza uulaalikke omwe, ooyo ngwaamba kuti ngu Wisi:

Johane 17:1 and 3-4 Yahushua aambe buyo majwi aya, wakalungumana kujulu wakati, “Taata, ciindi casika. Lemya Mwanaako kuti awalo akulemye. ³ “Mboobu buumi ubutamani, kuti bazibe nduwe, Yahuwah mwini-mwini, ooli olikke, ayooyo ngookatuma, nguwenya Yahushua Kristo. ⁴ “Ndakakulemya ansi, ndazyulizya mulimo oyo ngookandipa kuti nkuucite.

Ncobeni, milimo lwayo yini yakali bumboni, kutali kuti walo wakali Yahuwah, pele kuti walo wakali mwiiminizi ookwa Yahuwah. Mubuzuba bwa Pentecosti, Petulo waakambauka kuti:

Milimo 2:22 “Nobaalumi ba-Israyeli, amuswiilile majwi aya, Ngaa-Yahushua wa-Naza-reta, mwaalumi ngomwakatondekelwa Yahuwah, emilimo mipati amalele azitondezyo, Yahuwah nzyaakacita anguwe akati kanu, mbubonya mbuli mbomuzi nobeni—

Johane 5:36 “Pele bukamboni mbwejisi mbupati kwiinda bwa-Johane, nkaambo milimo njaakandipa Taata kwiizyulizya, njenjiyo njencita, niindilungulula kuti Taata ngowakandituma.

Banakristu banji basyoma kuti kaambo keni Yahushua ncaakali kukonzya kucita maleele nkakuti walo wakali leza. Pele aaya taali masimpe pe. Yahushua wakasumpula Yahuwah mukucita maleele:

Johane 14:10 ¹⁰ “Sena tosyomi kuti mebo ndili muli-Taata, awalo Taata uli mulindime? Majwi ngendamwaambila nsilyaambili ndemwini, pele Taata uukede mulindime nguucita milimo yakwe mwini.

Milimo 10:38 “Ngaa-Yahushua wa-Nazareta, mbwaakamunanika Yahuwah a-Muuya Uusalala enguzu. Walo wakali kuzelengana kucita zibotu, akuponya boonse abalyatidwe Saatani, nkaambo Yahuwah wakali awe.

Mbuli mwiiminizi wa Yahuwah, Yahushua wakalipedwe nguzu zyokwa Yahuwah mubuzwide.

Mbuli mwiiminizi wa Yahuwah, Yahushua wakalipedwe nguzu zya koonda mulimo ngwaakatumidwe. Yahushua taakaboolede mu nguzu zyakwe mwini, mbuli mbotunga twalangila kuti naakali Yahuwah, pele mu nguzu zya Yooyo wakamutuma:

Johane 5:43 “Ndaboola muzina lya-Taata, pele tamunditambuli; kuti umbi wasika muzina lyakwe mwini, ngomuti tambule walo.

Johane 10:25 Yahushua wakabavuwa kuti, Ndakamwaambila, pele tamusyomi. Milimo njencita muzina lya-Taata, njiindilungulula.

Kuboola muzina lya muntu umwi ciiminina kuti yebo uboola mu nguzu zya muntu ooyo. Yahushua wakamaninizya butumwa bwakwe mu nguzu zyokwa Yahuwah nzyaakamupede. Ikuti Yahushua naakali Yahuwah, walo naatakali kuyandika kupegwa nguzu; walo naakali jisi kale nguzu zyakwe mwini. Pele ikuti Yahushua kali mwiiminizi ookwa Yahuwah, walo naakali bulide nguzu zyabulemu zyokwa Yahuwah kuti abeleke mulimo wakwe.

Mwiiminizi ulemekezyegwa mbuli yooyo wakamutuma.

Mufundisi wa cikolo Thompson upandulula ciga cipati cimwi ca mulazyo wa butumwa mbuli mboceendelana kuli Yahushua a Yahuwah: mwiiminizi ulemekezyegwa mbuli yooyo wakamutuma.

Yahushua ulatondezyegwa mu Mulumbe mubotu [wa Johane] mumuzeezo wa Bujuuda wa mutumwa, alimwi kuyungizya waawo, kuleka mumuzeezo wakuti mutumwa silutwe omwe ooyo Yahuwah ngwabeleka kwiinda muli nguwe…Nkaambo Yahushua ngo silutwe mwiiminizi ookwa Yahuwah, eelyo muntu nalangana anguwe, ooyo muntu ulangana aa Yahuwah.”⁴

Ibbuku lisandulula mabala lya BuJuuda lyaamba makani aaya munzila eeyi:

Kaambo keni ka mulawo wa butumwa wa buJuuda kalaambidwe mu mulazyo wakuti, “mwiiminizi wa muntu ulanganyigwa mbweenya mbuli muntu ooyo lwakwe.” Aboobo kufumbwa mucito wa mutumwa uusalidwe kuba mwiiminizi ulanganyigwa kuti wacitigwa aa yooyo uumutuma…⁵

Aboobo, mulazyo wa butumwa utugwasya kumvwisyisya akuzubulula cabululeme zibalo zimwi eezyo zilibonya aanga zyaamba kuti Yahushua ngu Yahuwah. Ngooyu mukonzyanyo,

Johane 5:18 Ba-Juda ncebakali kusoleka kapati kuti bamujaye, nkaambo takuli kusotoka mulawo wa-Sabata kwalo pe, pele akwalo kwaamba kuti Yahuwah ngo-Wisi mwini, nkokuti wali kulipa ka-Lezaleza.

Johane 10:30 “Mebo a-Taata tuli umwi.”

Johane 12:44-45 Yahushua wakoompolola wakati, Oyo uundisyoma, tasyomi ndime, pele wasyoma nguwe uwakandituma. ⁴⁵ “Awalo uundibona, ubona nguwe uwakandituma.

Johane 20:28 Tomaso wakamuvuwa kuti, “O mwami wangu, Leza wangu!”

Eezi zibalo azimwi mbuli nzizyo, zilabelesyegwa kanjaanji “kutondezya” buleza bwa Yahushua. Pele eelyo Mangwalo naabalwa mumuzeezo wa bu Hebulayo ooyo wakazyibidwe mumusela mutaanzi, tulabona Yahushua kaamba biyo bwiiminizi bwakwe. James McGrath, mufundisi alimwi sicikolo wa Cizuminano Cipya waamba bwiiminizi bwa Yahushua eelyo nalemba kuti:

Alimwi muzeezo uujatikizya butumwa munyika ya nsiku ulangikaanga ulifwiinsyidwe mu kaambyo ka bamayi ba milawo kaambwa kanjaanji mutupango: ‘Ooyo uutumidwe uli mbuli yooyo wakamutuma.’ Icintu citobela ncakuti mwiiminizi takonzyi buyo kujata milimo ya bulemu pele amwalo mumulaka wa bulemu, ulakonzya kukkala acuuno cokwa Yahuwah nokuba antoomwe a Yahuwah, alimwi akuulikwa zina lya Bulemu.⁶

Ncenciceeci Yahushua ncaakaamba kuti kufumbwa uumutambula walo, utambula Yooyo wakamutuma:

Mateyo 10:40 “Oyo uutambula ndinywe ulatambula ndime, alimwi oyo uutambula ndime ulatambula nguwenya iwakandituma.

Kupindula ceeco, kusulaika a kunyansya Yahushua, nkusulaika akunyansya Yahuwah nkaambo walo wakatumwa mucibaka ca Yahuwah. Ikuti yebo wakaka mwiiminizi, nkokuti, yebo wakaka uutuma.

Johane 5:23 kuti boonse balemye Mwana, mbuli mbobalemya Wisi. Oyo uutalemyi Mwana, talemyi Wisi uwakamutuma.

Luuka 10:16 “Uumuswiilila waswiilila ndime, uutamuswiilili tandiswiilili ame, uutandiswiilili tamuswiilili uwakandituma.”

Yahushua, Mwiiminizi Uumaninide.

Mulawo wa bwiiminizi utugwasya kumvwisyisya zibalo zyabelesyegwa musyule lya waawa mukusumpauzya muzeezo wa musela wane wakuti Yahushua ngu Leza uukkwene cakumaninina. Ooyu mulawo ucisalazyila limwi kuti Yahushua nguni, mulimo wakwe nguuli, a cilongwe cilaakati kakwe a Wisi Yahuwah. Nokuba kuti kwakali baiminizi basyomeka batabalwi, muciindi cakainda amuciindi cino, Yahushua ulabainda boonse kuba mwiiminizi uumaninide wa Singuzuzyoonse Yahuwah. Naaba madaimona amulanganya mbweenya oobo:

Luuka 8:28 Naakabona Jesu wakakwiila, wamuvundamina wati ejwi ipati, Ino ndijisi mulandunzi ayebo, Yahushua, Omwana a-Yahuwah, Sijulu lyamajulu? Ndakukumbila kuti utandipenzyi.”

Masimpe, madaimona alimuzyi Yahushua kuti nguni. Eeli daimona lyakapozya kuti Yahushua, tali Singuzyoonse Yahuwah, pele Mwanaakwe, eelyo bbala limutondezya kuba Messiah naa Kristu.

Mbuli mbwali Simuzyalwaalikke Mwanaa Yahuwah, butumwa bwa Yahushua bulaandeene mukuti walo wakatumwa aa Yahuwah kuti amvwanye zintu zyoonse kuli Yahuwah kwiinda mu lufu lwa kulyaaba cituuzyo. Kuyungizya waawo, walo alikke nguwakasumpulwa kukkalila ku janza lya lulyo lyokwa Yahuwah nkaambo kakuteelela kwakwe alimwi akupegwa nguzu zya kulela nyika mucibaka ca Yahuwah. Ncenciceeco Paulu ncaamba Yahushua kuti ngu Adamu wamacaalizyo. Taceelede akugambya kujana kuti ikuyandisya kwa Yahushua ooko kupa bulemu kuli Yahuwah ooyo wakamutuma, ncecakali kumutonka kuya kumbele kubeleka mulimo wa bwiiminizi bwakwe. Kalyaamba lwakwe, Yahushua wakati:

Johane 7:18 “Oyo muntu uulyaambila buyo, nguuliyandawida bulemu bwakwe mwini. Pele uuyandaula bulemu bwayooyo uwakamutuma, ngonguwe uusinizizye, tamukwe bubi mulinguwe.

Saa mbubuti mbotweelede kwiingula Yahushua Messiah muntu, imwiiminizi ookwa Yahuwah? Atulekele Yahushua ayingule mubuzyo ooyo mu majwi aakwe mwini:

Johane 6:29 Yahushua wakavuwa wakati, “Ngooyu mulimo wa-Yahuwah, kuti mumusyome oyo ngwaakatuma.”

¹ Marianne Meye Thompson, “Gospel of John,” in Dictionary of Yahushua and the Gospels, Joel B. Green, ed. 1992 (Downers Grove, IL: Intervarsity Press, 1992), p. 377

² David Burge, Divine Agency in the Scriptures, 8-10-15, https://sandrahopper.blogspot.com/2015/ lyakajanwa mu 7-5-19

³ Shaliah, Wikipedia, lyakajanwa mu 6-30-19, https://en.wikipedia.org/wiki/Shaliah#Biblical_sources

⁴ Thompson, Ibid.

⁵ Agent (Heb. Shaliah), The Encyclopedia of Jewish Religion, R.J.Z. Werblowsky, G. WiYahuwaher, (New York: Adama Books, 1986), p. 15.

⁶ James F. McGrath, The Only True God: Early Christian Monotheism in its Jewish Context, (University of Illinois Press, 2009) p. 14.

Eeci cibalo citali ca-WLC cakazyila ku. Busena: https://onegodworship.com/jesus-the-human-agent-of-God/

Twakagwisya mucibalo citaanzi mazina aabakomba mituni ngobaulikide Taata a Mwana, akubikka mucibaka ca ngawo mazina eeni aabo. Kuyungizya waawo, twakajokolosya mu Mangwalo mazina aa Taata a Mwana, mbuli mbwaakalembedwe kutaanguna abalembi ba Bbaibbele bakayoyelwa moza. Nkamu ya-WLC