Eelyo , mwanaangu nsomona naakalazyikwa mumaanza aangu, umwi muzeezo wakali kumbele mumizeezo yangu: “Ime ndime ndeembela buumi bwa kana kasyoonto aaka. Kunyina uumbi pe. Nokuba kuti uulela mwana wacisa mwana nentako aano, ndime eecilaa mulimo wakusala weelede kukkala aanguwe.”
Mbuli basyomi, swebo tulangila kukomezya bana besu kuti bakabe basicisi mu bulelo bwa Yahuwah. Masimpe, kubajanina lwiiyo lubotu, katulangila kuti bayoojanana a muyandwa nyina uululeme, alimwi kabatakwe buyumuyumu bwa mali muzintu zyoonse nzyotulangila muli mbabo, pele cimwi cintu cicumba citonkela bulangizi boonse kumbele nca kuyoonjila mu bulelo bwa Yahuwah abana besu kabala mumbali lyesu.
Ipenzi liliko likopede bazyali banjaanji ndyakuti Mangwalo taapede milazyo minji mbotweelede kucita cintu eeco.
BaEfeso 6:4: “Anywebo numawisi, mutanooluvukili bana banu, pele amubalele mulwiiyo lwa-Mwami [Yahuwah]” amumilazyo yakwe. Tusimpi 13:24 tulazumina, kwaamba kuti: “Uuleka cuumyo ulisulide mwanaakwe, Pele uumuyandisya ulasungwaala kumukoma. Lino nkeciyeeya mbweekali kupegwa cisubulo nkecili mwana, ncuubauba kuyeeyela kuti ooko kululamikwa ncintu comwe a kusubulwa, pele eezyo zyobile tazyikonzyene pe nokuceya.
Kululamika ≠ Kusubula
Ibbuku lya The American Heritage Dictionary lisandulula kululamika kuti: “Kuyiisya ooko kulangilwa kuleta ciimo cimwi nokuba kulyeendelezya, kaoati ooko kuleta lusumpuko mu kulijata nokuba mu busongo. … Kulyeendelezya kuboola kwiinda mu kwiisyigwa kulijata; kulilesya.”
Cipego ciinda Kubota ncotunga twapa bana besu nca kubayiisya kulijata. Eeco ciboolela mu kulamikwa. Mbuli mbotuli bazyali, mulimo wesu ngotupedwe kuli Yahuwah kuyiisya bana besu, kubalailila mu bululami alimwi amu kulyeendelezya munzila ya buleza eeyo njotubalangila kuti balitondezye. Musemo wa kuluamikwa nkulijata. Basilumamba balalijata. Basikuzundana balalijata kapati, mbweny ambuli baimbi, basimba zifwanikis, aabo kwiinda mukwiiya, bakalondola kufumbwa ncobazwidilide kucita.
Buzyali ncintu ciyumu. Inzya, ncintu ciletela bulumbu pele atwaambe masimpe, kuba muzyali munzila iiluleme ncintu ciyumu nta! Bana tabazyalwi kabazyi kale bwakuyala malo aabo cifumofumo lyoonse pe. Tabazyalwi kabazyi kale bwa kulicumba menyo, kwaabana zya kusobanya, kubeleka cabunkutwe, akutacita mangwinini naa mambeke. Eeco ciboola kwiinda mukuyiisyigwa. Mwana uulekelwa kuuma kuti wanyema ulakomena kauma mukaintu wakwe nokuba mupati wa ncinto yakwe. Walo inga limwi waakulijana mu ntolongo, akupa mfulumende kuti ibaa ciindi ca kumuyiisya kwiinda mukumupa cisubulo kuti ayiye kulijata muli zyeezyo nzyaakaalilwa kacili mwana.
Koyiisya mwana munzila njayelede kweendela
Eelyo notuyiisya bana besu, ncintu cipati kumvwisyisya kwiimpana akataa busicinyonyoono a bwana. Takuli kufumbwa cintu cibi kuti nkulwanwa mu moza naa nkuzunda mumoza pe. Zimwi zintu ziya biyo mbuli aateene kukomena mu mubili wa muntu. Zimwi zintu ziboolela biyo nkaambo kakuti tukkala munyika ya cinyonyoono. Mbweeny mbocitali cinyonyoono kuba muntu, akwalo takuli kuba sizinyonyoono kuba mwana pe Mambeke, muli lwa ngawo, tacili cinyonyoono.
Luuka 2:52 kanjaanji usandululwa kuti “Eno [Yahushua] wakakomena mubusongo aciimo, amukukonda [Yahuwah] abantu.” Pele mumalembe mataanzi, mucibaka ca kubelesya bbala lya mucito wakainda kuti “wakayungizya,” Malembe aaci Giliki abelesya bbala lya cintu ciciyaa kucitika. Mumajwi amwi, aamba kuti Yahushua wakazumanana kuyaa kuyungizya kubaa busongo akukomena ciimo akukkomaninwa kuli Yahuwah aku bantu.
Yahushua wakali londokede kalaa myaka yotatwe, pele kutali mu busongo nanka kuzyiba bweende bwa zintu bwa muntu mukole. Walo wakali londokede naakalaa muyaka fuka, naakalaa myaka kkumi aciloba, pele alimwi kutali mbuli busongo mbwaakajisi naakasika myaka makumi otatwe. Macece tacili cinyonyoono alimwi taayelede kulanganyigwa boobo. Icintu ceelede kucitika, nokuba boobo, nca kuyiisya. Malailile aa Tusimpi 22:15 acisalazyila limwi eeci, mukwaamba kuti: “Bufubafuba bulaangidwe mumoyo wamwana, Pele musako wakukomya ulabutanda.”
Aboobo, inzya. Bana balayandika kululamikwa, pele kutali kuti nkaambo mbana, alimwi kutali mu kunyema. Eeco ciyiisya biyo kuti “uuzunda nguucita cibotu.”
Alimwi eelyo acembaala, walo takonzyi kuleya kuzwa muli njiyo
Tusimpi 22:6 nkampango kakondelezya, ncisyomyo citamvwisyigwi ziindi zinji. “Iyisya mwana aende munzila iielede, Lino akomena takooyooleya mulinjiyo.” Mbuli bazyali, tulayandisya kusandulula aanga eeci ncisyomyo cakuti ikuti twacita kabotu zyoonse, bana besu baakukomena banoosyomeka, banooli Banakristu batonkomene, pele tacisyi ncokaamba kampango aaka nokuceya pe.
Tusimpi 22:15 “Bufubafuba bulaangidwe mumoyo wamwana, Pele musako wakukomya ulabutanda.”
|
Yahuwah takonzyin kusinikizya ncayanda. Bana besu mnantu nsini balaa lwaanguluko ndobapedwe kuzwa kuli Yahuwah, lwakutambula nokuba kukaka lufutuko, mbweenya mbuli ndiswe.eeci cisyomyo cituyumyayumya kuti eelyo baakukomena, abana besu tabakakonzyi kuleya kuzwa mu milazyo a myeendelo ya buleza eeyo njibakayiya kuzwa ku bwana. Balo balakonzya kwiindizya kucita kabotu. Balo balakonzya kubalika kusikila kulaale mbuli mpobagolela, pele ooto tusimpe ntubakaiya ku bwana tuyoocaala mu myoyo yabo nokuba kuti bakaka kukkala kweendelenaya antuto.
Mbuli bazyali, ncuubauba kuyeeyela kuti mulimo wesu ngwa koongelezya bana besu kuti bazyibe kasimpe. Swebo tuyanda kuti balo basale nzyotuyeeyela kuti zililuleme. Alimwi aawa atulangisye: zimwi ziindi bana besu bakomenede kale balalubizya akupona mu bulumbu bwa kulubizya kwabo. Pele tuuli mulimo wesu kuzula muntu naba ni pe. Ooyo mulimo wa Muya Uusalala.
Yahushua wakasyomezya naakatantide kujulu kuti, walo uyootumina Muumbulizi ooyo uyoocita mulimo waandeene kapati: “Walo asika, uzooipa mulandu inyika aazibi, aabululami, aalubeteko.” (Johane 16:8) Ikuti yebo wabikkila ciindi , inguzu akuzuunyana kuyiisya bana bako, ikuti yebo wabalailila mu bululami amu kasimpe, ikuti wabalulamika akubayiisya kulijata akulyeendelezya kabotu, Yahuwah uyookuleleka mu kukakatila kwako.
Izaya 49:25 utwaambila cileleko ca Yahuwah: “'Ncobeni mbuboobu mbwaamba Yahuwah, Bazike mbaatolede singuzu bayoolubululwa, alunyanzyo lwamukali luyoovunwa. Njoolwisya abo bakulwisya, nkabela njoofutula bana bako.” Ibbala lyakuti kulwisya muci Hebulayo liiminina kukombelezya, kutingaana, kuzekelana. Alimwi lyaambilizya kukwabilila. Mumajwi amwi, Yahuwah usyomezya kucita zyoonse mu nguzu Zyakwe kuti avwune bana besu. Mpoonya, eelyo baakukomena, kunyina makani naa basala zintu zili buti mu maumi aabo, eezyo mbuto zyakasyangwa ku bwana lyoonse zinooliko kutegwa Muya wa Yahuwah ubeleke muli nzizyo akubakwelela kuli Nguwe.