Bakamboni Bobile mu Mangwalo (Ciyubunuzyo 11 Cazubululwa)

Mbaani Bakamboni Bobile ba Ciyubunuzyo 11, alimwi mbuti mbotweelede kusandulula cibalo ca Mangwalo eeci? Ikuti yebo koli wabolaa aa mibuzyo, nkokuti bwasunu Ime ndaa bwiinguzi. Atutalikile mu cibalo. Ciyubunuzyo 11:3-6 caamba zitobela:

“Kwamana ndiyootuma bakamboni bangu bobilo, banoosamide masaka kuti bakaambilizye mulumbe wa Yahuwah kwa mazuba aali cuulu amyaanda yobilo amakumi aali cisambomwe.”

⁴ Bakamboni bobilo aaba, misamu yobilo ya maoliva eeyo yiimvwi kumbele lya Mwami wanyika. ⁵ Alimwi kuti naa kwaba uuyanda kubacisa, kulazwa mulilo kumilomo yabo iinyonyoona basinkondonyina. Kufumbwa uuyanda kubacisa uyoonyonyoonwa munzila njiyona eeyi. ⁶Bakamboni aaba balijisi nguzu zyakusinka julu kuti mvwula itawi kwamazuba ngobaambilizya mulumbe wa Mwami Yahuwah; alimwi balijisi nguzu zyakusandula maanzi kuti abe bulowa. Balakonzya kuleta mwiika nuuba buti munyika kufumbwa ciindi ncibayanda.

Aawa mbuli zintu zyoonse mu Ciyubunuzyo ca Johane, kunyina cintu cipya, pele buyo zintu zya kaindi—nkokuti, Zintu zyamu Cizuminano Cakale—kazisamikidwe zikobela zipya, abalo Bakamboni Bobile mbweenya buyo kwiina kwiimpana. Twaambo tutobela tuli ciloba tulatugwasya kuzyiba zintu eezi. Zilatusolweda akuzintu zimwi zigambya mu mizeezo ya nyika yamu Bbaibbele.

1. Bakamboni Bobile mbaa Mozesi a Elijah.

Langa cibalo eeci alimwi. Elijah wiita mulilo kuzwa kujulu (1 Bami 18). Ngu Elijah wakajala julu cakuti itawi mvwula. Wakali Mozesi wakavwuntula mulonga wa Nailo mpoonya wakacinca kuba bulowa. Wakali Mozesi wakasubula nyika ya Ejipita a malwazi. Ikuti Mangwalo kalaa mulimo mu kuzyiba bantu bobile aaba, nkokuti mangwalo atondeka mbabo kuti mbaa Mozesi a Elijah.

2. Mbeenya Bakamboni Bobile bakalibonya aciindi Naakasanduka a mulundu.

Ikuti koyeeya kuti, “Peepe Mozesi a Elijah bakafwa kale —tabakalibonyi kabili,” nkokuti yebo weelede kwiibaluka kaano ka Kusandauka ciwa muli Mateyo 17. Ooko, Mozesi a Elijah balalibonya ntongola meso kabali antoomwe a Yahushua, kuzwa waawo kulibonya kkumbi akumvwika jwi lizwa kujulu. Bikkila maanu kuti mu kwiimpuka kuya kujulu kwa bakamboni bobile aaba mu Ciyubunuzyo 11:12, amwalo kuli kkumbi ajwi lizwa kujulu. Johane ulibonyaanga wakalaa kaano kakusanduka ciwa mumizeezo yakwe eelyo nabandika bakamboni bobile aabo, Ambweni nkaambo kakuti awalo wakaliko.

3. Bakamboni Bobile bayiminina Mulawo a Bashinshimi.

Nkaambo nzi bantu bobile aabo? Alimwi nkaambo nzi ncobalibonya kuti babandike aa Yahushua? Ncuubauba—Mozesi a Elijah bayiminina Mulawo a Bashinshimi. Mu Musela-Mutaanzi-wa-Bujuuda, “Mulawo a Bashinshimi” nkufwiinsya kwaamba Bbaibbele. Kunyina zibeela zya Bbaibbele, pele Bbaibbele lyoonse mbuli mbubaalijisi aciindi eeco (cf. Mateyo 7:12, 22:40, Luuka 16:16, abamwi). Mozesi wakali kulanganyigwa kuti nguwaalemba mabbuku osanwe aa Torah (Mulawo), alimwi Elijah wakaba mushinshimi wa mikonzyanyo (kuyungizya makani, langa muli Johane Mubbizyi mbwaakali kulikonzyanisya Elijah). Antoomwe aabo, batondezya bumboni bwa Yahuwah mubufwaafwi. Eeci, aboobo, ncencico ncobali atalaa mulundu wa Kusanduka ciwa: balo bapa malailile kuli Yahushua. Kuyungizya waawo, balo balazimaana pele Yahushua ulacaala nkaambo Yahushua nko kuzuzikwa akufwiinsya zyoonse zili mukati ka Mulawo a Bashinshimi.

4. Bakamboni bobile ‘nzisamu zya maolifa’ nkaambo bapa mungwimba ooyo uumwesya malambe aa Cikombelo.

Eeci inga camvwikaanga ncakupunga mbuli mbocilembedwe, pele muli Zekaliya 4, mushinshimi ubona cilengaano ca zisamu zya maolifa zyobile amalambe obile. Zisamu zya maolifa zilapa mungwimba kakwiina kuleka-leka alimwi akuzumanana lyoonse kumwesya malambe aayo kuti kaayaka lyoonse. Johane wakabweza ciimo ca Zekaliya akubelesya ncico aawa. Aboobo, ikuti Bakamboni Bobile kabali zisamu zya maolifa alimwi zikombelo zili ciloba kaali malambe, nkokuti kaambo kokwa Johane kalilondokede cinicini: Mulawo a Bashinshimi mbabapa mungwimba ooyo uuyasya cikombelo. Ikuti yebo kotali mu Mangwalo, nkokuti mumuni wako ulaafwi kuzima.

5. Bakamboni Bobile balafwiinsyigwa muli Yahushua.

Twabona kale kuti Mozesi a Elijah balamwaika kuzwa aawo mpobakusandukila pele Yahushua ulacaala akukkalilila. Walo uba, alimwi ucizumenene kuba waawo, kuba bufwaafwi akukosozya makani aa kuyanda kwa Yahuwah koonse mu misela. (Langa a Mwanaa Mbelele ooyo weelela kujula bbuku lya kuvwungaila lya misela yoonse mu Ciyubunuzyo 5.)

Pele kucili bumboni bumwi abwalo. Eelyo bakamboni bobile nobajaigwa, Johane waamba cintu cimwi cigambya mu cisyoonto 8, “Mpoonya mibili yabo iifwide iyokwaalabana mu mugwagwa wa munzi mupati ooyo wiitwa mumoza kuti Sodoma a Ejipita, ooko awalo Mwami wabo nkwaakakankaminidwe.” Lino, cilisalazyidwe, kwiinda mu lufu, kubuka kuzwa kubafu, akuya kujulu kwa bakamboni aaba kuti, iswe tulaa Yahushua kalibonya aawa. Pele Johane ucisalazyila limwi eelyo walo natondeka kwaamba kuti bakajailwa mu Sodoma/Ejipita/Jelusalema.

Kwiindilizya kululamya kaambo aaka, cilayandika kwaambwa kuti zyoonse Yahuwah nzyaakacita mumisela zitondezyedwe mubufwaafwi muli Yahushua. Walo ncecivwumbyo, naa nce cibambuluzyo, ca maseseke aa misela. Aboobo, Johane ulimvwa kwaanguluka kwaamba twaano tobile aciindi comwe—kaano ka bakamboni Bobile bokwa Yahuwah mbuli Yahushua a kaano ka Yahushua mbuli Bakamboni Bobile bokwa Yahuwah.

6a. Bakamboni Bobile babeleka mulimo wa Kwiibalusya—nkokuti., baliimwi mbuli babetesi.

Aawa, lino, zintu mpozitalikila kukondelezya. Mu Ciibalusyo 17:6 tubala kuti, “Muntu, uupedwe mulandu walufu ukonzya buyo kujayigwa kuti kakuli bakamboni bobilo naa botatwe, pele kuti kakuli kamboni omwe buyo teelede kujaigwa pe.” Mbweenya amu Ciibalusyo 19:15, “Kamboni omwe takonzyi kupesya muntu mulandu. Kuleelede kuba bakamboni bobilo naa botatwe kuti muntu ajaninwe mulandu.” Mumajwi amwi bakamboni bobile, bazuzika Ciibalusyo kabataninga kosozyela mulandu wa lufu ku nyika. Aaba bobile—Mozesi a Elijah, Mulawo a Bashinshimi, a Mangwalo—mbaakamboni bakosozyela nyika mulandu wa lufu.

6b. Kweezyekanya a Mateyo 18.

Aawa, kuyandika kwiima aasyoonto akuyeeya masena oomo Yahushua mwainduluka kwaamba cibalo ca Ciibalusyo: Mateyo 18. Mubweende bwa milazyo ya cikombelo, Yahushua waamba kuti, “Ncobeni Ime ndimwaambila masimpe kuti kufumbwa ncomutikaange ansi aano akujulu ciyokwaangwa. Kufumbwa eeco ncomutikaangunune aano akujulu ciyokwaangununwa Alimwi ndamwaambila kuti naa bobilo bazuminana ansi aano akaambo kaceeco ncabakumbila, Taata uuli kujulu ulabacitila. ²⁰ Nkaambo ooko bantu bobilo naa botatwe nkobabungene muzina lyangu, ambebo mpendi akati kabo.” “Bobile naa Botatwe” ngo mweelwe wa bakamboni bayandika kuti ukosozyegwe mulandu—aboobo, eeci tacili cibalo cakubamba nkamu yeendelezya cikombelo, pele ya kweenzya kabotu mu kukosozya makani aakutanda bantu kuzwa mu cikombelo. (Bikkila maanu kuti Paulu ubelesya mulaka ngweenya uuli mu 1 Bakolinto 5:3-5 mu kubandika mulimo wa kutanda munyina sikasaaza.)

6c. Kweezyakanya a Yahushua natumina basikwiiya bakwe bobile-bobile.

Pele mukonzyanyo umwi ulatungumika. Eelyo Yahushua natumina basikwiiya bakwe bobile-bobile (langa muli Maako 6:7-13), walo ubalailila kuti beelede kubeleka milimo yobile—umwi ngwa kuba bakamboni ba Bulelo, mpoonya umwi ngwa kusinganya baabo basulaika bumboni oobo. Mateyo ulayungizya akuti (10:15) inga wainda kuubauba mulandu waba Sodoma a Gomorrah kwiinda wa minzi eeyo mu Buzuba bwa Lubeta. Caambilizya nzi eezo? Kutumina bobile-bobile wakali mulimo wa kuzeka mbweenya mbuli cimwi cili coonse. Basikwiiya bobile-bobile bakali kubeleka mbuli bakamboni bobile aabo bakeelede kusinganya busena oobo bwaakaka mulumbe mubotu.

7. Kaano ka bakamboni bobile mu mulimo ookwa Yahuwah mumisela yoonse.

Aaka kaambo kamamanino kakazubulwa bunji kuzwa mu Ciyubunuzyo. Mu cipati 10, Johane ulaililwa kuti alye bbuku lya kuvwungaila lilweela mukanwa lyakwe pele lili mbuli mululwe mwida lyakwe. Eeli bbuku lya kuvwungaila lilweela-akulula ndijwi lya kasimpe lyokwa Yahuwah mu misela yoonse mbwiizulwa—lilalweela mukanwa nkaambo mbeta zya Yahuwah ziyaa kululamikwa, pele lilalula mwida nkaambo ka kucisa alufu ncoziiminina mbeta eezyo anyika.

Eelyo bbuku lya kuvwungaila, nolivwunguludwe, nka kaano ka Bakamboni Bobile bokwa Yahuwah mu misela yoonse. Balo bakapa bumboni bwabo bwa ciimo amicito yokwa Yahuwah kuzwa kumapasukilo aaciindi (langa mu BaLoma 1). Bantu baanyika bakasulaika nzila zyokwa Yahuwah (langa mu Intembauzyo 2). Bantu baanyika, mu buzangi bwabo, bakajaya bashinshimi bokwa Yahuwah—kapati mushinshimi nsini ookwa Yahuwah waandeene, Yahushua. Pele bakamboni bokwa Yahuwah, a mushinshimi ookwa Yahuwah, tabakonzyi kunyonyoonwa, alimwi muya ookwa Yahuwah (langa muli Ezekiya 37) ulazyokela kuzyoobabukulusya batumwa bakwe. Eeci (langa amuli Ezekiya 38) ndo lubeta lwa mamanino lwa nyika abasinkondonyina aa Yahuwah.

Saa, mbubuti mbotufwiinsya makani woonse aaya? Mulawo a Bashinshimi bokwa Yahuwah mbaa Kamboni Bobile bakosozya mbeta akusinganya nyika. Inyika yakasulaika alimwi acifutila Yahuwah, pele myeendelo yokwa Yahuwah inoo zunda lyoonse.

Ino ciiminina nzi eeci ku Cikombelo? Pe ma, ciiminina zintu zinjaanji. Ciiminina kuti swebo tuli mumuni wa nyika eelyo notuyasya mungwimba wa Mulawo a Bashinshimi—ndendilyo swebo notuli bantu ba Moza. Ciiminina kuti swebo tulizyi eeco cili mu bumboni bwesu—anguzu zyabo—kuti zizila mu mangwalo kutali muli lwesu tobeni. Tulizyi kuti ikuti twapa bumboni cakusyomeka, inga twalibambila basinkondoma mu nyika (nkokuti, bumboni buzwidilila inga kabuyootujazya). Swebo tulizyi kuti, kunze lya mukonzyanyo wa Mulawo, Bashinshimi, a Mwami simalelo wesu, kukanana majwi aa mulumbe mubotu, kwaambilizya majwi aamulumbe mubotu, nkwaambilizya cintu cisinganya akupa cileleko (cileleko kuli baabo basyoma, kusinganyigwa kuli baabo batasyomi). Swebo tulizyi kuti naa nokuba kuti tiitwajayigwa, Yahuwah uyootubusya kuzwa ku bafu antoomwe a Messiah, aboobo kunyina ncotunga twayoowa. Alimwi swebo tulizyi kuti kufumbwa cinga cacitika, Yahuwah uyoozunda kumamanino. Ijwi ndyotukambauka liyoozuzikwa masimpe.

Alimwi aawa, kupelengusya cilengaano ca Johane kusikila antaamu yamacaalizyo imwi—kutali biyo Bakamboni, Mulawo a Bashinshimi, Mozesi a Elijah, a Mwami Yahushua Messiah, pele nduwe andime eelyo notupa bumboni cakusyomeka kuli baabo basyoma alimwi bazwangene aa nyika. Ciyubunuzyo 11 tacili busanduluzi maningi bwa mazuba aacizya kumbele mbuli mbocili busanduluzi bwa mulimo wa ciindi cino. Alimwi eeco ncintu cimwi toonse ncotweelede kutontomana kulizeeza.

Eeci ncibalo citali ca-WLC cakalembwa aaba Jeremy Rios.

Twakagwisya We have taken out from the original article all pagan names and titles of the Father and Son, and have replaced them with the original given names. Furthermore, we have restored in the Scriptures quoted the names of the Father and Son, as they were originally written by the inspired authors of the Bible. -WLC Team